Things I Like To Whisper About

Would You Hear Me Whispering

تعليقات.....يا تعبني


شكرا ل احمد المحروق على الكاريكاتير

الخبر بموقع عمون " يحيى صويص يغادر برنامج ستار أكاديمي ويعود الثلاثاء الى عمان"

انا الخبر ما بهمني ولا بعرف مين يحيى صويص اساسا ولا بعرف ان ستار اكاديمي بدى ويلا خلص
اللي خلاني افتح عالخبر اني كنت متأكده اني راح الاقي تعليقات تحشيش من شعبنا خفيف الدم, جد ان بالرغم من كل المأسي و الاوضاع اللي بمر فيها الشعب بس لسا خفّه الدم موجدوه

قبل ما احط التعيقات بدي احكيلكم اهم اشي بالخبر اللي المعظم علّق عليه
"
وفي الأردن بدات الاستعدادات من قبل مدير اعمال يحيى صويص السيد مروان التميمي في التحضير لاستقبال يحيي في مطار الملكة علياء الدولي بالاضافة الى تغطية مباشرة على برنامج الزميل محمد عمر "مشوار" وتم دعوة كافة وسائل الاعلام الاردنية والعربية للمشاركة في مؤتمر صحفي للاحتفال بعودة يحيى صويص .
"

اخف دم تعليقات من ال 136 تعليق الموجودين عالخبر

هاد اكتر تعليق عجبني فبدي ابدا فيه

الطنط السفاح

اهئ اهئ اهئ انا كتير كتير اتأثرت لما تلع
مش أدر أأدر استتيع...احكولي مين تلعو من المسابئه عشان احت في شعرو علكه

______________________

يا اخوان انا بقترح بما انه يحيى صويص صاير رمز وطني واخباره على عمون اللي بنعتبرها جريده محترمه، انا رايي نقطع العلاقات مع لبنان ونطرد السفير ونغلق مكاتب ال LBC ونعمل على زعزعة الاستقرار هناك ونضرب موسم السياحه لرد اعتبار هذه الامه، جد سو هاذا يعني الناس عايفه حالها ومش لاقيه توكل والفساد في كل مكان واحنا دايريين ورا اخبار هال.. يعني اجا ولا ما اجا لطييييييييييييييييييييييف جدا :)
______________________

انا بقترح انه الحكومه تصدر بيان وتعميم يكون يوم الثلاثاء عطله رسميه عشان يطلع الشعب يستقبل البطل المغوار يحيى صويص و بتمنى من جميع فئات الشعب تخرج لاستقباله و بتمنى كمان من امانة عمان تنصب قوس النصر على طريق المطار لكي يمر البطل يحيى من تحته ......عن جد الي بصير فينا مش قليل حسبي الله و نعم الوكيل بس ...يا امة ضحكت من جهلها الامم.... وبتمنى تنشروا تعليقي يا صوت الاغلبيه الصامته يا عمون

______________________


يحيى الك كل المحبة من بنات عشيرة بني حسن عامة والزيود خاصة والمعلا تحديداً وان شاء الله رح تعوضها
هاد مش خفيف دم بس اكثر من 20 تعليق ذلو اهل اللي كتب هالتعليق فحبيت اضيفه :)
وباقي التعليقات انقسمت 10%مؤيد و 30% ضد و 60% بلشو ببعض :) ,هاد اشي ملفت بالتعليق بنسو الخبر الاساسي و بنزلو بهدله ببعض.

هو اجا ويلا ما اجا ؟؟؟


______________________

الاغنيه ما الها دخل بالموضوع....بس كتير بحبها ومش راضيه تروح من بالي :)

Ya ta3ebnee by Tamer Hosnee
Fandalism Free MP3 Hosting

27 التعليقات :

باختصار الشعب عنا فاضي اصلا بالدوام بالاردن بكون نص او اكتر الدوام طق حنك و نازلين بشل ناس تانين معهم و حتى اللى برا الشغل بطولو من الطيب نصيب ع فكرة ستار اكادمي تافه جدا جدا جدا (----)

 

همسة
يسعدلي هالصباح بالاول

:) انا محظوظة دايما لما باجي الصبح لعندك , وفعلا بنبسط على خفة دمك واسلوبك بالحكي

والحمدلله بضل يومي رايق لاخره :)

اما بالنسبة للحسبة ف ما فيها خيار اليوم D:

والله هالشعب مبسوط على اقتراحك . وانا من اول المؤيدين , شو هاد العز يومين عطلة بنفس الاسبوع
والله اشي غير شكل

الله يستر عليه هاد التاني ويخليه لامه :X

 

الحمدلله انتهت كل المشاكل بالأردن :كل الناس صار معها مصاري,بطلنا نحتاج للواسطة , و تحررت فلسطين و عايشين بسلام مع العالمبس ضلت مشكلة عويصة وحدة شو هي؟؟؟

هي استقبال البطل المغوار يحيى صويص بتاع ستار اكاديمي

فعلا انو يا أمة ضحكت من جهلها الأمم

 

بالنسبة للتعليقات مش قادر اوقف ضحك و لا حول ولا قوة الا بالله

 

(---)
و بس حد يطلع من الغرفه من اللي كان قاعد يحكي عن الناس معهم, بيجي دوره و بنزلو فيه, للاسف المعظم هيك :(

اينااااس
الله يسعدك انا المحظوظه بهيك خوات امامير بضلهم يطلطلو علي , وان شاء الله على طول بضل يومك رايق يا رايق انت :)

طيب خلص جيبي البطاطا, بنعمل مجدره بلاش منسف مدام ما في خيار :)

طول امبارح كل ما اتزكر ان اليوم عطله افرح من كل قلبي :$
اليوم لازم نستغلّه لاخر رمق :)
هههههههه امين يا رب :)

Ahmad

شايف كلّه انحل, المشكله ان الموقع اللي معظّم الموضوع لانه شكله اجا الشب وما حد حس عليه :)

انا بالنسبه لكلمه "يا امه ضحك من جهلها الامم" ما بحبها
لان متل هدول اشخاص بمثلو نفسهم ما بمثلو كل الامه, يعني لو اتطلعنا عالجزء التاني اللي متلي ومتلك و متل اللي ما عجبهم الموضوع و كل عيلتي اللي ما حد فينا بعرف مين الشب اساسا , كلنا ما بصير ننعد من الامه اللي انضحك على جهلها, فاهمني؟؟
يعني التعميم باي اشي بحسو غلط, وجهه نظر و بتمنى تتقبلها :)

اهلا اهلا علاء
زمان ما بينت, شكله ان شاء الله اشتغلت :)
انا بس يكون مزاجي متعكر, بفتح على خبر زي هاد بموقع من المواقع الاخباريه وفورا بنزل عالتعليقات :)

 

لصاحب السؤال, انا بفضل اجاوب هون عالمدونه علشان نفتح مجال اكبر للاجابه و هيك بتتكون عندك فكره كامله عن الموضوع.
بس هيك راح يبين ايميلك, فاذا عندك مانع اني انشر التعليق هون, بنشوف الحل التاني :)
بنتظر الجواب :)

 

السؤال بحكي

حاب اسألك كيف احساسك و انت مو متزوجه بتحسي انه في شي مفقود بحياتك مع انه موضوع الزواج مو مأثر عليكي شي, حابه يكون معك و بالمقابل بتفكري بامور بتحسيها اكتر اهميه, بتوهمي نفسك بامور علشان تنسي المفقود, طبعا انا ما بسألك كطفله صغيره في موضوع كتبتيه وحكيتي انه وقتها كان عمرك 27 فلو فرضنا هلأ عمرك 30 عشان هيك عم بسألك, بتمنى ما تفهميني خطأ او مواضيع العنوسه هاي الغبيه -عفكره بطلت تنحكى للبنات بس اصحابي بمزحو معي هيك كمان و بحكولي عانس مع اني مو كبير كتير

اول شي راح يوصلك عالايميل رفض بالتعليقات, اسفه ما بعرف كيف اعدّل عالتعليق فاضريت اكتبه انا والغي تعليقاتك :$

انا عمري 32 سنه, علشان هيك دايما بحكي اني يا خالتو يا اختنا الكبيره Whisper :)

انا مقتنعه ان الزواج قسمه ونصيب و ربنا اللي كاتبلي اذا راح اتزوج او لأ و ايمتا فانا تاركه الموضوع وما بفكر فيه.
واذا بخطر على بالي , ما بخطر الزواج بحد ذاته بخطر على بالي اني نفسي اصير ام, وهاد اشي موجود بكل بنت.
بحس انه مفقود لأ, انا عندي حياتي اللي بعيشها مليانه والحمد لله بكل اللي حولي, ما بلهي نفسي بس متأكده ان هالموضوع مش بايدي ولا بشطارتي زي ما بعض الناس بتحكي "اتشطريلك شوي" شو اعمل يعني !!!

مريت بتجربه ما كانت ناجحه اطلاقا, بس ما غيرتني والحمد لله و الله يخليلي اهلي اللي كانو جنبي و هلأ مليين علي حياتي :)

ان شاء الله تكون اجابتي كافيه, ويا ريت حد يجاوب اذا بحب يضيف اشي :)

هلأ بالاردن اطلقو كلمه حرائر عالبنات اللي مش متزوجات, انه بلا منها عانس, يعني برضه صنفوهم وحطوهم بفئات.

بالنسبه الك بحس ان عمرك باواخر العشرينات, بس لما الشب يتغرب بصيرو اهله واصحابه يزّنو عليه بالزواج :)

 

انا اسفه جدا جدا, بدي اعمل رفض كبست على نشر
عملت حالي منيحه وما زبطت معي
بععععععععععععتذر :"(

 

مو مشكله بتصير- عجبتني هاي حرائر لما كنت لسه ما كانو اكتشفوها - بتعرفو يا جمعة اخر مرة انزلت فيها ع الاردن كان الموضوع الدارج مع الكل شو يا اخي ما بدك تتزوج هاي الزيارة طبعا السؤال بكون باخر الجلسه بعد ما يحكولي كل الفضايح اللى صارت بغيبتي فلانه هيك سوت و فلانه هيك صار معها شي بيخزي و بالاخر شو ما بدك تتزوج طبعا الكلام ما معناتو كل البنات هيك بس باثر بتفكير الشب و بخليه يبفكر للمية قبل ما يفكر يرتبط

 

المشكله عند المعظم هي التعميم, مرات لا شعوريا بتحس حالك بتعمم, انا لما صاحباتي يحكولي عن مشاكلهم مع ازواجهم و خصوصا صاحبتي اللي كتبت عن مشكلتها, بحس حالي بالبدايه حاقده على كل الازواج من قصتها, بس مع التفكير شوي بتزكر ان مش الكل هيك, هي بابا و اخواني, ما بخلى الوضع من مشاكل عاديه بتحصل بكل بيت بس اجمالا حياتهم حلوه والحمد لله

انت بس تنزل الاردن المره الجاي, اول الجلسه احكيلهم بدي اخطب, فورا ببدو بالصفات المنيحه للبنات اللي حواليهم :)

ما حكيتلي شو طلعت خالتو Whisper ويلا اختك الكبيره Whisper :D

 

بشرفني تكوني خالتو او اخت كبير بس مو عارف( تلات سنين فرق) شو بكون ؟

 

3 سنين اممممم.... اذا اخت :)
الشرف النا يا مان :)

 

له له له ... هاي مش خبرية !!
لا حول ولا قوة الا بالله ...

جد زعلتيني انو رح يطلع من الاكاديمية ...

انا رح ابكي
شوفي :'(

 

Ahmad
الله يسامحهم هالحكام زلموووه للمسكين
لا تبكي..لا تبكي
لسا في متلو كتير عنا بكره برفعو اسم البلد فووووء...
عاساس ان البلد بستنا حد متلهم
لا حول ولا قوه الا بالله

 

هاي هي الكلمة اللي بدور عليها : زلموه :"(

 

سلام ....
لوووول ... أما البرنامج نهفة ,,, ستار أكاديمي .....
الله يهدي الجميع :)
بالنسبة لسؤال التعليق ..
ممم ، ما بعرف ليش الناس بتفكر إنه إزا الواحد ما تزوج و صار بعمر معين إنه في شي ناقص بحياتوا... أو إنه حياته مش مهمة .. على الهامش ..يعني و ما بصير بني آدم !!!!!!!
و إزا تزوج و حياته قلبت جحيم .. بصير هادا نصيب !!!!! هون نصيب بس قبل لا ...
و في غير إنه إتشاطري في كلمة مستفزة أكتر و هيي شدي حيلك :) لووووووووول.,,
خلونا نعمل حملة و نلف على البيوت يا بنات و نخطب ...لووووول ....

الشب ما بيعيبوا عمرو لو صار 40 ...
هيك المجتمع !!!!!!!!!
و إزا كان عمره 34 أو حتى 35 بياخد بنت ال 22 !!! بغض النظر في توافق أو لأ ..
و الأحلى من هيك ...
إنه بس يجتمعوا النسوان بصيروا يحكوا أكيد بنتك معموللها عمل ...لول !!!!!!!!!!!!! لهيك لهلأ مش متزوجة ,,,,,,,,, هاهاهاه ,,,,
أستغفر الله ...
بس والله من غلي :(

طولت صح ...

 

بس يا خسارة ... عندي امتحانات , ولا كان طلعتله ع المطار

 

خخخخخخخخخخخخخخخخ
هو هيك شعبنا، و الله لو عقلة راح على ستار اكاديمي ورجع الا يعملولو استقبال وحفلة وصحافة جد كانو الستار بالموضوع.
فرصة اني ما بعرف شي عن هالمسابقات الهبلة...
صبو القهوة وزيدوها هيل وحميلي تحت المنسف ويلي يا حيل (اقتباس خرندعي)..
يالله الحمد لله على سلامتك فارسنا يحيي، اجت الغائم يا اخوان

 

احمد

اه زالمين هالجماعه و قلبهم ئاااسي
مش تبيعي انت...ما تلعت عالمتار؟؟؟
له له له
شو امتحانات وشو مستقبل...هو اهم من كل شي.

رزان

بالعكس شكرا الك على هالتعليق لانك زكرتي اشياء كتير بتصير معنا
معموللها عمل....يا الله شو انحكتلنا,وحده اعطتني رقم شيخ بحكو عنه ممتاز اختها راحتلو وبعد باسبوع انخطبت !!! و قصص , ما بعرف بس في ناس بحملو هم الواحد وهو اساسا الموضوع مش شاغله.
امبارح كان عرس ابن عمتي...لو تشوفي العيله بتحسيهم كأنهم بشحدو علي وهمه بدعولي بالنصيب اللي احلى مني :) شكرا الهم بعرف انها من دافع محبه خالصه بس انو خلص مش كل مره, ادعولي اي نعم بس من وراي مش بوجهي :)ههههههههه

بتحبي اعطيكي رقم الشيخ؟؟؟ بركي معمولك عمل :)

Mohammad Badi
اهلا محمد
ههههههههه عجبني الريمكس اللي عملته :)
بس عقله لو راح ما بمشي معهم, بدهم واحد يحب و ينحب و يكون يااااي شو كول...هاي سياسه هيك برامج :)

 

هاهاهاها ,,,
بالك بنفك العمل !!! هاهاهاها ...
الله يتوب علينا ...
ع مبدأ ...
واحد حامل دقنه و التاني تعبان فيها ..
هاهاهاها ...
اه و بالأعراس ... العيون مترصدة و الأسئلة بتنهال و الشاطر إلي بيبلش ..
و الله إنو أنا هيك كتيييير مبسوطة :)
يا ستي الله يهدي بال الجميع ..

 

اميييين يا رب :)

 

loooooooool jad ta7sheesh elta3leqaat

meshan elbarnamej 3an jad no comment ... qemmet el wasa5aa welle bekoon fee kamaan

 

ahlan ahlan be SimSim

baramej elhadaf menha mas5ara fe mas5ara
w yday3oo 3a2l elshabaab foo2 ma ho daye3

 
الكونت دبلمونت خريستو

لا كان النت فاصل عندي ... وما سمعت الخبر لمشئوم صويص طلع ... يااااااااااااااااا ربي شو اسوي انا بحالي ؟؟؟
وانا بقول ليش كوريا الشماليه فجرت قنبله نووية ... مهو رئيس كوريا عصب ماعرف كيف يفش غلو فقعها بالارض عشان صويص


المحزن انو بنعطي حجم لناس ما بستاهلو وبنترك الناس الي بتتستاهل ...

الله بعين ... ملعون ابو هيك محطات بتحاول تعمل من شخصيات تافهه رموز لامة عظيمة

 

الكونت خريستو :)
وانا بقول ليش ردات الفعل عنا ما كانت عنيفه, شكله لانه فاصل النت عند الكونتات بالبلد

اكتر من محطه بس لهالسخافات و لهالتفاهات....الله بعين

 

شكرا همسة لآنك حطيتي الصورة عندك

 

شكرا الك انت احمد عالكاريكاتير :)