Things I Like To Whisper About

Would You Hear Me Whispering

تحسّس


في كلمات كتير و مواقف كتير بتحسس منها

اول اشي بتحسس منه بس وحده تحكيلي "حبيبتي" , مش حبيبتي المعنى المنيح لا حبيبتي بمعنى انها مش شايفتني و بتعتبرني بصف تاني "ب" و في حبيبتي اللي بتعتبر مسبّه, بس حد يردح لمده 10 دقائق وبالاخر تحكيلي ماشي "حبيبتي"....يعني مسبّه ادبيه مش اكتر.


انا وصاحبتي بالمكتب بنتعامل باخر نوع من حبيبتي بكلامنا, بتحكيلي اشي برد عليها بطريقه مستفزه شوي فبتحكيلي حبيبتي و بتشرحلي " هاي قصدي فيها حبيبتي المش منيحه !!!" ومرات بس نكون رايقين و صافيين و هو العادي عنا والحمد لله, بتحكيلي حبيبتي وبرضه بتشرح "هاي حبيبتي المنيحه" وانا نفس الشي بتعامل معها :)


ال "حبيبتي " بجميع انواعها بتكون صادره من بنت طبعا, الا امبارح , اجا المراجع اياه قريب الموظف- اللي طبعا ما صار اشي ضده- انا ما حكيتلكم انه اجا تاني يوم, طلعو مغيرين معلوماته ومش مغيرين معلومات باقي العيله, حكيتله روح للي عملّك المعامله و خليه يغيرها وفعلا بس رجعت تأكدت عالداتا بيز - او البازا ديت على رأي مديري العزيز- طلعو مزبطينله المعامله, امبارح اجا ويا اختي و يا اختي بحكيلو انت شو جابك, بحكيلي كنت ماشي جنبكم فحبيت اتأكد من المعلومات طلعو كل المعلومات متغيرين, حكيتله انت ساكن جنب الشغل يعني كل يوم راح تكون مارر من جنب الشغل, تأكدت من معلوماته طلع كل امورو تمام, حكيتله ما تغير اشي وكل امورك تمام زي ما بدك, بحكيلي طب خلص اسف "حبيبتي"!!!!!!!!!!!!!!!!!!!!!!!!!!!!
حكيتله عفوا؟؟؟ شو حبيبتي هاي, بحكيلي اسف اسف بالغلط طلعت, يلا بسيطه انت زي بنتي, حكيتله لأ انا مش زي بنتك, وانا عندي اب الله يخليلي اياه, ولو سمحت مره تانيه ركز وانت بتحكي, ضحك و لا كأنه صار اشي وطلع :(


اشي تاني بتحسس منه...الربيع :"(

من انا صغيره معي تحسس ربيعي, بس كل سنه بزيد مش فاهمه ليش!!!!
كل يوم الصبح اول ما اصحى ببدا بسمفونيه تعطيس تستمر لربع ساعه, ليبد مفعول الدوا بكون سطلت.
اهلي كانو يحكولي يرحمكم الله على كل تعطيسه, بعدين صارو يستنو احكيلهم خلصت فيحكولي اياها مره وحده :)


فكركم لو اسمي برهان كان ممكن تختلف حياتي :)





25 التعليقات :

شكلك بتقربيلي انتي :) الحال من بعضة و الله :)

 

الله بعين شو بدنا نعمل
انت من يافا صح؟؟ انا من يافا فهيك ممكن نطلع قرايب :)

 

انا بكره كلمة "حبيبي " المش منيحة كمان
بس الحمدلله ما عندي تحسس ربيعي

 

سلام
احنا الشباب عنا نفس الشي تقريباً انو لما بدي اسكت واحد او بالعربي انكسه بعد ما يخلص حكي بكل انفال برد عليه ببرود و بحكيله :"شو حبيبي؟؟" ساعتها اللي بسمعها بنقهر صح.

صحيح: يرحمكم الله :)

 

اهلا احمد
جد بتقهر صح؟؟؟
الحمد لله, فعلا انه مزعج التحسس الربيعي, يعني ما بوصل الشغل الا انا مسطله و نعسانه لان دوا التحسس بنعّس :(

 

انا ما حد بحكيلي حبيبتي :(

والله همسه شوفي يا حبيبتي "هاي حبيبتي المنيحه " هههههه ديري بالك سواء من حبيبتي وهاي عفارم عليكي شاطره ومانخاف عليكي ردك كان في محلو لهيدا الزلمه :)
الي ماتو اختشو في هالزمن والله عن جد قليل زوق
الموظف الي مثل صباحو انتى ما دخلك بهيك امور احكيلو كلمه ورد غطاها "معاملتك مش عندي لوو " وخلي مسؤولك يتصرف معو

عندك حسسيه والله مين سمعك على سالفه الحسسيه انا عندي حسسيه من الناس كل حدن صار يركب على عصبي :(

حسسيه هتشووو هههه :)

 

شو مالها الدنيا كل العالم مريضة عنا في البيت انا واخواتي التنتين مراض يا رشح يا التهاب في الحلق

بس بتعرفي كان ممكن تعذري على شغلة انو حكى حبيبتي صحيح انو غلط حكاها بس اوقاتا هيك شغلات بتصير عفوية من الواحد وبدون ما يكون بايدو وانا بعيني شفت شاب صاحبي سوا حركة لسة حبيبتي ولا شي بالنسبة الها , طبعا الحركة طلعت منو عفوية ومنيح البنت ما انتبهت

 

ana bkrah kelmat " 7yati, 3mori" bnrfzo

 

ازا من بنت على عيني و راسي ( حلوه يعنى ) بس ازا من شب بشب شبابه و بالنسبه للتحسس اللى شهر ع نفس الموال الصباحى عسطه بتهز جبال (----)

 

غير معرّفه/ مجهول 1 :)

هو زنخ الزلمه من اولها
الحساسيه من الناس هاي شكلها عند الكل و زايده هالايام
شو بدك تعملي الله بعين

احمد حمدان
سلامات سلامات
في ناس بنسجمو و بصيرو يحكو متل هالحكي بالغلط, بس بكون مبين انه مش قصده, هاد المراجع زنخ من اولها و رده فعله بس حكاها مبينه انه مش بالغلط

مجهول 2

yeah bardo benarfezo halkalemat

(---)

اذا مش بلئم اه حلوه, بس منه مش مقبوله :)
سلاامات ...هاد الحال من بعضه كمان

Ahmad
الله يسلمك يا رب

 

sabaa7 el dohor :)

ana bakrah kelmet 7abeebty bardooo !!! ma elha da3ee ,, keeef law mn shab
mn ween la weeen !!! lool.....
salamtek mn el 7asasyeh :)

 

سلامتك من الحساسيه-الحمدلله بسمع فيها بس!! بس بلاحظ انها في معظم الأحيان وراثه

أما كلمة حبيبتي فكمان بكرهها موت؛ خاصه لما تكون من وحده علاقتي فيها صفر-العلاقة يعني التقارب مش ضروري نكون شايفين بعض كل يوم يعني:)

 

ya saba7 w masa eldohor welleal w kull el2aw2aat :)
loool
allah ysalem 2albek ya amar :)

 

مياسي
الله يسلمك, والحمد لله ما عندك, هو في منو لان انا و اخوي هيك :$

احنا بالبيت بنستخدمهم كتير هالكلمات, ماما عودتنا نحكي هيك, بس للعالم اللي يا دوب نتعامل معها مش ضروري بالمره

 

عندك تحسس من الشياطين؟

اذا "لأ" ... زوري مدونتي

واذا " آه" ... شرفيني ع مدونتي لآنك رح تصيري تحبيهم ... مو كل الشياطين
بس شيطاني انا

 

لأ ما بحبهم:(
هيني رايحه عمدونتك لنشوف

 

awal she salaaaaammmmmmmat "7BEBTE" hahahaha :)
tanee she ana kman mn YAFA !! wb2ool leh b7bk ??!! wkman 6l3 qwaider yafawee ya salamz :)

 

Marooo fe bloggina,ya mar7aba ya mar7aba
hay "7bebte" elmne7a :D
OOOOOh 6l3na 2arayeb y3nee :)
I don't know if Qwaider from YAFA or not !!!

but any way kulna 2e5wan belblogs lool :)

 

looool
wallah had el zalameh kan bedo kaf mratab men 2edaike, y3alem 3ala wejho kam sa3a. a5 bs lao drabteeh
AND salamat, o yar7amokom allah 3l 3atsat el jayeen, men halla2 salaf
:D

 

Ahlan Mohammed
Swear to God I just sneeze faaa 2athabana wa 2athabakom allah :$

wallah kan beddo kaf bnos wegho :S

 

اول اشي سلامتك من الربيع

حلوة هاي حبيبتي تاعت الردح .. الله يعينكوا على بعض بالمكتب

:)

 

امجد
الله يسلمك :)
لاااا بمكتبنا اجمالا "حبيبتي" المنيحه , الا بس يكون في ضغط شغل, بس الحلو إنّا متعودين على بعض , فما في حركات صفوف الابتدائي :)

 

مشكله حساسية الربيع انا بعاني منها وصايره مشكله خاصه في العينين
اما حساسية كلمة حبيبتي هاي الحمدلله عمري ما مريت فيها

 

سوزان
سلامات يا قمر, اه انا كمان, عيوني الصبح بكونو منفخين, فشر نوال الزغبي :) بس الحمد لله لاطلع عالشغل بكون الوضع احسن
الحمد لله وان شاء الله ما بتمري فيها