Things I Like To Whisper About

Would You Hear Me Whispering

الاسرة في مطعم الاسرة

احلى اشي بس يجو خواني من السفر هو انه الروتين بلتغى من حياتنا, ما في اشي مرتب اله, يلا نطلع , يلا نحضر فيلم,يلا نروح ...يلا ناكل :$

طبعا الاكل انسو موضوعه, الاكل عال 1 الصبح عادي , مثلا امبارح بالليل اخوي طلب من ماما تعمله دحدح الساعه 12:30 بالليل كان جاهز, واكلنا نص الصينيه, انسو الدايت و انسو الوزن, انا شخصيا ما راح اوزن حالي لبعد ما يتسهل لخوي و اسجل بنادي و يمشي شهر و اعمل دايت قاتل, بعدين بشوف وزني, وخصوصا ان عنا عرس بالعيله ب 11\ 6 فان شاء الله لازم اكون نحفانه :"(

المهم, اليوم صحينا الصبح شو بدكم تفطرو, اقترحت اعزمهم عالفطور بمطعم الاسره بعبدون, كلهم رايحين عليه من قبل الا انا و مرة اخوي, يا الله شو بجنن هالمطعم, جد انه جوه اكتر من رائع, اي نعم المطعم مش من المطاعم الفاخره, بس والله كتير انبسطنا.
و الاكل اشي من الاخر, طلبنا كل شي بعملوه اله دخل بالحمص و الفول, ممنوع كبده وهاي الاشياء, وطلبنا قلايه بندوره,اللي فكرتها مش زاكيه بالبدايه بعدين قضينا عليها.

وبما انا عائله بتخاف من الحرام....فبحب اطمنكم انا مسحنا الصحون مسح على راي اخوي الصغير ههههههه

و اكيد كالعاده فجأه بتشوف نص العالم اللي بتعرفهم هناك, علشان ما تكون عملت اشي ما حدى بعرف عنه.

الجو كتير حلو, الاكل كتير زاكي, الخضار و حوض السمك, واحلى اشي صوت فيروز بالخلفيه اللي بخللي الاكل ازكى وازكى
و للصدمه الفاتوره طلعت كتير كتير قليله بالمقارنه مع مطاعم تانيه للحمص والفول - ابوك يالجباره :)

اتركم مع الاغنيه اللي اكلنا عليها :)




12 التعليقات :

طيب شو هيي أكلة دحدح أول مرة بأسمع هيك إسم

 

انا اكتر اوقات بحبها ايام الصيف نفس الاشي بصير عنا بالبيت .... الكل بيجي طلعات وسهرات عن جد بكون جو رائع

الله يخلي لكل انسان احبابه

 

حلاوة الشغلة باللمة و الجمعة! يمكن لو رحتي لحالك او مع ناس ما بتحبّيهم كان ما عجبك شي
حمدلله على سلامة اخوانك... انشالله بتتهنّوا و بتنبسطوا مع بعض

 

its not exactly a 5 star place, but i must agree that the company that matters!! il 2ahel wil far7a, thats the nice thing inshall akan f il maw maw! allah ykhaleekom la ba3ad.. cant wait for my brothers to come... its the same thing, no routine... well july is only a month away :)

 

شو صيف وكيف؟

شكلك معطله عن الدوام كمان؟

نيالكم صارلي عمر ما طلعت طلعه حلوه زي هيك:( انحفي ياختي انحفي العرس مهم ديري بالك-طبعا هاد الحكي بحكيه لحالي كمان:)

يخليكم لبعض ان شالله؛ شو أخبار عبود صح؟

 

Hamede

الدحدح هي نوع من الحلويات
من السميد بتنعمل,عباره عن 3 طبقات الطبقه الاولى والاخيره سميد عادي و الطبقه اللي بالوسط سميد مع قرفه و قطر :)
زاكيه كتير, كانو من زمان يبيعوها عابواب المدارس :)

SimSim

اهلا ياقمر, امين يا رب
يا ريت يجو ويستقرو بالبلد لانه جد بنشتاقلهم :"(

قويدر

معك حق, لانه بالايام العاديه نادرا ما نتتشجع على هيك طلعات .
الله يسلمك يا رب, ان شاء الله.
و ان شاء الله بنشوفكم بالاردن عن قريب :)

Ala' JA
yeah it is not,but as you said the company that matters
inshallah your brother bywsal belsalameh and to enjoy every single second of your time together

 

اهلا ميسو
ما بعرف بتحبي هالاسم ويلا لأ :$ صاحبتي اسمها بشبه اسمك وهيك بناديها :)

الحمد لله اخدت اجازه اسبوع, وطبعا كل يوم بتصلو من الشغل عاساس اني بشتغل بالكونجرس وغيابي بعطل الشغل :-\

الله يسعدك, وان شاء الله عن قريب بيجو الاهل وبتصيفو وبتكيفو :)

عبود بجنن ما شاء الله عنه
كل ما اقرر احط صوره عالبلوج اخوي بحكيلي بلاش حد يعرفك :$ هاي سيئه ان حد من عيلتك يعرف عن البلوج :"(
بس قريبا راح احط صوره :)

 

لا عادي بحبو

الكل بيناديني فيه الله يسهل عليها صاحبتي من شي 15 سنه كانت أول وحده بتناديني فيه :)

خلاص ودي صورة عبود ايميل وانا بنشرها عندي:) يا عمي انتي مبرمجة اوراكل اهم من الكونغرس وهالحكي الفاضي

 
مطعم ابو جبارة :D

كم الفاتورة :D
غريب مع انو فكرت انو الدحدح جاح :D
بس طلعت مش عارف ... يلاه فرص بتيجي للانسان هل ايام يغير جو ويستمتع ... استمتعي لاقصي حد...
عجبتني بس كانو شغاله بالكونجرس ... يما عليكي شو تعبيراتك قوية ... شخصية محورية بشغلك مشاءا الله عليكي

 

لا لا لا همسه هيك من ورايا طيب وين حصتي من الحمص والفول والفلافل هه لا لا لا انا زعلانه مخصماكي هيك هاي خيانه احنا هون مندور على ريحة الفلافل اللي كنا نشمها من بعد اميال في الاردن مش ملاقيين ما حدا بيعمل فلافل اله طعم شكله الزيت اللي بانقلى فيه مليون مره اله تأثيره على الطعم
عجبتني شغلة العرس ذكرتيني في حالي والموشحات اللي كنت اسمعها من امي واختي

يا ستي صحتين عافيه والله يخليكم لبعض وان شاء الله بتضل تشوفيهم ويشوفوكي ومايحرمكم من بعض

 

سوزان حبيبتي :$
كله ولا زعلك يا قمر, خلص بالضافه لعزومه الكنافه اللي اتفقنا عليها قبل, في عزومه حمص وفلافل باي مكان انت بتختاريه :)

العرس لبنت خالتي اللي زي اختي, وفي حفله صبايا قبل العرس, بتعرفينا ما بنقصر بهالحفلات و بنفيع عالاخر, فبدي يكون الي عين افيع :$

وان شاء الله بنشوفك عن قريب :)

 

اكلتها مرة و ما كنت اعرف انه اسمها دحدح بس خلص بمنا انه اتعرفنا ع الاسم بطلعلي اطبلها بعين قوية للدحدوحه ( معجب )