Things I Like To Whisper About

Would You Hear Me Whispering

سؤال بدون جواب....

بتعرف الواحد على كتير ناس بحياته, ناس بكونو كتير عزيزين عليه بتركو اثر كبير بحياته, وناس بكونو عاديين بمرو بحياته و ما بتركو اي اثر, حتى الناس اللي بتركو اثر ممكن يكون سلبي و ممكن ايجابي و برضه بختلف بقوه ودرجه ومده التأثير.

انا بحياتي مرو ناس كتير علي, وانا بطبيعتي بس اثق بالناس بثق بطريقه مطلقه علشان هيك الصدمه بتكون كبيره و يخيب املي, والحمد لله بستمر بحياتي لانه هاي سنه الحياه.

من الناس اللي تركو اثر كبير بحياتي وايجابي همه 3 صاحبات من المدرسه, من الصف الثامن للتوجيهي ضلينا مع بعض, و مع انا افترقنا بالجامعه بس ضلت علاقتنا متل ما هي والحمد لله وبعد ما تزوجو و وحده منهم سافرت لساتنا على علاقه قويه وكل شهر تقريبا بنجتمع.

اليوم كنا مجتمعين عند وحده من صاحباتي, انا بصراحه ولاول مره بكون مش متحمسه لهاللقاء, صاحبتي الله يسامحها كل زياره لازم تسمعني موشّح الزواج, اكتر من مره حكيتلها ازا انا مش حامله هم حالي انت شو بدك يا اختي؟؟؟ وبعدين انا مبسوطه هيك مش المهم اكون مبسوطه, كل مره لازم تنفتح السيره, هي المسكينه زوجها جدا سيء معها و بعد ما تشكي وتحكيلنا قصص عن زوجها اللي مورجيها النجوم بعز الظهر , بتنتقلي و بتبدا بهالموشح, انا اكتر من مره بكون نفسي احكيلها ان حياتي احسن من حياتها ب 100 الف مره بس بخاف على مشاعرها, ومرات بقول يمكن بس بدها تحس انها مش لحالها عندها مشاكل, وبدها تفترض ان هاي مشكله عندي...الله يهديها ويصلح حال زوجها.

من امبارح وانا زي اللي علي واجب, مش مرتاحه ومش مبسوطه, المهم رحنا , المسكينه نحفانه كتير و شكلها كبييييره , استغربنا ولمّا سألناها حكتلنا قصه طويله عريضه زي الافلام, المختصر المفيد ان زوجها كل ما يرجع من عند اهله برجع مستنفر و كيف انه ضربها وطلع هاي مش اول مره بضربها, واتصل باهلها تعالو خدو بنتكم انا ضربتها وراح اضل اضربها لتنعدل - كيف يعني تنعدل مش فاهمه !!!- واجو خوانها و البيت كله اصوات وصراخ وبناتها التلاته اللي اكبرهم 6 سنوات بصرخو وببكو, وكيف طلعت مع خوانها و تركت البنات لانه اخوانها ما رضيو ياخدو البنات, ولما ما عرف يدبر البنات وداهم عند خالتهم و راح لبيت اهلها يرجعها مع ان اخوانها حكوله اذا بتقرب عالبيت راح تندم, ولما اخوانها شافوه هناك ضربوه و مسحو فيه الارض, وكيف وسّط العالم كلها لترجعله.....وبعد كل هالقصص رجعت.

انا اللي مش قادره استوعبه....كيف راح ترجع الحياه عاديه؟؟؟
كيف راح تقدر تستمر الحياه بعد الاهانه وبعد الاذلال؟؟؟ كيف البنات راح تكون نفسياتهم؟؟؟ بتحكيلنا صاحبتي ان البنت الكبيره اللي حضرت قتله الام و قتله الاب ما بتاكل و بالمدرسه بحكولها انها صارت انطوائيه, معقول يكونو خربو حياه البنت للابد؟؟؟ مين احسن ترجعله علشان البنات ويلا تتركه برضه علشان البنات؟؟؟ هي بتحكي انها بتتمناله الموت!!! يعني شو هالحياه؟؟

لما حكيت لماما بتحكيلي عادي ياما ناس انفصلو و رجعو مره تانيه ونسيو واستمرت حياتهم عادي, معقول ينسو؟؟؟
انا لو كنت بمكانها شو كنت بتصرف؟؟
كل مره بنجتمع بنرجع بنات صغار بنرجع لصف تامن...هالمره حسيت صاحبتي كبيره كتير.
اسأله كتيره ببالي......معظمها مش لاقيتلها اجوبه...

16 التعليقات :

مسا الخير
صعب كثير احكي رأيي هون لأنو رح انفهم غلط

 
طرزان في عمان :d

الازمة انو احنا بنفكر الزواج هدف بحد ذاتو ... يعني اذا اتزوجنا خلص احنا انجزنا ... اذا الزواج ما كان مبني عتفاهم حيقلب مشاكل ونكد وبدل مايكون مرحله مهمة بحياتك تركتز منها وتتحرك لبناء مستقبلك ... بتصير تنحدر فيك للهاوية ... اذا مافي قدرة على التواصل بين الزوجين وقواسم مشتركة بالتفكير ... مافي داعي للاستمرار وتدمير حياة شخصين على الاقل في احسن الاحوال ... يعني يضل الواحد عراسو ولا يجيب قرد ويحطو على كتافو

 

الله يعينها صاحبيتك على هيك مصيبة ويصلح زوجها مشان بناتوا مش عشان شي

 

You just said in the beginning that you move on after a massive shock you have, oo 2inno hay sunnet il 7aya... allah yeydeehum oo yisle7 7alhom... bas il zalameh 3ajabni, bidrub mara!!!! lazmo 7areg.

what a shame!!!

 

والله يا همسه الغلط على اهل صحبتك كيف اخوانها يضربو الزلمه بين الناس وين الحكمه هان التصرف كان غلط والبنت صاحبتك ازا مش مرتاحه معو ليش خلفه 3 بنات يعني هيي بتحبو الاطفال يعني ثمره الحب الي بيناتهم مش ممكن اتكون بتتمنى الموت لابو بناتها على حكي المصريين " ضرب الحبيب زي اكل الزبيب " هي بس صاير معها لبس من عيلتا مافي توجيه سليم وسدقيني فوق الحب الاحترام اهلها غلطانيين درجه اولى
و راح لبيت اهلها يرجعها مع ان اخوانها حكوله اذا بتقرب عالبيت راح تندم, ولما اخوانها شافوه هناك ضربوه و مسحو فيه الارض, وكيف وسّط العالم كلها لترجعله.....وبعد كل هالقصص رجعت.

غريبه الناس وين حكمه الرجال الكبار ولا بطل في كبير وصغير في هالوقت كانك بتحكي عن اطفال مراهقين بتخانقو على لعبه فطبول حتى هادي لسه العقل بيستوعبها اكتر . يا همسه الواحد بس يحكي يا حيف على الرجال الي بفرجي عضلاتو بضرب بنت الله يستر عليهاوانشاله تنحل الامور كلها بيناتهم ويهدي سرهم :)

 

هلا المدونات صارت لحتى تفضحو العالم كان ممكن تحكى الموضوع من غير ما تحكى صاحبتك و بتعرفيها و الاسترسال بالكلام و ثاني شي ايش حكاية العرسان هلا كل شباب الايام معقدين و عصبين - خربتوها يا صبايا - عم بدور ع عروس و يا خوفي اروح عند ناس و اطلع فليح من عندهم ههههه

 

ويسبر صباح الخير ..
معلش سامحيني بس الله يلعن اخت هيك عادي !!
شو عادي ؟ وكيف عادي !!
بلحظة الي الواحد بمد يده على مرته خاص بتكون هاي نقطة فاصلة بكل شي ولا ممكن ترجع الامور متل ما كانت ...
فما حدا يحكي عادي .. لا مش عادي

 

صبااح الخير :)
عن جد مو معقول كيف صاحبيتك بتفكر و بالأحرى كتييييييييير متلها ... برأيي إنه كان بتقدر صاحبيتك تكشف أطباعه من من فترة الخطوبة
يعني مش بعد 3 بناااات .... و حتى من البنت الكبييرة و السؤال إلي محيرني .. طيب مدام حياتها جحيم ليش بتخلف ..آآآه و الله تعقيد ,,,
و كيف يضربها !!!!!!! الزوجة أمانه عند الزوج !!!!!!!
و لازم تنفصل عنه ... أحسنلها من الإهانة ,,, ....
عشاان بناتها .. إيش بدها أكتر من هيك تعقيد لنفسيات البنات ......
لا حول و لا قوة إلا بالله ,,,
بعد ما تحكيلك كل هادا الحكي بتفتحلك سيرة الزواج !!!!!!!!
برأيي إنه العلاقة إزا توترت من البداية و اكتشفوا أطباع بعض و ما قدروا ينسجموا الإنفصال كتييير أفضل .. لأنه هاي حياه.....

الله يهدي الجميع ...

 

محمد
مساء النور.. على راحتك بس يا ريت تغير رايك وتشاركني بركي في عندك وجهه نظر تشرح الموقف.


طرزان :)

معظم الناس وللاسف بعتبرو الزواج هدف وانجاز كبير وبنسو الاشياء التانيه...مش مهم تفاهم ولا تعاون ولا محبه المهم تزوجنا وفتحنا بيت وجبنا ولاد...كيف بعيشو جوا هالبيت مش مهم.
معك حق :)


احمد حمدان

امين يا رب...بالزبط علشان البنات

 

Ala2 JA

welcome back :)
Ameen for that, jad beddo 7areg



غير معرّف 1

المفروض انهم تزوجو بعد قصه حب, اهل الزوج مش كتير موافقين عن الزواج كانو, ما بعرف كيف بفكرو اهلها و كيف تترك البنات!!!
اخوانها غلطو بس تصرفهم طبيعي لشب اخته انضربت وراح تضل تنضرب لانه ما في وراها رجال...يعني شو بدهم يعملو وخصوصا انهم شباب بسن صغير وما عندهم حكمه وبعد نظر للامور.
امين يا رب
اهلا وسهلا دائما :)

 

غير معرّف 2

وين الفضيحه؟؟
اذا انا ما حد بعرفني كيف بده حد يعرف صاحبتي؟؟؟
وبعدين هالقصص مش فرديه, موجوده كتير بس ما حد بعرف عنها او بحب يحكي عنها , وممكن تصير مع اقرب الناس الك لا سمح الله...

العرسان انا اللي بكتب قصص النهفات منهم...يعني البنات بيجيهم عرسان كتييير و من الصف الثالث اعدادي, اكيد في ناس كانو كويسين وناس انا رفضتهم لاسباب ما الها دخل بالنهفات و ناس انا ما عجبتهم, توّكل على الله و روح اخطب وان شاء الله ما بتكون فليح و بتكون فارس احلامها للعروس :)
اهلا وسهلا دائما :)

خالد
صباح \ مسا الورد
شووو وين هالغيبه :)

لا خود راحتك عالاخر, لانه بصراحه هاي وجهه نظري انا كمان...مش عادي بالمررررره

رزان
صباح \ مسا الورد يا قمر
القصص كتيره بس احنا ما بنحس فيها الا بس تصير مع حد قريب منا :(
الضرب اذلال وعدم احترام و غل وكره ...يعني بجمع كل الصفات اللي المستحيل اي علاقه زوجيه تستمر فيها.
انا مع انها تنفصل عنه وتاخد البنات لمصلحتها ولمصلحه البنات لانه واضح انه ما راح يوقف عن هالتصرفات , مش بيوم وليله بتغير الواحد!!
بس ما بقدر احكيلها رأيي لانه هاي حياتها وهي ادرى فيها.

انا سمعت القصه من طرف واحد وبعرف ان اكيد في اشياء من وجهه نظر زوجها انها صاحبتي اللي غلطت, بس برضه مهما صار مهما صار ما بصير توصل انه يضربها.
الله يهدّي بالها و بال الجميع

 

ما في تعليق
أغلاط متراكمه وبس
ويا ريت تحكي لصاحبتك انو بعمرو الأب اللي مش كويس ما بيطلع اولاد مناح

اللي بيشوف امه بتنضرب قدامو وأبوه كمان من وين الو الثقه بالعالم؟

خلاص انهزت صورة أهم الناس بعينو
ولا حول ولا قوة إلا بالله

 

مرحب ويسبر

مشان الزواج ينجح ما بده حب .. بده تفاهم .. عقول راكبة على بعض .. ثقة ... اذا صاروا هذول ممكن يصير الحب .. بس وحدة أو واحد يحب أول انسان تدعثر فيه بالحياة .. ما بنفع

فيه ازواج بخيلين و بكون مبسوط مع مرته .. فيه أزواج بضربوا و بتكون مبسوطه معه ... انا ما بروج لهالأشياء .. بس بحكيلك انه اذا فيه تفاهم ممكن تمشي الحياة حتى لو صار فيه أخطاء و تجاوزات

صاحبتك وضعها لا تحسد عليه .. بس مش لحالهم .. تأكدي تماما انه وضعك 100 مرة أحسن

فيه أشياء اما بتنعمل صح او ما تنعمل ابدا ... لأنه الغلطة فيها بتكلف

صاحبتك قدامها حل ولحد صحيحي .. بتعيش مع جوزها ... و بحطوا حدود ..

 

اهلا امجد
الله يعطيك العافيه شكله الشغل كتير ومبعدك عنا و حارمنا من مواضيعك وصورك الجديده.
معك حق...زي ما بحكو كل فوله مسوسه والها كيّالها :)
بس المشكله بس يكون كل واحد عنده مبادئ واسلوب حياه مختلف هون بتخرب الحياه.

الحمد لله على كل شيء, الله يهديها ويهديه يا رب

 

قصه عاديه جدا وبتحدث في كل مكان بترجع وبتصير تاكل القتله وهي مخروسه عادي لانه هي من الاول سمحت لاله والغلط ركبها لالها شوفي همسه حياة الذل ما حدا لازم يرضى فيها ومهما كانت الاعذار كان لازم تركته من الاول قبل ما صار عندها اولاد لكن المشكله بتصير الوحده تحكي مش مشكله مش قاصد رح ستغير مع الزمن وكل الحكي الفاضي وبعدين هلا رح يحكولها بدك تطلقي وعندك بنات بكره بناتك ما رح يتزوجوا لصيت امهم المطلقه ومن هالحكي اللي بيعمل حاله ادمان على الضرب والاهانه وبتصير تستغرب اليوم اللي ما ضربها فيه او اهانها فيه
وكمان لا تصدقي حدا الا لما تسمعي من الطرفين بالاول لانه هي عندها صورة وزوجها عنده صوره وكمان ما بتصدقوا الاثنين لكن انت تعملي تركيب القصه بكل ما بتشوفيه واقع
آسفه التعليق كبير لكن هالقصص موجوده في المجتمع خاصه اذا كان الرجل عبد لامه واخته وحكيهم منزل والمراة مش سياسيه

 

Sozan
هي مشكلتهم الاساسيه امه و اخته, بنحكيلها يا اختي ايش ما عمل لاهله لا تدخلي ما بترد, وبعدين في مشكله تانيه بصاحبتي انها هي بتسب على حالها, وهاد اشي كتير غلط, بحكيلها اذا انت مش محترمه حالك كيف هو بده يحترمك؟؟؟
انا متأكده ان في احداث وفي كلام ما انحكي بالقصه و هو عنده وجهه نظر تانيه, بس اكييييييييييد الضرب مش الحل
الله يصلح الحال