Things I Like To Whisper About

Would You Hear Me Whispering

صح ويلا غلط؟؟؟

مش عارفه هي حسنه ويلا سيئهه فيي....انا ما بقدر اسكت عالغلط و بحكي للاعور اعور بعينه زي ما بحكو
ما بقدر استحمل الكزب و ما بقدر استحمل ان حد يستغبيني...ممكن امشي اشاياء كتيره بس هالاشيين ما بقدر اسكت وامشي الموضوع, حاولت اغير هالصفه لانها بتسببلي كتير مشاكل مع اللي بتعامل معهم, بس حسيت اني بحاول اغير من افكاري ومعتقداتي, اني بغش حالي قبل ما اغش اللي حولي.

اليوم مثلا , صار موقف بالشغل مع مديري العزيز, السيد مديري الفهيم طلبو منه ينسب اسماء لتشتغل بلجنه معينه عنا بالشغل, و هو بعرف ان قبل فتره المسؤولين عن هاللجنه اجتمعو معي ومع مبرمجه تانيه وطلبو نعمللهم برنامج بلغه اوراكل يسهل عليهم شغلهم, و انا وقت ما حكولي حددي انت مين منكم يكمل معنا باللجنه حكيتلهم اني بفضل يشركونا كمديريه كامله, لانه الشغل بلجنه معينه بترتب عليه مكافأه ماديه, انا حبيت ان الكل يستفيد وخصوصا ان الكل راح يشتغل من قسم الشبكات بتجهيز الاجهزه و قسم البرمجه اللي هو احنا بتجهيز البرنامج وتدريب الموظفين عليه, وحطيت المدير بالصوره واتفقنا ان اي لجنه تيجي نكون كلنا فيها.

المهم اليوم وبالصدفه عرفنا ان مديري الشاطر منسب اسم موظف جديد ما بعرف اساسا يبرمج!!!
مديري العنصري بفضل الشباب عالبنات, بعتبرنا احنا البنات مش خرج شغل, وسبحان الله بالشغل العادي بنكون خرج شغل بس بالشغل اللي فيه من وراه مكافأه او تميز او حتى استفاده بسيطه متل انك تتعرف على ناس جداد بشركات مهمه بالبلد لااااا ما بنفعو البنات, واكتر من مره سمعنا كلام معناه انا احنا البنات ما بصير نشتغل لانا ماخدين موقع المفروض شب يستفيد منه, وان الشباب بدهم يفتحو بيوت واحنا ما في ورانا مسؤوليات, والحمد لله ان مديري ما عندو بنات لانهم كانو انتحرو من زمان.

المهم نرجع للموضوع, انا بس عرفت انه منسب اسم الموظف الجديد انقهرت كتير, ناديت الشب وحكيتله اللي صار و حكيتله ان المطلوب منه برمجه, حكال انه ما بدو اللجنه لانه بس راح ينحط بموقف محرج بس ما يكون قد الشغل, فهمته اني انا مش معترضه عليه شخصيا بس معترضه على اسلوب المدير, وان المدير لو انه عنده اداره صح كان تصرف بطريقه تانيه, وان انا طلب ان كل المديريه تشترك بهاللجنه, وان انا ازا بكره اشي بالدنيا بكره الكزب والكزابين, انا بحكي بمكتبي و المدير قاعد بالمكتب اللي جنبي وسامع كل كلمه, طبعا الشب خف عقله وصار يأشرلي ان المدير بمكتبه, انا بهيك مواقف ما بعرف شو بصرلي, هي جرئه هو قهر مش عارفه بس ما بقدر اسكت, بحكيلي الموظف طيب خلينا نروح نحكي مع المدير, حكيتله انا هيك ناس ما بقدر اتعامل معهم , ما بقدر انافق و اضلي عاديه معهم....

فجأه طلع المدير من مكتبه و راسه بالارض وما حكا معنا ولا كلمه وماعرفنا وين راح, انا صرت افكر , معقول انا اسلوبي غلط!! معقول لازم اغير من حالي و اصير انسنه ب 100 وجه!!! معقول لازم اصير منافقه علشان اخد حقي!!! معقول لازم اصير اعمل تصرفات بكرها من الناس علشان اوصل للي بدي اياه واللي هو المفروض يكون الي اساسا!!! معقول...معقول....

شوي بتتصل فيي وحده من اللجنه بتحكيلي صاير عندكم اشي؟؟؟ بسألها اشي زي ايش؟؟ حكتلي ان مديرنا رايح عندها وطالب الكتاب اللي نسب فيه اسم الموظف و معطيها بداله كتاب منسب فيه اسماء كل اللي بالمديريه!!!
وحاكيلها اي لجنه من اليوم بدي كل الموظفين يكونو فيها.


شو يعني؟؟؟ اللي بعمله صح؟؟؟ ويلا هو فكر لقى ان هاد الاشي اللي لازم يصير؟؟؟
انبسطت بالبدايه, بعدين انقهرت...
انا مش شخصيه عدائيه بطبيعتي, بس مديري بضطرني اتعامل بطريقه انا ما بحبها, ليش لازم دايما احارب علشان اخد حقي, ليش لازم تنشد اعصابي , ليش لازم ينسم بدني, ليش ......

13 التعليقات :

على أية حال موقفك ممتاز ، بس حلو من المدير إنه غير رأيه، خلي العقل منك و لا تغفلي عن قول يا ساتر.

 

اللي انتي عملتي صح مية بالمية لانو هاد حقك بالشغل انتي موظفة ممتازة وانا متأكد من هالشغلة لانو مو الكل ببرمج اوراكل وانشالله مديرك يقدرانو عندو هيك موظفة بالمستقبل لانو اللي صار اكيد خلاه يتعلم

 

لأ.. تاكدي انك 9999% صح وما عم تعملي شي غلط وعادة الصراحة اللي فيكي عادة الكل بحب يوصل الها بس مرات بتلاقي الموضوع صعب...
وانا عن نفسي يا ريت اكون صريح بنفس مستواكي .. صحيح شوية مشاكل رح تصير بس بعدين اكيد الوضع رح يتحسن..

 

I think you have every right to voice your opinion and say exactly what's in your mind because sometimes keeping quite give others the impression that you are weak.
However, you should be careful how to approach the problems in a way that you don't hurt anybody's feeling or disrespect the people who are higher than you..You are free to hate them if you want to but don't let it show because they will use your actions against you, and always remember that those are co-workers that you have to see every single day.

I have a friend here who keep saying "kill them with kindness", she acts so sweet and calm and achieve whatever she want so quietly.
Good luck sweety and this boss of yours is close minded, girls these days constitute a large number of the work force anywhere.He needs to wake up and look around him

 

مسا الخير
هدا الاحساس دايما بصيبني بعد كل موجة غضب
بس ما قدرت اغير من حالي بصراحة كانك بتحكي عني

(انا مش شخصيه عدائيه بطبيعتي, بس مديري بضطرني اتعامل بطريقه انا ما بحبها, ليش لازم دايما احارب علشان اخد حقي, ليش لازم تنشد اعصابي , ليش لازم ينسم بدني, ليش ......)

نفسي الاقي جواب

 

اذا ما كنتي قد حالك بوكلوكي ... خليكي قوية زي هيك وشريرة بتوخدي حقك


عموما طلعي شريرة :D

 

والله مش عارفه!!
من امبارح وانا بفكر في موضوعك!!

بصراحه مش انتي اللي فاجأتيني؛ رد فعل المدير هو اللي فاجأني!!

أنا فاهمه قصدك؛ هو القصد انو انتي ما بتحبي تعصبي وتتطلع عصبيتك؛ بتزعلي عالعصبيه نفسها

المهم؛ زي ما حكى غيري؛ حاولي تحكي رأيك؛ بهدوء وتروي؛ بس أنا بحكيلك إذا عصبتي ما تندمي كتير؛ بيكون هيك صار وخلاص

هاد كله لأنو برجك الحمل:)

شكرا لأنه الحروف طاروا:)

 

الفكرة مش صح غلط او تغير بالمبادئ .. بس المفروض ما تسكتي بس بأسلوب والدبلوماسية مش غلط ،،
بالعكس الدبلوماسية ممكن توصلك لوين ما بدك !

 

Hamede
شكرا كتير للدعم, مش عارفه ليش غير رأيه, هو اجمالا سلبي.

Ahmad

اهلأ احمد,لا ما اعتقد تعلم بس شكله خاف من وجع الراس, لاني لحوحه بطبعي :$

Mohammad B.Irshid

اولا اهلا وسهلا فيك بمدونتي
هي متعبه الصراحه بس بعد وقت وبعد ما يكرهوك الناس بعرفو ان طبيعتك هيك فببطلو يزعلو

Noura

My boss is not a normal man, he don't have any opinion in any thing,and if we (me and my colleagues) didn't speak up we will lose all our rights.

this is what I don't like, that I have to be rude with him to make him understand that he should do some thing.

"kill them with kindness" I wish, I can't control my face expressions :$

 

Jafra

مسا الورد
وشكله ما راح نقدر نغير هالشي, لانه مش احنا الغلط
الله بعين شو بدنا نعمل

Ammar

مش شريره كتير, يا دوب ماخدين حقنا.
بس واضح انك انت الضليع بالشر :)

مياسي
بالزبط, انا بكره العصبيه, وبطبيعتي بغير التعامل مع المدير ما بعصب.
حتى بتعرفي هي مش عصبيه هي نرفزه وسمه بدن.

بالنسبه للحروف...انت بس تأمري يا قمر :)

خالد

الدبلوماسيه بدك تتعامل فيها مع ناس بتفهم وبتقدّر وبتستوعب,هاد واحد ما بفهم الدبلوماسيه بفكرها ضعف و موافقه عالواقع.
انا بعرف اني زدتها معه, وهاد اللي خلاني احس الموضوع غلط :(

 

اكيد الدبلوماسية الها دور ، بس في حالات بيضطر الواحد يعصب فيها خصوصاً لما يكون اللي حواليه لا بيردوا و لا بيصدوا و العصبية بهيك مواقف احياناً بتكون مليحة عشان يشوفوا انو الواحد صاحب موقف و مش كلمة بتوخذه و كلمة بتجيبه

 

اجيتي عل الوجع
الي عندي نفس الشي مش قادرين يا حرام لانه مخهم متخلف يقتنعو انا انا بنت و قادرة انه اعمل شغل احسن منهم ب مليوووووووووووووووووووووون مرة بس يا حرام اعزريهم النقص و الترباية الي اخدوها من مجتمعهم المتخلف بخليهم هيك يتصرفوا
حسبي الله و نعم الوكيل اشي بجلط بس تاكدي انه بالاخير انت الي بتتطوري و هم مكانهم لانهم ناس ما بضيفوا ع خبرتهم شي و عارفة
طنشي عن جد انا هيك بطنشهم لابعد الحدود
قال انت بالاخير بنت و عيلتك اهو من الشغل بالله عن جد و انت رجل و عيلتك وين مكانها بالزبط؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
بكرههم بصراحة عن جد بدون اي تعليق لانه فتحتي الجرح و الماساه الي بعاني منها من قسمي الغبي و الحقير

 

Allouh
بالزبط هيك مديري اذا سكتت مش معناته انك محترمه, لا انت ضعيف و بزودها معك, الدبلوماسيه ما بتمشي معه

مجهوله D:
اولا اهلا وسهلا فيكي
للاسف في كتير ناس من هالنوعيات وبتصادفيهم بكل مكان.
حتى ايام الجامعه لما كنا نسأل عن الماستر, كان في دكتور يحكيلنا انتو زياده عليكم البكالوريوس,روحو علقو الشهاده بالمطبخ :(
الله يعينهم و يعين بناتهم على عقلهم