Things I Like To Whisper About

Would You Hear Me Whispering

الى متى هذه الظاهره...

مش قادره افهم شو الفرق بين الايام اللي قبل العيد و اي يوم تاني بالسنه
العالم كلها كانها مداومه بالشارع
طيب مش في جامعات في مدارس في شغل الناس مضبوبه فيه
اي ساعه بالنهار بتروح على اي مكان بتلاقي الاردن كلها فيه

طيب بس افهم شو بيعملو
الشارع كانه كراج سيارات كل 5 دقايق لتتحرك 10ملم ايش في يا عالم
وبعدين بدكم تقنعوني ان الكل رايح يشتري اواعي عيد......هلأ 5 شباب بسياره ماشين الساعه 2 العصر و الموسيقى معليه عالاخر و السيستم شغال وتس تس تس تس...شو بتعملو بالشارع هلأ...بطشو يا حبايب الماما...ولكم هلأ وقت طش هلأ ولكم بدي اروح عالبيت

و العالم والدنيا مش أزمه مكشره ومش طايقه حالها...يا عيني عليهم بالازمات...الواحد بيتطلع عالتاني كانه قاتله ابوه امبارح وبدو ياخد تارو بهالدقيقه...ويلا ازا لاسمح الله اجا حظك انك بدك تطلع من شارع فرعي لشارع رئيسي.....لولولوليييييييييييييش بزفوك العالم
لا اللي وراك بفهمو ان سيارتك مش مجهزه للطيران ولا سياره المفتش كادجيت اللي يصيرو العجال رجلين طوال وتفشق عن السيارات ولا اللي بالشارع الرئيسي برحموك ازا فكرت هااا بس فكرت تمشي نص ملم لقدام...وفي ناس بنعجئو بسرعه يا جماعه كم من زمور بتوقف السياره بمحلها وممكن يصيرو يبكو :$

يعني شو فيها لو اشتريتو هالاواعي قبل بشهر شو بدو يصير...على اساس انو احنا بالاردن متابعين لخطوط الموضه و اللي بنزل قبل شهر بيصير ياااي موضه قديمه ومش ستايل و فلجر
مكل محلات البلد الها سنتين بتعرض نفس اللبس...حتى في فترينات بالحسين من 2000 ما تغير اللي فيها ...والشاطر فيكم يروح عالحسين هلأ...يمكن لبعد العيد ليرجع

ان شاء الله العالم تبطل هالعادات السيئه وتنظم امورها اكتر علشان ما نضل نكره بعض
وخصوصا ان هالايام ايام فضيله بدل ما الواحد يسبح ويدعي يصير يسب وينسب عليه....في اليوم واحد كرهتو جحرني وحكا اشي لاني مشيت قدامه...عكلن الله يسامحك وبحب احكيلك انو المسبه بتلف بتلف وبترجع لصاحبها ....نا نانا نا نااااااااا:)



5 التعليقات :

لا وشو .. كنت اكون زعلاااان .. و متدايق لمّا والدي كان ياخدنا نشتري اواعي العيد قبل بشهر.. قبل العجقة و الأسعار ما تطير في الهواء..

الله يرحم ايّام السيستم... اوب-تس اوب-تس اوب-تس اوب-تس اوب-تس
:)
كل عام و انتو بخير

 

اليوم اربد ما بتنفات من الزحمه!!!

بدك الصراحه صايره احس الدنيا دايمن زحمه شو هاد:)

كل سنه و انتي سالمه صح؛ شريتي أواعي عيد؟؟ انا رحت شريتهم:)

 

قويدر
وانتو بالف خير :)
الاسعار طايره طايره شو بدنا نعمل

مياسي:
و انت بالف خير يا رب
معك حق دايما زحمه الشوارع

لا لسا ما اشتريت :"(
بس لازم قبل العيد اكون شاريه لبستين وحده للبيت و وحده للطلعه :)
وما بعمل ازمه المول جنبنا بروح مشي P:

 

ذكرتيني بايام حلوة تعرفي انت لو تطلعي من الاردن رح تشتاقي لبعض الشغلات بس مش الصوت العالي والزحمه بس رح تشتاقي لاجواء العيد اما الزحمه فهي كل مكان هي الناس بتزيد ولا بتنقص كل عام وانت بخير

 

sozan
وانت بالف خير يا رب :)

انا معك ان العيد من غير العيله والناس والعجئه مش عيد ...خصوصا ان بابا وماما مسافرين والعيد اكيد مش حلو من غيرهم :(