Things I Like To Whisper About

Would You Hear Me Whispering

ملكة الحفله


اول عرس بوعى عليه بحياتي كان عرس خال بنت عمي , مرة عمو من شرق اسيا و الشب بكون  ابن عمها و اخوها بالرضاعه, خليط ما بين شرق اسيوي و شركسي :$ ما علينا المهم...انا اول ما خطب عمو مرة عمي الكل بسأل مين بتشبه يحكولهم بتشبهني , وقتها كان عمري سنه و سبحان الله عيوني جايين على صيني, ولهلأ اللي بشوفني اول ما اصحى وخاصه اذا شوي منفخين الجفون يااااا حبيبي, ويلكم تو جوردان, ما تفهموني غلط, انا بحب هالصفه في حالي و بموووت بالشكل الصيني المهم نرجع للعرس.



العرس كان بمكان مفتوح برة وعلى بركة و العروس كانت من نفس جنسية العريس وكانت بتجنن ما شاء الله, وانا وكأي بنت اردنية بعمر سبع سنوات طبعا كنت قد مارست جميع الحيل المقبولة والغير مقبولة لاقنع ماما تشتريلي فستان عروس وملحقاته على ذوقي ,بدور و ببرق و برعد وكل هالقصص موجوده فيه, و لكن كان شرط ماما ما اطلع من البيت لابسته -علشان الفضيحه ما تكون من البيت - و في حال بنت عمي لبست فستان حفله او كان في بنات لابسين فساتين عرس بلبسه,واني البس فستان عادي للعرس... وبما ان الفستان المقترح  كان برضه  اول الفساتين اللي شاركت بتنقايته  فااااا وافقت.

طبعا بنت عمي لبست فستان العرس و اللي كانت اصغر مني و كانت وما زالت اطول مني  بس وانا صغيرة كنت قصيرة بزياده وكنت – ركزولي على كنت- نحيفه نحيفه  عظمه  فاااا كنت مبينه اشي زغنون حتى لو 7 سنين

المهم اول ما وصلت مارست انا وبنت عمي هواية النق لحتى لبسونا الفساتين, طلعت من الحمام – واللي غرفة العمليات للتغيير و تجديد الميك اب وهالقصص, بنت عمي امها حطتلها ميك اب وانا لأ بما ان هاد من الاشياء القليله اللي بتدخل فيها بابا و بياخد فيها قرار في تربايتي....ممنوع منعا باتا احط اي نوع من انواع الميك اب ... مو كتير فرق عندي بما اني اولا حاطه تاج و شعري مفرود وبنت عمي ما في تاج وشعرها مربوط...وثانيا فستاني بدور اكتر من فستانها فاااا حسيت بالتفوق على الميك اب بهالميزات.

العريس بعزف عالجيتار وقام عزف وغنى للعروس وبرضه هاد شي جديد و كنت اول مره بسمع اغنيه "يا ريت فيي خبيها" و من وقتها وقعت بغرام هالاغنيه, كنت حاسه حالي متألقة و جد جد يمكن حاسه حالي احلى من العروس...ما وصلت فيي اني اقلق زي بنت صاحبتي عمرها 10 سنين واللي كانت لابسه فستان ابيض وحاطه طرحه وكانت حامله هم وسألتها امها شو مالك, حكتلها خايفة يفكروني انا العروس هههههه ... بس برضه كنت حاسه حالي ملكه الحفله وبطير ومتألقة.



ما قعدت يومها وحتى لما ماما غيرتلي الفستان ورجعت لبستني فستاني العادي و بدو اهل والدة العريس يرقصو شركسي و انا اللي اول مرة بشوف هالرقصه, ركزت و ميزت رقص البنات عن الشباب و اعطيتها...عادي مين احسن مني و قعدت ارقص زيهم و الف و ادور بالقاعه و اشبر واعمل حركات و كأني في عالم تاني وحاسه ان كل القاعه عتمه وبس ضو علي انا, ما كان في بالي الف نظر ولا اني اكون محور اي شي, كنت طفله على طبيعتي بدون تقييد, انا ذاكرتي مش كتير قوية...او بالمرة مو قويه و بتذكر لمحات عن طفولتي بدون تفاصيل التفاصيل ولكن هالعرس بتذكر كل دقيقه فيه .



الحلو ان بعد شهر من العرس اجت مرت عمي بتضحك وبتحكيلنا انهم لما حضرو شريط العرس نص التصوير كان الي و المصور كان مستلطفني ومستنغشني و مفكرني من العيله ومركز علي بالتصوير ههههههه و فهمت شو الضو اللي كنت متخيلته علي...طلع جد , اضاءة الكاميرا كانت ملاحقتني

 و لهلأ بس اشوف العريس بالمناسبات والاعياد تلقائي بنصير نضحك  :)

9 التعليقات :

" الكل بسأل مين بتشبه يحكولهم بتشبني"

نسيتي حرف الياء بعض الشين بآخر كلمة
"العفو"

---------------
حلوة الذكريات ... حلوة التأملات ... حلوة التهيؤات

خخخخخخخخخخخخخخ
--------------
عشائر الشيشان تعلن تضامنها التام مع عشائر الشركس في دحضها للإشاعات التي تم تداولها بعاليه

وشكراً

 

شووووووو بالنسبه للعربي ؟؟ ههههه حكيتلي ياء ناسيه :')

المهم تم التعديل واضافة "هاء"

اما بالنسبه للرقص الشركسي فاااااا انسى ...حلقت تحليق هههههههه
بتمنى ما اشوف الفيديو بحياتي.....هو من قليل العمو بضحك بس يشوفني :$

 

أنا كان قصدي

بتشيبني
*فليلة* أو *تحليقة... أسرع*

 

https://www.youtube.com/watch?v=sBhP3xwJUXE

 

انت بالذات وبعد اخر بوست بلاش تجيب سيرة الشيب :)))

تحشييييش ....انا اول ما كتبت العنوان تذكرتها بس لم اتوقع انك تربطهم ببعض ههههههه

 

what do u mean
تذكرتها

a7lam is never to be forgotten from every minute of every day of our lives!
eh!!

--------------

what
شيب
?
I have zero idea what u r talking about
*what was the name of that condition when u start forgetting things and names,,, hmmmmmmmmm .. el muhim seems u have it nana*

 

انا مبسوط انك رجعت تكتبي .... زمان عنك
welcome back

 

قرب يصير سنة عن آخر تدوينة!


*ما يصحش كده*

 

عدت سنه وشوي ولسا الوضع على ما هو..راحت ايام الكتابة والانسجام والتعبير بدون تخطيط :(

ان شاء الله نرجع زي زمان ..كانت ايام حلوة

شكرا الكم انكم لسا متابعين و شكرا لوجودكم داائما

على امل اللقاء القريب ان شاء الله :)