Things I Like To Whisper About

Would You Hear Me Whispering

ما بعد الغربة (2)


بعد ما رجعت من دبي ارتحت  تقريبا شهر بالبيت و بعدين رجعت لشغلي القديم, المدير العام متغير و مديري المباشر متغير و الموظفين اللي بمديريتي نفسهم و زايد عليهم كم موظف و موظفه جداد منهم شخص منتقل من مديرية تانيه بقدر احكي و انا ضميري مرتاح تماما اني بكرهو, هاد لحاله اله قصه مخبرتكم عنها سابقا و راح اكتب بوست احط اللينك و اكمل القصه لاحقا - كيف بس التشويق لا رجعه بقوّة :)

المهم انا قبل كنت اعاني باني الوحيده اللي بتعرف اوراكل بالمديريه وشغلنا اساسي اوراكل و اكتشفت ان الوضع زي ما هو, البرامج اللي احتاجت لتعديل وقف الشغل عليها, رجعو للشغل اليدوي و الاوراق والتصوير, بدون مبالغه وانا من اللي كنت بالرغم اني اعاني مستحيل اتوقع اني بس اطلع يصير الوضع بهالسؤ بس الوضع تراجع كتير لدرجة انهم اضطرو يتعاقدو مع ناس من بره ليزبط الوضع شوي, وانا اللي كنت اعاني و اشكي ما حد تفرج فيي و لا قدّر شغلي وتعبي وهاد السبب الرئيسي اني طلعت اشتغل بره.

المهم من ضمن الشركات شركه انا بعرف موظفينها لاني كنت اخد عندهم كورسات و بعرفهم من ال 2004 يعني عشرة عمر, حافظينهم و حافظيني وركزو على هالنقطه, بعرفهم وبعرف عن عائلاتهم من كلامهم عنهم و همه بعرفو شخصيتي و طريقة تفكير و بعرفو معلومات عائلية و شخصيه بحدود طبعا العلاقة العمليه, اخواني بدبي , اني البنت الوحيده كلها معلومات في سياق الحديث او المواقف, زي مثلا الك اخت بتشتغل بشركه كذا كتير بتشبهك لا انا ما الي خوات, هيك يعني الكلام بخليك تفصح عن معلومات, المختصر -بعد كل هالحكي- انّا بنعرف بعض و مكونين فكرة عن بعض.

واحد من الموظفين لا اخفي اني كنت بفترتها معجبه باسلوبه بالشرح و شخصيته وخفة دمه, اكبر مني بالعمر ومتزوج و يحكيلنا عن بناته و كانت الكورسات عنده جدا ممتعه و اسلوبة بخلي الشخص مستحيل ينسى لانه كل شي مرتبط بموقف لطيف, طبعا ابدا ابدا ما عمري بينت اي شي من هالحكي لهالشخص و من 2004 ولغاية 2010 السنه اللي سافرت فيها كل تعاملنا كان عملي بحت, اتصالات دائمه بينا لكل عطل او مشكله بالداتا او السيرفر او سؤال او مساعده بامور الشغل وكل شي طبيعي.

لما رجعت من الامارات من اول اسبوع كان في اجتماع مع هالشركه بخصوص البرامج و المدير العام طلب اني احضره مع اني لسا ما بعرف شي عن طبيعه عالشغل بينا و بينهم, وفعلا حضرت و اجا هالموظف و مدير الشركه واتفاجأو بوجودي و رحبو فيي مع تعليقات المدير عن رجوعي للحكومه و يحكيلي اسبوع وراح تبدي تحكي "غلطه وندمان عليها" , الموظف متغير نحفان و مغير طريقه التمشيطه ومربي سكسوكه, من الاخر صار شكله افضل من قبل بقفزات, طول الوقت ساكت و يوزع ابتسامات انا ما فهمت منها اشي, خلص الاجتماع و ودعتهم و رجعت لمكتبي.

شوي وصلتني مسج من الموظف,بحكيلي انه سعيد جدا برجوعي وهلأ بقدرو يتعاملو مع حد بيفهم عليهم, رديت مسج شكر عاديه, تاني يوم الساعه 9 الصبح الموظف برن, كيفك و كيف حالك ونفس كلمات المسج, و وعدته اشوف البرامج ونضل عتواصل بخصوصه و سكرت الخط, بنفس اليوم الساعه 6 رجع اتصل فيي O.o وانا اساسا بخلص شغل عال 3 و بالصدفة كنت انا بره اخوي عازمني عالغدا, بسألني وينك حكيتله طبعا بره الشغل و اني باكل, بحكيلي الله يسامحه اخوكي لهلا مش مغديكي و الحكي خارج نطاق الشغل, سألته خير في شي ؟؟ بحكيلي لا بس حبيت امسي عليكي ....اعتذرت منه بلطف وحكيتله ان الاكل اجا و اذا في شي بخصوص الشغل يحكي معي وانا بالدوام.

بعدها بيوم اتصل عال 9 بسألني شربت قهوتي ويلا لسا و بحكيلي من الاخر انا لما شفتك بالاجتماع ما عرفت اركز ولا عرفت احكي, عن  فرحته بشوفتي و رجعتي وحكي غريب والشمس طلعه ملبتنجان,و هو يحكي وانا مصدومه,كيف بس تبطل تسمع و افكارك تروح فيك لمنطقة تانيه, مصدومه باني مستحيل يخطرلي انه هالشخص يكون من الناس اللي بتسلو و بخونو و بعملو علاقات, شخص كان كل مره يحكي عن عيلته وعن بناته, شخص انا بعرف زوجته لانها اجت عندي بمعامله وصرنا صحبه لفتره, وصل لموضوع انه بحب دائما يحكي معي وانه حس اني منزعجه بس حكا معي المسا, صحيت و بديت احكي, مسحت فيه الارض ادبيا لانه راح نضطر نشتغل مع بعض -وما زلنا بنشتغل و بنحكي مع بعض - و حكيتله اني ما بستقبل اي اتصال حتى لو كان من صاحبتي اذا بدها تحكي معي عن الشغل و انه ما يحكي معي الا بخصوص الشغل وخلال الدوام فقط و كان في اتفاق اني اخد دوره ريفرش لارجع اشتغل بسرعه عندهم هو اقترحها وبدون مقابل, حكيتله وبخصوص الدورة شكرا الكم انا بجيب كتب و هي النت عندي و البرامج و راح اتذكر لحالي .

تبرير الموقف من الجميع انه توقع اني تغيرت بسبب الغربه, توقع اني عقلي المسكر ما شاء الله ما شاء الله تفتح و ممكن اتجه لانحراف شوي, مع كم رأي بانها ممكن تكون ما يطلق عليه "مراهقه متأخره" ترافق سن ال 40 عند الرجال :$

ملاحظه ع الهامش
الموضوع مو ان ياي شو انا بجنن وكل العالم بتعجب فيي
الموضوع ان نفس الناس اللي بتعامل معها من 10 سنين وعارفتني وحافظه اسلوبي بالتعامل فكرو ان الغربه غيرت من اخلاقي واسلوب تفكيري وقناعاتي...وهالحادثه صارت مع اكتر من شخص بالشغل 


ما بعد الغربة (1)

13 التعليقات :

انا تقديري انه ممكن يكون في عوامل اخرى غير ما ذكر ...
مثلا انه يمر في ازمة بعلاقته مع زوجته ووجد فيكِ ضالته لكي يّغير مزاجه وينسى مشاكله وهمومه
وممكن كمان يكون فكر في انك كبرتِ شويّتين وهيك عامل الزمن بيضغط عليكِ اكثر وممكن الفرصة تكون افضل
مهما كانت الاسباب والمبررات التي ممكن ان نسوقها ...بالنتيجة هو اخطأ وتسرع ,,,,خاصة وانه لم يلحظ منكِ اي اشارة ممكن ان يفهم منها انكِ مستعدة للمضي خطوة الى الامام معه ,,,,
واخيرا ما تظلميه كثيرررر لانه ممكن كمان تكون طريقته نجحت مع غيركِ ولذلك هو اعتقد ان ما ينقصه فقط المبادرة التي لم يقوى عليها سابقا وقدر عليها حالياً ...
شو الحل ؟؟؟ ما بعرف ما تعلمته في حياتي شيء وما هو موجود حاليا شيء اخر

 

مرحبا صديقتي ويسبر
كيف حالك..اسرتك الجميلة بخير دائما إن شاء الله..

دائما ع البال

 

بتعرفي سرحت بالموضوع كتير
بس مابررتله إنه فكرك صرتي أوبن مايند

مابعرف,,, صاير شي
ومش هاممني ولا هامك نعرفه


إم كعك العيد

 

مش عارف شو احكي الظاهر اني مش عايش في هالمجتمع ..... لا تقطعي الكتابة ... زمان عن مواضيعك

 

ما بعرف ليش خطر ع بالي انه زوجته اتوفت وبيبحث عن عروس ^_^

الدنيا مليانة من هيك نوعيات ، وفعلا بيفكروا انه اللي بيسافر أو بتغرب ممكن أخلاقه تتغير ...

عمومًا .. سنة حلوة وسعيدة عليك يارب

 

مرحبااا
وينك ويسبر؟؟؟؟؟؟؟
ان شاء الله بخير

 

اصدقائي الرائعين
بعتذر عن التأخير بنشر التعليقات والرد ...شكلي من تطنيش المدونه المدونة قررت توقيف تنبيه الايميل لولا اخر تعليق من الغالية لطيفة كان ما عرفت ان في تعليقات

فعلا العالم والمجتمع الليبنعيش فيه عميتغير اكتر واكتر وكل فترة بمرق علي قصص واحداث جديده صادمه بشخصيات لم تمر علي من قبل

اختي الغاليه لاتي
اشتقتلك كتير كتير و بدي اتطمن عليكي ولكن مدونتك كأنها صارت مغلقه وما عرفت اوصل :(
انا والاهل بالف خير :) ان شاء الله انت تكوني بألف خير

ابوعمر...وائل....ام كعك ما غيرها...امتياز

شكرا لتواجدكم و دعمكم الدائم :)

 

انا كمان افتكرت انه مثلا اطلق او مرته ماتت بس الظاهر ما هيك
علي كل انت اهم شي انك ما تركزي وتخليه يرفع لك الضغط تبعك والاهم انه دايما تتعاملي معاه بحذر
سيحان الله كيف مرات بنعامل الناس بحسن نية ويفاجونا بس الطبع يغلب علي التطبع بنرجع نتعامل مع غيرهم بنوايا احسنه الي ان يثبت العكس
تحياتي
علا

 

الرائعة ويسبر المميزة..
رمضان كريم

من المريح سماع اخبارك بعد كل هذا الغياب..
دايما بخير يارب

 

شئ مؤسف لكن من هنا لا أجد أي مشكل في دخولها وظهورها
من دون التسجيل.
اتمنى ان تكون مشكلة مؤقتة وتحل المسألة من تلقاء نفسها ..

خالص ودي وتمنياتي صديقتي ويسبر

 

مساء الخير
بعتذر على التاخر بنشر التعليق والرد
لساتني بتعامل مع الشخص بحكم الشغل ولكن هلأ رجع تعاملنا زي زمان والحمد لله فهم اني ما تغيرت

 

اختي الغاليه لطيفه
كيفك حبيباي
تقبل الله الطاعات في رمضان والعيد والايام جميعها
وكل يوم وانت بالف خير يا رب

 

ان شاء الله تكون المشكله انحلت :$