Things I Like To Whisper About

Would You Hear Me Whispering

إحباط...



من يوم ما رجعت عالشغل وانا ما بسمع غير شكاوي من الموظفات عن ازواجهم, وانا بطبعي تلقائيا و من الطبيعي اني اوقف بصف البنت, لكن من كتر الشكاوي بديت احاول اكون واقفه على الحياد و احاول اتفهم وجهة نظر الزوج, يعني خلينا واقعيين مش كل البنات ملائكه متلي , في النكد وفي الممل وفي الزنان, وفي مشاكل طبيعيه بالحياه وبكل بيت, في ضغط على الزوج و في وقت مناسب للنق وقت مناسب للهدوء و الصمت, لا انكر بما اني مش بموقعهم ما بقدر احكم بس برضه اشي ومنه.

 صار عندي كتير تردد باني اعرف الشخص منيح ويلا سيء من القصص اللي بسمعها, بتحكيلي البنت شكوى عن زوجها بعلملة كبيره و بتختمها بس ربنا الله هو منيح ما بدي تاخدي عنه فكرة سيئه, مرات بحكيلها لا يختي زوجك مو منيح ومرات اكتر بهدي النفوس غصب عني و باجي عحالي و بسكّت حالي بالعافيه..... بالزبط انا شو دخلني و ليش اخرب بينهم وهي ما عندها مشكله :)

الفترة هاي تغيرت الشكاوي, وماشاء الله تطورو الازواج وصارت اعمالهم على مستوى ماشاء الله ماشاء الله, حب وعلاقات و خيانات و زواج من تانيه وطلاق وقصص, الي فتره بسمع قصص بنصدم منها مش طبيعيين الازواج صايرين لاااا ما تحكو متحيزة و عنصريه الوضع غريب, قبل كم يوم دخلت صاحبتي المكتب الصبح و هي بتحكي تلفون و وجهها ما بتفسر, خفت يكون في مشاكل جديده عندها طلعت المشكله عند صاحبتها.

هاد يا اخوان صاحبتها  - وهي من جنسية عربيه غير اردنيه - اكتشفت علاقة بين زوجها و بين سلفتها, اه اه سلفتها اللي يعني مرة اخوه, يعني الاخ بخون اخوه عادي و بكل بساطه, ولما واجهته بالمسجات والمحادثات اللي قرأتها و اللي كلها مشاعر و حب و حكي زفت و بتبدا دائما ب "اخوي جنبك" -خوا ان شاء الله اللي يهفيك يا بعيد-  حكالها هاد حوار عادي وانت مكبره الموضوع, حكتله لو حكيت لاهلك عن هالشي شو بتتوقع تكون رده فعلهم, حكالها اصلا امي بتعرف.
الست ما كذبت خبر و حكت مع والدته و حكتلها عن اللي شافته و هو بس عرف عصب و ضربها و طلقها و طردها من البيت, هي بتتصل بصاحبتي تحكيلها انها ما الها حد هون و مش عارفه وين تروح و انها خايفه منه وبدها تروح عالمخفر تشكيه.

تخيلو انّا نوصل لزمن الاخ بخون اخوه, بعرف ان "الحمو الموت" وان دينا ما حكا عن الموضوع لولا انه كبير وممكن يحصل, بس انك تشوف واقع كتير الموضوع كبير, و من كثر العلاقات والفساد والخيانات و الكبائر اللي بتصير بتقرف الزواج كله و بتقرف الستات و بتقرف الرجال, اكيد ما بعمم وان خليت بليت بس المجاهرة وانتشار هالاشياء بخزي صار, قبل هالمره حكيت عن العلاقات بين الموظفين عنا بالشغل المتزوجين والمتزوجات وكأنه حقها او حقه للاخ والاخت يحبو و ينحبو و يعيشو هالمشاعر اللي المفروض تكون ساميه ومحصورة لاشخاص معينين و يوزعوها على اللي بستاهل وما بستاهل.

كتير الوضع مزري و كتير المشاكل منتشره, المشاكل الغريبه , بعرف البيوت اسرار وما في بيت بخلى من المشاكل بس اللي بسمعه هالايام اشي فوق العادي,  ظلم و افترى وتدني اخلاق و رمرمه جد اشي بحبط 


4 التعليقات :

Two posts بيوم واحد؟ يا طخه يا إكسر مخه 😀
فعلا قصص عجيبه غريبه. ما عندي كلام أو تعليق على الموضوع غير هيك.

 

طول عمري بحكي وراء كل خيانة رجل ..امرأة تخون معه ...
لذلك الموضوع ما فيه رجال ولا ستات ...فيه اخلاق ...مبادئ ...دين ...قيم وعادات ...تماسك اسري ومجتمعي

ما يحدث الآن هو نتاج طبيعي لمجتمع منفتح في ظاهره منغلق في باطنه

طبعا اكيد فتحتي نفسي على الكتابة وعلى التدوين وانا وعدتك بس تأخرت شوي بس راجع ...

حابة تسمعي قصص ...كل القصص عندي ...من التي تشكي من خيانة زوجها لها وهي متمددة ونائمة في حضن ( حبيبها ) الى الذي يشكو زوجته التي تقضي نهارها على الفيسبوك والواتساب الى ( حبيبته ) المستلقية في حضنه ..

المشاعر والاحاسيس ....هو العنوان المفقود من واقعنا والجميع استبدله بالمصالح ...
طالما ان لا مشاعر ولا احاسيس وغلبت المصالح ...ضاعت الطاسة وانصحك ان لا تستمعي لهن ولا لهم من بعد اليوم لان الاساس لو كان في حد ادنى من الاخلاق ان يعيشوا بسلام او ان ينفصلوا بسلام ....اما صاحبة صاحبتك قوليلها عادي منيح انها سلفتك مش اختك .. !!!...الله يلطف فينا

يوسف

 

@مالك
لااااا راجعه بقوة ان شاء الله :)

@يوسف

يا لطيف يا لطيف
جد اشي بقشعر البدن الله لا يبلينا :$
بس برضه بدنا قصص وتفاصيل وبوستات :)



 

l mohim el amn + al aman

:{

l 3alam ba66alat tfrq ma3ha ishi shiklo

7arfiyyan