Things I Like To Whisper About

Would You Hear Me Whispering

ربحت...ربحت :)


اليوم و بعد قرون من مغادرة الحظ الجميل لمحيطي  ربحت جائزة :)
اي نعم 10 كيلو معكرونه بكافة انواعها وعاملين حساب انّي احبس بشاي مع حليب وراها بس يا جماعه ربحت...ربحت :)

كنا انا و ربى العسل بفطور مع مجموعه ستات و في مسابقات و سحب جوائز عارقام البطاقات, طبعا لفو ودارو حول ارقام بطاقاتنا لقالو بس, لكن انو يحكو الرقم ابدا, سألو سؤال و اللي بسأل الاسئلة كان قدامي جاوبت طلع صح و اخدت جائزه, انسو فرحتي و اني صرت ازقف زي الصغار بس جائزة يا جماعه, وانا اللي كنت فاقدة الامل تماما باني اربح اشي, زمان كنت كل ما اشارك بشي اربح, تجميع صور او مسابقة عالراديو, وفجأه مو عارفة ايمتا بالزبط سكرت معي.

اليوم تزكرت اخوي الكبير اللي كان وما زال موسوعه متحركه ماشاء الله عليه, من اعلام الدول لعملات لعواصم لاسماء حيوانات و اصواتهم, لاسماء, كيميا و فيزيا و جغرافيا ورياضيات,شو اسم ابن عم خالة الزرافة يجاوب, كم رمش لعيون النمله يجاوب, شو بطلع لو خلطنا ثاني اكسيد المنغنيز مع 10غم من الزئبق يجاوب, لكن عمرة ما شارك بمسابقه, و لا عمره حد وقفه يسأله سؤال عالهوا متل اللي بصير مع العالم الا مرّه وحده و هو بالامارات, وقفوه وعلشان حظه حلو كان السؤال
 " شو اسم المسرحية اللي غنت فيها فيروز اغنية هالسياره مش عم تمشي"  O.O

ايش؟؟؟مين؟؟؟فيروز؟؟؟ مسرحية؟؟؟ أن أن أن أأأأأأأأأأأأأأأأأأأأأأن
يا الله شو ضحكنا يومها على ردة فعله وعلى تعليقاته

نرجع لموضوعنا.....انا ويسبر بنت ابو الوسابر ربحت يا رجاله :)

ملاحظه ع الهامش
اشتقنالكم :)
ملاحظه 2 عالهامش
زي ما انتو ملاحظين بالصورة حتى كتكوتي البيبي متفاجأ :)



11 التعليقات :

هاد البيبي المتفاجئ بس تضربيه بيسير يبكي صح؟

كاااان عندي متلو زماااااان :-| زكرتيني فيه

انا ما ربحت غير مرة وحدة في حياتي... ربحت تذكرة لمدينة العاب اطفال داخلية ووقتها كنت لا متزوجة ولا عندي اطفال :-D

اعطيتها لاختي وصاحبتها يودوا اطفالهم لول

بحيرة البجع

 

أنا مقدر قديش انت فرحانه والدليل هيك رجعتي تكتبي بالمدونه :)
عجبتني "احبس بشاي مع حليب وراها" انا بعرف الناس بتحبس بسيجاره بس مش بالشاي :)

 

@Mohammed

الله يبارك فيك :)
عقبالك بشي يفرح قلبك ان شاء الله

@بحيرة البجع

اهلا اهلا يا قمر...اشتقنالك :)

لا هاد البيبي حصّاله
بس البيبي التاني لساته عندي, ميداليه بس للاسف خربوه بنات اخوي

بس تضغطي على انفه بصير يضحك و بس تضربيه بصير يبكي :)


@Malik

هلأ انا فرحت بالهدية كتير لكن اليوم كله كان حلو فحبيت استفيد باني ارجع اكتب بالمدونه واني اضلي متذكره هاليوم :)

الي اكتر من شهر بفتح اكتب و برجع بسكر و مخي مقفل عالاخر, فقررت اكتب و ما افكر و لا اقرأ شو كتبت و انشر بركي هيك رجعنا شوي شوي

الله يبعد عنا السجاير و يبعدها عن الكل
انا بحبس بقهوة بصراحه لكن الناس شكلهم بدهم مصلحتي :)

 

والله وانا اشتقتلك ولمواضيعك بس....

مممم...

بصراحة انا ما بقرأ المواضيع الانشائية ولا في اي مدونة، او ما تسمونه بالـ"خواطر" او الـ"شعر" او اللي هو

بس آجي الاقيكي كاتبة كلام انشائي منمق بلف وجهي وبرجع (بتعرفي، باجي على بلوجك مشي انا) مشنو ما اليش طولة بال

بحب بس تكتبي كلام حقيقي يمس الحياة الواقعية وبتحمس ارد واعطي رأيي وافكر واشارك واضيف وآخد من افكارك وافكار المعلقين

فيرضى عليكي كتريلنا من هدول الأشياء :-)

بحيرة البجع

 

الله يسعدها القمر يا رب :)

انا اساسا لانه بطل يطلع معي كلام وفقدت قدرتي عالتعبير بطلت اكتب

انا مو كتير بالشخابيط و الخواطر وهالقصص بس مرات بطلع معي اشي بقوم بوجع فيه راس الناس اللي بتابعوني :)

انت بتنوريني دائما و هي اليوم صار معي موقف قهرني شعبرت عنه بدون تنميق وطجيته زي ما هو :$

 

"فقدت قدرتي عالتعبير"
ho meen da7ik 3alaiki o gal enno 3ndek ta3beer asla6an

!!

-------
I was gonna comment on the "baby" I had really a good "bad" line but u ruined it as u mentioned him in the post

yn3an tabban!!

:P

-------

mobarak , ma3karoona lal sobi7

make a big big waleemeh o e3zimy a5ooki 5a9 na9

:DDD

 

اصلاطن انت مقهور من ابداعي اللامتناهي :)

قبل كم يوم كمان ربحت اشي تاني بس لما استلم الهدية بقاهركم لسا بكير هلأ :)

 

عجبني كلامك ألي بتكتبي اشي حلو و لطيف
اذا عندك تويتر ياريت تعطيني الهاندل تاعك حابب اتابعك اذا ممكن

 

عجبني كلامك ألي بتكتبي اشي حلو و لطيف
ذاذ عندك تويتر ياريت تعطيني الهاندل تاعك حابب اتابعك اذا ممكن

 

اهلا سهلا مدثر محمد

واهلا عماد القيسي....انا غير فعاله اطلاقا على تويتر :)
شكرا لمروركما