Things I Like To Whisper About

Would You Hear Me Whispering

مشاهدات وسبرية ساعة الصبحية في الانفصامات العلاقاتية...المشاهدة 6




دمك خفيف و دمه خفيف...بتتناغشو على بعض و مستلطفين بعض و مستخفين دم بعض لاقصى درجة بزيدها معك بالمزح بتزعلي او تدايقي , مرات بتعاتبيه بتطلعي كتير حساسه و هو كان مفكرك غير هيك, بتطلع حساسيتك مزعجه, قد تقلّي عقلك و تستسمحيه و قد تصل فيكي مناحه العقل انك تعتذري و هو لانه صاحب قلب كبير بسامحك على مضض وعلى وعد منك انك ما تكرريها و بنفس خفة الدم الاولى برمي كلمة تانيه بتبلعيها انت زي الشاطرين علشان تثبتي انك مش حساسه.

نقلب الموقف و انت تغلطي و تخففي دمك و تمزحي معه نفس ذات المزحه اللي مزحها معك فوق, عن خباثة من باب وحده بوحده و ما صدقتي و هي اجت الفرصه - خلينا واضحين ان كيدهن عظيم ما بدنا نكذب - و قد تكون مزحه بريئه وانت ناسية تماما اللي هو عملة فيكي قبل - عاساس بننسى اشي مهو الاسى مابنتسى يختي - بتقلب جد و رجولة وما بطلعلك و لو وحده تانية مزحت معه هالمزحه كان بكف قلبها سبع براويز عالحيط, بتحكيله و بتحليفيله انك ما كان قصدك وانه ما فيها شي  و ممكن تذكرية بانه مزح معك هالمزحه من قبل ,برد الرد العجيب  " انا شب و الشب غير" او "انت ما راح تفهمي شو بعني كلامك من وجهة نظر الشب"

هلأ برضه انت و اعصابك و حجم المصيبة و ردة الفعل بتقرري شو تعملي و اذا حابة تفهمي شو يعني الشب غير و حابة تفهمي معنى كلامك من وجهة نظر الشب , بدك تروحي لنفس ذات العرّاف  لاستخراج الارواح و التنجيم لحتى تفهمي شو قصده بالزبط :)


7 التعليقات :

ايواااااا...

مهو مشان هيك البنت لازم يكون عندها حدود...

مشان هيك لازم تكون هي صاحبة المبادرة وتفهم الشب انو اخدان وجه زيادة ما بدها الشغلة... فازا هو من النوع اللي بيمزح مزح تقيل ينضب ويلم التعابين ومعاها بالذات يغير اسلوبو لأنو غير هيك -ببساطة- رح تحطو البنت بخانتو الزغيرة جداً اللي ما بيستاهل اكبر منها... وازا رفع راسو بجحرة منها بتكسرلو ياه...

أنا شخصياً هيك بتعامل...

اللي بيعرفوني وبيعرفوا حدودي بيتعاملو معي بكل ارتياح... واللي بيستهبلوا وبيساووا حالهم "كوول" وبيحاولوا يتعاملوا معي بأريحية -لأنو بتعرفي احنا هون بالأردن طول عمرنا هيك تعاملنا أريحي وفريندز وكوول والشباب والبنات كتيير أصحاب ومافيها أي اشي أبداً- بعاملو بما ذكر أعلاه :-)

هاد هو اسلوب التعامل الأمثل :-)

بحيرة البجع

 

إنجن البلوغر معي :(

ينعن طم طم بس :(


-------------

الحل لما في أعلاه هوه\

سنحه سوباعية الأفق تسفقهم ع قفا وجيههم الجوز \
إنتهت القصه
نقطه
سطر جديد

 

اشتقت لحكياتك بجد استمتعت من الصبح :))

 

a9lan l mazi7 l enathi makrooh

o ymkin 3aib kaman!

 

ايه!!! ليه مو راده عالتعليقات هون ؟؟

@بحيرة البجع

انا مثلك...بحكو عني دفشة و بدج دج ومع الوقت بتعودو على طريقتي و بلزمو حدودهم

النغاشة زايده هاليومين و المجتمع الوظيفي بخليكي تتعاملي مع كل الاصناف فالافضل تكوني واضحه من اولها و ما تستني الايام تعلمهم للجماعه...موقف و بكون درس للكل :)

@Um Omar

هههههه بحب المختصر المفيد و الدخول بالموضوع على طول :)

البلوج عتبان علينا لانا هاجرينه شكله :$

 

@لبنى
الله يسعدك يا قمر
اشتقنا لهالهالم كتير...ان شاء الله نرجعله قريب

@Haitham

شف الرد الذكوري البحت O.o

تعلم من ام عمر...جابت اجل الجهتين بكل عدالة و روح رياضية عاليه