Things I Like To Whisper About

Would You Hear Me Whispering

عيد العمال


المشكله الاساسية في مؤسساتنا الحكوميه هي انهم ما بقدرو ولا بحاسبو الموظف على شغله وعلى انجازه, لأ اهم شي اي ساعه اجا واي ساعه روّح, اذا تأخر 10 دقايق يكتب مغادرة و يتحمل عشرطعشر جميله و انه يضل قاعد بمكتبه طول فترة الدوام بغض النظر شو بعمل, نت و فيسبوك, شات العاب مش مهم المهم يكون قاعد بمكتبه.

اليوم المدير مصبح مستنفر, من الصبح واقف مكشر جنب ساعه الدوام ولا صباح الخير ولا برد السلام, و كلّف مدير مديرية موظف اله 100 سنه بشتغل بالوزارة بانه يلف عالمكاتب و يكتب اسماء اللي قاعدين بمكاتبهم و اللي مش قاعدين, ولما سأل عن وحده من الموظفات اللي بالمكتب اللي جنبي و حكوله انها بالتواليت, علّق واسفه عاللفظ لانه لازم انقله حرفي " ول عليكو كل الموظفين  انسهلو اليوم كلهن بالحمام" , انا كنت بشتغل و مجدّه من الصبح والله العظيم انه احبطني و لما رئيسة القسم للموظفه اللي مش بمكتبها وقفت قدام التواليت و نادت على اسمها انصدمت و حكيتيلها "من كل عقلك بتستني تحكيلك نعم من جوا الله اكبر حتى على التواليت لاحقين الموظفين"  استحو و مشيو

هلأ ما بنكر ان في نسبة كبيره من الموظفين ساعه على بعضها ما بشتغلو , وبنسو الضمير و الحلال والحرام, و خصوصا اللي في الهم تعامل مباشر مع المراجعين واحنا مؤسسة خدميه بتخدم ناس مساكين ومحتاجين, طريقة التعامل على النفتره على الذل و الانتظار على الخمسين الف مشوار ليجيبو اوراق لاستكمال المعاملات و اللي بعطوهم اياها بالقطارة و روح وتعال,لانهم عارفين انهم ما بتحاسبو على كل هاد ولكن بتحاسب الموظف اذا ما كان قاعد على مكتبه او اذا روّح قبل بدقيقتين من نهاية الدوام.

غير عن التقدير السنوي و اللي برضه "بعض" المدرء بكون تقديرهم ابعد ما يكون عن انجاز الموظف, صاحبتي المحاسبة اللي ما بعطوها اجازه الا بميت الف واسطه لانها ماشاء الله مخ نظيف و انجاز و دقة و حل لكل المشاكل تقديرها طلع جيد بس, ولما راحت تراجع مديريها بحكيلها " انا باجي عندكم عالمكتب ما بتوقفيلي بس ادخل, وبعمرك ما عزمتيني على قهوه ولا شاي, بعمرك ما جاملتيني بكلمه بصباح"
ردت عليه بانها لما قرأت قانون الخدمة المدنيه وفيما يخص التقديرات السنوية ما قرأت باب المجاملات و العلاقات الاجتماعيه فيه و طبعا ما عملت شي لانه اذا اعترضت بتيجي لجنه من الوزارة تحقق و طبعا طبعا راح تطلع محقوقه غير عن موضوع المحسوبيات و العائلات و العشائر و الوساطات, مستحيل يطلع موظف صح ومدير غلط.

المهم يا جماعه انه خميس جمعه سبت عطله و ان شااااااااااااااااء الله انّا نكيف :)
كل عام و كل يوم و كل دقيقه و الجميع بالف خير دائما :)






8 التعليقات :

دخلك إعملي أبديت وحطي إسمي مع الصوره
مارح نكيف :(
مافي عطله

 

واااااع :'(

في الامارات ما في عيد عمال و لا شي
بدي اعطل زيكوا :'(

 

اولا ان شاءالله بتعطلوا وبتكيفوا يا نيالكم
ثانيا والأهم اقول لا حول ولا قوة الا بالله
الجمله هاي استوقفتني كثير وخلتني مش عارف شو بدي اكتب "انا باجي عندكم عالمكتب ما بتوقفيلي بس ادخل" ـ
اذا كانت هاي عقلية مدير فللأسف ما في امل بتحسن الاوضاع في الأردن.
قبل كم يوم كنت احكي مع شاب صاحبي حكيتله يمكن لازم اطلب لجوء في امريكا خوفا على حياتي لأنه ممكن مدرس جامعه ينطخ بسهوله من طالب. يعني لا الدوائر الحكوميه سليمه ولا الجامعات ولا المدارس شلون بدها الناس تكون مبسوطه وتحب البلد؟
للأسف بالأردن في موظفي كثير بيشتغلوا بذمه وامانه بس لا الدوله ولا الناس بتقدر وبتثمن تعبهم.

 

هو المدير شكله مستنفر لانه طلع للموظفين يوم عطلة اصله بيغط على قلوبهم اذا الموظف ارتاحله يوم.
ويالنسية لصاحيتك المحاسية فمن رايي تشتكي بعرف ما راح تستفيد بس العيار اللي ما بيصيب بيدوش ولاحقا بيصير يحسب حسابها بس اتقاء للمشاكل هالشي شفته اكثر من مرة بالشغل.
عالعموم كل عام واحنا العمال المشعتلين بخير وانا شخصيا كيفت نوم وافلام :-)
شجعتيني اكتب عن يوم من مغامراتي بالشغل. راح افكر بالموضوع ;-)
 

 

This comment is for Kayyaleh. Sorry I don't have Arabic keyboard on this machine.
You don't have to think about it. Just write about your experience at work. Jordanian bloggers are getting too lazy. What is going on?
Whisper, thanks for blogging again. I like reading your posts

 

جراد. المسألة مو مسألة كسل بس الكل في الاردن نفسيته تعبانة هالفترة. أزمة السوريين والمشاكل و كل يوم بتسمع بقتل في الجامعات أو قي الحارة اللي جنبك والمجازر اللي معبية الاخبار.
باجي تاكتب اشي كوميدي بحكي لحالي ما اسخفك ومين اله نفس يضحك او اكتب اشي درامي طيب هي العالم ناقصة نكد؟
حتى الكتابة اللي كانت متنفس عندي ما عاد الها طعم.

 

Um Omar

عطلنا و نمنا و ضلينا بالبيت وما تحركنا :(
بس الحمد لله مدامنا عطلنا اذا كيفنا :)

Lio

بالامارات العطل بتجنن بتسحب ايام عيد الاتحاد لحاله حكايه :)

خلص خلص لا تزعلي خديلك اجازه وانا بتواسطلك عند المدير :)

 

Jaraad

الروتين والملل بخرب كل شي بس زي ما حكيت لام عمر مدام نما اذا كيفنا :)

للاسف هالعقليات منتشرة كتير في المؤسسات الحكوميه والله اعلم ان الخاصه فيها برضه هيك...الاجتماعيات و المجاملات و النفاق هو اللي بمشي و الشغل اخر شي بتفكر فيه

هاي مصيبه جديده العنف اللي صاير بالجامعات ...و قبليها كان منتشر ضرب الاساتذة و ضرب الاطباء
الله يحمي الجميع و يهدينا و يهديهم يا رب


بالنسبة للكتابة قررت اكتب اي شي بخطر في بالي و شوي شوي بنرجع :)
شكرا لتواجدك دائما :)


كيكي

فكرت كتير انها تشكي و لمّا سألت بالوزارة نصحوها انه بلاها لان الشكوى راح تضل بملفها ...يعني ورقة اثبات انها تبعت مشاكل و اكيد ما حيصير شي فبلاها

ههههه نووووووووووم وهاد اهم شي :)

يااااا ريت تكتبي...يا اختي خلينا نفش قلبنا شوي
لا تفكري كتير...طبقي بدون تفكير
اكتبييييييييييير