Things I Like To Whisper About

Would You Hear Me Whispering

وبحكولك ليش الدكاتره بنضربو




ماما من قبل العيد وهي بتشكي من ركبتها و مع عجئه العيد و طلوع درج و نزول درج زاد الوضع, راحت عالدكتور و اعطاها مسكنات و حولها للمستشفى علشان التصوير, اخدنالها موعد يوم الثلاثاء الجاي عند دكتور العظام في المستشفى ليصوروها و يعملو اللازم, طبعا 100 ترجاي انها تقعد و ترتاح و لكن بدون فائده, الها كم يوم بتسحب رجلها سحب و ما بتقدر ترفعها و اليوم و هي بتمشي من عند الباب ما قدرت ترفع رجلها و ضربت بالعتبه, حبيبتي داخت من كتر الوجع و الحمد لله كنت جنبها, طبعا نشف دمي و صرت انادي على اخوي زي المجانين :( الحمد لله صحصحت و مشي الحال.

حكينا ما بدها هلأ بدنا نروح طوارئ عالمستشفى, دور و عجئه طبيعي و ساعه الا شوي لدخلنا على غرفة طوارئ العظام , مع ان الناس بتتجاوز الدور وما حد حاكي معها شي ضلينا قاعدين لان اللي عالاستقبال حكالنا ارتاحو و انا بنادي عليكم بالخمس مرات اللي رحت اساله فيها ايمتا دورنا.

اجا الدور و لله الحمد و قبل ما حد يفحص قررو نصور الركبه, اخدنا ماما عالتصوير و صورناها, كنت انا و اخوي مع ماما و طلبنا من بابا يروّح لانه اساسا ظهره و ركبه بوجعوه وما بقدر يمشي ولا يضل واقف بالمستشفى, برضه دور عالتصوير و لكن اكثر تنظيما, خلصنا و رجعنا لغرفة الطوارئ  اعطيناهم الصور و الممرض علقها عالجهاز الخاص بصور الاشعه و خصصولنا سرير لماما, ماما فضّلت تضلها عالكرسي المتحرك لانها مش قادره تحرك رجلها, بعد بنص ساعه و احنا بنستنى حد يجي اجا الدكتور المقيم بسالنا عن الحاله, شرحناله و فحص رجل ماما و استأذن علشان يروح  يشوف التصوير و يرجعلنا , و قبل ما يطلع بحكيلنا لسا هلأ كان دكتور العظام واقف و راح و الله اعلم ايمتا يرجع, اخوي وصفله شخص كان واقف جنب الممرض اتطلع على الصور و اتطلع على ماما و طلع من الغرفه, طلع الاخ هو الدكتور بس فضل انه يطلع من الغرفه قبل ما يفحص ماما, الدكتور المقيم حكالنا هلا بنتصل فيه و بيرجع, رجع بعد نص ساعه تانيه رجع الدكتور المقيم يحكيلنا عن الصوره و عن العلاج المتوقع لرجل ماما و لكنه مش دكتور عظام و بترك القرار للدكتور اللي حكو معه وحكالهم انه  هيو جاي, واقترح يعطي لماما ابره مسكنه لحتى يخف الوجع.


اجت الممرضه بعد نص ساعه  و اعطت ماما الابره مفيش ربع ساعه  ماما صار وجها اصفر و صارت تحكيلنا انها دايخه و حاسه حالها بدها تستفرغ, ركضت عالممرضه الاخت و بكل برود بتحكيلي اه هاي الابره بتعمل كل الاعراض دوخه و لعيان و هبوط عادي عادي, رجعت عالغرفه ماما غمضت عيونها و بطلت قادره تتحرك ولا تحكي, حملناها انا و اخوي و نيمناها عالتخت و رجعت للممرضه وين الدكتور , ال حكو معو 3 مرات و حكالهم هيو جاي , ساعتين ونص و احنا بنستنى الدكتور اللي لا ذمه ولا ضمير لانه حسب ما فهمنا ما اله شغل تاني بالمستشفى غير طوارئ العظام يعني الغرفه اللي احنا قاعدين فيها , حكيتلها عن وضع ماما للممرضه وانا نشفان دمي بتحكيلي " الحجه شكلها بتبالغ" اخوي هون اعصابه اللي ضلينا انا وماما نهدي فيها طول الساعتين فلتت منه, صار يصرخ و يبهدل قام الممرض حكاله انا ما الي دخل بس يجي الدكتور صرخ عليه بدخلت الاخ الدكتور, اخوي بلش يحكيله " كيف انت دكتور و بتتطلع على صور مريضه بالطوارئ و بتتركها و بتطلع؟" 
الدكتور و بكل وقاحه  الدنيا و بنبره مستفزه جدا  " عندك مشكله ما تحكي معي و روح اشتكي" 
اخوي بلش يصرخ ويبهدل و حكاله "اه بدي اشتكي عليك" , حكاله الدكتور " اطلع بره اشتكي و بديش حكي كتير"  
اخوي " انت واحد مش محترم و لو انك محترم كان حسيت انك بتتعامل مع بشر و مرضى وانا راح اشتكي عليك و هلأ" و كان اخوي ماشي باتجاه الدكتور خلص ضاربه لولا تدخل الممرضين و باقي الدكاتره, اجا دكتور عظام تاني اخد اخوي يهديه و بعدين اجا شاف ماما و تبين انه ردّه فعل الابره غلط و هاي اول مره بصير بمرسض هيك و طلعت رجل ماما بدها جبص :(

الدكتور نفسه اخد ماما و حطلها الجبص وبدقائق كانت الوصفه مكتوبه و المواعيد محدده و الدكتور التاني اعتذر لاخوي و حكاله اذا بدك تشتكي هاد حقك بس انا عملت كل اللي بقدر عليه للوالده , اخوي حكاله انا مش جاي اقاتل انا  معي مريضه بدي اعالجها و اروح, و احنا مروحين اجا الدكتور المقيم بحكي لاخوي معك حق باللي عملته و انا لو مكانك بعمل نفس الشي, شو مريض طوارئ يستنى دكتور ساعتين و نص, و احنا دائما هالدكتور بسببلنا مشاكل مع المرضى و اهاليهم.

من ال 8 المسا لل 1 بالليل و احنا بالطوارئ....طب بالله عليكم هيك دكتور بدوش قتله تصحيله ضميره اللي مات و تذكره باليمين اللي حلفه؟؟؟

34 التعليقات :

الف مليون سلامه على مامايا وسبر تصدقى ان حال المستشفيات تقريبا واحد فى كل الدول العربيه يظهر ان مستوى الطب والتعليم اصبح متدهور فى كل الدول
نعانى فى مصر من معامله الاطباء وسوء حال المستشفيات
ربنا يشفيها ويعافيها ويخليها ليكى حبيبتى وبلغيها سلامى من مصر وقوللها الف حمد الله على السلامه

 

اولا حمدالله على سلامة الوالده. نسأل الله لها الشفاء العاجل.
فعلا يوم عصيب اللي مريتو فيه. اخوك معاه حق باللي عمله. انا مش عارف لمتى راح نظلنا بهاد الوضع المزري.
انا قاعد بكتب بموضوع المستشفيات بأمريكا. الفرق مبكي جدا.
المشكله هاد الدكتور نفسه او قد يكون دكتور اخر بنفس الأخلاق ما بيقطع فرض صلاه.
على العموم الله المستعان. مش عارف شو بدي اكتب بصراحه. قصص زي هيك بتنرفزني.
ظلك طمنينا على صحة الوالده.

 

5ls t3o n6a3my m7md atleh leiakoona 3ebrah

slamat

 

الله يكون بعون الناس اللي معاش حدن تطاوش معها

سلامتها للست الوالده,, ألف لا بأس عليها
والحمدلله إنك بالأردن يا بطه :)

في دكاتره حلال حرقهم بكاز وسخ اه والله
وفي منهم بجو ع الفرازه
خصوصي اللي بحطوهم بطوارئ المستشفيات العامه
لازمن يكون بطنك مبقور ومصارينك طالعه ل بره لدرجه إنك قصيتي المراره وحطيتها بجنبك ورجعتي باقي الأحشاء جوات بطنك عشان يفكرو يتطلعو عليكي


بروح الشر عنها,, يارب ما تحتاجوهم بعد هيك يارب

 

الف الحمدلله على سلامتها ويسبر ..
وانشالله بتقوم ع حيلها عن قريب انشالله .. وهي بكامل صحتها وعافيتها ..


من كم يوم اخوي كان عندي ..
حكالي شغله كثير بتعبر عن الحالة اللي مريتو فيها ..
الدكتور لما يصير يتطلع ع شغله كوظيفه .. ساعات دوام واجازات وراتب .. بموت قلبه وبتموت الرحمه اللي فيه .. الرحمة اللي اساساً المهنه هاي انبت عليها ..

في مهن وأشغال ما بنفع نعاملها زي اي مهنه ثانيه .. والطب واحده من هالمهن ..



متأسف عالاطاله ..
وانشالله ميمتك مشافيه ..
:)

 

حمدلله ع سلامة الوالدة يا ويسبر
والباقي خلينا ساكتين!

 

الف حمدلله على سلامه الوالدة و اجر و عافية ان شاءالله ..
اما المستشفى و الدكتور و الممرضة هادول حكايتهم شي تاني.. و اتوقع هما عارفين انه حتى الشكوى ماتنفع !!
ماني عارفة ليش بيصير دكتور و هو مو قد المسؤولية !!

 

ألف سلامة عالوالدة و ان شاء الله ما تشوف شر. جد موقف مستفز و هدول بستاهلو طخ مش بس ضرب ... بنسوا الانسانية و بتفزلكوا ع خلق ربنا!

 

حمدلله على سلامه الوالدة ويسبر والله بيعين

 

salamat alf salameh

deero balkom 3alaiha o 5alloha terta7 bas bdoon ma t7is enno mafrood 3alaiha terta7

mashy
------

zaman kont agool Allah y3een l mostashfayat o ykoon b 3oonhom o ba7awel atfahham enno l dakatrah wel momarideen makleen hawa kaman o masakeen

bas l 3'alibiyyeah lel asaf ma 3indhom dameer

ma biddy tseer malak ra7meh o tethakkar enha resaleh gabel ma tkoon watheefeh

eshta3'el sho'3lak sa7 zay ay watheefeh thanyeah o kathar Allah 5airak

!

a5ooki ma byenlam b haik 7aleh

 

الف الف سلامااات للوالده ما عقلبها شر يارب وتشوفيها باحسن حال باقرب وقت يارب...هلا بالنسبه للي صار فللاسف متل ما كنت احكي لمراجعه اليوم " خالتو باي مكان في المنيح والعاطل ما بتقدري تحكي الكل منييح او الكل عاطل" للاسف حتى بالمهن الطبيه هاد الشي اي في عاطلين نسيو انهم بتعاملو مع بشر وبفكرو انو بس دوام وتقضاية ساعات وبس ...

 

الف سلامة علي الوالدة يا ستي علي الاقل الوضع عندكم ااكتر بكتير افضل من هنا بس فعلاً نحن محتاجين نقيف علي حقنا في الصحة وفي التعامل بانسانية مع المرضي يعني فعلا لو اشتكينا الدكتور هل حيحصل تغيير ولا ادارة المستنشفي غير مهتمه بالمرضي
الموضوع مستفز فعلاً
تحياتي
كونو بخير

 

ألف سلامة على ميمتك ... اجر و عافيه يارب ... و الله يعطيها الصحة و العافيه

في دكاتر جززين و في منهم معاملتهم هي الدواء ... الله يبعد النوع الاول عنا اجمعين :)

 

اولاً : سلامتها
ثانياً : هاي حقيقة الطب في الأردن ، مستوى تعليمي سيء ، و دكاترة راسهم أكبر من أكبر بطيخة في أكبر بسطة ، و لا واحد بعترف انه ما بعرف و شايف حاله و مش مصدق، فمش راح يعجبه لا الراتب و لا الشغل
طريقة التعليم في كليات الطب الأردنية بتقتل الرحمة في نفسيات أغلب الطلاب
و طول ما كان القبول بعتمد على معدل القبول في التوجيهي وبس راح نكون مكانك راوح

 


هبه فاروق
الله يسلم قلبك يا قمر, للاسف الناس اللي بلا ذمه ولا ضمير منتشرين بكل مكان هالايام

اللهم اميين, هي احسن و لله الحمد لكن ما بترضى ترتاح :$

Jaraad

الله يسلمك مالك, اللهم امين
للاسف بالبدايه كنت ضد اخوي انه يصرخ عليهم, بس لما شفت كيف الموضوع مشي بسرعه اول ما صرخ و ردود افعالهم انفش قلبي فيهم و صار نفسي انا احكي كمان
الناس بطلت تعرف الدين منيح و ما بتعرف الا اللي بدها اياه , تطبيق الدين بتعاملهم اليومي و ان الدين المعامله,كله مش مهم, بنصوم و بنصلي و يعطينا العافيه
الموضوع فعلا بقهر
الحمد لله احسن لكن ما بترضى تقعد :(

 

الحمد لله على سلامة الوالدة و إن شاء الله بتتحسن عن قريب، و ما بدي أعلق ع تناحة بعض الدكاترة الله يهديهم

 

I am so sorry..ya3ni waja3 3ala waja3..!! salamet 2alba, inshallah kheir. My mom has the same problem with her knee also, she refused to take the injection and like your mom, she does not sit or rest !!!!

Please give your mom a hug from me, it has to be a Lebanese loving hug,OK? tamneena 3anha dayman..

 

Rain

Allah ysalmek ya rab
3ajbatny el fekra....elmafrood ywafe2 w yda7y 3alashan el mojtama3 2asla6an

Um Omar

اللي بقهر انو ما حد تحرك الا لما صار في صراخ و طوشه و اللي بقهر اكتر ان باقي المراجعين اللي بستنو معنا بدل ما يعبرو عن قهرهم من الدكتور كلهم صارو يهدو باخوي و يحكو بسيطه بسيطه :$

الله يسلم قلبك يا قمر....الف الحمد لله اني هون ويلا ابصر شو كان صار فيي لو كنت بعيده
سبحان الله كيف ربنا بيسر بدون ترتيب من عنا

قصدك وحل؟؟؟ لاااا زيو زيهم
هينا قررنا نضحي فيه انا و قطوره :)

اللهم اميييييييييييين

 

Mr.Jam7awi

الله يسلمك يا رب...اللهم امين بس هي ترضى ترتاح :$

جد بطل في ذمه ولا ضمير عند بعض الاطباء, تجاره مش اكتر ولا احساس انهم بشر اللي بتعامل معهم ولا شي
معك حق, اذا صار الطب و ظيفه بتروح منه الانسانيه

طيل قد ما بدك صديقي...المدونه كلها على حسابك
اللهم اميييييييييييين

Abu Zaina

الله يسلمك
و سلامتها لوالدتك, ان شا الله راح الشر و صارت احسن
الله يشافيهم و يعافيهم و يضلو فوق روسنا يااا رب

اي قسم, زيو زي صف الكلام اللي بدخل من دان و بطلع من التانيه, بطل اله معنى

تجميع فلوس و شوفة حال ما بتخليك تخلص باي وظيفه كانت مش بس الطب

 

مياسي

الله ﻳﺴﻠﻤﻚ يا رب
على رايك..الحكي بسم البدن :$

 

Wafa

الله يسلمك يا قمر، امين يا رب

صاحب اخوي بشتغل بطوارئ نفس المستشفى و بالصدفه ما كان مناوب و لما حكاله اخوي عن اللي صار حكاله صاحبه ان هالقسم دائما في عليه شكاوي و مشاكل

بنسو يختي، بس الفلوس المهم

 

hb

الله يسلمك حبيبتي اللهم امين

شفتي بالله عليكي هالعالم،، جد بدهم طخ
اي انسانيه، فلوس فلوس و ﺑﺲ

 

Susu

الله يسلمك يا قمر
الله بعين شو بدنا ﻧﻌﻤﻞ

 

Haitham

والله يا هيثم مش راضيه ترد علينا و تضل قاعده،الله يسامحها من تاني يوم صارت بدها نفك الجبص بالبيت و بالعافيه لاقنعناها يضل لبكره علشان المراجعه :$

انا لعند ما اخوي بدا يصرخ و مع اني مقهوره كنت يفكر بنفس الطريقه
مساكين و عليهم ضغط و لكن بس كل شي مشي بسرعه بعد ما صرخ انقهرت اكتر و ندمت اني ما فشيت قلبي و سمعتهم كم كلمه بالعظم

اشتغل شغلك وكتر الله خيرك و ضل تزكر ان العالم اللي بتتعامل معهم مرضى و عائلات ﻣﺮﺿﻰ

 

Miss Light

الله يسلم قلبك يا قمر امين يا رب

انا معك تماما وهالشي بنطبق على كل مكان وظيغي
حتى انا كموظفه حكومه سابقا و لاحقا بحكي نفس الشي وبتعرفي سمعه اخلاص موظفين الحكومه
بس لما يكون شغلك طبيب و مش مواعيد لا طوارئ فلازم الاخلاص يكون مضاعف

واكيد التعميم باي شي مش ﺻﺤﻴﺢ

 

sab7al5air
الله يسلم قلبك

كمان :$ كل هالمصايب و اكتر عندكم الله يعينكم

مشكله اذا بدنا نقاتل على كل شي بحياتنا وخصوصي على حقوقنا اللي مفروض ناخدها بدون اي تعب ولا تحميل ﺟﻤﺎﻳﻞ

الشكاوي بتتاخد بعين الاعتبار في المواقع المهمه اللي بتحترم حالها و بتحترم العالم اللي بتتعامل معها
اما مثل هيك مكان متعودين عالشكاوي و الدكتور اول كلمه حكاها روح اشكي ومش هامه دليل ان ما في اي اجراء بيتخذوه بهيك مواقف

اهلا و سهلا يا قمر...ﻧﻮﺭﺗﻴﻨﻲ

 

Lioness

الله يسلمك فوفو امين يا رب

يا عيني عليكي..مرات كلمه منيحه و تعامل طيب بخليكي تشفي من اي مرض
الله يسامحهم و ﻳﻬﺪﻳﻬﻢ

 

خبر

الله يسلمك يا رب

نبره صوته و طريقه كلامه بتدل انه محملنا جميله انه جاي يعالجنا
و لما اجا الدكتور التاني يهدي الوضع اجا الاخ يسال عن اسم ماما ليعطينا اوراقها انه ما بده يعالجها..جد نفسيات مريضه و بدها علاج

المفروض يعطوهم ماده انسانيه و صحوه ضمير كل سنه بالمستشفيات لحتى يعملولهم ريفرش و يذكروهم اصول ﻣﻬﻨﺘﻬﻢ

 

Saleh

الله يسلمك صديقي .. الحمد لله في تحسن هلا

الله يهديهم و يهدينا ﺍﺟﻤﻌﻴﻦ

 

Al7amdolellah mama is better now, yes 7bebty :( and the other knee is hurting het too but less than this one

Salamet 2albha 5altoo..they can't set or relax at all ya 2o5te :$

I did and she sends her regards to all of u here :D
Don't worry I gave her a lot of hugs and kisses bekul el2anw3 lool

Thanks ya amara

 

يعني أموركم بكم دقيقة انحلت !!! طيب من الأول... لازم يجيب لحاله البهدله يعني؟! احنا شعب ما بنيجي إلا بالصوت العالي آآه والله ....مشكلة المستشفيات والنظام الطبي عنا مشكله عويصة الناس بطل عندها ضمير بالأول وثانيا مافي محاسبة جدية وفعليه من الإدارات والنقابه !! يعني لو ينادي عليه المدير هالطبيب ويرشوا بهدله ويهدده بالفصل لو اتكرر الموضوع عمره ما بفكر يعيدها ويأخر العالم !!!
وسلامتها الوالده :-) شكلها يعني طلعت مكسوره ؟!

 

للاسف بعد الصراخ والبهدله و الطوشه والتهديد كل شي مشي بسرعه و على اكمل وجه

يعني طبيب و طوارئ يقدر ان الموضوع مش مستحمل و يشتغل شغله صح..مش طالبين اكتر من هيك

الله يسلمك يا رب..طلع عندها تاكل بالركبه و بس ضربت رجلها في نتوءات كانه تكسرت وبس تتحرك الرجل بتصير تحك من جوا و توجع و بتدوب مع الوقت فجبصنوها لحتى ما تتحرك...هيك فهمنا من الدكتور :)

 

سلامتها و فرصة تدلعوها غصب عنها :))

 

الله يسلمك يا رب
بتعرفهم الامهات ما برضو يقعدو مش يتدللو :(

بس تخفش علي بكل شي بسبقها بالحلفان فااا بتضطر ترتاح ﺷﻮﻱ