Things I Like To Whisper About

Would You Hear Me Whispering

لمّا تعيش لحالك






بس تعيش لحالك كتير اشياء بتتغير بشخصيتك و بطريقة تفكيرك, بعيدا عن قوة الشخصيه و الاعتماد على الذات و هالقصص, في اشياء بسيطه بتتغير وانت مش حاسس فيها.

مثلا انك بتصير تحكي مع حالك و بصوت عالي و بكل اريحيه.... بتتقاتل مع حالك و بتبهدل و بتنكّت و بتحشش و بتلوم , كله مش ضميريا...لأ صوت و صوره :)


اشي تاني بتغير, ردود افعالك على الاشياء بتقل مع الوقت, قبل كنت احمل هم الشي بس يصير و اقعد افكر و ينسم بدني , هلأ الامور - بعض الامور علشان الحلال و الحرام لاني لسا بسم بدن حالي على اشياء تافهه - صارت تمشي اسهل

مثلا.... قبل كم يوم وصلت عالبيت من الشغل متأخره و يا دوب 5 دقايق و حيأذن المغرب, الاكل كان جاهز بس بدو تسخين, اكتشفت ان ما عندي غير عودين كبريت, حكيت عادي بشعل واحد و بحاول احافظ عالتاني قد ما بقدر ليطلع النهار و بجيب تاني يوم, ولّعت عين الغاز و كلّه تمام و اشتغلت العين, طفيت عود الكبريت هوب طفى الغاز :$ طلعت الاخت الحريصه حضرتنا مسكرّه الجره كعادتها بعد كل استخدام, عادي في عود تاني, سخنت الشوربه و سخنت الاكل و كلّه تمام, ولمّا رفعت الطنجره عن النار قررت اني ما اطفي الغاز استحياطا بركي في شي هيك او هيك, ياااااااااااااااا دوب ها يا دووووووووووووب ببعد الطنجره عن الغاز لاحطها عالمجلى حتى اسكب الاكل هب طب فلتت ايد الطنجره وكل اللي فيها بشكل انسطاحي انبساطي انفراشي على السجاده تحت المجلى و الارض :(

اول شي لفيت وجهي لاتأكد ان الغاز لسا مشعول, مشعول ولله الحمد, تاني شي حكيت لحالي - اه بصوت كمان - يلا الك كم يوم جاي ابالك سمبوسك و شيش طاووق, طلّعت الاخوان من الفريزر , مسكت السجاده كتيت اللي عليها و فورا عالغساله, نظفت الارض, قليت الاخوان و هم نم ولاااااااا كأنه صار شي :)


لو انا زمان...ياااااا لعوووويييييي...كان انئمصت و حردت و برطمت و انسدت نفسي عن الاكل...بس على مين!!! ويسبر تتحدى الملل :) لا مش ملطوشه من حد هاي ما تحاولو :)

في اشياء كتير بتتغير ....هاد اللي متزكرته, يا ريت تشاركوني باللي تغيّر فيكم و انا بس اتزكر شي جديد بخبركم :)


* ملاحظه ع الهامش.... اللي فوق كتبته من شي 10 ايام بس ما بعرف ليش ما نشرته
تقبل الله طاعاتكم و عيدكم مبارك ان شاء الله
بتمنى تكونو ما نسيتوني بالدعاء بالشهر الفضيل اللي مر طيران.....اللهم بلغنا رمضان

16 التعليقات :

والله لك وحشة
ولك عندي اعتذار شديد ..انا عارفة ليه.

عيدكم مبروك ومبارك ان شاء الله

التدوينة محتاجة قعدة ووةقان وهاالساة
مافيش وقت خالص..

لغير القيام بالواجب ع السريع

 

حبيبتي و اختي و صديقتي الغاليه لطيفه

و الله اني مشتاقه كمان.... و مقصرّه و بشدّه :$ سامحيني

الله يبارك بعمرك...علينا و عليكم باذن الله

نورتيني و بتنوريني دائما يا قمر :)

 

كل عام و انت بخير يا رب
طبعا الحياة لحالك اعتماد تام و هادا جربته و كان صعب خاصة اول سنة جامعة
يمكن يكون اهون او اصعب لما يكبر الواحد مش عارفة

 

لووووووووووووول ..
زماااااااان عن برطمت هاي ..
D:

انكسر الشر ستنا ..
ووقع قلب عدوينك الاهي ..
على السجاده ..


بالنسبه الي ..
ما تغير في اشي يذكر ..
قصة "بحكي مع حالي بصوت عالي" ..
موجوده من زمااااااان .. وحوارات مطوله ومفصله .. خصوصاً لما بكون بعمل بشغله .. وبتناقش مع حالي إنه هاي بتزبط .. لأ هاي ما بتزبط ..
بتذرك اني حتى ايام الجامعه كنت احكي مع حالي بصوت عالي بالشوارع ..
وياما اكلت تعليقات وتخويثات من شلتي ..

الهم بهيك اشياء ما بهكله كثير ..
يمكن لإني شب ..


بالنسبه للي اتغير فيه ..
بعتقد .. زاد انعزالي عن الناس اكثر بكثير من ما كنت أول ..
كونه في البيت في الاردن في ناس واشياء مفروضين عليّ ..
بس هناك كله بخياري وبايدي ..
وبطبيعة الحال .. انا راحتي في وحدتي ..

اضيفي لذلك إنه صرت أنظف غرفتي كل فتره وفنره .. إنه جد أنظفها ..
P:

 

خم نم + برطمت ..... هيهيهييييي :جميل:

الله يرحم أيام هالمصطلحات

---------

عجبتني إنو على الغسالة على طول... صدقت أنا!

ههههههه

صارت ويسبر تعرف شيش طاووق/// شكرًا يا الإمارات :P
-----------

يمكن ما تغيرت كثير أنا، مع إني درست بإربد و منت ماخد بيت هناك بالبكالوريوس و الماجستير بس ما أظن اسمها غربة غربة يعني! أهلك بعاد 70 كم بآخر المطاف مهو.
بس اتعلمت المسؤولية أكثر؟ نعم

كنت ماما البيت! هههههههه
+ الواد سيد الشغال اللي بجيب أغراض البيت كل أسبوع و هيك ...

اللي و لا قدرت أقدرله = الطبخ! + الكوي! شيئان يحتاجان فن أظن :)
--------

يمكن زي ما قال كوز
الانعزالية (حسًا و معنى ً) زادتا باطراد: صرت بأفكاري منعزل أكثر + الناس اللي بحب أكون معهم = نسبتهم صارت أقل و أقل! مع إني ل 6.5 سنة عشت مع أقارب و أصدقاء أعرفهم من قبل الجامعة بس يمكن يمممممكن لما ال settings تغيرت و عرفنا عن بعض أشياء جديدة و هيك + يمكن كمان خوفي أن يعرفوا عني أنا أشياء جديدة ساهمت بهالشي

--------

بدعواتنا و الله يا ويسبر، دائمًا

 

:) والله هذا الموضوع في بالي له فترة.. عن جد الحياة الفردية بتغير كثير أشياء بالواحد.. موضوع الأكل عندي مش مهم لأني بروح متأخرة فأي شيء موجود كويس.. وما بطبخ إلا مرتين بالأسبوع وبعزم حالي السبت عند أختي ههههه

فيه شيء لاحظته على حالي كمان.. إن تجربة الحياة الفردية ومع الوقت بتخليك تطلع على الحياة الاجتماعية من عادات وتقاليد وعيب وواجب ولازم ومش لازم بطريقة تانية... يعني بحس إني كل الكم الهائل من هالمعتقدات حطيته عجنب وعاينت كل شيء موجود واللي ما لوش داعي تخليت عنه واللي عاجبني خليته.. يعني بطلت أنافق اجتماعيا أي حدا.. فيه كثير أشياء يفرضها المجتمع عشانها "لازم وما بصير إلا نعملها" ما بعملها. ما بجامل حدا إلا بما فيه.. فيه كثير من التقاليد مالهاش داعي وما بعملها

طبعا كل هذا صعب في مجتمع تكثر فيه تعقيدات المجاملة الاجتماعية.. بس الحياة الفردية بتخليك قادر تواجه اللي مش عاجبك في هذه التعقيدات حتى لو الناس حكت عني إني "أنتي-سوشال"

الحديث يطول لكن لهون بكفي

كل عام وانت بخير يا ويسبر :)

 

الواحد لما يعيش لحاله بيكون تقريبا ع راحته بس مرات بتصير هاي الراحة مزعجه للاشخاص الثانيين
الوده بتخيليك تعيدي التفكير بكثير مواضيع بعيدا عن المؤثرات الخارجية

كل عام وانت بخير :)

 

مساء الورد

كل عام وانت بخير وعيد سعيد

جميل أن الوحدة أو العيش بشكل

منفرد يكسبنا بعض الأشياء ومنها

إطفاء جذوة العصبية التي تتملك

البعض بحيث تحيل حياته لجحيم مع

أبسط الأمور وأحييك على هذا التغيير

تحياتي وإحترامي

 

لبنى

وانت بالف خير يا قمر....غربة الجامعه غير عن غربة الشغل....كل وحده الها تجاربها الخاصه بس يمكن الشغل وعدم التزامك بقرف دراسه بعطيكي حريه اكتر و خصوصا انك بتاخدي راتب :)


Mr Jamhawi



اسكت يا خوي ....طول الدوام كنت افكر بالاكل اللي جاهز و بتعرف صايمه و بتشهّون
يلااا الحمد لله اكلنا اشياءات زاكيه برضه :)

انا حميّله هم درجه اولى...مرات بحكي لماما حاسه كأنه عندي امتحان فيزيا و مش دارسه...قمّة الكئابه يعني :)

اهاااا...حب الهزله زاد عندي لدرجات كبيره و هاد شي مزعجني بصراحه

التنظيف ما تغير علي...الطبيخ قفزه نوعيه بالنسبة الي :)

 

Sheeshany

خم!!! مقلش...مقلش يا مفتري

الكوي بكرهه وما زلت امقته بس مجبرا اخاك لا بطل...مع انه في النا دراي كلين بما انه بنلبس يونيفورم للشغل بس بكره ريحة الاواعي من الدراي كلين فبضّطر اغسل و اكوي :)

شغله جيبة اغراض البيت وانك رب الاسره هاد برضه تغيير و تحسب وتكتب شو بدك وشو ناقصك وشو نأجل و شو مهم, فكره الالتزام بالمكتوب على الورقه الحمد لله بتزايد مستمر بس لسّا ما حققت الهدف المطلوب :$

هوهوووو شيش طاووق و كوردن بلو... العمليه وسعت اوي :)

Asooool

القلوب عند بعضها يا قمر :)

اخد القرارات بحد ذاته رائع جدا و تحمل النتائج بغض النظر شو كانت


انا هربت من هالنقطه.... الالتزام بعادات وتقاليد العالم ما الها دخل غير براي فلان وعلّان ارتحت منها بنسبة كبيره مش نهائيا لان هالعالم بضلهم وراكي وراكي :$

لااا طولي طولي قد ما بدك يا قمر...وانت بالف خير يا رب
ربنا يعيده عالجميع بالخير

 

مياسي

عالقليله واحد فينا مرتاح لانهم بالعاده لا برتاحو ولا بريحو :)

وانت بالف خير يا رب

ريبال بيهس

مسائك سعيد و اهلا وسهلا فيك في مدونتي المتواضعه

اصدقاء اختي اللطيفه لطيفه اصدقائي اكيد :)

وانت بالف خير و ربنا يعيده على الجميع بالخير

انا و لله الحمد مش عصبيه ولكن هديت اكتر بالغربه....الرضا بالقرارات والنتائج صار ابسط و اسرع من قبل

اهلا فيم مره تانيه :)

 


Thank you for your wonderful topics :)

 

Thank you for your wonderful topics :)

 

ع فكرة معك حق اكتر اشي بشغلة الحكي مع حالك بصوت عالي >>> أنا هيك صار معي ايام الغربة
بس اطمني, الحالة بتخف تدريجيا لما ترجعي من الصحرا تبعتك لمكان فيه ناس.. وحبيت كتير رد الفعل "الكووول" بعد عملة كب الطبيخ :P

 

اهلا اهلا بعروستنا الحلوه :)

الله يطمنك...انا راجعه عند اهلي وكنت خايفه وضعي يكون صعب عليهم...مش ناقصهم المساكين

انا انصدمت برده فعلي :) ذكريات لبعدين هاي