Things I Like To Whisper About

Would You Hear Me Whispering

عن التحرش



امبارح كنت بتفرج على صور عالفيس بوك للسلسه البشريه "زيي زيك" اللي صارت بعمان بتاريخ 25\6\2012 اللي شاركتنا فيهم مدونه فريكه مشكوره , هالسلسه كانت من دوار المدينه الرياضيه الى دوار الداخليه للتأكيد على حق الاردنيات بمنح الجنسيه لابنائها و رفض للقتل بداعي الشرف و تزويج المغتصبه للجاني و منع التحرش.

معظم التعليقات و كالعاده تركت الموضوع الرئيسي و الهدف و الرساله من هالسلسله وكانت استهزاء عالصور و اصحابها وعلى الكلام, المشكله ان المستهزئين ما بعرفو انهم احد الافراد اللي هالسلسه بتوجههلها رساله و بشكل واضح و صريح.


التعليقات تم الغائها حسب ما شفت اليوم كانت خصوصا على صور البنات ,في منها استهزاء وفي منها "تحرش" لفظي صريح على صاحبة الصوره, المشكله ان شبابنا بفكرو ان الموضوع بس بخص باقي بنات العالم وما بخصهم, ما بخص الفتيات بعائلتهم اخواتهم....امهاتهم...زوجاتهم...بنات عمهم ..الخ

بفكرو ان بنات عائلتهم معصومين من المعاكسات ومن التحرش, لو كل واحد فيهم راح و سأل اي قريبه اله لحكتلهم بلاوي زرقه سمعتها او صارت معها بس هي ردّه فعلها كانت محدوده هذا في حال انها ما ضلّت ساكته وما عبّرت.

قبل فتره كتبنا عن ظاهره المعاكسات و في اكثر من تعليق من صديقات النا حكولنا عن تعرضهم لهيك مواقف, وقديش هالمواقف بتسبب ازعاج للبنت, ولكن شكله البنات بحكو بشي و الشباب بفكرو هالشي خاص بهالبنت اللي حكت.

لمّا حضرنا فيلم 678 انا و اهلي, اخوي وبابا كان تعليقهم كأنه هالموضوع بصير مع بنات معينين او في بلدان معينه ومن قهري بديت احكيلهم "بعض" و "اخف" المواقف اللي تعرضتلها من معاكسات و تحرشات, و بدّي اوضح هون ان التحرش بعني تحرش لفظي و تحرش جسدي, ان البنت تكون ماشيه بالشارع و انت تلّزق فيها عأساس المكان ازمه هاد تحرش جسدي,لمّا تستغل ازمه المواصلات و تقعد تدافش بالبنات هاد برضه تحرش, المهم حكيت قصص بالجامعه و بالشغل, بابا و اخوي التنين انصدمو وللحظات الكلام هرب منهم, و بعديها بدى بابا يحكي عن الموضوع بنظره تانيه و بلهجه تانيه كشخص الموضوع صايبه مش متفرج بس, واخوي بحكيلي انّه عمره ما فكر ان اخته تتعرض لهيك مواقف او تسمع هيك كلمات, و انه راسه بدو ينفجر و نفسو ياخد حقي من كل المواقف اللي حكيتها.

الموضوع مش خاص ببنت معينه ولا ببيئه, لا تلومو البنت و لا لبسها و لا عاداتها, فكرو بالموضوع كمشكله عامه و خاصه بنفس الوقت لحتى تقدرو تفهمو و تشوفو الموضوع انه مشكله, ولو كل واحد ما كان واثق و ضامن ان اللي بخصّه محمي من هيك مشكله لوصلنا لبيئه و لمجتمع خالي من المعاكسات و التحرشات.


8 التعليقات :

فعلا الناس بتكون متخيلة ان المواقف دي بعيدة عنها او ما بتحصلش لمجرد ان بناتهم ما بيحكوش على المواقف اللى بتحصلهم ..

ربنا يحفظنا و يحفظ كل البنات يا رب و يهدي شبابنا اللى يستحقوا الهداية و ينتقم بعدله من كل معتدي و ظالم..

تحياتي أختي

 

للاسف غالبا بيكون عارفين بس بيحاولوا يقنعوا نفس باى حاجه عشان يجروا وراء رغباتهم
حياتى

 

الموضوع ده مشكلة خطيرة تقريباً في كل المجتمعات العربي ... وللأسف نوقشت كثيراً ولم يفعل لها حل جذري يمنعها .. حتى القوانين المستصدرة

كل ذلك لا يمنع ابدا افكار متغلغلة في المجتمع منذ عقود .. يجب ان يتم حل هذه المشكلة بالتدريج بخطط ممنهجه تصل للناس عن طريق الإعلام و التعليم

 

للاسف هذا واقعنا وهذا هو حال شبابنا

:(

 

EMA EMA

اهلا و سهلا فيكي بمدونتي المتواضعه و شكرا على الزياره و التعليق :)

اللهم امييين... المشكله الشباب من النوع ما بعرفو كم الموضوع بأثر على البنت و نفسيتها و كم هو مزعج

عمرو يسري

معقول في شب بتخيل وحده بعرفها مكان اللي عم بعاكسها و بتهون عليه؟؟
غريبين هالنوعيه من الشباب

اهلا و سهلا فيك بالمدونه و شكرا على المتابعه

 

محمد السيد

فعلا...القصص اللي بنسمعها مش خاصه ببلد او موقع معين
و البنات اللي بشكو من هالموضوع من مختلف الجنسيات و الاعمار و طرق التفكير

معك حق...المشكله خطيره و بدها حل جذري لتختفي نهائيا

نورتني و شرفتني بوجودك

وجع البنفسج

اهلا اهلا يا قمر....نورتيني :)


ان شاء الله بنوصل ليوم خالي من هيك واقع مرير

 

مجتمعنا مجتمع ذكوري وليس مجتمع رجولي

بإختصار

وعنا رفض وممانعة لكل اشي جديد وممكن يكون برة عاداتنا وتقاليدنا المجيدة

 

هاي هي مشكلتنا..... بنمشي على معتقدات باليه و افكار سوده و بتستمر الحياه و بتتطور و بتتقدم و بتتغير و نفس الافكار موجوده بادمغه بعض الناس اللي عايشين حوالينا