Things I Like To Whisper About

Would You Hear Me Whispering

تعب المشوار


غريب الانسان كيف مشاعره و قلبه و مزاجه كلهم بتحولو بمجرد مرور ريحه او مذاق او صوت قديم برجعهم لايام ناسيها , لذكرى قديمه تراكمت عليها الاف الذكريات و الاحداث, و بتطلع هالذكرى بنفس مشاعر و احساس الانسان بوقتها, بطفوله بريئه بشباب متهور او ممكن بقلب مكسور, حتى بالوانها بوقت ما حصلت

لما سمعت هالاغنيه قبل كم يوم تذكرت سيارتنا المرسيدس الخضرا, تذكر التمشايه بشارع الاستقلال و الدنيا منوره باضاءة الشارع و اللي كنت اعتبره مكان سحري و خاص فينا, بجبل الحسين و دوار فراس و لعب الغمايه مع اخواني على هالدوار, بسندويشات الفلافل و الشاورما من جواد, بالايس كريم من محل ما بعرف شو اسمه بجبل الحسين, بانذهالي بدمج نكهتين من الايس كريم في "قرطوس" واحد, ضحكتي و فرحتي وريحة الدنيا و صوت السيارات, بسباقاتنا انا و اخواني و بابا يمشي ورانا بالسياره هو وماما.

كنت احس الاغنيه مفرحه, ما كنت اسمع الكلمات, شي جديد اكتشفته بالطفوله, القدره على تحويل اشد الكلمات حزن لمعاني حلوه, يمكن لان مشاعرنا كانت حلوه و دماغنا ما بتقبل اي شي غير السعاده.

اليوم و بعد اشي و عشرين سنه من فتره سماعي هالاغنيه, بسمعها منيح, بسمع الكلمات و بفهم وجعها, شكلنا بس نكبر بنصير اكثر هشاشه, مع ان المنطق بقول ان الطفل هو الهش و الانسان بس يكبر و تزداد خبراته و تجاربه بصير اقوى, شكله لأ, بنصير ارق و قابلين للكسر بسهوله, ذاكرتنا بتصير اقوى , فبتستمر مده وجعنا.

انا حكون اقوى و اصلب, طفولتي "يمكن" انتهت - الله اعلم - لكن ما راح اتخلى عن ذكرياتها, ما راح اتنازل عن مشاعر بفتقدها حاليا حتى ولو كانت بتوصلني عن طريق ذكرى لدقائق, بدي احاول ما اغير ولا اعدل بالذكريات و مؤثراتها و خصوصا الذكريات الحلوه, بدي اتضل هالذكرى بانوارها و بطعمتها و بريحتها و بضحكتها مثل ما هي و بدون تغيير حتى ولو انه فعليا.....تعب المشوار.






13 التعليقات :

الله يسامحك على هالتدوينة يا وسبر!! مؤثرة الى ابعد الحدود!!

 

ليالى العمر معدوده بالذكريات التى نعيشها وبدونها لا يوجد حياة ...... سواء كانت حزينة ام سعيدة ....
تسلم ايدك ياجميل

 

يعني مصرة ويسبر كل ما نجي هون تبكينا
لا ما راح نعدل بشي من طفولتنا وذكرى الماضي راح تضل عايشة فينا..
كل شي فينا راح يكبر ويشيب إلا خيال طفولتنا بيضل ببراءته وعذوبته ..
نحنا بحاجته وبحاجة إنه ما يكبر
كل شي بيكبر والعمر بيقصر
وبتضل الذكرى متل ما هي ما بتتغير

تدوينة فوق الوصف ويسبر موجعة .. قاتلة

 

خليني أحكيليك إني شايفاها مش كئيبه هالتدوينه

وعادي, إنه مجرد سماعك لشي تكرر معك بطفولتك يذكرك بمواقف مكنتش ماخده بالك منها

تزكري كم كنتي مبسوطه وإنتي عم تسمعيها معهم,او وإنت بتلعبي مع أخوتك,تزكري ورح تشوفي إنه لا فيها إنكسار ولا حزن لا سمح الله

الله إيخليلك ياهم يارب,,وميحرمكمش من بعض

 

الشخص منا حاليا هو نفسه الطفل اللي كان صغير وكان فرحان

والفرح الطفولي هاذ ما بتقدر بثمن , ومش لازم نغير نظرتنا اله

واذا بنقدر كمان نخليه يمتد لآخر لحظة بعمرنا , بكون أحسن وأحسن

صباحو ويسبر :)

 

ايسكريم غازي :)
المحل اللي على دوار فراس ههههههههه اللي كان مشوار جبل الحسين لا يكتمل الا بعد بوظته واللغمطه التي تتبعها :))

الروائح ...هي ما تحملني بعيدا في الذكريات اكثر شيء
عطورات من الانواع القديمه ...أو شجرة ياسمين عراقي امر من جنبها بالصدفه وبيكون بنفسي اوقف تحتها وما اكمل مشواري
أو رائحة الخبز السخن ومأكولات معينه...
نعم لازم ادخل الاكل بكل شي :))...بما اني ناويه اعمم الطبخ على التدوين هذا الشهر

 

ربنا يسعد مسائكم وكل اوقاتكم يا رب

راجعه من الشغل مسطله ....اعذروني و بكره ان شاء الله حرد عليكم :)

تصبحو على خير :)

 

في شي مش منيح!

متفق مع أم عمر أنا!

ما فيه كآبة و لا بشلن :)


هيك حسيت (حتى الشيشان بيحسوا! آه)

و بالنسبة لنيسان ... = خذلاااااااااااااااااااااااااااااااك !
و بس

هههه

-------

يا ويسبر عم بتقولي إنك بتسمعيها ب"تركيز" أكبر و بتحسي بالوجع بشكل أكبر

ما الحياة فيها وجع بس برضه أشياء متلازمة بجنب الوجع :)

مش كل الكلمات بتفضي "في الأغنية" للوجع حتى لو ظاهرها هيك :)

(آه، عن نفس الأغنية عم نحكي) :]

 

احمد

امييين يا رب....هيك طلعت فجأه و عملتلها جدولة لتنتشر بالليل

الحمد لله مود الغم ما استمر كتير فما يهمك :)

Afnan

اهلا وسهلا بافنان القمر
نورتيني و شكرا لتعليقك

معك حق...هي حياتنا عباره عن حصيلة ذكريات بحلوها و مرها و بدنا نعيشها

 

زينة الصبايا

مساءك فل وياسمين يا قمر

الله لا يجيب وجع يا رب...مشيت هي لحظات و بعدين غطّت الذكريات و المواقف و رجعت عشت هديك الايام باحساسي :)

um Omar

المشوار تعب تعب...و في سنين ضاعت ومشيت...الحمد لله
بس الذكريات هي اللي بتخلينا نمشي و نستمر و نمشّي الايام

بيني و بينك...المود ما كان ولا بد ساعة كتابة الموضوع بس مشي الحال بعدها

 

ابو زينه

احلى ايام و احلى ذكريات و احلى شعور

اكتشفت انّا ما بنفقد الطفولة...بطغى على تصرفاتنا الرزانه و الرصانه و لكن لحظه صغيره نقضيها مع الاطفال او مع ذكرياتنا الطفوليه بتصحي الطفل اللي بداخلنا

اولاد اخواني الهم فتره مسافرين و شكله هاد اللي مخليني عايشه دور الكبيره هالفتره :)

نيسآانه
اييييييييييييييون...غازي ...كيف نسيته ؟!؟!؟!؟

لا بد من كل طلعه ناكل بوظه...وتزكرت الاشي القراقيش اللي زي الخبز المحمص :)

بعد ما ماما تشرحلنا ان الف ايد انمدت عليه نضل مصرين بدنا منه و يشترولنا :)

هو في ازكى من الاكل....ميته جوع بس عيب اكل عال 10 :$
فتحتي نفسي بزياده :(

 

شيشاني

مهي صارت تكرهنا زيك ام عمر فطبيعي تتفقو....مبسوطه يختي :$

مهو اي شي بالحياه طبيعي مزاجك ينعكس عليه بوقتها....ممكن يكون حلو و تشوف ابشع اشي فيه و ممكن يكون بشع و تشوف احلى شي فيه

المود كان مركب غلط بساعتها :(

رجعت سمعتها....مش شايفه اشي منيح
تعب المشوار...و بتسكر معي بعديها

 

أكيييييييييييد مبسوطه
نيهااهاهاهاها