Things I Like To Whisper About

Would You Hear Me Whispering

فيروزيات 2....




بتعرفة من سنين بس هو ما كان منتبهلها, حاولت تتحركش فيه بسلام او بصباح او بترتيب صدفة لقاء, و لكن كل مرّه و باخر لحظه بتغيّر رأيها, اخلاقها و "كرامتها" ما بتسمحلها, مع انها دائما بتنادي بموضوع "لا موقع للكرامه بين الاحباء" و لكنها بكل مرّه بتتراجع عن خططها وبتقنع حالها انهم اساسا مش احباب فالكرامه لازم تكون موجوده.

مشيت الايام و تغيّرت الوجوه بالشغل ولكن وجهه هو الاشي الوحيد اللي ضلت تشوفو اول ما تصحى من النوم و اخر شي قبل ما اتنام, ومع مرور الوقت شجاعتها بالتعرف عليه اكتر كانت تخونها اكتر, لحتى اجا اليوم اللي اجا شب من الشغل يعترفها باعجابه فيها و برغبته بالتقدم لخطبتها, الشب ممتاز كتير اجتماعيا و ثقافيا و شخصيته كتير حلوه, بس فيه عيب واحد...عيب واحد بس.. انه مش حبيبها اللي سكن قلبها و عقلها و كل حياتها, فكرت وحاولت تحسبها منيح و طلبت مدّه للتفكير قبل ما ترد على الشب و ما كانت تعرف ان هالفتره تفكير هي اللي راح تغير حياتها كلها بعدين

قبل ما يخلص الدوام يومها فجأه لقته واقف قدام باب مكتبها, بعد ما استأذن للدخول و قعد و بعد لحظات صمت دامت ثواني حسّت فيهم انها بدنيا تانيه , ومشاعر غريبه, مش سامعه الا دقّة قلبها, ايديها باردين و جسمها كلّه منمّل و نفسها ولا نفس زي التاني بطيء و سريع و مخنوق.

و بعديها حكا الحكي اللي كانت نفسها تسمعه من زماااااااااااااان, ما صدقت حالها بس عرفت انه معجب فيها بس كان متردد يفاتحها لانه ما حس منها باي قبول, و انه اليوم لما حس انها بدها تضيع منه قرر ما يضل ساكت و حتى لو انها قبلت بطلب زميله ما كان راح يقدر يتحمل خسارتها و ملامة نفسه انه ما حكالها عن مشاعره, الكلمات وقفّت بحلقها وما عرفت شو تجاوب, طلب منها انها ما تجاوبه فورا و اعطاها رقم تلفونه و طلب منها بس تفكر منيح و تقرر تخبره بقرارها لانه بفضل يسمعه منها ما يسمعه من حدا تاني.

ما صدقت الدوام يخلص وطيران على سيارتها, قلبها ما وقّف دق و الدنيا قدامها اضواء بتطفي و بتضوي, وصلت سيارتها و سكرت الباب, ركّت راها على ايديها على الستيرنج و حاولت تنظم انفاسها, مش قادره تفكر , قرارها هي عارفته و متأكده منه, بس كيف بدها تحكيله, كيف بدها تجاوبه, شغلت السياره و اشتغل المسجل على نفس الاغنيه اللي كانت شغّاله عالكاسيت لمّا وصلت على الشغل الصبح....بس سمعتها ابتسمت و مسكت موبايلها و حكت معه و بس جاوبته كلمه وحده ... "انت حبيبي" و قرّبت موبايلها على المسجل لتسمعّه الاغنيه...





10 التعليقات :

و بعدين مع هالسولافة!

كم فيروز فيه؟ :]

أنا مكتئب و برجع أقرأ بعدين عمهل :)

 

jameel :) you've been tagged in my post http://gemini-girl-may26.blogspot.com/2012/06/eleven-tagged-questions.html

 

تباًُ

زمان عن كتاباتك وإسلوبك

تقطعيناش مره تانيه فاهمه؟!؟

بي إص,سيبكي من هيشم
هوه أصلاتن بفكر فيروز طبخه أو اكله

 

أنا لحبيبي وحبيبي إلي...

الله ويسبر

شو هالرومانسية

حاسة كأني هون بعمل تنقية للقلب
بوست فوق الوصف
ولحن فيروز عامل عمياله

أنا متابعة حتى فيروزيات 100

 

فيروزيات لحد 100 يا زينة!

أنا مقاطع من الآن لمجرد الفكرة هذه

و هع (سمايلي مكشّر)

 

قصتك بالنسبة الي هي مزيج من الألم واللذة :-)

شكراً لأسلوبك الجميل...

بحيرة البجع

 

Sheeshany

قرّو عالعالم
هي لا بكتب ولا بنشر شي قديم....ان شاء الله تكون ارتحت نفسيا هلأ :(

راح الاندفاع الكتابي و راحت الكلمات

Gemini Girl

Thanks ya amar... I'll do thr tag soon inshallah
I love tag posts :)

 

UM OMMAR

مهيو قر فيها السيد و بطلت تطلع الافكار و الكلمات...

ههههههههههههه.... حكيتلو من قبل...انت شو بفهمك بفيروز ...فيروز الها ناسها المميزين :)

زينة الصبايا

شايفه بالله...كاينه مسلطنه عالاخر الفتره الماضيه و الرومانسيه عامله عمايلها معي

النيه اني استمر للفيروز ال 100 بس يخف التأثير الهيثمي شوي

بحيرة البجع

الله يبعد الالم عن قلوب الجميع يا رب

شكرا لمرورك و تعليقك ....نورتيني :)

 

السيد فرحان :)

المهمة تمت و البشرية في خير -لإشعار آخر-

قال اندفاع كلمات قال!
واسقة من نفسييها أوي

 

لااا انتظرونا بجزء جديد و قريبا ...وها اصلاطن