Things I Like To Whisper About

Would You Hear Me Whispering

فيروزيات 1....



اول مرّه بمر يوم الشغل بسرعه, كل يوم بتفرج عالساعه الف مرّه لتمر دقيقه, بس اليوم...اليوم بالذات الوقت مشي بسرعه, اليوم اللي ما نفسه يخلص قرر يخلص بسرعه.

راح عغرفة مراقب الدوام و زي كل يوم لقى صف طويل, و بدل ما يوقف بالدور و يضل يقنع اللي قدامه يمشيه قبله زي كل يوم باخر الدوام, وقف مكانه و بالعكس كل ما يجي حد يصف وراه يمشيه قبله, بده الوقت يطوّل ليوصل البيت, او بالاحرى ما بدو يرّوح عالبيت.

شغّل السياره و بدا طريق العوده, فكّر بكل كلمه و كل انفعال صار بينهم امبارح "هو صحيح السبب مش محرز بس كان لازم اكبر الموضوع لتتعود على اسلوبي" تذكر منظرها و هي بتناقش و بتدافع كرهها اكتر وبدا يخفف سرعة السياره " انا على شو مستعجل؟؟ اكيد هلأ بتكون محضره موشح جديد تبدا فيه اليوم و انا ما نفسي احكي" ساق على اقصى اليمين و على سرعه 20, رجعت مواقف قبل بيوم تنعرض بخياله و رجعت كلماته و كلماتها ترن بدانه, ندم على بعض كلماته و رجع انقهر من بعض كلماتها, صابته غصّه بقلبه لمّا تذكرها و هي مخنوقة و صوتها بدا يختفي و دموعها بدت تنزل, و رجع لعنها بسرّه الف مرّه على جرحها لرجولته و بانه ما بقدر يحميها حتى من نفسه.

بالرغم من بطئ سرعة السياره لكن استغراقه بالتفكير خلى الطريق تمشي بسرعه, نزل من السياره و وقف بالشارع يتفرج على شباك البيت " يا ترى شو بتعمل هلأ؟؟ موجوده ويلا مش موجوده؟؟؟ معقول حكت لاهلها؟؟ صغيره عقل و بتعملها " رجع لنفس انفعال قبل بيوم " كل شي بتعمل منه قصّه و بتكبره وكان لازم اخلي الموضوع يكبر لتعرف قديش بدايقني"...." يا ترى لسا زعلانه لاني حكيتلها ان عقلها صغير؟؟" رجع قلبه رق و حس بالندم.

فجأه صحي من سرحانه على صوت الجار و الجاره اللي مشيو من جنبه " اكيد عارفين كل شي صار امبارح, مهي حبيبتها و بتحكيلها كل شي" رجع انفعل و حس بدقات قلبه بتتسارع , طلع الدرج بسرعه و يا دوب بدو يفتح الباب, شم ريحه اكله بحبها, ابتسم و فكر "معقول طابختلي اكلتي المفضله لتصالحني؟؟" دخل البيت سمع صوت خطوات بتركض للغرفه, شوي بدى صوت موسيقى و اجت زوجته باحلى طلّه و احلى ابتسامه بتحكيله " طولنا ..كتير طولنا... 15 ساعه و 40 دقيقه و 15 ثانيه...طولنا كتير حبيبي"....و بدت الاغنيه




10 التعليقات :

جميلة جدا جدا...ما فيش أجمل من ان الزعل بين الحبيبين أو الزوجين ما يتخطاش 16 ساعة !!و جميل جدا ان كل واحد فيهم يبدأ بالصلح..و الأجمل طبعا فيروز الحاضرة في كل موقف أو احساس في حياتنا..
..جميلة جدا القصة..سعدت بوجودي هنا..تحياتي

 

راااااااااااااااائعه

احببت المشهد بشده
التفاصيل .. والمخزون الشعوري اللي جواه


وزعلي طول أنا وياك .. وسنين بئيت
جرب فيهن أنا إنساك .. ما قدرت انسيت


:)

 

حلوه حلوه
بس
يختي عليها !
15 ساعه و40 دقيقه و15 ثانيه
كمان...هههههههههههه
شكلهم عرسان جداد هالجماعه !!!
خليها تقابلني بعد 15 سنه و40 دقيقه هههههههههههههه

 

العنوان منفر و جدًا! (لإلي قصدي) :]


تعجبني الدقة أنا بس :P

المشكلة ربط الأحداث/المشهد حلو و زابط مع الأغنية!

grrrrrrrrrrrrrrrr

 

أبدعتي بالوصف يا شيخه
ماعرفتك والل


نيسانه,, هههههههه

شكلهم عرسان جداد هالجماعه !!!

قولتك ههههههههههههه

 

احمد احمد صالح

نورتني و شرفتني بالزيتره و المتابعه

فعلا...لان كل واحد عنده مبادره الصلح و كل واحد حسبها صح و زي ما شاف نفسه انظلم شافها ظالمه انحلت المواضيع بسرعه

شكرا لتواجدك

KOOZ


شكرا صديقي :)
انها تعجب كاتب مميز زيك بعنيلي كتير

 

نيسانة التدوين

الله يحلّي ايامك يا قمر

بتعرفي....ماما و بابا الهم متزوجين 40 سنه و بكل مشاكلهم اكتر من ساعه ما بضلو زعلانين من بعض :)

هاي مسببه مشكله لمرتات خواني...اخواني بفكرو انهم لازم يكونو زي ماما...و انا دائما بحكيلهم اذا انا مش زي ماما كيف بتتوقع مرتك تكون زيها

Sheeshany

انت شو بفهمك بفيروز و هالقصص...فيروز الها ناسها المميزين :)

هههههه عجبتني المشكله :) احكي لحالك

 

Um OMMAR

ههههه...شفتي كيف بس اركز بطلع معي شغلات بس بدي مين يكتشفني انا :)

شكلي كان لازم ادخل مشهدين تلاته للاطفال بالقصه ليبين انهم مش عرسان جداد

 

عقبال ما يكتشفوك خبراء الفحيص :صفيييييييرة:

قال لما أركز ... دخيلكو أنا

----
قلتيلي مميزين آآآه ، مميزين = بيصير يكون بشي سلبي كمان عفكرة

 

ايون...ايون مميزه و ايجابي كمان
و بعدين اه بس اركز ببدع انا....و الدليل WeWe :)