Things I Like To Whisper About

Would You Hear Me Whispering

عادات الزواج



الحلو بشغلي الحالي انه بعرفني على ناس من مجتمعات و بلدان و خلفيات و معتقدات مختلفه, بالبدايه كنت محافظه على مسافة امان لحتى اتعرف على كل واحد و الاكتر اني اعرفهم على طبيعتي لتحديد الحدود و عدم تخطيها ولحتى ابين اللي بقبله واللي ما بقبله, اولها كم من مجادله اكبرها بزياده لحتى الكل يعرف شو بقبل وشو ما بقبل.

و الموضوع مش بس مع الاجانب, لأ العرب كمان, في موضه بشغلي العرب الشباب بستخدمو كلمة "حبيبي" بس يحكو مع البنت, الاجنبيات ما بهمهم و بالعكس بستخدموها معهم و معنا احنا البنات, انا كل ما حد يحكي حبيبي انئز ,كبيره يا جماعه حتى بدون معناها الحقيقي بس كبيره فكنت كل واحد يحكيلي اياها احكيلو" ما تحكيلي حبيبي و اه كمّل شو بدك" في منهم عادي و فهمو وفي منهم التافهين اللي بدو بانا مش قصدي انك حبيبي و انت زي اختي و هالحكي, و وضحتلهم اني اختهم و اختهم الكبيره كمان بس انا ما بحب هالكلمه, مع الوقت اتعودنا على بعض و صار التعامل غير, باحترام و بحدود.

تعرفنا على بعض زاد من معرفتنا بثقافات و عادات وتقاليد بعض , بالاكل باسلوب الحياه بالقوانين بعادات الزواج, خلينا بعادات الزواج ....مثلا الباكستانيين عندهم بس توصل بنت لسن الزواج, واللي هو 20 عندهم بتتولى وحده من قريبات العروس بتزويج هالبنت و بتصير تحكي لكل الناس عنها, لانهم بباكستان و بسبب الظروف اللي عندهم الكل بخاف من الكل, وحتى الجيران ما بتعاملو مع بعض, الكل بحمل مسدسات و عادي تكون ماشي وتلاقي طلقه مرت من قدام وجهك, فبخافو جدا من الخلطه والعلاقات الاجتماعيه شبه معدومه, لهيك ما بعرفو ان هالبيت في بنت للزواج و المفروض حد يعلن عن هالشي و ينشر الخبر.

بنيجيريا الوضع جدا غريب, زميلي النيجيري عاش مع زوجته قبل الزواج 4 سنوات و صار عندهم ولد و بنت وهو متردد يتزوجها, لانه وبكل بساطه اذا الاب رفض الزواج البنت و اولادها برجعو لبيت ابوها و ممنوع يشوفها الشب, و عندهم طلب الزواج بكون من العمّه مش من الاب, لانه عندهم العمّه هي الوحيده اللي الاب لا يمكن يرفضلها طلب, و اذا العمّه وافقت الاب راح يوافق على طول, فكل بنت بتكون في الها عمّه كتير قريبه منها و بتختارها لحتى يجي الشب و يطلبها منها, و بس العمّه توافق و طبعا الاب تلقائي يوافق , بيوم العرس البنت بتركع قدام ابوها قدام الناس و بتطلب منه يزوجها الشب, بقوم الاب بسألها اكيد بدك اياه و بكرر السؤال 3 مرات و هي لازم ترد بالموافقه, و ممكن هون كمان الاب يحكي انه مش موافق و يلتغي كل شي لهيك اهل العريس بكونو قاعدين مع بعض بعيد عن اهل العروس لحتى اذا صار الرفض ينسحبو بهدوء.

و الحلو انهم بعد الزواج بتضلها العمه المسؤوله واذا صار مشاكل بتشكي البنت لعمتها و هي الوحيده اللي بتمون عالزوج و بطلعلها تتعامل معه زي ما بدها و اي قرار بتاخدو هو اللي بمشي....فرجانا صور العرس و مرته كانت حامل و اولادهم حواليهم :) صورة مرته راكعه قدام ابوها و صوره اهل العريس قاعدين على جنب بعيد لخحالهم....بحكيلو بس يا ريت تكون عارف حجم التضحيه اللي عملتها مرتك بانها تركع قدام الناس هيك, بحكيلي عادي هاد شي بصير يومي :$

17 التعليقات :

العمة المسيطرة
=
حماة بشكل آخر

لول

بس جد حلو الواحد يعرف و يتعرّف
:)

---
ما في عادات في من وراها غنائم و حلويات مثلاً .. بس س"ع"ال بريء

 

لله في خلقه شؤون

سبحان الله

اشكرك ، جعلتيني ابتسم

 

منين أجبلي عمة هلأ يحبيبتي؟

 

هيثم


عفكره....انا عمّه :)
منيح ما انا بمكان سيطره كان طلعت كل "العقد" عالعالم :)

اللي عملو فينا راح نعملو فيهم :)

سوعالك مردودلك....اخر خبر سمعناه ان في بيبي جديد اسمه انس انضاف للعائله البلوجريه و للاسف ولا شفنا حلوان ولا حتى ملبس عقضامه

 

نور

ربنا يسعد مساكي يا قمر و نورتيني بالمرور

ان شاء الله على طول بتضلها الابتسامه

ام عمر

ليش بدك عمّه....مخلص ابو عمر نال الموافقه من الوالد و من كل العيله :)

بعدين انا عندي عمّات - الله يخليلي اياهم - بس الله وكيلك ما فيهم بس يشوفوني غير يبدو موشح "يا علي" و " يا حبيبتي يا عمتي" و كأنهم ببكو علي ...مش فاهمه يا حرام ليش حاملين همي مع اني انا اساسا مش حاملته :)

 

من الشغلات الحلوه بالخليج هو وجود ثقافات مختلفه والتعرف على هاي الثقافات شيء جميل
زي ما احنا منشوف عادات باكستان ونيجيريا غريبه اتوقع انهم كمان يشوفوا عاداتنا غريبه :)ـ
بس شغله غريبه انه شباب عرب بخاطبوا البنت بكلمة حبيبي يعني مش لهالدرجه

 

أنا طفرااااااااااااااااااااااان
الملايين خلصو

علكة أم القرشين أبقدرش أجلّي

و من باب تغيير الموضوع:لويش إم عمر مغيرة اسمها بالعنجليزي

بتتهرب من الظرايب يمكن

 

زدتيني ثقافة

حلو أنه العمة تكون مسيطرة على الأقل بتضل أهون من الاب
وبتضل قريبة للبنت

وحلو قصة الباكستان والي بتعلن عن البنت
تخيلي هالشي يصير عندنا
مصيبة
هههههههه

تحياتي ويسبر

 

خلص هيك حاسيتها إشي بخوف وجودها
مع إنه عماتي الحمدلله على قيد الحياة
لكن البلاد فرقتنا
ههههه

حلوه ,, ههههههههه
ليكونن عماتك متشيعات من وراكي؟
هههههههههههه

 

M3ak 7a2 4 them arranged marriage is very strange :-)

El3'areeb 2eno wa7ad menhom ma 3ajabo 2e3terady 3alkelmeh o_O

 

Wt7weshet w shwalat el7'aleej 2elly jebt-ha ma3ak wean ra7oooo????
6alle3 2elly t7et 2awal bala6a yalllllla ;-)

Um omar!!!! Ana ma btda5al belsyaseh :-/

 

3enna law 7ada y3melha be6al3o meet msebeh felbenet
2absar leash bedallelo 3aleha.....elbenet bayereh ...2absar leash bedhom y5laso menha w hate 2esas

2ahlan wa sahlan ya amar :-)

 

La bs hay 6are2et-hom belt3beer 3an m7abet-hom 3ala ra2y mama :-\

6abashony 7ob :'(

 

منهون ل تعرفي تسوقي ع تلفونك
وتعربيه
وتلاقي التاغز
والبولد
كلمه وحده بحب احكيلك ياها

هههههههههههههههههههههههههههههه

مبارك مبارك

 

الله يبارك فيكي

لا تخافي علي حريفه وبتعل8 بسرعه :)

 

كتير حلوة هاي القصص انا بحب اسمعها كتي رو بسال اي حدا غريب عن عاداتهم الغريبة هاي
بالنسبة لموضوع حبيبتي هاي الشغلة كتير منتشرة الها فترة طويلة
يعني هلا الوحدة ما لازم تسمح لزوجها يقولها يا حبيبتي
معقول ؟
يعني اذا الزوج حكى يا حبيبتي - زميلك او الليي ببيع الاواعي بالسوق او شركة الاتصالات شو بدهم يحكولها ؟ :))

 

لبنى القمر... كيفك صديقتي
زمااااان هالقمر ما بان

سبحان الله بتسمعي قصص و عادات و الحلو انهم بستغربو من عاداتنا احنا و من طريقه تفكيرنا

شعوب وقبائل لتعارفو.،،حكمة ربنا هاي و بتتطبق بالحياه

حبيبتي هاي مشكله كبيره عنا احنا بس :$
العالم هون و بكل الجنسيات عايشه و متعايشه معها..و بنطلع بالاخر معقدين :)