Things I Like To Whisper About

Would You Hear Me Whispering

المصعد




انا بطبيعتي ما بحب المصاعد, مش خوف او فوبيا لا بس بفضل الدرج من باب ان فرصه الواحد يتحرك شوي بدل ما هو قاعد على طول, و لكن بس يكون الطوابق كتيره و العماره عاليه فبركب المصعد عادي و حتى لو لحالي. فوبيا ان المصعد يوقف فيي ما تصيبني مع اني بفضل يكون معي حد لان الموت مع الجماعه رحمه زي ما بحكو و فرصه يكون في حد نتسلى معه و نتحدوت شوي
أي نعم عندي مشكله كبيره بالمناطق المغلقه, حتى لو غرفه كبيره و انتبهت ان ما في شباك او باب مفتوح بحس حالي راح يغمى علي من قلة الاكسجين, حتى بالسيارة لو الدنيا موت زمهرير لااااااااااااااازم افتح الشباك ولو نقطه لاحس بالهوا

ليش هالمقدمه.... لان جديد اكتشفت ان في حلم مزعج دائما مرافقني ومن انا صغيره, كتير بحلم اني بركب مصعد, مرات لحالي و مرات مع حد, مرات بكون واسع المصعد ومرات بكون عالقد القد, و دائما بكون أزراره او كبساته غير عن العادي او مش موجودين اساسا فما بعرف وين اكبس و بكبس أي شي و هات يوقف المصعد او يفتح الباب و دائما في نزلات و طلعات زي الملاهي بتوقف القلب, ومرات بصير يطير زي حلم اليوم , ييدا الحلم بمكان بعرفه و بعدين بنتقل لاماكن جديدة و مرات بفتح الباب على مكان غريب ما فيه ابواب بس مصاعد ثانيه و ينتقل من صغير لواسع لضيق او لعتمه و ضو, وبضل طول الحلم مخنوقه

هل ممكن عقلي الباطن بكره المصاعد لهيك ما بركبهم؟؟

هل في للمصعد دلاله تانيه بالحلم غير المعنى الواضح اله؟؟

ما بعرف بس اللي بعرفه اني بكره هالحلم لأني بصحى خايفه و متدايقه كتير


كلمة السر




من و احنا صغار و احنا بنحضر افلام الكارتون و لكل عمل سحري و لكل فعل خارق في مدخل كلمة سر...كلمة خاصه لحتى يصير هالفعل الخطير....يعني مثلا...علي بابا و الاربعين حرامي - وما قصدي شي ولا حضرته للفيديو فلا تروحو بتفكيركم لبعيد - لمّا كانو بدهم تفتح المغاره كانو يحكو "افتح يا سمسم".... لمّا الساحره غيرت اليقطينه لعربايه لسندريلا حكت "ابراكدابرا" - حاضرة النسخه المصريه منها وما بعرفش عنجليزي - اكيد فهمتو قصدي...المفروض يكون في كلمة سر او حركة معينه لحتى ينتج عنها الاشي الخارق.

بس كبرنا تعلمنا انه هالكلام كلّه قصص كارتون و لعب ولاد صغار, ليصير شي خارق ولتحقق هدفك و لتوصل لنتيجه معينه بدك تشتغل, وبدك تتعب , و انعجئنا كلنا كل واحد بطريقه ليوصل للهدف.
مرات بكون عند الشخص اكتر من هدف واحد و هالشي مش غلط و لا عيب , بل بالعكس ممكن يكون اشي كتير منيح و لكن برضه تعلمنا انك لتحقق الاهداف الاكبر و الاكثر بدك تضاعف جهدك اضعاف و اضعاف, بدك تتعب اكتر و اكتر لتوصل للنتيجه.

و بس كبرنا اكتر - اه بحكي عن حالي هون ...35!!! لهلأ مش مصدقه....يلا ما علينا هلأ, المهم بس كبرنا فهمنا انّا مقسمين لفئتين, فئه بتمووووووت و هي بتجتهد و بتضل مكانها, وفئه بتعرف تحسبها صح, بمفهوم الصح الخاص فيهم و اللي بمفهوم الفئه اللي واقفه مكانها اشي غلط, و بتوصل و بتحقق هدفها, و هالفئه التانيه بتصير اهدافها اكبر و اكتر و لكن هالمره مفهوم كتره الاهداف بكون عباره عن طمع و....اممممم بدي احكي كلمة ما فيها اساءه مثل وقاحة و قلّة ادب علشان ما نسيء لحد رجاءا, خلينا على كلمة طمع افضل, و طبيعي هيك اهداف بدهاش تعب و لا جهد, بدها شوية "فهلوة" و "تبادل مصالح".

ممكن اللي فوق كلّه كلام مش مفهوم, بس في شي بلف و بدور حوله ومش عارفه امشي بطريق مباشر اله ولكن.....الكلام كلّة مقدمة للسؤال اللي يطرح نفسه ارضا.....كم ملف المفروض اجيب و كم مرّه لازم افتح و اسكر الملف و وين المفروض ارمي الملفات المغلقه لحتى يتغير لون جواز سفري؟؟؟؟

صباحكووووووووووو


صباحكم و مساكم وكل اوقاتكم فل و ياسمين ...وجمعه مباركه للجميع

مقصرّه....بعرف..مقصرّه مشاركة و تعليق و رد...بيني و بينكم هي فتره ركود عام شامله المعظم هالايام لااااا تنكرو ...القدرة عالتعبير و الكلام اللي كان يقفز قفز من دماغي لاصابعي للكي بورد و يااا دوب اكون ملحقه, هلأ صرت افتح الصفحه مش عارفة عن ايش بدي اكتب و اقرر ادور على صوره تلهمني, بس كيف ادور على صوره بدون كلمه للبحث!!! الف و ادور و اقضي 3 ساعات بتنقل بين الصور والمواقع و اقرأ كم شغله في الموقع اللي عجبتني فيه صوره وهب ...شو بتقووول 3 ساعات طارو؟؟؟؟ بسكر و بمشي بخطط اليوم المقرره و باي باي كتابة بوست :$





الاربعاء كان يوم الام....كل عام و كل يوم وكل دقيقه وكل ثانيه و الامهات بالف خير يا رب ...الله يخليلنا امهاتنا و يخليكم لاولادكم و يرحم اللي فقد والدته و يسكنهم فسيح جنانه.

بدي اعترف اني كنت ناوية اختفي فتره عن العالم الافتراضي هاد لارتب اموري......الحمد لله اني مش زلمه و بقدر ارجع بقراري بأي وقت.. .مع ان الحمد لله كترانين المش زلام بهالعالم و بحكو و بلتو عالفاضي....هوووو بديش اطلع خليني بالموضوع :$
قررت وانا بالاردن اسكر كل شي و بعدين قررت تأجيلها لبعد "الاحتفالات " بعيد ميلادي :) - ما حبيت اعتمد عالفيسبوك المذكر الاساسي وحبيت ارمي كلمه هون للاعلان للي ما بتابعو الفيسبوك - ولكن يوم الاربعاء وصلني اتصال رجعني لمود ايام زمان, لمود العالم التدويني بفترته الذهبيه :) بتتزكرو؟؟؟ او يمكن ذهبي من وجهة نظري لان في ناس ماشاء الله مستمر التدفق الكلماتي عندهم....مش حسد لا سمح الله لا بس نوع من انواع القر :)

المهم ولاول مره بتعايد بعيد الام بصفتي الام الروحية للمدونين :)
الله يسعدك يا ام عمر على قد ما اسعدتيني و ضحكتيني باتصالك ....ربنا يخليلك خالتو و يخليكي لاولادك يا رب


ما حرجع زي زمان الا بس ارجع نفسيا زي زمان وهاد بدو وقت و تغييرات جوهريه بنفسي و بطريقه تفكيري...في اشي مش عم بسامح نفسي عليه هو اللي غيرني من فتره و لازم امشي عنه و اقتنع زي ما كل اللي كانو حولي بوقتها و اولهم ماما اني ما بصير الوم نفسي عليه بس هات هالعقل يفهم.... ما حختفي تماما و لا حسكر شي بس راح اضل احاول اتواجد اكتر و اذا قصرت فسامحوني, بغيب و لكن برجع و بقرأ كل اللي بتكتبوه و برضه الكلمات للتعليق بتهرب مني, شكرا لتواجدكم جميعا في حياتي و شكرا لاعتباري صديقه الكم, بوجودكم الحياه احلى و بكون كتير غلطانه اذا بقرر ابعد

دمتم بكل الود :)





Happy 21st Birthday To Ali :)




كل عام و اخونا و صديقنا علي بالف خير
العمر كله يا رب تقضيه و الابتسامه تبقى على وجهك
و العمر كله يا رب و وجودك يرسم الابتسامه على وجه والدك و والدتك
و على وجوهنا احنا كمان اللي تشرفنا بمعرفتك

السنة الماضيه علاقتنا بعلي كانت عن طريق والده صديقنا و اخونا يوسف
لكن السنه كلنا عرفنا علي اكتر
فبعتذر صديقي يوسف
المعايده صارت مباشره بدون واسطه :)

اختك وصديقتك ويسبر


يا قدسنا



دائما بحس بسلبية كبيرة بس اجي اكتب عن فلسطين, وعن اللي حدث و بحدث في القدس و غزة و الخليل و بكل بقعة من ارض فلسطين, ما بدي اكون من اللي بس بلومو و بعاتبو وبحملو مسؤوليات على اصحاب القرار بالبلد, سألت اكتر من انسان عن دورنا بهيك احداث, و هل معقول انا نضل بس نشجب و نستنكر زينا زي باقي العالم؟؟ هالموقف كثير سلبي, و بحس انّا زي ما بنأشر على العالم و بنلومهم احنا علينا ملامة.


انا متأكدة تماما ان "للبيت رب يحميه" وان ربنا لا يمكن يقبل الظلم لانسان, وانه ابتلاء النا والهم والله يصبرهم ويساعدهم, ولكن اكيد راح نسأل يوم القيامة عن مساجد الله اللي بتتهدم و بتنحرق و بتتحول الى مواقع اثرية, واي اعتداء على مسجد هو اعتداء على كل مسلم و حتى على كل عربي لانه الاعتداء ما صاب المساجد لوحدها, الاعتداء صاب الكنائس هناك واي رمز ديني, الصهاينة بدهم يبينو انهم المسيطرين على الحياة كاملة هناك, الدينية و الاجتماعية وحتى الانسانية, و الكل لازم يثور على هيك تصرفات, ما حد برضى لاخوه الانسان انه يجي حد يهينه و يحرمة من ابسط الامور,يحرمه من حريته و من حياته.

معظم اللي سألتهم حكولي ان بما انّا مش مسموحلنا تعمل اشي و لا مسموحلنا نعبر باي طريقة , واجبنا انّا ندعي لاهلنا جميعا هناك بالصبر و الفرج القريب, انّا نساعدهم بالمال اذا بنقدر و بنضمن ان الجهة اللي بتجمع هالفلوس فعلا راح توصللهم هالدعم, انا نجتهد بمعرفتنا عن اللي بصير هناك و نزرع هالحب و هالمعرفة في قلوب اطفالنا, حتى يكون الجيل الجديد زينا, مع انّا ما شفنا فلسطين لكن بنحبها كتير وهي دائما بقلبنا.

اللي بستغربة ان اي قرار صهيوني, يقابل باستسلام تام كأنه هي الامر الناهي بهالدنيا, اذا قررو ان الاردن يكون وطن بديل الكل ثار و بدا يكتب, ليش صار بالنسبة النا اي قرار صهيوني خلص راح يطبق فورا و كأنه ما في بايدنا شي نغيره, بعرف ان الصهاينه همه اللي بتحكمو بامريكا وامريكا بتتحكم فينا, لكن ليش الاستسلام التام لهالشي, النا 60 سنة بنستسلم و بنسكت , النا 60 سنة بنستنى قرارات الصهاينه علشان نثور ونفور زي المي بس تغلى بتفور, وبتطفي النار اللي تحتها بس و بتهدى و بتنسى باقي النيران المشعولة بالمناطق التانية, ومشكلتنا انّا بننسى بشكل تام, ما بحكي ان الحياة المفروض توقف, لكن فورا ننتقل من حالة قمة الحزن و الغضب, لقمة الاستهتار والنسيان و الضياع.

الله يفرجها و يسامحنا و يلهمنا الصواب

______________

هالتدوينه كتبتها قبل سنتين تحديدا في 8\3\2010 لقيتها اليوم وانا بقرأ بتدوينات المدونه القديمه, للاسف من سنتين ما بقيت الامور على حالها ..لأ كل مالها بتصير اسؤ و احنا مكانا ما عملنا شي, حتى الدعاء اشك ان الكل لسا مواكب عليه

اليوم بابا حكا اشي استوقفني.....بحكيلنا لو لا سمح الله اجا واحد " مجنون" من هالمستوطنين و فجّر المسجد الاقصى شو ردود الافعال اللي ممكن تصير و شو ممكن يكون الموقف العربي ؟؟؟؟
اجتماعات طارئه؟؟؟ شجب و استنكار؟؟؟ قمّم عربيه؟؟؟ مطالبات و تنديدات؟؟؟
طيب الشعوب شو ممكن تعمل؟؟ شو بايدها تعمل؟؟؟

فكرة و اسأله خلّت عقلي يوقف و ينشل من الصدمه... ردود الافعال حفظناها صم... بس احنا ردود افعالنا معقول برضه صارت محفوظه كمان؟؟؟