Things I Like To Whisper About

Would You Hear Me Whispering

انت ما بتحبيني


كلمة يمكن كلنا حكيناها بفتره معينه من حياتنا, بطفولتنا...بفتره المراهقه ...بلحظه ضعف و يأس على كبر.... او حتى بينا و بين انفسنا


بتذكر ايمتا حكيتها بالزبط....كنت راجعه من المدرسة وانا بالصف الخامس, كانت ماما قاعده مع مرة عمي عالسطوح بشربو قهوه, ببيتنا القديم اللي كنّا بوقتها ساكنين كلنا مع بعض بنفس العماره, كنت دائما اروّح عالبيت على امل انهم يكونو عالسطوح, نص ساعه بنشوي بالشمس و بصيبني نعس لطيف بقضيهم بمارس متعتي الثانيه و هو الوقوف عالسطوح و اراقب الناس و السيارات الرايحه و الجاي, اشوف البنات و الاولاد المروحين من المدرسة و اشعر بنشوة الانتصار بوصولي قبلهم, كانت ماما تحكيلي بدي اطل من الشباك ما اشوف اي حد لابس مريول ازرق يمرق قبلك, كان الموضوع تحدّي اكتر منه خوف من عواقب التأخير و اللي ما شفتها و عايشتها الا مرة وحده لمّا قررت اخد الباربي معي عالمدرسة و اروَح من طريق جديد و بالصدفة بنات قريبات النا كانو واقفين على باب بيتهم و بدينا نحكي و نلعب و نسيت الوقت و بس وصلت البيت بعد نص ساعه تأخير شفت ماما و على وجهها نظره عمري ما شفتها من قبل ولا من بعد, كانت عيونها حمره و جحرتني جحره حسيت عيونها ملزقين بوجهي, و بدت تبهدلني وصارت تبكي :( طلعو خواني منتشرين يدورو علي و ماما ما خلت حد من صاحباتي الااتصلت تسأل عني عندهم, اكلت اللي فيه النصيب من التهزيئات و اللكمات و كانت وحده من المرات القلااائل اللي بتنعد على اصابع الايد الواحده اللي بتضطر ماما تستخدم ايدها بالعقاب.

نرجع لموضوعنا الرئيسي -و بعدين مع عادة القصص الجانبيه هاي :$ - المهم روّحت و لقيتها عالسطوح و بلحظه وصولي قررت تنزل, انقهرت و زعلت و برطمت - على رأي ماما - و من تحليل لتحليل بعقلي الواعي بلحظتها استنتجت ان ماما ما بتحبني , ما بدي اخوض بفكرة ان ممكن اكون مش بنتهم اساسا و اللخبطه اللي ممكن صارت بالمستشفى مع الضغط على النفس بتناسي الكوبي بيست اللي بيني و بين ماما, رحت زي الشاطرين و وقفت قدامها و اطلقت القنبله, " انت اصلاطن ما بتحبيني " .... لحظه صمت لثواني بالغرفه و بكل بساطه و بدون اي مبالاه حكتلي ماما " اه انا ما بحبك" ونقلت نظرها لمرة عمي اللي لساتها مصدومه, مرة عمي ربنا ما رزقهم اطفال ومش مجربة المسكينه انا صدمتي كانت اكبر, ما توقعت هالرد مع انه كان قراري الناتج من تحليل و تفكير, مرة عمي بدت تشرحلي كيف اني غلطانه و لو ماما ما بتحبني كان ما بتعملي اللي بدي اياه .. و الطبيخ و الغسيل و المشاوير و الطلعات و اللبس....وانا الطنّه اللي بداني من هول الصدمه مش مخليتني اسمع اشي, و ما رجعت لارض الواقع الا بس ماما حسّت بصدمتي و الصفار اللي طغى على وجهي و قامت و ضمتني و انا بديت ابكي بدون وعي, وبس حكتلي انت الهبولة اللي بتحكي انّي ما بحبك

البعد و الغربه بتخليني اتذكر تفاصيل التفاصيل بامور عملتها و حكيتها و بردود افعال و نظرات و فلسفه زايده ما كان الها اي داعي خلت ماما تزعل مني او تدايق او حتى تتطلع علي نظرة ال "ايش مالك اليوم" ماما حبيبتي لو اقعد 100 سنه ابوس ايديكي و رجليكي و احملك فوق راسي من فوق ما بتوازي ضمه بسيطه منك... من بوسة تصبح على خير... من مسحة بايدك على راسي بتخليني اغمض عيوني و ارمي كل هموم الدنيا وراي و ابتسم

ماما.....انا بحببببببببببببببببببببببببببببببببببببببببببببك ,

19 التعليقات :

يا الهي شو قلّبتي مواجع
وذكريات

امي ما بتحبني
ابوي ما بحبني

اخواني كلهم ما بحبوني
بس لما يكبر الواحد بكتشف قديش نظرته محدودة لكل اشي , محدودة بزاوية معينّة مش اكثر

ومع الغربة كمان , بتتأكد هاي الفكرة للواحد انه نظرته كانت محدودة

يا الله ما اتفه الاخطاء منهم قدام اللي عملولنا اياه

قتلتيني بالبوست هاذ رسميّا

.

الله يخليلك اياهم , ويخليلي امي وابوي
امي اللي بتبكي مع كل تلفون بحكيله معها

 

LUNAR

انا بعتذر جد...بس لان اهلي كانو هون و تسهلو قبل كم يوم المواجع تقلبت علي بزياده :(

الله يخليلنا اياهم و مع اني متأكده انهم سامحونا و بنفس الثانيه عن هالعمايل بس ان شاء الله دائما يضل قلبهم واسعنا بعلّاتنا و اسلوب تفكيرنا اللي بشطح مرات

اللهم امييييييييين

 

واضح جدا انك بتحبيهم كثير
زي ماهو واضح انك ما بتحبينا

شاطرة بالغيّاب وتقليب المواجع من لمن يغيبوا عنك لحتى يرجعوا عندك او انتِ تزوريهم
وبعدين بتنسينا شويّ او شويّتين
ليسافروا
وببلش تقليب المواجع من جديد

بمزح ...شوي
بس في منه
وعدتينا ترجعي زيّ ما كنتِ وبعدك مش قادرة......نص نص

الله يخليلك اياهم ويسعدهم بوجودك معهم ويسعدك بوجودهم معك

والله يرضى عليكِ ويسعدك

 

سلام ... خليتيني أدمع :(

فعلا إحنا نظرتنا كتيير محدودة للأمور .
و إزا ما عملولنا شي يعني ما بحبونا ..

مساك فل :)

 

ما عنديش كثير أقوله
انا من هالناحية شبشب بكل معنى الكلمه

بحب امي وابوي
قد الدنيا
بس بحاول أبعد عنهم على قد ما اقدر
وما اتعلق فيهم أو اعلقهم فيه

لسبب بسيط جداً
انا بني آدم رايح
ما تسألينيش وين وليش رايح
انا بعرف اني آخرتي رايح
وكل يوم بتأكد من الموضوع أكثر


مش بقلك شبشب ..
;)


عالعموم .. زي ما بدعيلك دايماً
ربنا يجمعك فيهم عن قريب
ويجمعك فيهم جمعه ما في من بعدها فراق
:)

 

Yosef

لاااااا ....الله اعلم بمعزّة عالمكان و معزتكم عندي

النيّه رجعه هنيّه بس في عندي يومين دوام زي الشاطرين من النوم للشغل ومن الشغل للنوم :)

تسلم يا رب...اللهم اميييييييييييين

و يخليلك احبابك و يخليك الهم على طول

اللهم امييييييييييين...كترلي من هالدعوات هاليومين

Anonymous


اهلا و سهلا فيك او فيكي دائما و بعتذر على الدموع, هي كانت فضفضه زكرتني فيها بنت جيران اخوي لمّا زعلت من امها و حكتلها اياها :)

وللاسف حتى واحنا كبار النا لحظات غريبه برضه :$
الله يهدينا

مساك\مساكي ورد وياسمين

 

طب انتي ليش ما بتحبينا؟؟؟

فشي قلبك وامطرينا ذكريات وعوضينا عن كل الفتره اللي غبتيها....كل على قلبنا زي العسل بس
كبري الخط الله يسعدك يا قمره يا شمس نجوم
معقول خط التعليقات اكبر من الموضوع نفسه....يعني افشئ عن الموضوع واكتفي بالتعليقات ؟
معلش انبحتت شوي استحمليني
لسه راجعه من عند كيكي ومسموم بدني من البخلاء اللي هناك:)

 

Mr. Kooz

بعيد عنك و بعيد الشر...ليش هيك بتحكي :$

الله يخليلك اياهم و يخليك الهم و يفرحو فيك و بولادك عن قرييييب يا رب :)
دعوه على هالمسويه راح تجيب اخرتك :)

بعد التجربة اكتشفت ان زي ما احا بحاجه انّهم يظهرولنا حبهم همه بحاجه اكبر انّا نظهرلهم حبنا و خصوصا بس يكبرو بالعمر

هلأ قوم احكي مع خالتو وعمو و اكسبلك الرضا قبل ما تنام.. هلأ بحكي ...اترك الفيس بوك و قوم بسرعه

اللهم امين :)

 

نيسان

انا بمووووووووووت عليكم بس الظروف و الدوام مش لطيف ابدا ومش معطيني فرصه

لا اخفيكي - حلوه هاي لا اخفيكي - بديت اتردد بالشعبره ولكني انتصرت على شعور التردد وراح اخفيه تماما

و الدليل اني اي نعم ما رشحت مدونه - للاسف - بس شاركت بالتصويت :)

بالنسبة للخط ولا يهمك يا قمر...الليله بضلي وراه يا بكبر يا ما بنام... اله 3 سنين و مش عارفه اسيطر عليه معقووول؟؟؟

لسا ما زرتها...هلأ بروح اسم بدني شوي :)

 

اولا ما تردي على نيسان والبوست أصلا بيضحك.. مفروض تتغير نفسيتك :)
ثانيا الله يخليكم وما يحرمكم من بعض.

 

ههههههه الله عليكي يا وويسبر
احلى شي هاي القصص الجانبية

بتعرفي رح اصدمك انا
يمكن انا ما اعرفت ولا قدرت الى اي درجة اهلي بيحبوني
الا لما صار عندي اولاد
يمكن انا لما كنت بنت ببيت اهلي
كنت مدللة نوعا ما
وما كان يعجبني العجب
حتى وانا بالجامعة وراكبة سيارة موديل سنتها
كنت ضل على راي امك برطم
انتو رحوا شوفوا الاهل شو بعملوا لاولادهم
انتو في احسن الاحوال بتسفرونا على سوريا
شوفوا صاحباتي الي كل شهرين ب فرسنا وايطاليا
وبعدين مع شغلة القصص الجانبية هاي
نرجع لموضوعنا

اكتر شي بالدنيا رح يخلينا نقدر اديش اهلنا بيحبونا
لمن نصير نحنا اهل
ساعتها رح نرجع نبوس ايديهم واجريهم كمان


لك خالص الحب
كوني بخير دوما يا رب

 

ويسبر
اضم صوتي لصوت نيسان
بليزززززززززززز
كبري الخط
وعلى فكرة
ترا والله انا كمان لسى هلا كنت
عند كيكي ومجلوطة من البخلاء

 

لووول
كأنه انا لسه لهلأ بحكيلهم هالحكي :D
شكلي مش ناويه أكبر و بدي اضل صغيرة و ادلع عليهم

بس جد بحزن عليهم من اللي بعملوا فيهم
الله يعينهم علي و يعطيهم الصحة و العافيه و يطول بعمرهم

 

بجوز تضحكي عليّ

بس هالفكره أنا كانت في بالي من زمان
وترسخت أكتر بعد ماحضرت فلم ل أحمد حلمي إسمه " ألف مبروك" إنه إنت بتشوف كل اللي حوليك غلط
أو مقصرين فيك,, أو مش فاهمينك
بس لو تقعد مع حالك أو تراجع الموقف وإنت رايق ومش تحت الضغوط
بتلاقي حالك إنت الغلط


الله يحمالك أهلك وأحبابك يارب ويجمعك فيهم كل دايمن على خير وصحه وسلامه يا عسل

 

مش عارفة ليه بلشت اضحك يمكن لاني عملت نفس الشي مرة
الله يخليلك الميمة يا ربي

 

ربنا يسعدك ويخليلك ماما
عارفه انا كنت بقول اكثر من كده ..لما كنت بزعل اقول لماما انا اكيد مش بنتك يا ماما
هههههههههه شغل عيال بقى
دومتى بخير وصحه وسعاده

 

كيكي

تسلميلي يا قمر...انا و الحمد لله نفسيتي احسن من قبل ما يجو اهلي عدبي فما تخافي علي :)

أمل

عودونا عالدلع شو نعمل احنا؟؟؟ اي نعم بنزيدها و بنعيش الدور بزياده بس بيجينا يوم و بنصحى فيه

كتير بمعهم هيك بحكو....بس تصيرو انتو اهل بتعرفو قيمتهم, بس والله بنعرف قيمتهم كتيييييييييير هلأ

بالنسبة للخط...فتم بحمد الله تكبير الخط :)

الله يبعد البخل و الجلطات عنّا كلنا

 

LioneSS

ههههههههههههه....لساتنا بمود الدلع اذا :)

ممكن انا بس ارجع عالاردن ارجع احكيها...ما بستبعد :$

اللهم امييييييييييييييييييييييين

Um Ommar

كتييييييييييير حبيته لهالفيلم...جد واقعي و حقيقي
هيك احنا بنحلل على كيفنا بدون ما نحاول نفهم :$


تسلمي يا رب..اللهم امين و يخليلك اهلك واحبابك و اماميرك الزغنونين

 

Sozan

كلنا يمكن عملناها باختلاف المواقف و الاعمار :)

تسلمي يا رب...اللهم امين
و يخليلك اهلك و احبابك يا حلوه

هبة

تسلميلي يا قمر
اللهم امييييييييين


اه و على باب الجامع و غلطو بالمستشفى و هالحكي الغريب تبعنا

مسائك و صباحك فل يا فل