Things I Like To Whisper About

Would You Hear Me Whispering

While in Jordan...1






بما اني راح اضل رايحه جاي على خط دبي - عمان - دبي فحبيت اشاركم بالمشاهدات و القصص اللي صارت معي و اللي راح تصير معي مستقبلا

نبدا باول شي و اخر شي بنشوفه بعمان وقت السفر ...المطار





انا غير مطارنا شفت مطار دبي, الشارقه و مطار البحرين, كل واحد فيهم عند الجوازات في كاونتر لاهل البلد و كاونتر للاجانب, الاجانب هون العربي و الاجنبي, و بالخليج في كاونتر للي جايين من دول مجلس التعاون الخليجي, بكل المطارات بكون طابور الدول الاخرى مليان و بكونو 2 او 3 و اهل البلد بكون تقريبا فاضي الا عنّا , بكونو كاونترات الدول الاجنبيه فاضي يا دوب 5 او 6 اللي واقفين و احنا دور طويل عريض على نفس الكاونتر, مع انه في 3 كاونترز للاردنيين بس دائما و ابدا واحد اللي شغال و دائما و ابدا بيجي واحد على اساس منظم بقطع الدور من مكان ما في بنت اموره من غير هدوم و و بخليها توقف اول الدور الجديد و دائما و ابدا بكون واقفه قبل هالبنت بكم واحد و بضل اخر الدور....يااااا سبحان الله انا معكم ان طبيعي وحده محجبه و روحها مفرفطه و على وجهها كشرة اللهم احفظنا مستحيل حد يختارها لتكون اول الدور بس برضه مش عاجبني الوضع :)

المهم ما بنكر ان للحظه تمنيت اكون من الدول الاجنبيه لاخلص و امشي من الهلاك و في شب حكاها " يا ريتني اجنبي يا عمي لاخلص" .... خلصنا و مشينا و وصلنا للدرج الكهربائي....ايش العفن اللي احنا فيه؟!؟!؟ هلأ بما انه في مطار جديد كبير بدو يفتتح بعد كم من .... - املأ الفراغ لانه مش باينله وقت - بيعني اهمال المطار اللي بنستخدمه و بنستقبل فيه الزورا و السياح؟؟
الدرج من كتر الوساخه لونه اسود ومش امبن الحديد اللي فيه, و بهزّ و بدقّر مع كل درجه بمشيها من الدبق الرهيب اللي عليه, الدربزين اشي مخزي, طبقات طبقات الوسخ عليه, الموضوع مش معضله يا اخوانا, الموضوع شويه مي و صابون و واحد من اللي بنظفو بساعه بخليه يضوي.

اوك نزلنا تحت, لا في ضو و لا في اوكسجين, كل مطارات العالم بتكون انارتها قويه , وبتذكر مطارنا من زمان واحنا صغار كتير الضو قوي و نور بزياده و خصوصي ان بوقتها كان ما في نيون بالبيوت و الاضاءه كلها لونها على احمر\ برتقالي اما بالمطار الدنيا بيضاااا, هلأ عتمه بشكل بكئب, و نفس مشكله الحزام, حاليا صارو 2 و برضه لسا بتوه وين تروح, لا في مونيتور مكتوب عليه ولا في واحد تسأله, و اللي بشتغلو بس بنزلو الشنط وبكوموهم فوق بعض بدون ترتيب ولا بشكل عالقليله تروح تدور و تشوف التاغ الك ويلا لأ, بعد ساعة انتظار, واحد من الاخوان المسافرين و اللي كان واقف جنب شنطه نسخه عن شنطتي اخد شنطه عن الحزام نسخه عنها برضه و مشي, طلع الاخ ماخدها وبس شاف انها مش اله مش يرجعها عالحزام, لأ تركها جنبه و قعد يستنى شنطته :$

نيجي للطريق و اللي الحمد لله صار اهون و ان شاء الله بعد هالشتويه ما يطلع تزفيته مثل باقي شوارعنا الجديده و تقبّع شقف الزفته كأنهم بلاطات مش زفته.

الكراج.... جد جد جد مش قادرة استوعب انهم معينين واحد يوقف على باب الكراج عالاله ياخد الورقه و يتطلع على ساعته و يكتب الساعه عالورقه و يكبس كبيسه ليفتح القاطع, ونفس الحركه عالسيارة اللي وراها ولانه دقيق الشب برجع بتطلع عالساعه كأنه يعني مشي نص ساعه من قبل دقيقه بس اتطلع عالساعه للسيارة اللي قبلنا وهلم جر, وبحكولك ليش ازمه بالكراجات, انو بالله عليكم!!!! شو بالنسبة للتكنولوجيا؟؟؟ الهم اكثر من سنه على هالوضع, زبطوها لهالآله ابووووووووووووووس ايديكم.


ملاحظه ع الهامش

للي بدو يحكيلي ما الك كم شهر برّة البلد و بدك تنتقدي و صرتي ناسيه و هالقصص بحكيله يا ريت تقرأ هالبوست تحت عنوان " مطارنا العزيز" و هالبوست تحت عنوان " المطار...يعني و بعدين" و اللي كتبتهم من زمان و انا لساتني بالاردن.

و دمتم :)


6 التعليقات :

و دمنا!
همممممممم

ماشي

فعلاً جيل مماعيط

أكالين / سفّارين / نكّارين

اسألّا على أيام البغال و الحمير بس

خخخخخخخخخخخ

"I`m good, 2ah!" say 2aaaah!
:P

-----
1? do u mean there is more! Oh God!!

 

بس أسافر
إزا الله راد
بخبرك ري أكشناتي
وإلى ذلك الحين

أنا من حزب المعارضه
شوووووه ياااه,, ما صرلك بالقصر من إنبارح العصر تتحكي ع مطارنا العزيز,, وتسلخيه بوستات

له له,, مش هيك أولاد البلد مش هيك
:sc:

 

حسبيّ الله ونعم الوكيل

هذه تجربتي العاشرة او العشرون ...بطلت اعد من زمان لالغاء موقعي او مدونتي الشخصية....
لا يدور في ذهني ابداً اني شيئ عظيم لا سمح الله
ولا يدور في ذهني ابداً ان جوجل وما شابهها من المواقع ... تركت الكون وتفرغت للعبد الفقير لوجه الله تعالى
ولكن يدور في ذهني سؤال واحد
لماذا ايُّها الجبناء
يا من تمرون على مدونتي
وترونها مُخضرة مُزهرة
وبدلاً من تستمعوا بخُضرتها
لا تتركوني وشأني
تطعونني في ظهري
وترسلون تقارير بحق مدونتي
كفاكم ...طفح الكيّل
وسأكتب لاحقاً مفصلاً ما جرى معي
ومن يقف خلف ذلك


اما انتم
صديقاتي واصدقائي
إخوتي وإخواني الاعزاء
يا من واكبتم وجودي معكم لاكثر من عام هنا

من رأى منكم ايّ إعوجاج مني او له ايّ ملاحظة ...
حلفتكم بالله ان تكتبوا مُلاحظاتكم
فقد اكون سهوت عن مُلاحظة اخطائي

وكل سنة وانتم سالمون والامة العربية والاسلامية بخير

يوسف
26/11/2011

 

مررت بمطار الاردن العام الماضي .. و فعلا لفت انتباهي انه معتم و ما في ضو كفاية و اعتقد ولا اكسجين كفاية كمان ..
بس كمان الحق يقال أحسن بمراحل من معبر رفح البري و الجسر و شهراء سيناء و الشحططة تعت الفلسطينية :)

دمتي منورة و سندبادة على خط الاردن الامارات :)

 

whispers
اسمع من عبارات همسا امامها همسا وخلفها همسا وبين كلماتك همسات لا يسمعها الا كل عاشق ولهان
مااجمل عباراتك " قلبى انقلب على قلبى والعقل يقف على الحياد "
تعرف ياهامس اننى احب بعقلى وافكر بقلبى كى اكون رحيما عادلا
لماذا لا تزورنى فى مدونتى حتى نتبادل الافكار والآراء
الفاروق

 

هيثم و ام عمر

بديت اكرهكم انتو اللوز...ركزي معي شوي يا ام عمر و خليكي بصفي بتكسبي ولا تردي عالاعداء

صديقي يوسف

الف الحمد لله على السلامه لك و لمدونتك
و ان شاء الله تضلها عامره فيك و فينا على طول يا رب

التعليق وصلني ضمن الرسائل الغير مرغوب فيها لهيك تأخرت بالنشر لاني بالصدفة مريت على هديك الصفحه

صديقي و والدي فاروق

اهلا وسهلا فيك دائما و وجودك بشرفني :)