Things I Like To Whisper About

Would You Hear Me Whispering

اسئلة تطرح نفسها ارضا...كلاكيت تاني مرّة



بما اني مش فاضيه و الافكار خالصه من عندي من كترها فقررت اني اعيد نشر بوستات قديمه من ايام ما كان دمي خفيف و بالي فاضي :)



ليش سائقي التكاسي ما برتاح قلبهم الا بس يحطو خط المسرب بنص السياره؟؟

ليش سائقي التكاسي بس يكون معهم راكب, بصيرو مناح ما شاء الله و بمرئو كل اللي جاي من طريق فرعيه,وطيبين و بمشو بطيء و بحترمو قانون السير, يعني ببدو يوقفو السياره بس يشوفو الاشاره اللي بعد كيلو ها...هاا بدت تصفّر؟؟؟؟

ليش واحنا واقفين صف طويييييييييييييييل عالاشاره بتصير الاشاره خضرا وما بنتحرك ولا نقطه و بس تصير حمرا بتبدا السيارات تمشي؟؟؟

ليش لما تحترم نفسك وما تزمر للي بقطع الشارع, علشام حرام ينصرع من صوت الزامرو بصير يتطلع عليك و بحط ايديه بجيابو و بمشي و بقطع الشارع على اقل من مهله؟؟؟؟

ليش لازم اذا واحد بحكي تلفون خلوي بالشارع او بالمطعم لازم كلنا نسمع موضوع المكالمه من اولها لاخرها؟؟؟

ليش الاشياء بتكون قدام عيونا و مزهقيتنا ومقززيتنا واحنا النا 100 سنه مش مستخدمينها, وبس نحتاجها بتختفي, وبننسى وين حطيناها؟؟؟واذا كبيناها,تاني يوم بالزبط بنحتاجها ؟؟؟

ليش صرنا بس نحكي علبناني - مع انها لهجه حلوه وخصوصا من نورا :) - و بس نطعوج بالكلام و احنا بنحكيه و نحكيه بطريقه غريبه من مناخيرنا - مش من راس مناخيرنا انه تكبّر لا نحكيه بخنف - هيك بنكون يااااااي شو كول و راقيين و متتورين - متطورين - وبس نحكي على طبيعتنا بنصير ياااااي شو فلجر و حفرتل؟؟؟


ليش بس تكون منيح مع الناس, بتصير اشي عادي بحياتهم و آخر اشي بفكرو فيك و بمشاعرك, وكأنك اشي روتيني بحياتهم, و اللي بكون يسيء الهم بكون مهم و بحملو هم مشاعره و احاسيسه؟؟؟


ليش اول ما يجيني فلوس زياده لازم يخرب اشي بالسياره :"( ؟؟


ليش دايما بنضل نأجل تنظيف الشبابيك بركي شتت الدنيا, و بس نيأس و انظفهم تاني يوم بتشتي سبحان الله؟


شو كمان...شو كمان...كان في بالي اشياء اكتر بس مش متزكريتهم...بس اتزكر برد اضيف...انتو زكروني ايش كمان؟؟


من الاسئلة اللي ضافوها اصدقائي بالتعليقات

ليش كل مرّة بغسل السيارة بتشتي؟؟

ليش بنظل نستنى بالعطله و بس تيجي بنزهق من اول يوم؟؟

ليش البنت بعد ما تنخطب بتحلى بعين الناس؟؟؟


6 التعليقات :

LOL you made my evening...jd t7sheesh

 

أنا عندي إجابات
و كلها منطقية

بس مش لكل الأسئلة

و ما حأشاركها طبعاً

خليكنّ

جهلة

خخخخخخخخخخ

 

Rain

Rainoooooooo...miss u kteer ya amar
Happy to draw a smile at ur face ya amar :)

كيكي

كلنا بانتظار الاجابات ...بس في ناس ما بدنا اجاباتهم اسمهم مكتوب تحت

Sheeshany

عجبني التواضع ب " بس مش لكل الاسئله " :)

الله يخليك...بنترجاااااااااااااااك تحكيلنا :)

 

أنا اللي البرد مأثر علي!

فعلاً إنك نانا

كتبت تعليق بالإدراج الغلط

وينك يا نيْسان تحكيلنا : "الكبر عبر"

خخخخخخخخخ

 

اي تعليق :$

ولااااااااا فاهمه عن ايش بتحكي


خطايا :(

يااا رب ما يكون في حد كتير مشاركين بمتابعة التعليقات