Things I Like To Whisper About

Would You Hear Me Whispering

اخر اخباري 2 :)


كتير اشياء و كتير قصص و كتير احداث صارت الفترة الماضيه خليني احكيلكم اهمها

اولا زيارة الاردن و لمدة 4 ايام :) من شهر 6 حجزت لانزل عالاردن في اجازتي الاربع ايام لانه رمضان من غير الاهل اكيد ما اله معنى, اتفقت مع اخوي اللي بالاردن و قررت افاجئ بابا وماما و لكن بعد نصيحة الجميع باني ما افاجئهم حكيت مع ماما وانا بالشارع اللي ورا البيت تماما و فعلا الكل كان معو حق, ما بصير نفاجئهم لانهم و بالرغم من اني خبرتهم قبلها بدقائق كانو مصدومين كتير و خصوصا بابا اللي جد خفت عليه, كان نايم و صحته ماما قبل ما اوصل بتحكيله " لمين مشتاق كتير" بحكيلها " لاولادي" حكتله " ولمين مشتاق اكتر شي فيهم" حكالها " ل... ويسبر" حكتله " طيب هيها شوي و بتيجي" :) الحمد لله ربنا بارك بهالاربع ايام و استغليت الفرصه و جددت الرخصه لانه اخذ الرخصه هي الخطوة اللي حاليا شغاله عليها :)


تاني شي وهو اني و بعد تجربة السكن مع حد قررت اني ما بدي الغرفة Single و بدي ستوديو لحالي , و الحمد لله بعد اخد وصد و نشافة ريق و طوش و مسح جوخ و مجاملات اخدت الاستوديو, لانه بما اني لا متزوجه ولا مخطوبة ما بطلعلي ستوديو و لكن ربنا يسرها الحمد لله, اخواني الله يخليلي اياهم و يسعدهم همه و مرتاتهم و اولادهم جهزولي معظم الاساسيات في البيت ومن يوم ما اجيت للامارات و لحد ما بديت انام بالاستوديو ما نمت بهالراحه و العمق اللي بنام فيهم.
مشاركة " الحمام" اجلّكم الله و البيت مع حد مفهومه للنظافه و للترتيب و للازعاج غير عنك كتييييييييييييييييييييييييييييييييييييييييييييييييييييييير صعبه :$
قبهيك بتكون Mission #1 accomplished :D و هيني شغاله بالمهمة التانيه واللي هي الرخصه و انتهاء مدة الرخصه الاولى هو اللي اخرّ الموضوع لانه طلع القانون اذا رخصتك خالصه تعتبر ما معك رخصه وتعامل معاملة اللي ما بعرف يسوق :)
و المهمه الثالثة الجديده هي اشتراك النت و اللي ان شاء الله قريبا جدا راح تحصل

رمضان كل ايام الاوف قضيتهم عند اخواني واول ايام العيد كنت مداومه و احتفلنا بالعيد انا واخواني تاني يوم, اجتمعنا و تغدينا سوا و وزعنا هدايا الصغار و بعدين اخوي وصلني عالشغل للشفت المسائي.

الحمد لله التأقلم على العيشة الجديده بتحسن مستمر و بديت استقر و شعور لوم النفس على جيتي هون يختفي , الانسجام بالشغل الجديد واستيعابه و تكوين صداقات جديده و من نوعيه جديده ومع جنسيات جديده مستمر و متطور


هاي اهم واخر اخباري اللي قدرت ارتبها حاليا.... في قصص كتيرة ومواقف كتيره ولكن مش عارفه اصيغهم تخيلو :( بطلت انطلق بالحكي زي قبل مش عارفه ليش

يلا فتره و بتمشي ان شاء الله

كل عام وانتو بالف خير و ربنا يعيده عالجميع بالخير رمضان طار اسرع من السنوات اللي قبل مش عارفه هل قلّة البركة بالوقت عقاب او انه ثواب انّا ما نحس بالتعب!!! الله اعلم و بنرجع نحكي" اللهم بلغنا رمضان"

نراكم قريبا ان شاء الله :)

20 التعليقات :

كل عام و انتي بخير و صحة و عافية اولا
:)

و الحمدلله انه امورك بدات تتيسر و انه بداتي ترتاحي اكتر هناك و ان شاءالله الشعور يستمر على ماهو عليه
:)

و لا تطولي الغيبه اشتقنالك

 

كل عام وانتي واهلك بألف خير يا رب

صارلي زمان ما فاجئت حدا هون , بالعكس كانت المفاجأة تيجي سلبية انه : تأخرت السفرة لعمان اسبوع او اسبوعين

بس بظل حلو شعور المفاجأة :D

السكن بالخليج بشكل عام بدون ما يكون مع الواحد رخصة : اشي بزهّق , فا منيح انك بلشتي بالاجراءات

بالتوفيق بالنسبة للسكن الجديد , وان شاء الله امورك تتيسّر دايما يا رب

 

كل عام و إنتو بألف خير ويسبر
موضوع السكن و مشاركة لالإقامة و المطبخ و الحمام مع أي إنسان رايحة تكون صعبة.. و اسألي مجرب

أنا من قليل صرت أروح من نابلس لرام الله و أرجع كل يوم :)

أنا رايح أدعيلك إنو ربنا يسهل معك أمر الرخصة.. بس بما إني انسان استغلالي و أناني فرايح أدعيلك أكتر انو ربنا يسهل معك موضوع الإنترنت عشان نضمن مرورك على كل التدوينات

على فكرة.. في عندي تدوينة
VIP
ما بعرف إذا قرأتيها ولا فاتتك.. اسمها "بعد الفراق" :)

 

أنا بقول النت أهم من الرخصة :)
و ما دام انا قلت .. فااااا

خلص
:)

ترجعي بالسلامة يا ويسبر و ييسرلك أمورك
:)

 

أنا كمان مبطلة أنطلق بالحكي متل قبل :(

مبسوطة انو أخبارك حلوة و كلشي تمام
انشالله بتتوفقي و بيضل الوضع حريقة و الاسهم مرتفعة
:)

 

السلام عليكم

كل عام و أنت بخير
مبسوط كثير إنك بلشت تنسجمي مع الحياة الجديدة ،
و مبروك السكن اريح شي لحالك
بس نصيحتي إلك إنك تظلي تطلعي و تشوفي الناس ، أنا قبل سنة سكنت في شقة لحالي و مع ضغط الدوام و الدراسة
ما كنت اشوف حدا فصابني حالة اكتاءب مزمن
.
بالتوفيق و أمورك للأحسن بعون الله

 

اشتقنالك يا قمر
عيد سعيد

 

مساء الخير صديقتي العزيزة ويسبر
انا بعرف هناك نشرة اخبار كل ساعة او حتى كل يوم مرة وممكن يكون في بانوراما كل يوم او كل اسبوع بالكثير
بس كل شهر مرة....كثيررررر
يعني حسيت لما قرأت الجملة الاخيرة
نراكم قريبا ان شاء الله :)
كأنك بتقوليلنا النشرة القادمة على عيد الاضحى المبارك
وكل عام وانتم بخير

بس برضو بقول طالما ارتحتِ في السكن مفروض انك انحلت اكثر من نص مشاكلك والنت مش معقولة في الامارات في مشكلة
حليها.....وبلاش اجي احلها انا

الله يرضى عليكِ ويسعدك
ويسهلها يوجهك كمان وكمان

 

اربع ايام ولا البلاش...حلوين!

ع فكره اخوي كان يعمل هيك بأهلي...ييجي فجأة ...يلاقوه واقف الباب...
حلوه المفاجآت...بس اهلي يجننوه "يضلهم يومين وهم يحققوا معاه:
ليش جيت فجأه ؟
في شي؟ صاير معك شي؟
لما يعيف حاله...
بعديها صار يخبرهم بموعد اجازته بس برضوا يفاجئهم قبل موعده بيومين

:)

الحمدلله انه نفسيتك احسن مع الاستوديو وزيارة عمان ....وربنا يتمها عليكِ مع الرخصه والسياره ان شاء الله

 

الله يوفقك وكل عام وانت بخير

أنا معاك وبكل قوة عالسكن لأنه مثل ما حكيتي تماما.. وأنا كمان ساكنة لحالي لنفس الأسباب والحمد لله مرتاحة وأختي ساكنة كثير قريب فأمان الحمد لله

وانت ما شا الله عنك عن عشرين رجل ما بنخاف عليكي فخليكي سنفورة قوية :)

أنا كثير بنبسط لما أقرأ أخبارك الجيدة والله يكثرها عليكي ديري بالك على حالك

ويسبر مثل ما اتفقنا أي شيء بتحتاجيه من هون أنا جاهزة أي نعم منعرفش بعض بس الناس لبعض

الله يخليلك أهلك يا رب ويجمعك فيهم عن قريب :)

 

ما شالله عامله كل هادول وساكته؟
:)
ع فكره السكنه المشتركه بدها شغل كتير اسأليني أنا :))
كل سنه وانتي سالمه وسبوره :))

 

إه! مفكر إني أول واحد علق و مكيف على صباحي أنا

خخخخخخ

مفاج"ع"ة

---

+ غسألي مياسي يا ويسبر عن السكنة المشتركة ، اسأليها

:]

 

Sheeshany

بس علشان ما تنام مئموص راح ارد عليك اول شي .... يلاا عيش :)

راح اسألها ولاااااااااااااا يهمك
بس عالفيس بوك مش هون ..بس اللس مشتركين بالفيس بوك همه اللي راح يعرفو الاجابات :)

ما قدرت اضل منيحه للاخر :$

Wafa'

وانت بالف خير و صحه وسلامه يا قمر

الحمد لله مع الوقت الامور بتتحسن و السكن كتيييير فرق معي :)

ان شاء الله ما حتأخر كتير ....هانت :)

 

LUNAR.

وانت بالف خير يا رب

جد سمّة بدن التأخير بالسفر خصوصي اذا بتعد الايام والساعات عد ليجي موعد السفر :$ ان شاء الله ما تصير معي لاني ممكن انجلط و خصوصي اني مشتاقه لاهلي كتير وعلى طول وبصبر حالي تصبير للموعد الجاي لشوفتهم على خير

معك حق بالنسبة للرخصه...ربنا ايسر الامور وتمشي بسرعه وعلى خير ان شاء الله لاني انخنقت و تعّبت خواني كتير معي الاشهر الماضيه

تسلم يا رب...اللهم اميييييييييييين

جعفر

وانت و الاهل بالف خير يا رب
جد صعبه كتير و خصوصا عاللي متعود من صغره على ان يكون كل شي اله لحاله :$

الحمد لله انها تيسرت بالاخر

الله يعينك بس جد بتفرق الراحة النفسية بالموضوع, يعني قهره و تعب اعصاب و نفسيه كله بروح وبتصير الحياة اسهل بكتير

هههه ربنا يسمع منك بالدعوتين و بدعوتك بتدوينتك
بكيتني يا صديقي بكلماتك و وصفك ربنا يجمعنا عن قريب

 

Sheeshany

ممتاز كتير اذا خليني اركز عموضوع الرخصه بالاول :)

شكرا على مساعدتي باتخاذ القرار

تسلم يا رب....ربنا يسمعنا اخبارك الحلوه عن قريب

Rain

مش عارفه شو مالي :( الانطلاق و الكتابه بدون تفكير وتخطيط ضاعو مني هالايام

الله يبسطك كمان و كمان يا قمر و ان شاء الله كل ايامك اخبار حلوه

اسهم!!!! لاا لسا ما صرنا من اصحاب رؤوس الاموال يادوبنا مسكنا اطرافهم

 

Kol 3am w anti b5eir.. Good news..

 

شو الأخبارات الحلوة هادي :)
ربنا يسعدك و يوفقك كمان و كمان يا وسبووورة .. عنجد مفاجأة حلوة لأهلك ربنا يخليلك ياهم و يخليلك كل حبايبك يااارب .. بجد ما في أحلى من انه تستقلي بلا روومييت بلا بطيييييييخ .. انا جربت الاتنينو عنجد هناك فرق في كل شي .. ربنا يهنيك حبيبتي :)

 

موفقة يارب
والله يسهل أمورك ويريح بالك خيتي
(:

 

كل عام وانت بألف خير يا وسبوره الأموره :))) وشو هالأخبار الحلوه هاي :) الله يوفقك يا رب ويسعدك على طول ...^_^

 

Tareq....Hadeel....Bullet and Orangee


ربنا يسعدكم يا رب
اسفه عالتأخر بنشر التعليق و الرد.... قلّة النت عامله عمايلها معي بالاضافه لظروف الحياة و عجئتها

كل عام وانتو بالف خير و نراكم قريبا باذن الله :)