Things I Like To Whisper About

Would You Hear Me Whispering

لنكتب عن.... ظاهرة المعاكسات \ شهر حزيران

من اقرف المواقف اللي كانت تواجهني في الباص :(


اول مره بطلع لحالي و بروح وباجي كانت بالجامعه, و مش اي جامعه, الجامعه الهاشميه و تعتبر سفره و ساعه ونص ب 3 باصات اشي بوّتر و كانت اول مره بركب فيها باص كمان, يعني جو جديد و بعد و عجئه جامعه كانت حياتي بشعه جدا, فتره الجامعه وحده من الفترات اللي بكرهم بحياتي, بعيده و صحرا بالاضافه لان كان عنّا بالبيت احداث غريبه جديده فكلّه اجا مع بعضه.


فتره الجامعه انا ما كنت محجبه, والحمد لله تحجبت على اخر فصل بسنه رابعه, كانت المعاكسات اشي غريب برضه, مشي بالمجمعات و اختلاط بعالم غريبه و من بيئات مختلفه, من رمي كلام و من مدّة ايد اشي بقزز بقرف بخزي وبقهر, اسمع اشياء مرات ما افهمها اروح احكي لاخوي, شو يعني بس شب يحكي هيك طبعا هو يصير بدو يلطم, يحكيلي مبدئيا لا تعيدي الكلمه و بعدين انا صحيح بحب تحكيلي كل شي بس راعي مشاعري, يعني ان اختي ينحكالها هيك كبيره يا عالم ... غير طبعا عن لزقة صحاب المحلات و الديباجه و الاسطوانه المشروخه " ليش زعلانه" بالبدايه كانت تقهرني الكلمه و بالاخر بس صرت "كبيره" صرت احكيلهم " مش خلصت موضه هالجمله؟؟؟ جد خلص بطل الها سوقها يا جماعه" ...خالتو ويسبر بصير :)
اللي بدي اوصله من هالحكي انّي اول ما تحجبت حسيت كأني اختفيت عن وجه الارض بالنسبة للعالم, كأني صرت اشي شفاف ما بشوفوه, ادخل المحل واطلع ولا كأنه في حد دخل, امشي بالمجمع ولا كأنه في حد بمشي, انا بصراحه انبسطت و حمدت ربي و خسيتها نعمه و رضا من رب العالمين اللي صار.

المهم خلصت جامعه و بديت الشغل, شوي شوي حسيت ان العالم صارت تشوفني, رجع التعليق و رجع الغمز والابتسامات, انا انصدمت, لكون مش منتبهه لطريقة لبسي او مزودتها بشي وانا مش منتبهه, سألت بنات خالتي اللي تحجبو بنفس الفتره اللي انا كنت محجبه فبها حكولي انهم همه كمان ملاحظين ان المعاكسات زايده, تخيلو يا جماعه اني بكون واقفه علشان اقطع الشارع بيقوم شخص "محترم جدا" بوقف سيارته و بصير يتطلع علي عأساس انا من اياهم :( بطلت العالم تميز الكل صاير يفظّع بتصرفاته و يتخبى ورا الحجاب و قليلين الحيا بطلو يميزو فبجربو حظهم مع الكل.

بنت خالي المنقبه برضه بتتعرض لنفس الموقف, و بتحكيلنا انه بلحقوها شباب و بصيرو يرمو حكي , مشهد ان شب ماشي بطيء بالسياره ورا بنت و بتفاهم معها على المبلغ المطلوب صار شي متكرر و مأساه اذا بصير شي عادي, ما بنكر ان في بنات بفظعو باللبس , مش محجبات و محجبات اشي غريب اللبس, لكن برضه في شي اسمه غض بصر و مش عذر ابدا انك ترمي بلاك على بنات العالم, لان زي ما في من هالبنات بحبو و بدهم حد يتحركش فيهم في نسبة جهل بس عايشه عالتقليد الاعمى للموضه و اخلاقهم ما بتعكسها طريقة لبسهم.

خايفة نوصل بيوم لانه يكون في عنّا شوارع خاصه "معلن عنها" للرذيله, خايفه يصير الشك قائم و التعميم قائم بسؤ الاخلاق حتى يثبت العكس, خايفه يصير شيء طبيعي الشب يتعرض للبنت بالشارع, خايفه يصير شيء مقبول تلفظ الالفاظ النابيه الجارحه الخادشة للحياء على مسامع الجميع, خايفه اي شخص مريض نفسيا يعطي لنفسه الحق انه يتحرش ببنت بدون اي رادع و بدون اي خوف من ردود افعال, لانه وللاسف العالم صارت تمشي على مبدأ "ابعد عن الشر و غنيله" بس قبل ما تبعد ما في مشكله لو وقفت تتفرج و طلت موبايلك و صورت و اذا في مجال شاركت.

33 التعليقات :

رح احكي شي واحد واثق الخطى يمشي ملكا! الصورة اللي حاطيتها ذكرتني بموقف كنت راجعه من الجامعه وانا لابسه جلباب لا بنطلون ولا بودي وأجأ واحد زفر قعد جنبي وصار يلز علي بس لما مد ايده وبالكف ع نص وجهه ونزلوا صاحب السرفيس وتبهدل
هلا انا من وجهت نظري النذل نذل وين ما كان ورح يتناذل لو كان اللي قدامه بنت نبي مش شرط لبس مش شرط ماكياج ومش شرط غنج كله أعذار فاضيه!

 

اللي خايفة منه عم بصير صراحة أنا عايشة في منطقة بإربد قريب من كلية ومرقت فترة كنت أشوف بنت من الكلية تتبادل القبل مع شب والمنطقة مش مخفية أبدا كلها بيوت

 

بتصدقيني لو حكيتلك أنا يمكن مرتين بحياتي اللي ممكن سمعت فيهم معاكسات ...!!! أكيد ويسبر البنت المحجبه ما ببتعرض لمعاكسات على قدر البنت اللي مفرعه سبحان الله الحجاب بصونها أكيد .....إن شا الله بكتب عن الموضوع لأكمل موضوع غربة البنت :) وضحكتيني جد لما أخوكي قال خافي على مشاعري هههههههههههه

 

ما إلي أقول إلا الله يصبرك و يصبر كل إللي زيك، و الله يهدي شباب هالأمة

 

بتصور انك اختفيتي اول ما تحجبتي لأنك ما كان لسا وجهك متوعد على الأشار بعدين بس تعود وصار الحجاب حلو رجعتي تنشافي يعني كلنا اول ما نتحجب بنمرق بهاي الفترة :p
او ممكن لأنو زي ما حكيتي لأنو الناس بطلت تفرق بين انواع البنات او قصدي البنات انواعها صارت تتداخل زز يعني بطل الحجاب دليل على شي ولا حتى النقاب ولا ولا ...
وبالنسبة للمناطق تبعت الرذيلة ما تستغربي اذا صار !! انا سمعت انو بالـ 70 كان في ترخيص لهاد العمل هون وبمصر كمان او يمكن هو بالأ 80 !!
المهم حمدالله على سلامتك من فترة الجامعة :p

 

مرحبا ويسبر،
هيه هيه هيه أول وحدة بعلق أول مرة
صحيح أبشع شي هو المعاكسات، حسبي الله و نعم الوكيل في اللي بعاكسو و خصوصا الي بمدو ايدهم ، دايما بكون مستعدة بدبوس في الباص عشان أعلمه الأدب، (طبعا هاد زماان لما كنت في الجامعة)
الغريب إنهم ما بفرقو بين محجبة و غيرو ،والله اشي يقهر، أنا لما أسمع أي كلمة بغلي الدم في عروقي و بعصب و بكون نفسي أخنق اللي بيحكي ،بس اكتشفت إنه في بنات قال بفرحو لما حد يحكيلهم كلمة (قال خليني أحس إني حلوة!!!!!!!!!!!!!!!) غريب و مش فاهمة لهلأ كيف هي بتفكر
آآآآآآ صدمتيني بحكاية الي بوقف للبنت بنص الشارع،فكرت مافي هيك بالأردن (معلش صرلي سنتين مش نازلة و هاي السنة ناويين نسافر،الله يسهللنا السفرة )يلا خليني أدير بالي و أنتبه هناك و أنا ماشية.......
كمان نفسي حد من الشباب يفهمنا هم كيف بفكرو و شو بكون متوقع لما يحكي كلام و يعاكس، يعني شو بدو يكسب، يعني شو الهدف أو الدافع؟؟

 

و الله يا ويسبر صرنا و خلصنا , صار في شوارع معروفه بهيك شغلات , للاسف ما كنت مصدق بالاول , بس المصيبة الحكومة بتعرف هالشي ,بس سلامتك!

 

أنا حأكون قارئ صامت هالمرة و ما أشارك

---
و فرصة نستفيد صحيح - خخخخخخخخخخ

 

احنا هنا في السعودية الكل محجب بانواع مختلفة من الحجاب و الكل بيتعاكس و بيسمعله كلام يسم البدن. البنات الان صايرين هما اللي يعاكسوا , طيب اذن خلونا و عاكسوا هادول البنات و سيبوا الباقي , بس لا لازم الكل يسمع منه كلام. شوفي الموقف البايخ دا قبل كم سنه واحد كان بيعاكس و قال كلام قشعرلي بدني فسبيته, تتوقعي ايش قالي؟؟ امرني اسكت لانه صوت المرأة عورة !!!

 

انا مش قادر أعلق ..

الحكي اللي بدي أقوله كثير ..

اقلك شو؟

رح اكتب فيه بوست عن قريب انشالله

 

معلش تعليق ع قصة وفاء: لم أتمالك نفسي من الضحك، ما هذا الإيمان الذي يملأ قلبه
:-)

 

اصدقائي ...
اسفه على التاخر بالرد على التعليقات و لكن حابه اسمع منكم قصصكم بالاول لان في ناس بس يسمعو او يقرأو القصص بفكرو انها مواقف فرديه و مش منتشره

مسائكم و صباحكم و كل اوقاتكم سعيده
و كل ذكرى اسراء و معراج وانتو بالف خير
ربنا يعيده علينا و احنا من الله اقرب و من تحرير الاقصى اقرب ان شاء الله

 

marra ana w o5tee t3aradet la mawqef el sayara lol kan fee share3 el jam3a el ordunyeh w hyeeh btelbes 3abay w ana men habalee lbeset kaman 3abay zayha ! sayaraa wa2afatelha w wa7deh wa2afatlee ana lool 6ab3an ana bkashra ba7keloo 3afwan fee eshee ? hweeh elta5am be7kelee entee kontee teshte'3lee belmakan el fwlanee ana 6ab3an bjafa9a 7aketloo la2 yaa 3amme twakkal 3ala allah !

 

اللي بخاف على اهل بيته ما بعمل هيك لانو ببساطة بخاف يصير معهم هيك ، وقال صللى الله عليع وسلم "لاتؤذوا المسلمين ولا تُعيّروهم ، ولا تتّبعوا عوراتـهم - ] فإنه من تتبع عورة أخيه المسلم يتتبع الله عورته ، ومن تتبع الله عورته يفضحه ولو في جوف بيته ". رواه الإمام أحمد وأبو داود والترمذي ، وهو حديث صحيح .والمسلم مطلوب منو غض البصر .
الصراحة هاد الموضوع بزكرني بقصة قراتها ، ومابدي اكتبها بس نهايتها بتنتهي بهاي الحكمة
دقة بدقة ولو زدت لزاد السقا
الله يستر على الجميع

حنين

 

قال صلى الله عليه وسلم" لاتؤذوا المسلمين ولا تُعيّروهم ، ولا تتّبعوا عوراتـهم - ] فإنه من تتبع عورة أخيه المسلم يتتبع الله عورته ، ومن تتبع الله عورته يفضحه ولو في جوف بيته" . رواه الإمام أحمد وأبو داود والترمذي ، وهو حديث صحيح .

ولو كان هاد الشخص بخاف على اهل بيته اكيد ما راح يعمل هيك لانو الدنيا سلف ودين، والصراحة هاد بزكرني بقصة قراتها ومش حابه اكتبها بس خلاصتها : دقة بدقة ولو زدت لزاد السقا
الله يستر على الجميع

حنين

 

يسلموا ايديك ع الموضوع .. قصة المعاكسات هادي ولا عمرها بحياتها رح تخلص .. اللي لافت انتباهي انه ما فيش معاكسات في البلاد الأجنبية .. بس احنا اللي مفروض اصحاب دين و اخلاق و شرف و شهامة اللي عنا منها .. اللي بعرفوا انه بالامارات (بالشارقة) في غرامة على المعاكسات و باي وقت البنت بتقدر تجيب السيكيوريتي تاع المكان للشب اللي مدايقها و بياكل هوا :)

الله يبعد عنا و عنكم شر ولاد الحرام (دعوة ماما ههههه) .. سلام وسبووورة :)

 

أنا مبارح كتبت تعليق وما بعرف ليش ما طلع، عموماُ في حديث معناه "من تتبع عورات الناس تتبع الله عورته وفضحه ولو في عقر داره" واتوقع انو حديث صحيح او حسن.
يعني هدول ربنا اللي راح يتبع عورتهم مش الناس!!!
ولو هاد الشخصالمعاكس بخاف على اهل بيته ما بعمل هيك لانو الدنيا سلف ودين،وهاد بزكرني بقصة قراتها مو حابه اكتبها بس بتتلخص بكلمتين :
دقةً بدقة ولو زدت لزاد السقا

الله يسترعلى الجميع

حنين

 

مساء الخير يا بطه
اول شي طمنينا على الست الوالده واللقاء العاطفي السخن بينكم:)

تانيا...
ح اعلق ع نقطه ليش هالايام صاروا كل البنات يتعرضوا للمعاكسات بدون استثناء ...حاسه انه الحجاب هالايام موضه اكتر منه تديّن والتزام....في كتير بنات بعيلتنا محجبات وهم ما بيصلوا....تحجبوا لانه صاحباتهم محجبات وهيك قصص يعني ما بتقدري تحكمي هل هذا تدين وللا موضه ماشيه في البلد....بينما قبل 20 سنه!!! مثلا....كان الحجاب يدل عل تدين والتزام عشان هيك اللي محجبه ما كانت تتعرض لهيك معاكسات او تتعرض لها بصوره اقل

تالتا@ وفاء
لوووول على الموقف تبع صوت المرأه عوره

 

ويسبر:) شكرا كتير على اختيار هدا الموضوع المهم جدا! يمكن لأني هلأ قاعدة بالبيت فصرت بعيدة عن مثل هذه المواضيع، ولكن ذاكرتي لا تخونني في تذكر ذكريات بشعة وغريبة تعرضت فيها للتحرش وأنا أرتدي الجلباب الحمدلله!
اقترحت في تعليقي على مدونة نيسان أن نقوم (الفتيات المدونات) بعمل مدونة تستعرض مواقف حقيقية تعرضت فيها الفتيات إلى التحرش ورد الفعل المناسب في تلك الحالة من باب "عرفت الشر لا للشر لكن كي أتقيه".

 

و أنا حششت على قصة وفاء

مرة بنت بتقولّي كانت ماشية و شرطي اجا لطّشها
قبعت معها و قالتلو شو حاميها حراميها؟
قاللها لأ حاميها أولى فيها

 

حبيتوا للموضوع و رح احكي فيه شي يوم اكيد .
كيفك و طيمنينا عنك و لو بايميل يا بنت
على اسا جارتنا و الا الشغل هناك زي عنا نحت بنحت لينهد الحيل
بعرفك بتحبي تثبتي حالك و انت قدها بس ما تنسينا
:)

 

عزيزتي ويسبر
مش قادرة اعلق على الموضوع مع انه عاجبني جدا
لسبب انه قرات نفس الموضوع بكل المدونات اليوم
هوه ايش في بالزبط
مال الناس و مال كل اشي؟
في ازمة بنات بالبلد مثلا؟ انا محجبة و ملاجظة انه نسبة المعاكسات عالية كنت افكر انه مال الشباب هسا فهمت انه مال البنات؟ اكيد معظم البنات بيعملوا اشي بخلي كل الشباب يفكروا انه اي بنت شو ما لبست من اياهم

 

Sozan

انا كنت اعاني من نفس الموقف بالباص, واحلى شي اللي بنام و بكون قلبك بدو يوقف و همه بتمايلو و بوقف قلبك عند كل مطب, غير اللي وراكي و بمدو ايديهم, اشي بخزي ايام بشعه كانت, مرّه وحده اضطريت اني احكي لانه زودها كتير و شو كان ردّه يا حزرك؟؟
"شو مفكره حالك مرلين مونرو " طبعا انا مسحت فيه الارض و علنا و ضلت كرامته تنئح عليه فبنص الطريق صار يحكي ...وقفت و حكيتله "شو رايك تستحي على دمك و تسك؟؟؟" قام خنس

الله لا يعيدها من ايام ولا يبلي حد يا رب

بالزبط...لا دخل لبس ولا دخل ميك اب

Anonymous

مش خبريه بصراحه :$
يعني انتشار هالشي مع الايام العالم بتتعود عليه و ما بوقف عند حد
الله يجيرنا من بكره

 

Orangee

حظ مش اكثر...اللبس ما اله دخل, اللي ما بستحي ما بتفرق معه, بنت خالي طول عمرها بتلبس نقاب مش بس جلباب و بتتعاكس و بتوقفلها سيارات و ياما مبهدله عالم
و حتى لو لابسه شي مش مناسب...هل هالشي بعطي الحق للعالم تنهش فيها؟؟؟؟ مش في اشي اسمه غض البصر؟؟؟

اخوي مسكين ناسي ان اخته بنت برضه :)

Saleh

اميييييييييييين يا رب
المشكله زي ما بين بس الكل كتب عنها مش فرديه و للاسف منتشره كتير كمان

 

Hana

بتصدقي اني ما كنت احط ميك قبل ما اتحجب و بس تحجبت عجّبت ميك اب؟؟؟
لاني كنت حاسة الحجاب بشع علي كنت احط ميك اب كثير و كانت اول مره بحط روج كمان
الله يسامحني على هديك الفتره ...انا هلأ بحط ميك اب الله يهديني :$ بس مش زي وقتها

الموضوع ما اله دخل بطريقة اللبس ...الموضوع باعتقادي بين قلّه الدين و بين انتشار البنات اللي بخفو تصرفاتهمن بالحجاب اللي لابسينه فالشباب الوقحه بطلو يفرقو

الله يسلمك يا رب :)

Lily

مسا الفل يا قمر... معلش ما زبطت معك :$
انا مرّه مسكت ايده للي وراي و قرصتها قرصه بكل غل بقلبي و ضليت زي ما انا ولا كأنه صار اشي و هو خنس و جلّس و نزل بالموقف اللي بعده
في بنات بحبو هالكلام و نفسيتهم بتتأثر و في بنات اكتر هالكلام بأذيهم و ما اله اي ايجابيه عندهم .... اشي مؤذي و مقرف كمان

لسا ما قرأت كل التدوينات عن الموضوع و لكن اعتقد انّا من تدويناتهم راح نفهم ولو جزء بسيط من طريقة تفكير هالنوعيه من الشباب ..والبنات للاسف :$

 

Dr.Mohammed

للاسف شكله اه :(
عنّا بالاردن؟؟؟؟؟ وين ؟؟؟ خلي الواحد يقاطع هالمناطق

مهو فرصه العالم تلتهي بالقرف بدل ما توجع روسهم بموضوع الفساد و الاصلاح

Sheeshany

ان شاء الله تكون استفدت؟؟؟
لسا ما قرأت ادراجات الاصدقاء عن الموضوع بس متأكده انها كانت مفيده و ثريه بالتحليلات و القصص المؤسفه

 

Wafa'

للاسف اشي مستحيل يتصدق ولكن للاسف طلع حقيقي... قبل كم يوم كنت مع اخوي بالمول و رحت انا اشوف الاواعي الستاتيه و اخوي راح عالجزء الرجالي بعد ما دورت ما لقيت شي رحت عند اخوي لقيت وحده بتحكي معه, ال بتحيكيله انه عجبها كتير طوله و ان "جسمه" لبّيس و بتشكر و بتمدح اشي بخزي الله يخزيها شافتني قامت سحبت حالها و مشيت, بحكي لاخوي هبله هاي ويلا بتتهبل بحكيلي في منها كتير
الله يقرفهم هالاشكال

يا الله شو بقهروني هدول اللي فاهمين الدين غلط.... بس بعرفو اللي عالعالم و بنسو اللي عليهم
ما في غض بصر ولا في حياء ولا في شي بس انتِ المهم صوتك ما يطلع
يا عيب الشوم على هيك عالم

ΣcoŞan

شفت انه في ادراج و قرأت شوي منه عالموبايل بس للاسف لسا ما قرأته كامل
اول ما اخلص ردود طيران هناك رايحه

 

SimSim

انا كنت واقفه قدام مسجد جنب بيتنا...تخيلي و وقف من كل عقله و صار يتفرج و فتح الباب !!!! انا ينفتحلي ابواب انا!!!
مشيت كم خطوه بعيد عن السياره و يئس و مشي

حنين

اولا اهلا وسهلا فيكي بمدونتي المتواضعه و اسفة جدا عالتأخير بنشر التعليق و الرد...حقك علي :)

المشكله في ناس بفكرو بما انه هو محجب مرته و مغطيها و ساتر على حرمته فهو بعطيه الحق يتطلع عالعالم اللي بمفهومه مش مستورين !!!
و للاسف في منهم كتير هدول
سبحان الله ..ربنا كريم و عنده ما بتضيع الحقوق....الله يهدي و يستر عالجميع

شكرا للمرور :)

 

هديل

الله يسلمك يا قمر...هي بصراحه اقتراح صديقتنا اورانجي و بتصويت الجميع كان اختيارها :)

للاسف مع انه ما في دين بحثهم على هالموضوع ولكن جد ما في تعليقات
مرة اخوي اجنبيه بتنصدم قد ما العالم بتعاكس و بتتفرج...يتحكي ما عنا هالظاهره بهالانتشار نادرا ما تسمعي كلمه و بتكون من ناس مريضين نفسيا و نادرا ما حد يتفرج على حد

بتذكر ان اخوي مره حكالي ان بالامارات اذا بمسكو واحد بعاكس البنت من العقابات اللي بتعاقبها انهم بنشرو صورته بالجريده انه كان يعاكس البنات بالمكان الفلاني

اميييييييييييين يا رب....سلام يا قمر

Naysan

مسا الورد يا قمر
:( الله يسهل عليها حبيبتيييييييييييي
زي الصغار بس شفتها من بعيد صرت اركض عليها و مسكت دموعي بالعافيه و ضليت حاضنتها و اخواني يحكولي دورنا يلا خلصينا
نيجي لثانيا
في منو اللي بتحكيه بطريقة الحجاب و اهدافه بس مش سبب للمعاكسه بالمره

اكيد ما بنقدر نحكي ان المتدينه ما بصير تتعاكس و اللي مش متدنيه تتعاكس الله لا يردها :) احنا ضد الظاهره بشكل عام

الله يسامحك...شو قبل 20 سنه حسستيني اني خالتو :( قبل 20 سنه كان عمري..امممم
O_o
ايه.... ماشي خالتو شو نعمل :)

اما بالنسبة لثالثا...شفتي بالله عليكي

قهرني الموضوع كتير .... كيف فاهمين الدنيا هالعالم مش عارفه

 

Rana

العفو يا قمر...شكرا لكل اللي صوتو و للي اقترحت الموضوع :)
شكرا كتير صديقتي رنا....لانك اثبتي وجهه نظر كتير مش مقتنعين فيها و بعزو الموضوع لطريقة لبس البنت

لهلأ قرأت مدونه سمسم و جقرا "لبنى" و ام عمر و حاطين قصص عن الموضوع
و صديقنا ايكوسان برضه كاتب عن مواقف بس لسا ما كملت قراءة ادراجه

Rain

الله لا يعطيه العافيه على هالرد .... العالم بطلت تستحي يا اختي :$

 

Jafra

حبيبتي...كلك ذوق يا قمر
هههههه ...بيني و بينك اخدت الموضوع جد و رجعت لايام المدرسه
بدي اكون الاولى :)

Noor


اولا اهلا وسهلا فيكي في عالم التدوين و اهلا وسهلا فيكي في مدونتي المتواضعه :)

انا كتير مبسوطه ان الكل كتب عن الموضوع لانه هاد الهدف من فكرة " لنكتب عن ..."

هي مال البنات و مال الشباب اللي بعاكسو
اما اللي بتعاكسو فمش دايما بكون الحق عليهم ولا دايما بكونو مبسوطين على هالموضوع

 

الان اعرف الى اين نحن سائرون طالما واللهجة المحكية هي التي يكتب بها كثير من المدونون.
وطالما وأن التعليم عندنا عكس كل دول العالم هم يتقدمون بالتعليم ونحن نتأخر خذي مثل انت كنت مش محجبة وتحجبت في اخر سنة جامعة المفروض ان التعليم يعني الانفتاح
وبدل ما تحللي مسألة المعاكسات وتعرفي الاسباب وتقترحي الحلول اصبح الأمر مجرد همسات وطق حنك لا والمصيبة انو ولا في تعليق يقترح حلا ما .
سبب المعاكسات شيئين انعدام الثقافة او الوعي وليس التربية فقط فاثقافة خير مربي والامر الثاني الكبت والحرمان فالناس تشاهد العري والجمال على التلفاز والنت ولا تستطيع ان تعبر عن مكنون طاقتها الجنسية وبدل ما تقترحين الحل خفتي منه وهو ان يكون هناك اماكن لتفريغ الكبت الجنسي تسمونها انتم معشر المؤمنين والمؤمنات أماكن رذيلة ولكن عدم وجود هذه الاماكن بشكل رسمي لا يعني انها غير موجودة هي موجودة وبدل ما يكون هناك شارع واحد اصبحت كل الشوارع اماكن رذيلة
مفيش فايدة قالها سعد زغلول لزوجته صفية مفيش فايدة يا صفية

 

اولا اهلا وسهلا فيك ضيف بمدونتي

اللغه المحكيه هي الاقرب للتعبير عن اللي بدي احكيه, انا المدونه عملتها لاحكي فيها انا عن اللي ببالي, لا هي مدونه تختص بالادب و لا مدونه مختصّه باي شي, هي مكان خاص فيي بشارك فيه افكاري و معتقداتي و وجهات نظري مع اصدقائي و صديقاتي المدونين و مثل ما لاحظت حتى انت استخدمت بعض الكلمات المحكيه في تعليقك حتى توصله النا, ولكن وانا معك ان في تقصير منا تجاه لغتنا العربية الفصحى بشكل عام

اما عن موضوع المعاكسات... ما فهمت وجهة نظرك عن الحجاب و الانفتاح و العلم.... غير ان تعريف الانفتاح مفتوح و مختلف من شخص للتاني فما بتقدر تربطه باي شي حتى توضح مفهومك الخاص اله

الموضوع تساؤل عن الاسباب لاني بجهلها, و بس تعرف الاسباب بنقدر نضع حلول


اما بالنسبة للحل اللي حضرتك اقترحته فهو مرفوض تماما و هو يمكن سبب للمشكله مش حل من وجهة نظري
لو الشباب و البنات غضو البصر عن هيك مشاهد لما ضل تفكيرهم منصب على هالامور و لاستفادو و افادو من وقتهم الضائع