Things I Like To Whisper About

Would You Hear Me Whispering

غربه البنت....



الموضوع بكل بساطه اني قرفت....الشغل اللي انا فيه حاليا ما بحقق ولا 1% من اللي بدي اياه
الراتب مش بزياده والسكن مش مريح و لكن هو تصبيره لاخر السنه لاشوف شو بصير معي , ما بنكر انها خبره جديده ان كان بمجال الشغل او بمجال الاغتراب و التعرف على صفات جديده موجوده فيي وما كنت اعرفها, بس انا قرفت وكان لازم ابعد لفتره عن كل شي و عن كل الناس - ما عدا اهلي طبعا

الموضوع اني وبكل بساطه ما كنت طايقة شغلي و اكتر من مره كتبت عن هالموضوع, دورت على شغل بالاردن وما زبطت, خمس سنين وانا بمكاني, معاناه و ضغط و نفسية تعبانه وناس مريضه حولي و صار بس بدي ابعد و اخلص من الكل, انا بعرف اني مش صغيره لحتى هلأ اقرر ابدى و اجرب بس حسيت اني ابدا اهم من التفكير و التحليل و اني اشتري نفسي اهم من كل شي.

الكل بحكيلي او بلمحلي ان انت اللي اخترتي تغتربي و هالشي مش صحيح 100%, ما بنكر ان كل واحد فينا فيه ولو جزء بسيط بتيجيه اوقات بكون نفسه يروح على مكان لا حد بعرفه ولا هو بعرف حد, انا بعترف ان هالحاله عندي مرات و لكن انا عندي اسبابي الخاصه وحده منهم و اهمها اهلي :), انا تغربت علشان اهلي, اكيد الموضوع مش مادي اطلاقا لان الحمد لله وضعنا المادي مستقر و دخلنا الشهري شبه ممتاز, راتبي كان وما زال الي و كنت وما زلت بندعم ماديا من اهلي :), الموضوع بكل بساطه ان بابا اللي كان يشتغل بشركه خاصه و كان بالاداره بهالشركه و بعد 36 سنه شغل وصل لسن التقاعد, و بما انا بلد كتير بهتم باللي بضحو بحياتهم و بكرمهم بكبرتهم, بعد التقاعد انقطعت كل التسهيلات الي كانت الشركه مأمنتها لبابا و منها التأمين الصحي, فجأه بابا وماما صارو بدون تأمين صحي, حكينا عادي وشو يعني بنروح على شركه تأمين خاصه و خلصت خلصنا, بابا انرفض تأمينه بكل الشركات الخاصه اللي عنا لانه عنده كولسترول و ضغط و ديسك و تآكل بغضاريف الركب - هاد اللي كسبه بالاضافه للراتب التقاعدي من الشركه اللي كان يشتغل فيها - و ماما وافقو تأمينها ب 1000 دينار سنوي و غير شامله للست من الامراض , تخيلو واحد وصل لل 60 من عمره و بهالسن صار ما في تأمين, شكرا لخدماتك خود راتبك العالي من الشركه و ابعد عنّا و روح امرض بالبيت.

بشغلي ما كان مسموح للبنات يأمنو ابائهم و الحمد لله في نفس السنه اللي صار فيها كل هالاكشن فجأه سمحولنا نأمن الوالدين , و الحمد لله امنت بابا وماما معي :) و صار هلأ عندهم تأمين و ادويتهم و علاجاتهم متوفره دائما, هلأ نرجع لموضوع الغربه, شغلي باي شركه خاصه داخل الاردن بفرض علي اني استقيل من الشغل , هلأ ممكن اني اشتغل بشركه خاصه و اجيب عقد مزيف من بره الاردن و اقدمه لشغلي و اخد اجازه, يعني لف و دوران و كذب و حذر وخوف و تخبايه و كذب مرات ومرات بس حد يشوفك صدفه او حد يتصل فيك, وجعه راس غير انه حالتين من الموظفين االي عنا بالشغل توجههلهم انذار بعد اكتشافهم.

فاااا الحل الوحيد هو دبي, وخصوصي بوجود اخواني فلا تعتبر غربه و خاصه بفكرة ان اخوي الصغير يجي يشتغل هون و كلنا ننتقل هون, الخطه تغيرت , اخوي ما بده يجي هون و بابا ما بده يبعد عن العيله , فصارت انّا كلنا نضل رايحين جايين عالخط.

فهل انا اخترت الغربه, اه اخترتها اولا لاني بدي ابعد و تأمين بابا وماما كان سبب تاني و الاهم, كتير امور بحياتي مش مثاليه كانت, ازمات و ازمات و ازمات.... كلها خلتني احس اني عاجزه و انسانه مش ناضجه وما بتفكر بطريقة سويه, احكامي عالناس والامور صارت غلط و كل مره صدمه جديده , طيب و بعدين ؟؟؟ ضلّي مكانك و حطي راسك بالارض و امشي ويلا اعملي شي و غيري و جربي؟؟؟ انا مش كبيره بس برضه بكره ما راح اصغر لأ راح اصير اكبر فهلأ احسن من بعدين, درست الموضوع شو راح اكسب و شو راح اخسر, ما راح اخسر شي ان شاء الله, شغلي القديم موجود و بدي ابعد عنه لفتره بكل الاحوال, اهلي و ان شاء الله ربنا يحميهم و يخليلي اياهم راح نضل نلتقي كتير و خصوصي ان مجال شغلي بسمحلي اشوفهم كتير ان كا بجيتهم عندي او بسفري انا عندهم زيارات قصيره, فحسيت اني راح كسب راحه نفسية و تجربه جديده و خبره جديده ممكن تفتحلي مجالات كبيره قدامي مستقبلا.....فاااااااااااااااا قررت الاغتراب

هلأ اللي بدي اسألكم عنه هو شو وجهة نظركم بموضوع غربه البنت؟؟؟
في ناس بعتبرو الموضوع عادي وفي ناس بعتبرو الموضوع كأنه الدنيا اخر وقت ....بنت تسافر و تتغرب؟؟؟ وكأنه خلص بنت طلعت بره البلد اذا البنت راح تفلت و تضيع و تتغير و تنسى تربيتها و اخلاقها.... و هل دائما الغربه لازم تكون لاسباب ماديه؟؟؟ انا ما بنكر ان من اسباب تغيير شغلي هو مادي لاني نفسي اشتري بيت بالرغم من التقليل من شأن هالموضوع بالنسبة لاهلي لانهم حالينها باني اولا راح اتزوج - اه لسا عندهم امل :) - و ثانيا ان منطقيا اضل عايشه في بيت العيله, بس انا بطبيعتي شوي نكده وبحب اعمل كل شي انا بنفسي و بحبش اكون تقيله او اتحمل ان في اشي مش انا اللي عاملته وجايبته بجهدي و تعبي.

و لكن مرات بنتغرب بس لنبعد, لنجدد النفسية و لنرجع لشخصياتنا القديمه اللي الظروف و الضغوط غيرتها و حاليا و بشغلي الحالي هاد اللي انا ناويه اعمله و لاخر السنه بنشوف شو بصير اشي جديد :)


تحديث
امور و اسأله جديده من التعليقات

هل اغتراب البنت للدراسة بختلف من وجهه نظر المجتمع و اكثر قبولا من اغتراب الشغل؟؟

هل سكن البنت المغتربه بسكن الشغل مرفوض و لو ساكنه مع حد من عيلتها بتبطل مغتربه؟؟؟


44 التعليقات :

ما دخلني أنا اول واحد
للتو الآن و في هذه اللحظة وصل اللينك على تويتر و إجيت ...

بدي أحجز بالأول .. و برجع :)

 

اوك...خلّص الجلي و ارجع :)

 

أوكي
حجزنا

و للأسف ما عندي إضافة لأني حضرتي مغترب لأسباب فيها تقاطعات كبيرة مع ما حكيتي أم الويسبر

منها هروب "ذاتي يمكن" ، منها مادي
منها خبرة لأنو و لا أي جامعة/كلية بالأردن رضيت فيّ لأني ما معي واسطة و راكب راسي

---
بالنسبة لغربة الأنثى
أنا كنت حأكتب..
"خليني أستنى تعليقات الناس/ات"

بس خليني أحكي إني "شوي" تقليدي و بفضل يكون خيار ما بعد الأخير! أووووبس

الدنيا تغيرت، آه و سفر الأنثى بالتالي تغير.. كمفهوم و ممارسة و أساس

بس مش راكبة معي لأنو مع تغير العالم هناك تغيرات موازية و معظمها باتجاه الشرّ -برأيي- ، لا أقصد أن أقول أن النساء/الإناث لا يعتد بهن و لا بقدرتهن على تخطيها و لكن أظن الجزء الشرقي مني يرفضها أن تكون إلا آخر خيار

:بدون ضرب:

 

Sheeshany

ممتاز جدا....انا اساسا بستنا تعليق من هالنوع لافهم اكتر الموضوع

انا مع ان الغربه صعبه و خيار صعب بس عالجميع شباب و بنات

بس يا ريت توضح اكثر وجهة نظرك... شو الاشي اللي بتتخوف منه او اللي بخليك ترفض الموضوع؟؟
ايش التغيرات الموازيه التانيه؟؟؟

شو الفرق عن البنت اللي بتشتغل ببلدها و اللي بتشتغل بره البلد؟؟؟

شو اللي ممكن يغير مفهوم الاخلاق و الدين و التربيه و العادات والتقاليد بالنسبة للبنت بس تغير مكان سكنها؟؟

 

اسمحولي أفوت على نقاشكوا الحامي الوطيس بمداخاه بسيطه ..

موضوع غربة البنت معقد شوية ..
خصوصاُ التغرب الى مجتمع شرقي ..

في المجتمعات الشرقيه .. المنظور نحو البنت .. منظور دوني .. أنا ما بعمم أحكام مطلقه .. بس بنسبة منيحه هيك ..

لذلك .. في العادة البنت .. انسان مطموع فيه .. لذلك بتكون في محل تهديد ..

الان البنت في بلدها .. بتظل مهيبوه .. من الناس لإنه عليتها واهلها عندها ..

بس لما تكون في بلد من دون حدا .. الرهبه اللي بحكي عنها بتروح ..


شخصياُ .. كفكرة استقلالية وحرية للبنت .. أنا مش ضد ..

بس إذا بخصني .. وبهمني هالحديه .. لأ بفكر بسلامتها قبل كل اشي ..


وعذراً عالاطالة

 

موضوع غربة البنت موضوع شائك بالنسبة للمجتمع الشرقي، مع اني أؤمن بأن الفتاة الشرقية فيها من الفضيلة والنقاء ما يؤهلها لأن لا تنزلق في أي مطب، لكن على الرغم من ذلك فأن نظرة المجتمع لا تزال نظرة فيها الكثير من التحفظ، لكن بالنسبة الك ويسبر فموضوعك مختلف لأنك عند اهلك في الامارات ويمكن الجزء اللي هناك في الامارات اكتر من الجزء في عمان، فما الذي يختلف ؟

اصبري ويسبر وان شاء الله ببتوفقي بشغل ممتاز، هناك بلاد فرص بس كل شي بأولو صعب

 

ΣcoŞan

ما بنكر ان في نوع من الرهبه موجوده عندي و بحس بامان كبير بسبب وجود اخواني و بسبب سرعه وصول خواني الي, بتلفون خلال 5 دقايق اخوي بكون عندي

ما بنكر وجود اصحاب نفوس مريضه و لكن هدول حوالينا بكل مكان, يعني ياما دخل شباب من اصحاب هالنفوس المريضه لوسط بيت اهل البنت عن طريق النت و الموبايل

غير عن البنات اللي بكونو عايشين لحالهم بسبب وفاة الوالدين و الظروف بتخليهم يكونو وحيدين بوسط بلدهم

انا بصراحه ما عندي وجهة نظر خاصه بالموضوع, ما فكرت اني ضد او مع ...ولكن بحاول احكي الافكار اللي حاليا براسي و اشوف وجهات النظر

و اختلاف وجهات النظر جدا بسعدني لحتى نكون محيطين بالموضوع من جميع الجوانب

شكرا صديقي

نادر

شكرا صديقي.... انا معك ان وجود خواني بهوّن الموضوع ولكن انا عايشة بسكن الشغل يعني برّه بيت اخواني, ممكن هاد برضه يخليني من ضمن البنات اللي المجتمع اله نظره خاصه فيهم

الله يجيب اللي فيه الخير....مش عارفه و لا شايفة المستقبل كتير مرات بكون واضح و مرات يا دوب بكون شايفه بكره :)

 

انا مو ضد ومو مع بنفس الوقت..يعني بالنسبه اللي بصراحه شغلي ماشي حاله الحمد لله وتفكيري بالغربه بس بكون لهدف واحد بس كمل دراسه وحاليا شويه صعب الموضوع


بس كتيير من صاحباتي تغربوا وعم يشتغلو شي بالامارات وشي بالسعوديه وحتى باميركا
فيه منهم مرتاح ومبسوط وفيه لا ..وبصراحه المرتاح منهم هم اللي الهم حد متلك عزيزتي ويسبر اخ يعني او اخت بنفس البلد بس غير هيك كان كنتير الوضع صعب مو لانها بنت بس لانها بنت وحيده ببلد غريب....حلو الموضوع رح كون من متابعينه :)

 

Miss Light

اولا هلا و سهلا فيكِ هون و يا ريت تضلك تعيديها :)


اهااااا شكرا كتير الك لانك فتحتي باب جديد بالموضوع

هل غربة البنت للدراسه تعتبر اهون من غربتها للشغل بالنسبة للمجتمع؟؟
حلو كتير هالموضوع

معك حق 100% ان وجود خواني كتير بهون, يعني مثلا انا من الاربعاء و لليوم وانا عند اخوي و هو اللي بوصلني و بجيبني من الشغل هالفتره و هالشي بعطيني راحه بزياده, اخوي عرض علي اني اقيم عنده بس انا ما بدي, هل لو اقامتي عند اخوي المجتمع بتقبل غربتي اكتر من اقامتي بسكن الشغل؟؟

نورتيني :)

 

السلام عليكم
بلشت أرد عالموضوع بس لقيت حالي كتبت كثير ، فقررت أعملها تدوينة عندي من خبرتي و كمان لأنه كان معي بنتين من الأردن بدرسوا هون
إن شاء الله شوية و بنشرها

 

مية ورده ويسبر

باعتقادي انه المجتمع بشوفا اهون...بصراحه لما تيجي سيرة الشغل بره الكل بيعطي نفس التعليق انه شو عليكي كبنت من مسؤوليات ماليه لحتى تفكيري تشتغلي بره بس بالدراسه شوي النقاش بكون غير ...هيك عالاقل اللي عم بشوفه من اللي حوالاي


تسلمي ياعسل :)

 

موضوع شائك وما في رأي واحد هو الصح. موضوع زي هاد لازم الواحد ينظر اله بشكل فردي. يعني صعب نجزم ان غربة البنت صح او خطأ. لكل فتاة قصه وسبب للأغتراب.ـ
لما كنت في الكويت كان في عمارات لسكن الممرضات و المدرسات المغتربات. ما سمعت انه الناس كان ينظروا الهم بطريقه مختلفه.
الغربه بشكل عام صعبه وين ما كانت. انا بعرف عائلات كثير هون في امريكا رغم الوفره والرزق بس مش حاسين بالسعاده وكآبة الغربه شيء بفكروا فيه بشكل يومي. اما غربة الشخص سواء رجل او فتاة الغير متزوج فهي اصعب بكثيــــــــــــــــــــــــــــــــــــر من المتزوجين. لأن هذا الشخص يعيش في شبه سجن انفرادي. العائله (اقصد الأب والأم والاخوان) هي الاساس لا الأصدقاء.
كلنا بنعرف قصة جحا وابنه والحمار. لما يركب الابن على الحمار الناس مش عاجبهم ولما يركب جحا على الحمار ويخلي ابنه يمشي الناس برضه مش عاجبها وهكذا. الخلاصه انه غاية الناس من المحال. الفكره اللي بدي اوصلها انك شو ما عملتي الناس راح بسهوله تلاقي اشي تحكي عليه. اذا سكنت عند اهلك راح يحكوا في موضوع الزواج اذا سكنت لوحدك راح يقولوا يا عيب الشوم اذا سافرت بره ...... قصه طويله. في امور الانسان بضطر يعملها لأنها احيانا بتكون الملجأ الوحيد وهو اكثر واحد بقدّر الامور.
بس طبعا هذا لا يمنع انه الواحد يستشير اهل الخبره والمعرفه بالموضوع.
شغلت الناس شو رأيها حطيها على جنب وفكري بأمور منطقيه بتخصك اكثر:
المستقبل المهني. هل العمل في دبي اله مستقبل؟
هل الغربه بتخليني اسعد ولا بتزيد المواجع
حاولي تفكري بأساله خاصه بك من هذا النوع واستشيري وصلي استخاره حتى تتيقني شو الأفضل الك ولأهلك
كمغترب اعزب ممكن اسردلك مية عيب بالغربه وومكن في نفس الوقت اسردلك مية شغله حلوه. لذلك الامر صعب تعميمه. كل شخص اله ظروفه الخاصه واسبابه.
والله المستعان

 

Alirbidi

وعليكم السلام و رحمة اله وبركاته

هلأ بروح بقرأ البوست الجديد :)

Miss Light


صح...مع اني مش كتير حاسة بالفرق بس المجتمع بشوفو اهون فعلا

ومع ان ادراج صديقنا محمد ببين ان حتى للدراسة بتضلها برضه غربة و الها اثارها

اهلا و سهلا فيكي دائما يا قمر :)

 

Jaraad

موضوع ارضاء الناس هاي غاية لا يمكن ادراكها و متفق على هالنقطه....موضوع الزواج و "الهروب" من الزن واحد من الاسباب ولكن الموضوع متشابك مع مواضيع تانيه

انا من وقت ما اجا القبول لهالشغل بشهر 2 و لعند ما وقعت العقد وانا بصلي استخاره و لهلأ كمان, عملت موازنه للامور مش عارفه اذا كانت صحيحه او لأ و تشجيع اهلي برضه و وجود خواني كلهم امور اقنعتني بالفكره, اللي شوي مخليني صرت متردده اشتياقي لاهلي و لاني ما بشتغل بتخصصي, يعني خبرة 10 سنوات تجمدو لاخلّص هالسنة و اشوف شو بصير معي

سؤال انا شو اللي عملته بحالي و ليش بيجي من وقت لتاني بعدين برجع بتأقلم, انا لسا ما كملت الشهر هون و يمكن لسا بكير عالحكم, الله يجيب اللي فيه الخير يا رب

 

هذا عادة للي بصير ببداية الاغتراب.
http://en.wikipedia.org/wiki/Homesickness
بس لما تتعرفي على البلد اكثر وتتعرفي على ناس بتصير الامور اسهل. بساعد كثير كمان لما تكوني متفاهمه مع اللي ساكنه معهم. اذا بتقدري تشتري سياره راح الامور تتغير تماما لأنه بصير تنقلك اسهل بكثير. والامارات امان سهل انه البنت تتنقل بالسياره لوحدها. لما يكون عندك سياره راح تحسي باستقلاليه خصوصا لما تزوري الاماكن الحلوه زي المولات والشواطئ

 

وانا ما دخلني هذا موضوع ما بقدر اعلق عليه بكلمتين

بدو رد بتدوينة
اذا موافقة اعطيني الضو الاخضر
وبلاش تقولي عني هذا بتلكك
وكل ما اكتب شيء
ببلش رد عن جنب وطرف

الله يرضى عليكِ ويسعدك
انتِ بحاجة الى الهدوء اولا
وسماع راي ووجهة النظر الكثيرين

 

خواني بحكولي ان الطبيعي تسألي حالك هالاسئله و يجيلك هالشعور لانه اجالهم برضه ومش طبيعي لو ما حسيتي بهالتردد بالفتره الاولى

موضوع السياره هو الموضوع اللي شغاله عليه حاليا, خوفوني من صعوبة الحصول على الرخصه بس ان شاء الله ربنا بيسر, الكل بحكيلي لو معك سياره كتير بتختلف الامور

اللي معي بالسكن ولله الحمد كتير كويسين و متفاهمين و حطينا قواعد عامه و الكل ملتزم فيها خصوصي انهم ومع انهم عرب و لكن مفاهيم كتيره بتختلف بينا و مراعاة اني بلبس حجاب الحمد لله ما عانيت منها و خصوصي انه اشي جديد عليهم

واكتر شي مهون الموضوع ان اخر الشهر ماما جاي هون ان شاء الله :)) فالنفسية احسن بكتير

 

yosef


مسائك سعيد

ما بتتصور كم بسعدني لمّا ترد على تعليقي او ادراجي بتدوينه :) بحس حالي حكيت بموضوع مهم و حساس

اميييييييين يا رب
وجهات النظر اللي بتختلف معي و اللي بتتوافق بتفيدني اكيد لانظر نظره شامله و اعمق ومن ابعاد مختلفه

بانتظار الادراج :)

 

Every experience we go thru in life adds 2 our knowledge.. Never feel sorry for anything... Later u'll know that! Though I spent a very short time in KSA bt I learnt a lot from that..

 

الغربة مرة وصعبة بس الصبر وان شاء الله ربنا يوفقك وتلاقى راحتك وهدوء نفسك
تحياتى لك وسلامى المعطر لويسبر القمراية

 

بعيد عن غربة البنت و الشب و الشغل و الدارسة بس ياريت لو كل الستة مليون في البلد يصحلي أخليهم يتغربوا سنة و يرجعوا بلكي تتغير هالعقلية و تصير تفهم إللي حواليها بلكي يتغير كل التفكير

 

آه بالنسبة للتأمين الصحي المفروض كل واحد ما يوصل 60 تأمنه الحكومة صحياً شو هو هاللمصيبة يعني لازم كل ما يمرض يظل يترجى صحياً

 

Tareq

U r totally right...inshallah not to feel sorry about any thing later :$

هبة فاروق

تسلميلي يا قمر :)
ربنا يسلّم قلبك حبيبتي و يجعل ايامك كلها مسك و عنبر على طول

 

خبر

المشكله انه مهما بعد الواحد و حاول يغير طريقه تفكيره بس يرجع فورا بترجع العقليه القديمه

زكرتيني بفيديو لابو محجوب بس ابنه يرجع من السفر...هاي

http://www.youtube.com/watch?v=c2GGAxN0bZU

ما بتغيرو صدقيني :)

بالنسبة للتأمين فهالشي بجلط...يعني الواحد بحتاج تأمينه بس يكبر لانه بتكتر امراضه فبدل ما يوفرولهم تأمين بسحبوه منهم :$

اشي بقهر

 

شوفي
انا رح احكيلك انو انا بكره الغربه من واقع انو لما كنت عايشه بالامارات كنت اشوف واسمع قصص سكن العازبات وكنت احزن فتكونت عندي نوع من العقده
كان الواحد يشوف اشي بيوجع القلب والله!

هلأ موضوع اني اهج من البلد فكرت فيه الا مالني كنت مفكره اهج عالسعودية فترة من القرف بس اللي صار اني هجيت ع عمان الحمدلله!

أما حكاية انو البنت مش محتاجه ماديا تتغرب فهو كلام معلش بتخفظ عليه، السبب انو هلأ عموما ما في واحد بيسأل وكل واحد الله يعينو ع ظرفو فإذا البنت مش وارثه شي منيح فمعناتو مصاريها احسن لها

وبالاخر يا ويسبر بيكفي نحكي عالناس، ايه والله عم بشوف بالسكن عينات اشي بيوجع القلب 10 تدوينات ما بتكفيهم!!

خليها عالله
بس رأيي انا:
ما بشجع:))

 

اولا الله يوفقك فيما اخترت :)
ثانيا من وجهة نظري ويمكن تكوني قرات مدونه والدنا العزيز يوسف المرء الى ما هاجر يا ويسبر فالبنت المحترمه بتكون من دار أبوها بنت محارمه يعني واعرف بنات من الأردن وفلسطين اجو وخلصوا دراستهم والعيون ما طلعت منهم وبالمقابل لأعرف بنات في عمان ما خلوا شي يعتب عليهمم
اذا بدك تستني للمجتمع ليتقبل الفكين عمرك ما راح تصيري وثانيا الناس ما راح تسكت لمجرد عشت مه إخوانك اللي بده يحكي عليكي رح يحكي لو كنت في غرفتك
الشي اللي بدي احكيه اعملي الشي اللي بتشوفيه صح ولا تكترثي بالمجتمع

 

ويسبر حبيبتي :)

طبعاً انتِ عارفه اني انا مريت بهالتجربه قبلك و انا تغربت للشغل مثل حالتك بالزبط و جنب اخواني

رح احكيلك عن تجربتي من منظروين
اولا رأي الناس في الموضوع
ثانيا رأي الشخصي

بالنسبة لرأي الناس
شوفي يا ستي بالأول ما تتخيلي حجم الهجوم اللي لاقيته و حكي الناس العدائي سواء الى او لأهلي كيف انهم سمحولي اتغرب -بس الحمدلله لانه بابا بعقليه متفتحة عرف كيف يرد عليهم و يتعامل معهم-
بس بعد شي سنتين و بس بلشت بكرم الله و رحمته اتحسن بالشغل و وضعي يتحسن بالشغل ماديا و نفسيا و اللي انعكس كتير على شخصيتي بالتعامل و بالشكل لاني صحتي تحسنت بعد ما تحسنت نفسيتي ته، بلشت الناس تحكي شوفوا كيف نجحت بحياتها و بلشت نظرات و كلامهم يتغير بالاعتزاز والفخر للقرار اللي اخذته و تحمله صار اللي كان ضددي صار معي و صرت بس افكر ارجع على الاردن الكل يوقف ضدد خليكي عندك لان الكل لمس الفرق

في شوي شوي انتِ بتغيير نظره الناس بإيمانك باللي عملتيه و اللي اكيد كله برضى الله و بالاخر الله الموفق بكل شي

بالنسبة لرأي الشخصي، الغربة كتير صعبه كتير اكثر ما بتتوقعي، كانت تمر أيام لولا ايماني بالله كان ممكن اذيت نفسي بس الله وحدته اللي صبرني و رحمني، انا عني لو قبل ما تغربتي سألتيني ما كان شجعتك بس هلأ بما أنك صرتي ماخده القرار فكملي و تشجعي و ان شاء الله الله بقويكي و بصبرك و برزقك كل شي منيح

الله ييسرك كل خير حبيبتي :hug:
و يعطيك الصبر و القوى يارب :)

 

صباح الخير ويسبر
اول شي الله يهدي بالك ويريح قلبك...الغربه كربه...وصعبه على الطرفين بنت او شاب....نفس اللي بتشكي منه الكل بيشكي منه في الاول وبعدين شوي شوي بتتحسن الامور

تانياً...غربة البنت...الموضوع صعب كتير لمجتمعنا واغلب الناس بترفضها خصوصا للشغل لكن بقدر اقولك ان اي نظره واي مفاهيم ببتغير لما الواحد يكون في قلب الحدث,,,,يعني امي مثلا رفضت فكره تغربي للدراسه رفضا تاما
ولكن قبل فتره اختي الصغيره كانت قاعده بدون شغل وحاولت كتير هون وما زبط معها , ف أمي نفسها صارت تقول لو يصحلها شغل بالامارات ما فيها شي ولا تضلها قاعده وتروح حياتها هيك او
انها تشتغل هون شغل مش مناسب لها ...

فلا تفكري كتير شو نظره الناس للشي اللي انتي مقتنعه فيه...لانه حتى اللي بيرفض او ما بيشجع....بيجيه وقت وبيصير يتقبل الموضوع لما يكون الموضوع بيخصه شخصياً.

الله يوفقك ويسعدك
معلش استحملي شوي واكيد ح تستفيدي من التجربه ...حتى لو قررتي انك ما تكملي وترجعي لعمان ....ح ترجعي وانتي مبسوطه وبنفسيه احسن لانك جربتي بنفسك كل الخيارات المتاحه امامك وما اخدتي قرارك بناءا على نصائح نظريه.

 

ليش متعبة حالك؟

الغربة عمرها ما كانت غلط! البنت قبل 100 سنة كان عيب تروح المدرسة! هلأ عيب اذا ما فاتت جامعة و تعلمت زيها زي الرجل و احسن

الدنيا بتتغير .. و احنا اللي بدنا نغيرها

ما دام الواحد عارف اللي بعمله و عارف انه اللي بعمله صح .. شو المشكلة؟

يسعد مساكي

 

مرحبا. أنا جديدة في مدونتك بس قرأت مواضيع يوسف عن غربة البنت وذكرك في إحداها. بدي أحكي كثير بالتعليق فاسمحيلي:

انا زيك تماااماااا! نفس النمط تقريبا. بس الفرق والحمد لله أهلي مأمنين وبابا بعده بشتغل لأنه بكره "التقاعد" بالرغم من إنه المدرسة اللي بشتغل فيها كثير مغلبينه. ما بهتموا أبدا للمدرسين بس همهم الربح.ما علينا. الموضوع إنه مو لحالك بتمري بهذه الحالة ومو لحالك متغربة. بعرف كثير بنات اختاروا يعيشوا بالبلد ويشتغلوا وأهاليهم ببلد تاني. والحمد لله مبسوطين لكن وتحت لكن 100 سطر هم كمان بتمر عليهم هذه اللحظات التي تمرين بها. ولأزيدك من الشعر بيت. أنا مريت فيها كمان http://aseel-thinking-of.blogspot.com/2010/09/blog-post.html


إذا بدك أي شيء أنا مستعدة أساعدك على الأقل ما تمرين به أمر به أنا أيضا. بس أنا بصراحة تمسحت شوي فبطلت تفرق معي. المهم. هيني في هذا الفضاء الواسع وأماااااانة إذا بتحتاجي أي شيء. أم أونلي آن إيميل أواي :)

ملاحظة: أنا ما بحب السكنات سو ساكنة ببيت أهلي. بس الحمد لله أختي ساكنة بنفس البناية وكل يوم بروح بتقل دم عليها وعلى جوزها ههههه ان شاء الله بس ما يكونوا يشوفوني ثقيلة دم :|

الله يوفقك

 

Hi Whisper, First of all I wish you best of luck in your new adventure.

Second, I know that our society and culture look differently at the issue of ladies working and living abroad. I can speak from my own experience and tell you that you are doing the right thing. There is nothing wrong by your desire to better your life and help your parents. This is exactly why am away too. I was not born with a silver spoon. My life has been always a struggle in every way and still is.
There is nothing wrong by being independent ,strong and ready to face whatever life throws at you. Life is full of surprises and ups and downs, and we should be able to face everything instead of relying on others and be a sitting duck and let somebody else decide our life for us.
Unfortunately, our society will judge us no matter what, you can be in Amman and people will find something to criticize you whether it is about age, marriage, work, clothes......I am not saying that we should ignore our culture and pretend that we are a western society, what am saying is you know who you are, stay true to yourself and focus on your well being. See how you can make the best of this adventure, learn more about your surroundings, the people, the culture. Widen your thinking, make your self richer financially and mentally and simply fly.... May Allah be with you always and good luck habibti :)
Your friend, Noura :)

 

غريبه فكرت حالي علقت ع الموضوع!
ونسيت شو كتبت والله ولكني كل ما اريد قوله هو انه الأسباب في الغربه تختلف من شخص لآخر الا في النهايه هي للحاجه ما تدفع الانسان إلها وفي النهايه الانسان يقوم بما يحب ويرغب وإلقاء النظر لما يظنه الناس او المجتمع لن نتقدم قيد خطوة
لا تنظري الى ما يقوله ويقره المجتمع لأنك لن تكوني ويسبر الان ان انتظرت الأذن من المجتمع

 

مياسي

ايش كنتي تشوفي؟؟؟ O_o
الحمد لله السكن منيح و اللي معي بالسكن كتير كويسين بس هو شكلة الاشتياق, هي قربت اخلص فتره التدريب و ابدا الشغل المزبوط و بس يرجعو مرتات خواني و الاطافيل بتحسن الوضع اكتر ان شاء الله لانهم من يوم ما اجيت وهمه مسافرين :(

هي فكرة دبي كانت تعتبر مش غربه بالنسبة النا, وغير دبي ما في خيار اساسا :)

الموضوع المادي مهم اكيد, بس البنت غير عن الشب, في الها ظروفها اللي تخليها بدها تستقل اكيد بس مش زي الشب اللي بدو يفتح بيت و يتزوج و يكوم نفسه ....البنت مكومه و بتستنى اللي يشيل هههههه عاساس انها بضاعه بتعرفي

ما بتشجعي؟؟؟؟ هلأ بتحكي O_o

Sozan

تسلمي يا قمر :)
انا بصراحه بعمري ما فكرت بالموضوع, بس في تعليق هو اللي لفت نظري و فورا طلع الكلام معي

انا اساسا عندي اللي مخلي العالم مش متقبلتني فاااااا قررت اعطيتهم سبب جديد :)
ان شاء الله يكون الصح اللي بعمله

اسفه عالتأخر بنشر التعليقات بس كان عندي امتحان و كنت بنحت ...ال اللي بياخدو 100 بعطوهم شهاده فااااا انا كبرت براسي :)
المجتمع بدو اياني او البنت بشكل عام تندفن و تضلها ساكته و تمشي زي ما بدهم و يمكن ...ها يمكن ساعتها يخففو الانتقاد

حاسة حالي زنخه كتير لان المعظم هون متغرب و انا اللي عايشة دور كتير و بتشكون :$
سامحوني لاني هيك هالفتره و ان شاء الله قريبا برجع طبيعيه

 

LioneSS

كتير بنشبه بعض عفكره....هي ام عمر ما حكتلك :)

العالم دائما على حق لهيك عندهم تغيير المواقف عادي جدا ....اللي بكون ضدك بقرارك باي شي بالحياه نفسه اللي بصير يحكي انه نصحك تعملي هالشغله بس يبين قرارك هو الصح
و قيسي على كل شي بالحياه

الله يسامحكم...ما انا حكيت 100 الف مره اني بدي اسافر, هلأ جايين تحكولي
الموضوع كنت متوقعه انه صعب بس مش لهدرجه :(
بس بتعرفي شغلي راح يوفرلي فرصه اشوف اهلي اكتر ان شاء الله و هالشي الحمد لله اللي مهون الموضوع
يعني ماما ان شاء الله باخر الشهر جاي و بعد كم شهر بابا وماما جايين و انا بعد 6 شهور بدي انزل فان شاء الله بتهون
و موضوع ان مرتات اخواني مش هون و بس مع اخواني و مع انهم بالمره مش مقصرين بس برضه ب 14 الشهر سبحان الله ال 2 بدهم يسافرو يجيبو مرتاتهم و انا خايفة من هديك الفتره :( يحالي يحاااااااااااااااالي راح اكون ...الله يهونها و يمررها على خير

Naysan

صباح و مسا الورد

اميييييييييييييييين يا رب, ان شاء الله تتحسن

الكل بحكي هيك...حتى خواني الظهر حكيت مع واحد اعبرله عن اكتئابي :) نكدّت عليه المسكين وقبل شوي اخوي التاني حكى معي و برضه فشيت قلبي :)
بحكولي بكره بتتعودي و اولها طبيعي تحسي هيك و اللي بدك اياه احنا جاهزين, ما بدي شي او مش عارفه شو بدي :(

الله يهونها....زنخه و انا نكده ما بحب حالي :)

تسلميلي يا قمر....ربنا يخليلي اياكم كلكم اخواني و انتو خواني وخواتي هون ...وربنا يسعد ايامكم و يسرلكم الخير يااااا رب

اليوم تقريبا نفس الحكي خواني حكولي ....ان بكره بس تزبطي حالك و تمشي الايام و تاخدي الرخصه بتتحسن الاوضاع كتير, و بحكيلي معك حق, احنا خناشير بوجهك لا فروحه ولا عبود تنبسطتي معهم :)

ان شاء الله اكون عملت الصح, و بكره اقرأ هالتدوينه واضحك على حالي :)

 

PP

يعني جد جد اني زودتها, سوزان و لبؤة و انت حسستوني اني زودتها كتير .....مالك و هيثم ومحمد عادي شباب و بستحملو :)

ربنا يسعد مساكي وكل اوقاتك يا قمر
معك حق...انا ما عندي مشكله بحكي المجتمع بس الفكره شوي صدمتني انه في حد ممكن يرفض الموضوع و طلعو اخوانا المعلقين برضه عندهم نفس الفكره
تسك تسك تسك...

عجبتني جملتك
الدنيا بتتغير...واحنا اللي بدنا نغيرها

نعم صحيح :)

Aseel

اهلا وسهلا فيكي ...نورتيني :)
شكرا لصديقنا يوسف اللي دائما بعطينا من خبرته و نصائحه اللي بتفيدنا

للاسف لهلأ ما قرأت الموضوع بتعمن, مريت عليهم بسرعه ولكن بدي اقرأهم منيح

اللي فهمته انك انت كمان متغربه, بس بالاردن :)
للاسف معك حق نسبة الشك و التحليل عنا اكبر من مناطق تانيه , و ما في شي مجاني بالحياه صاير, بس اذا بتحبي المشي, في حدائق الحسين فيها مساحات فاضيه و تراك للمشي , بصراحه مشروع اكتر من رائع طلع معهم بالغلط ولسا مش منتبهينله, ان شاء الله ما ينتبهو و يقومو يسكروه ا يصير بفلوس او انهم يصيرو بدهم يحسنو فيه فيدمروه زي عادتهم بالمناطق التانيه

الله يسعدك يا رب ..ما بتقصري , يلا بصير عنا تبادل خبرات اذا علشان نفيد بعض :)

وانا اكتشفت اني ما بحب السكنات :( بس برضه خيار اني اعيش عند اخوي لسا مش كتير داخل مخي ... بس اذا ما تأقلمت حيكون الخيار الوحيد اللي قدامي

هي ايميلي صار عندك و زي ما حكيتلك اهلي همه اهلك واذا بدك اي شي انت تأمري :)

 

Noura

Thanks ya amar :)

I'm sorry for being drama queen these days :$ it's hard and I'm not getting used to it, hopefully soon maybe after I get my salary :) can't wait bsara7a

You are right ....people will always have something to criticise and what ever u do is not good enough for them, and yes even while I was in Jordan a lot of my life decisions were wrong in their point of view specially those related to marriage issue

The thing that maybe because of the lot amount of downs in my life I'm afraid of a new one, I know that I'll learn a lot during this experience and there will be benefits even though I'm not going to gain them now or direct

Thanks 7bebti...Allah y5alely 2yakom :)

 

ويسبر

صديقتي العزيزة

اتفقنا ما فيش زعل

جزء من الخلل انتِ سببه ولا بد ان تحاولي على الاقل ان تتغيّري وهذا ليس في صالحك فقط انما في صالح الجميع
والتغيير يتطلب اولا معرفة اين مكمن الخطأ وثانيا قرار بالتغيير

في الجانب الذي يتعلق باهلك ودورك ودور الآخرين خذي نصيحة مني وانا اكثر من لعب دور (المُكمل ) اي انني اكمل كل الادوار ...كل من يغيب انا بديلا عنه ...كل من يقصر انا بديلا عنه...حتى اصبحت بديلا عن الجميع
ومن ثم بدأت اشكو من تقصير الجميع ...طيب الم يكن من الافضل ان اترك لهم مساحة لكي يمارسوا دورهم الم يكن من الافضل ان الح واطلب من المقصر ان يمارس دوره الم يكن ذلك افضل للجميع
الآن ادركت كم كنت مخطئا حين حملت السلم بالعرض وقلت انا لن اقصر وهاي فهمناها ولكن انا بديلا عن من يقصر او من يفكر ان يقصر يوما...هاي ما فهمناها وليش؟؟؟؟

المطلوب ان اقوم بدوري فقط تجاه الاخرين وعلى اكمل وجه وان اكون مثلا للآخرين ان يقتدوا بي وان ادعوهم لذلك لا ان اخذ مكانهم

اضيفي الى ذلك انني آدم وانكِ حواء ...وحواء هي العطاء وبما انها مجبولة بالعطاء والى ان يحين الوقت وتصبح زوجة واما بارادة الله يكون عندها مخزون هائل من القدرة على العطاء لذلك يجد من حولها ومن هم الاقرب منها عطاءا بلا حدود منها وهذا عظيم ولكن من الخطأ ان يكون على حساب الغاء وتهميش عطاء الآخرين مهما كان قليلا ومتواضعا لانه ومع الايام يضعف مفهوم العطاء عند الآخرين حين يشعرون بحجم عطائهم المتواضع امام حجم عطاءك بلا حدود

ثانيا
نحن لا نفصل الآجرين لا حسب مقاساتنا ولا حسب مفاهيمنا وليس المطلوب منا لا ان نربيهم ولا ان نعلمهم سواء كانوا زملاء لنا في العمل او في السكن

المطلوب منا ان نعرف كيف نتعامل معهم ...ونفيدهم ان امكننا ونستفيد منهم ان تمكنا من اكتشاف ما بفيدنا عندهم ...واكيد موجود عندهم
حياة الآخرون ملكهم كما هي حياتنا ملكنا
لا نقدر ان نعيش بعزلة لذلك لا بد من محاولة الاندماج ضمن حدودك الشرعية والاخلاقية ...فانتِ صاحبة القرار

ربنا خلق في كل انسان ...جوانب من الطيبة ...اكتشفيها عند الآخرين وركزي عليها

لن اقول اكثر من ذلك الآن ولكن نصيحة من صديق يعتز بوجودك دائما الى جانبه وجانب كل الاصدقاء
انتِ بحاجة الى اجازة قصيرة تختلي فيها الى نفسك وتفضل ان تكون اجازاتك لزيارة صديقة مقربة وخارج نطاق الاهل
سستساعدك كثيرا على مراجعة ذاتية

وبالمناسبة والله كنت ناوي آخذ استراحة واكتب تدوينة انني مضطر لوقفة مراجعة نقدية ذاتية لا ادري كم ستطول وهل ساتمكن من الكتابة خلالها او التعليق...
وتدوينتك عن غربة البنت هي من اجل ذلك الى اليوم

دمتِ بخير
والله يرضى عليكِ ويسعدك

 

يوسف
ما بقدر أحكي إلا انو الجزء الأول من نصيحتك ممتاز وفي مكانو!

بصراحه ويسبر ومن غير زعل أنا لما قرأت التدوينه اجى ببالي انو وين دور اخوانك بالموضوع؟

 

في هاي اللحظه انا شوي وبدي افقع فراح اترك الرد لوقت تاني صديقي

بس اللي انا فيه هلأ سببه انا زي ما انت حكيت

 

البنت سعرها بسعر الشب
ومو عيب اننها تتغرب وتعيش برا وتبني مستقبلها زي اي شب ولاي سبب كان

وانا من هذا المنبر احييكي وسبورة واتمني لك حياة سعيدة ان كانت بالغربة او في بيتك بالاردن

السؤال المهم... اتبضعتي من اكيا ولا لسا؟

 

باختصار و بدون فلسفة و لت و عجن انتِ حرة بتعملي اللي بدك اياه و مش بنت زغيرة تستني من هاد و هداك ياخدك و يوديكي
و حتى لو بتغلطي عالاقل هاد اختيارك و قرارك و بتغلطي و بتصححي غلطك حسب ما انتِ بتشوفي

أي لمتى بدها تضل البنت تحت عهدة حدا؟لمتى بدنا نضل نشوفها ناقصة و عاجزة و لازم تتخبى ورا الزلمة؟؟؟؟
أنا شايفة اللي عملتيه اشي عظيم كتير
و ولا تردي عحدا من اللي بيقولولك غلط
لا انتي بنت زغيرة ولا الدنيا سايبة
أي مشان الله صرنا بالقرن ال21 لوني بحكي بفكرة ثورية بنقول بس كل الموضوع انك طالعة تشتغلي
حتى عهاي تتحاسبي؟

 

Yosef

طبعا مفيناش من زعل :)

انا بعرف و بعترف ان المشكله جزء منها فيي و لكن بعد 34 سنه و تعودي و تعوّد اللي حوالي التغيير شبه مستحيل

هلأ انا مش من الحركين و اللي بروحو وبيجو, انا البنت الوحيده فالعيشه فيها دلع وبزياده مرات, و هالشي زايد موضوع الغبه علي, ولكن عند الجد بتلاقيني ب 10 شباب, و اهلي عرفو هالشي و بغياب خواني الشباب الكبار عن البيت بسبب الغربه صار الاعتماد اكبر, و انا من اللي ما بعاند اهلي بالمره حتى لو شي مش عاجبني فهالشي برضه خلاهم ياخدو راحتهم :)
انّا من اللي بحب اظهر قويه من الخارج و يا جبل ما يهزك ريح و مرات بكون من جوا هو :) متدمره عالاخر

اللي حوالي حاليا هي صدمه حضاريه بحته, شوي شوي عم بتأقلم و بندمج, بنحط قواعد اساسيه بكل شي و بتمشي الامور

انا بهالوقت بحاجه لاي شي الا العزله :) لان ما في صديقات مقربات هون, لو زوجات خواني هون كان الوضع افضل ب 100 مره, الحمد لله قراب مني و بشاركهم كل شي ولكن سبحان الله التنتين مسافرين من اول ما اجيت و راجعين على رمضان ان شاء الله, وجودهم راح يريحني كتير ان شاء الله
و بس انسجم بالشغل الا ما اتعرف على ناس يكون عقلهم على عقلي, و لكن هالفتره تدريب فمضرة اضل بالمجموعه اللي بتدرب معها

المهم و اهم شي هو القرار الاخير اللي اتخذته...شكرا لتواجدك معنا دائما و بتمنى تختفي فكرة الغياب هاي نهائيا

هو في احلى من عالمنا هاد لنجتمع فيه بعيدا عن الناس!!!

شكرا صديقي

مياسي

اخواني دورهم موجود وبعمرهم ما قصرو, بس زي ما حكيت لصديقنا يوسف , سفرهم خلاني اعبي كل المناطق الفارغه بالبيت و همه تعودو على الوضع هاد

شكرا لايميلك يا قمر...هلأ كتير احسن الحمد لله

 

كعكي

انا مقتنعه انو مو عيب و بعمري ما فكرت ان في ناس بتميز بين البنت و الشب بموضوع السفر ...بس حبيت اشوف رأي الباقيين :)

تسلم يا رب

طبعا ... اول تبضع كان من اكيا و جبت اشياء حلوه :)

Rain

شوووو قصدك مش بنت صغيره O_o

فاهمتك يا قمر و معك حق

ما بتقدري تفرضي عالناس وجهة نظرك و لكن برضه ما بصير تفرضي وجهة نظرهم على حياتك..... الحمد لله بما اني مقتنعه و اهلي شجعو الموضوع فانا توكلت على ربنا و قلت اجرب و ربنا يجيب اللي فيه الخير


مسائك سعيد حبيبتي:)

 


My sweet friend, I translated your blog, very nice and interesting you site.
When you want to take refuge in good ballads of yesterday, today and forever

in all languages and genres I invite you to visit my blog and listen me.
From this Saturday July 16th I pay tribute to Arab culture , Middle East songs,in

Arabic lenguage.
I am a broadcaster of Argentina.
Best regards from Rosario-Argentina
Albert.