Things I Like To Whisper About

Would You Hear Me Whispering

شو بالنسبة...8





شو بالنسبة للناس اللي بربطو ولادهم وهمه ماشيين بالمول؟؟
جد مش منظر بالمره وما في اي مبرر بالعالم بسمح لانسان انه يربط ابنه زي الحيوان و خصوصا زي الست اللي شفتها اليوم اللي مش ناسية تطلع بكامل اناقتها ولا ناسية الميك اب ولا ناسية الاكسسوارات وماشيه بتحكي هي واللي معها و "بتجر" بنتها جر بالحبل وراها, انا انصدمت وماما انسم بدنها من المنظر, حاولت اصورهم و بدون ما ينتبهو ما عرفت و من 20 صوره هاي اوضح شي للحبل


كان نفسي اخد الصورة هيك عيني عينك او اروح واسألها عن رأيها باللي عاملته و اصورها علنا مدامها موافقه عليه بس ماما حكتلي بدكيش وجع الراس مع انها حبيبتي مميتي ضلّت تراقبلي اياهم لاقدر اصورهم وخصوصي ان معها شحطين - اه مش ححكي رجالين لانهم بس كأنهم حرس للام و بلفلفو حواليها - البنت كتير هادية دخلو على اكثر من محل و وقفو يتحدثو ولو انها مخرّبه كان خرّبت الدنيا و كل العالم بالمول كانو منصدمين من المنظر, لان حضرة الام بتجرها جر وراها و بتشدها مش حتى انها ماشية جنبها.

بدكم تحكو البنت كثيرة حركه....هالشي افضل من انها تضيع.... اي سبب ما ببرر هالشي, هاد رأيي, مش عارفه تسيطري على بنتك؟؟؟ انضبي ببيتك و لتتعلمي كيف تخليها ترد عليكي بتصيري تطلعي امّا هالمعاملة و هالمنظر فمرفووووووووووووض تماما.

هالمنظر و للاسف صرت شايفته اكثر من 5 مرات بالمول بالذات ,و العالم فخورة باللي بتعمله كأنه موضه و مسكو فيها زي باقي هالموض اللي اكلت عقولهم, كأنه نوع من انواع تطور التربيه و همّه بتبعوه, مش انه اشي فاشل و ما بنمّي عند الطفل غير التعود على الذل و المهانه .

الله يهديهم بس شو بدنا نحكي


24 التعليقات :

منظر مقزز
والله ما حدا بدو ربط بالحبل الا الام نفسها ...

 

أووووووووووووبس!

فرحت لما شفت العنوان "شو بالنسبة" بس لما قرأت حسيت إني تبهدلت

لوووووووووووول

إحنا بنعمل هيك

أول مرة بالحج + كم مرة بالعمرة

بس مو بالمول!

 

Naysan

كتير بصراحه :$

انا مع انو الاب هو اللي لازم يتعاقب نظرا للتعليق السابق اعلاه :)

Sheeshany

O_O

اوبس!!!!!!!!!!!!!!!!!!!!!!!

شو بتقووووووووووووول!!!!!!

ليش هيك بتعملو بالمسكينه؟؟؟ :(

انو يعني ما شاء الله ما شاء الله عليك مو بالمول...فخلص بننسى المرات السابقه

بعرف ان من وجهة نظركم انه هالشي احسن من انها لا سمح الله تضيع....بس هاد مش الحل O_o

بسررررررررررررعه سكر كل شي و روح عغرفتك فكر باللي عملته و ممنوع نت لشهر

 

مرحبا ويسبر :)
انا قبل ما اتزوج شفت المنظر وقرفت منه لكن بعد ما تزوجت وعرفت شو يعني انه تجيبي خلفه ومن دون ما يكون حدا حوليكي يساعدك بدك تستعيني بالقرد مش بس الحبل !
يعني انا مثلا لما اروح ع المول ابني الله يرضى عليه بيروح يتخبى بين الفساتين الطويله وبدل ما صاحبتك تشتري شي بتصير ادور على ابنها ومرعوبه وبعدها قررت احط شنته بحبل لحتى اعرف وين الافندي بيروح
يعني بالفصيح فيه مبررات وهي وسيله للحمايه مش للاحتقار طبعا احنا نعتبرها تشبيه بالحيوانات لكن الضرورات تبيح المحظورات يعني تحط اله الحبل ولا يتوه وانت مش عارفه وينه وانا باعتبرها دلاله على المسؤوليه وتخفيف حمل والولد ما بيحس فيها شي يعني ما بتهينه لانها جايي على شكل حقيبه وباحجام واشكال الاطفال بيحبوها
يعني في النهايه الاهل ما بيخسروا الطفل ولا بيعكننوا على اللي خلفه عيشته وهو يحكي له وين رحت ولى والاهل بيعملوا الشوبينج بطريقه اريح بس او اي مكان ثاني يعني مثلا لهيثم والعمره الناس زحمه واطفال كتير بينسرقوا ما بتضيعوا بينسرقوا لما بتضل ابنك او بنتك حواليكي حتى لو حبل بيضل بالك مرتاح انها معاكي
يعني حرام العقاب اخطي :)

 

شي مستفز و انا متأكدة لو كلب كان حملتو كنوع من البرستيج و لا يمكن تربطو ..

 

مش معقول! اول مرة بشوف هالمنظر هاد!!! لهالدرجة وصلنا ! تقليد اعمى للاسف

يعني ماشي بالنسبة للشيشاني بالحج و بالعمرة ممكن جدا لانه الوضع مش طبيعي بس بالمول!؟ صعبه و الله

 
أزال أحد مشرفي المدونة هذا التعليق.
 

مساء الخير

ولايّ هالبلد ما فيها اشي بيسر
والا احنا اللي نازلين ندور على سمة البدن

منظر مؤلم جدا
والله لو كان بيدي لوضعت القيود في والدها ووالدتها وارسلتهم مخفورين لتجرية السجن لمدة اسبوع على الاقل

دمتِ بخير

 

فكرت بس خفت من آلاء لأنها صاحبة الفكرة

+ شهر أبقدرش

فاااااااااااااا


:تمرّد:

و هع

 

yemken saroo y6al3oo 7baal mashyeh ma3 lebseh mo3ayaneh loool jadd eshe beqharr !!

 

عنجد ما بسيررررررررررررررررررررر شو التخلف هاد!!! لازم يشوفوها حقوق الأنسان والطفل ؟!!! معقول الها قلب تعمل هيك ببنتها؟!!

اسمحيلي احكي لهيثم شي؟
هيثم حراااااااام عليك بنوتك لزوزة ما تعمللها عقد نفسية وما تعمل هيك كمان مرة حتى بالعمرة انا بتذكر كنت اروح عمرة مع بابا وماما وما كانوا يعملوا هيك كان لازم اضل ماسكة ايدهم اجباري وكانو يقولولي اذا صار وحسيت حالي ضايعة لازم اروح عند عمو الشرطي اللي بنادي على الأسماء بالمايك وكان دايما على شنطتي االظهر في اسميي ورقم تيلفونا بس عمري ما ضعت على الأقل مو بالحرم :P

 

Sozan

هلأ ما اختلفنا ان انتِ يحق لك ما لا يحق لغيرك - شيشاني يعني - ولكن مش مستوعبه الموضوع منيح :$

ممكن لاني مش بالموقف و مش معانيه من مسؤوليه و حركة الاطفال فالموضوع مش مقنع كتير الي

حكيت مع بنت خالتي بالموضوع صارت تضحك و تحكيلي اذا بس نروح عالمول المره الجاي ما تيجي معنا , طلعو مفكرين يشتروه لاولادهم :(
بتحكيلي افضل ما انهم يضيعو لا سمح الله او اني اقضي الطلعه بس الحق فيهم

و انا ما زلت رافضه للفكره :$

رتبو اوقاتكم و طلعاتكم و سيطرو على الاولاد
كل العالم كانت تطلع مع ولادها و ما تحكيلي ما كان في ولاد اشقيا من زمان, وربنا بسترها ان شاء الله

برجع و بحكي ان ممكن لاني بعيده الموضوع اسهل بنظري

حششت على "بدك تستعيني بالقرد مش بس الحبل " هههههههههههههه الله يعينكم

بالنسبة للعقاب فزي ما شفتي هيو معلق مره تانيه و منزل بوست جديد و بفيديو مشقلب يعني تمرّد علني O_o

Sire

صح عفكره....بالعاده بدللو الكلاب و بحملوهم كنوع من المظاهر الكذابة المرافقه للئلاطه :$

 

W7l

المشكله انها حرفيا بتجرها وراها وهاد اللي قهرني بزياده
و البنت المسكينه مش ملحقه تمشي

هو ضياع الطفل مصيبة بصراحه و لكن مش قادرة اقتنع باي سبب لاستخدام الحبل مع انه في ناس مقتنعين تماما بفائدة استخدامه

Yosef

مساء النور

شكلي سميت بدنك بهالخبريه ...وانا كمان ما جبت شي يسر
ههههههههههه

المنظر بصدم و الكل كان مستهجن لهيك اجيت كتبت فورا وبدون تجميل

 

متزكره لما كنا نروح عمره كنت أشوف النسوان رابطين ولادهم بشال طويل ومربوط الطرف التاني برجلها وتكون بتصلي في الحرم

من ناحية بفكر فيها يعني يمكن مامعها فلوس تجيب خدامه أو تحطهم في روضه أو مركز رعاية أو حد تتركهم عندهم وبنفس الوقت نفسها بترغب تصلي في بيت الله الحرام

يمكن الطريقه هاي غلط بس بضله أهون من إنو تلاقي إبنها مغتصبينو ومرمي قطع ورا شي بنايه

 

Sheeshany


انا اساسا قلبي كبير و عملت عفو شامل كامل عن كل اللي معاقبين و اللي بكرهم

فترات طيبة غير معتاده بتصيبني من فتره لفتره فبحاول استغلها

SimSim

Exactly :)
Bent 5alty 7akatly 2enha zay elshan6a w betkon lab2a lallebes :S

2ebdaaaaaaaaaa3 be3'eeer ma7alloh

 

Hana

اللي شفتها واضح انه همها منظرها هي وبس و غير انها معجوئة بالحبل و مفكره الناس بتطلع معجبة بالابتكار و التقليد اللي مدخلته عالبلد و بتعمله

شكرا هنا....احكي كل اللي بدك اياه لهيثم و خدي راحتك عالاخر :)

 

نورنياتي

اخر سطر افحمني وطار كل ترتيب الكلام اللي طرأ في بالي وانا بقرأ بداية التعليق :(

الله لا يبلينا ولا يبلي حد يا رب

مش عارفه اذا في طريقة تانيه ما يكون فيها امتهان لانسانية هالطفل, انا حسيته كتير مؤذي هالحبل
يمكن انا حامله هم شي الطفل نفسة مش حاسس فيه ولا حيأثر عليه

 

أبوك يال استغلال

:]

 

شفته المنظر هاذ كثير , ما بعرف حسيته منفّر جد , وحسيت انه الولد
Hulk
او اشي وانهم مش قادرين يسيطروا عليه من مرة

ما بتخيّل حالي مربّط زينة هيك

احنا كنا صغار برضه وهيّنا كبرنا وما شاء الله علينا , ما اظن خطر ببال اهلنا يعملوا فينا هيك

 

والله يا ويسبر معك حق نوعا ما
بس عنجد بعد ما صارت راما تمشي بللشت افكر اجيبه خصوصا انها لسه ما بتعرف الخوف
لسه ماجبته لا تحقدي عليي هههههه
لا بس برضه فيه بدائل من فتره شفت سيارة بالريموت كنترول الاب او الام بيتحكموا فيها وبتكون معهم في المولات بس كمان مش بكل الاماكن بتقدري تستخدميها يمكن اذا جبتها كمان اضطر اجيب الحبل للاماكن اللي ما بنفع امشيها بالسياره زي لما ننزل عمره مثلا ما احلانا واحنا بنسوق سياره جوا الحرم ههههه

Ro$e

 

Sheeshany

Bs bardo ....don't push ur luck :D

LUNAR.

انا رأيي من رأيك, ان الكل كان صغير و اكيد كان في حركين و شعتين و لكن ما حد استخدم هالطريقة :$

الله يعينها ماما كانو خواني زي التؤام و التنين احرك من بعض و برضه استغربت و استهجنت المنظر و قهرها كتير, بالعاده بكون بدي اصور شي ما بتحب كتير و لكن هالمره هي اللي بدها اياني اصور و ضلت تلف حواليهم لنلاقي احسن زاويه :)

 

Ro$e

اهلا اهلا يا قمر
سبحان الله, لسا قبل كم يوم كنت بقرأ بالادراجات القديمه و قرأت اسمك من ضمن المعلقين و كتير استفقدتك و للاسف ما في طريقة نتواصل لاتطمن عليكي

كتييييييير طولتي علينا يا قمر

لاااا ما تجيبيه :(
بعرفهم الصغار بس يكونو حركين و ما بخافو, عنّا عينه فروحه بنت اخوي, هديك ممكن تمسك ايد اي حد ماشي و تمشي معه :(

الله يحماهم يا رب و لا يضرهم ابدا

اه اخوي مشتري زي بسكليت هو بدزّه و بهيك بضلو الطفل قاعد وكأنه بلعب و كتير بالمولات برضه بأجرو عربايات زي السيارات خصوصي للاطفال ممكن يستفيدو منها الاهل, مع ان فروحه بتنزل و بتصر هي اللي تدفعها :)

لا تطولي علينا يا قمر

 

أنا يوميا بقرأ شو بتكتبي بمدونتك وحتى المدونات اللي حاطه لينكاتهم متابعة معظمهم
وبعجبني تواصلكم مع بعض بس بكتفي بالقراءة والاستفاده منكم بصمت

Ro$e

 

Ro$e

اهلا وسهلا فيكي دائما بمدوناتنا يا قمر :)

انا اكيد بحب اسمع رأيك دائما و لكن وجودك برضه بسعدني....المهم تطمنينا عليكي من وقت للتاني :)