Things I Like To Whisper About

Would You Hear Me Whispering

يا مركب رايح عالعقبه...2011




الفتره اللي غبت فيها اولها كانت كتير حلوه و بدت بسفرة عالعقبه بدون تخطيط, هو اي نعم كنّا انا و بنات خالتي مخططين على زن مشترك بالبيتين لحتى نقنع البهبهات و لكن فجأه وبدون مقدمات وبس يأسنا قررو انهم يروحو يحجزو :)

هلأ احنا اكيد بنحب ان الاباء والامهات يروحو معنا ولكن حاولنا على موضوع نروح بنات لحالنا ما وافقو الاهل و الفكرة كانت مرفوضه فحاولنا نروح مع الامهات لحالهم برضه كان القرار ان الكل يروح ولكن تقادير ربنا انها تزبط

زوج خالتي - الله يرحمه - كان في بداية مرحلة التعب و قررو الاهل انهم ما يروحو و لغو حجوزاتهم و ضلت حجوزاتنا انا و بنات خالتي ال 5 و زوج و اولاد وحده فيهم :)

الرحله كانت كتيييييييييييييييييير حلوه و بكل تفاصيلها حتى المزعج عشناه و قررنا ننبسط فيه و مشّينا حالنا بكل الظروف و الحمد لله كانت رحلة موفقه من اول دقيقه لاخر دقيقه و احنا بنضحك , وبجانب البحر و الغروب و الطقس اللي بالصدفه كان اكثر من رائع اولاد بنت خالتي خلّو الرحله متكاملة و بتجنن

الفندق كان اله ترس بيكشف المنطقة كلها و البحر و الاضواء والغروب كان شي خياااال مع جلسة تحدوت - احاديث - و شيبس وعصير و شوكلت و بسكوت دمار كانت و ما بتتنسى, و بعديها رحنا نتمشى بالسوق و تعشينا بمطعم اسمه "تتبيله" , كنا ناويين نروح على "تشي تشي" ولكن كل المطاعم كانت فل و هاد كان مكتوب عليه قريبا في "عمان" فحبينا نجربة قبل ما يوصل للعاصمه ;)

واكيد اهم شي تواصي ماما و خالتو من المكسرات من محبوب الجماهير "محمص الشعب" :)

اتركم مع الصور و انتظرونا بصور الرحلة الربيعيه التانيه اللي رحناها الثلاثاء الماضي :)



الحيط بواحد من مطاهم الفندق كان كلّه تواقيع و كلام
ما فهمت اشي بس منظره حلو















14 التعليقات :

حلوين كتير ما شاء الله :)

 

اهااا و احنا بنحكي وين ويسبر غايبه اتاريها رايحة تتسبح !!!

:)

 

نيالهم الناس اللي ساكنين على البحر. شكرا على الصور. كثير حلوه.ـ

 

يا عم ناس بتروح بتأجز وتنبسط وناس ماكلة هوا بالدوام :)
شو بالنسبة للعلم اللي في الصورة؟ هاد علم أي دولة؟؟؟

 

بعتذر لجميع اللي علقو على البوست و اختفت تعليقاتهم


نيسانة ...جراد...دكتور وحل...كيكي القمر :)

بدي استنى لبكره على امل ترجع التعليقات زي ما رجع البوست لاني وللاسف لغيت التعليقات من الايميل و لأني كتير مرتبه ولاجل الصدف امبارح فضيت الايميلات الملغيه :)

شكرا الكم على التعليق

 

ياااي الله يبسطكم دايما :) مع اني ما بحب العقبة لكن شجعتيني اروح!!
بس كنت بتوقع قلاقي صور للأطفال :P

 

كيكي

الحمد لله فيه شوية ذاكرة شغّاله عندي ومنها تذكرت انك سألتي عن العلم بالتعليق ...صح :)

هاد علم الثورة العربية الكبرى

Hana

امييين يا رب
تسلمي يا قمر...الحمد لله كانت رحلة حلوه

في صور اطفال كتيييييييييييييييييره بس مافي مجال للنشر

من صور فروحه و عبود كتير ناس عرفو مين انا :$
و الحمد لله ربنا ستر انهم من اللي معلش يعرفو عن المدونه

بشجعك و بعنف بس بسرعه قبل ما تصير شوب, وقتها بعمان كانت شتا فهناك رهيب الجو

 

ميهاهاهاهاااااااااااااا

على التعليقات الضائعة

خخخخ

---

عمري ما رحت العقبة!

:shame:

 

إن شاء الله دايماً تظلك مبسوطة
ممتاز هيك غيرت جو
مع إني ما بحب العقبة بس إن شاء الله عالصيف رح انزللها

محمص الشعب أنا ذاكره لما رحنا رحلة المدرسة عالعقبة ،

 

Sheeshany

انا فاهمه ان كلامك نابع من اللاشعور كتعبير ارتدادي لحبك الداخلي للبحر المعبر عنه بالكره بسبب التأثير اللامباشر و اللا وعيي عليك من البيئة المحيطه فيك

كلاااام كبير متعمق ما حتقدر ترد عليه لاني و بكل بساطه استخدمت كل اللالفاظ الفلسفيه الاجتماعيه المطروحه بين ايدينا

بالعربي

انت مش عارف شو رايح عليك بس لانك ما بتحب البحر

Alirbidi

تسلم يا رب...امييين يا رب
الحمد لله اللي بيسرلنا نعمل الاشياء اللي بنحبها

له له له ...ان شاء الله بس تزورها السنه راح تغير رأيك :)

محمص الشعب شهرته يمكن بشهرة الساريه بالعقبه :)

 

kteer 7ilweh hay el soorah!
http://3.bp.blogspot.com/-gDu575wvA0Q/TcsVtI2dHSI/AAAAAAAACAc/92DTtNVIjEA/s1600/290420113553.jpg

 

الله يحلّي ايامك

كنّا راكبين القارب السريع و عم بتمايل و يا دوووووووووووب ماسكين حالنا و عم بنصرّخ و اخدت الصورة :)

فيها اشي زي دائري مش فاهمه كيف زبط :)

حرّيفة تصوير انا من يومي
ههههههه

 

البحر نعمة من الله سبحانه وتعالى
غروب وشروق الشمس على الشاطيء تحفة فنية من رب العالمين
رحلة جميلة وصور أجمل
أتمنى لك التوفيق دائماً وراحة البال

 

مهو عشان هيك حبيتها
<3