Things I Like To Whisper About

Would You Hear Me Whispering

نظرات...


بتعرفو بس تكونو ماشيين بمكان او حتى قاعدين و تلفو وجهكم و تيجي عينكم بالصدفه بعين حد , حد ما بتعرفوه بالمره ولا عمركم شفتوه بس في احساس غريب بيجيلكم ان في شي مشترك بينكم او ممكن يجمعكم, و بتشعرو ان هالشي همه كمان حسوه من نظرتهم او من رجوعهم المفاجأ للنظر الك كأنهم شافو شي بوجهك

هالشي صار معي مرتين بحياتي و اليوم مره منهم, ما بعرف شو بعني و هل هو شعور حقيقي ويلا وهمي وهل هو بصير مع الناس كلها ويلا بس صار معي و لكنه شعور غريب

وعلى سيره النظرات

يوم الثلاثاء يوم العواصف الهوائيه الغريبه اللي صابت عمان, كان عندي مشوار و اخوي وبما اني قاعد عالجاعد هالايام و مهما قامو الجاعد و رجعوه بضلي قاعد, اخوي بستخدم سيارتي و بروح فيها عالشغل و اللي موقعه بالشارع اللي ورا بيتنا سبحان الله, المهم عندي مشوار فقررت اروح مشي لاجيب السياره , بالعاده بهيك موقف بابا بوصلني لشغل اخوي لاخد السياره ولكن انا حبيت امشي, بتعرفو القرارات بالمواقف الغلط و بس تصرّو عليها, وفعلا لبست و طلعت و كنت شوي و راح اطير فعليا, مش هوا اللي كان, بالبدايه كان من ورا فكأنه في حد بدفعني لقدام, وبعدين اكتر من مره اوقف لاني مش عارفه اتحكم برجلي و انا بمشي, صرت امشي جنّابي من الهوا و اكبر مصيبه اولى لمّا دخلت من شارع فرعي لاطلع عالشارع الرئيسي, زوابع و مش قادره اتحرك, و المصيبه التانيه لمّا طلعت فوق جسر المشاه لاقطع الشارع دماااااااااااااااااااار, انا طبعا كل ما افقد السيطره اصير اضحك, بضحّك الوضع شو حد يدزك لورا و بعدين لقدام وبعدين تمشي يجي الهوا يطير رجلك وما تعرفي تحطيها عالارض!!!

المهم وانا بالممر الفرعي باتجاه الشارع الرئيسي مرّت من مقابلي ست و لابسه يونيفورم شكلها مروحه من الشغل, بتطلع من بعيد فبس قرّبت انا ذوقا بحكيلها "الله يعطيكي العافيه" مع ابتسامه لطيفة ظريفه وتقولوش سبيت عليها, تقولوش كاينه قاتله اعز عزيز على قلبها و تعرّفت علي , شوي و بدها تضربني, كشّرت و رفعت حواجبها واتفرجت علي من فوق لتحت و مشيت :$
انا برضه ضحكت شو بدي اعمل يعني

25 التعليقات :

هاي شكلها بدور على مفشه شكله المدير عامله شغله معها اليوم!!
ييييييييييي انا بكرهه هاد الجو لانه جو الحساسيه :(

 

حبيبتي يا وسبوورة ... بعرف وحدة مرت عليها النظرة هادي و لليوم ما نسيت !

أما خالتو المعصبة هادي كسبتي انتي فيها حسنة .. و ربنا مخبيلك ياها :)

ضلي اكتبي لأضل اجي و استمتع أنا بكلمات تشي بجمال صاحبته :)

 

Sozan

شفتي بالله عليكي و اجت بوجهي :$

هو اجمالا الكل مش طايق الكل بكون بالشارع بس ال انا حبيت اخفف عنها :)

بالزبط....جو التعطيس و العيون الواوا
الحمد لله لسا التحسس الحقيقي لهلأ ما بدا معي و ان شاء الله ما يبدا

هديل

ياااي يعني مش انا لحالي و مش بتهيئلي هالشعور :)

ان شاء الله, انا ابتسمت و حبيت اهّون عليها الهوا وانّا بالوضع نفسه
بس ما طاقتني الخالتو :(

حبيبتي انتي وجودك بسعدني و طلّاتك بتفرحني دائما :)

 

مغامرات ويسبر :D

حمدلله عالسلامة كون انو الجو بهداك اليوم ما برجع منو إلا كل طويل عمر !

واللي صار معك عفكرة صاير معي من قبل .. انو انا على اساس ماشية على سنة افشاء السلام .. وبجيكي مرات وحدة تقول كأنو السلام عليكم هيي بتسمعها مسبة !

لمهم انتي اخدتي حسنة بكل الاحوال

 

همسة

يا مسا الفل
جمعه مباركه عليكي و علينا يا رب

وما اكثر هالمغامرات :)

الله يسلمك :) كتييييييييييييير غريب الهوا كان يومها, وخصوصي فوق الجسر, شكل الغيوم كان بجنن و نفسي اصورهم بس على مين انا يا دوب ماسكه حالي :$

انا برضه بحب موضوع افشاء السلام و بحب ابتسم بوجه الناس الستات طبعا مش بوزع ابتسامات هيك "تبسمك في وجه اخيك صدقه" بس العالم بالغالب ما بترد بطريقة منيحه

الله يهدينا و يهديهم

 

احلى مافي الموضوع كله انك استمرتي بالضحك
الله يعطيك العافية ياعسل
:)

 

Wafa'

مش عارفه هو العمر ويلا التجارب اللي علمتني ويلا تعودت اني اضلي ارد بالضحك على هيك مواقف :)
كنت زمان اكتئب و انصدم و انقهر و اخد موقف ومرات انكسف بس بطلت

العمر اله احكامه شكله :)

الله يعافي قلبك يا قمر
جمعه مباركه على الجميع :)

 

يمكن كان يومها سيء ؟

 

ياختي عليها
والله الفراغ حلو

ايش اعطيها نظرات انتا :))

وبعدين شعبنا اذا ابتسمتيلوه بيجحرك اشي مرتب كبف اذا حكيتي معاه ؟

:))

حابين نشوفك بالمناسبه اذا امكن يا باشا

 

بالنسبة للنظرة مرة عليي كتير وأكتر من مره تصير معي أكون بدي ألف راسي بس بتفرج بطرف عيني بلاقي الشخص عم يتفرج عليي

صراحة هيه إلها شغلة بالطاقات وتبادل الأفكار
نفس شغلة لما يخطر على بالك حد ومثلا تحكي معو تلفون ويحكيلك لسا كنت بدي أحكي معك عمرك أطول من عمري
ويكون صادق مش يحكي هالحكي عشان يتهرب من غيابه

بس الصراحة المصطلح العلمي أو التفسير العلمي إلو ناسيته
متزكره مره كتبت عنو في مودونتي
إستني أطحش أفتشلك عليه
إزا طلع هوه

http://ba6e5-7yati.blogspot.com/2008/07/blog-post.html

مش متزكرة كتير النص
بس إزا مش هوه حاولي دبري راسك

 

White Freedom

ممكن... لكن انا حاولت اخفف عنها بالابتسامه و التحيه مش اكتر

الله يعين الناس و يفرجها عالجميع :)

مياسي

هههه شفتي بالله....بعطيني فرصه للتأمل و التركيز والطلعات

هو كله من النوم...نامي منيح بتركزي منيح و بتشتغلي عالنظرات اكثر هههههههه

انا ابتسمت و حكيت...الحمد لله ما ضربتني اذا و مشتلي اياها بتنبيه بسيط و جحره :)

لااازم و قريبا جدا...لسا امبارح بعتت لرزان احكيلها انه اشتقتلها و بدي اشوفها

يلا بركي رتبناها قريبا ان شاء الله :)
اشتقنا للصبايا كلهم

 

نورنياتي

هي مش التقاء نظرات ...هاي بتصير كتير بس انه بس تشوفيه بتحسي بشعور غريب

كتير عجبتني التدوينه اللي انت كاتبتيها

هاي بتصير كتير بيني وبين ماما, يعني مرات بسمع ماما بتناديني و هي مش بالبيت بتصل فيها بتكون بتكر فيي و بدها مني شي او مرات وهي بالبيت بروح بحكيلها ماما بتناديني بتحكيلي لسا بفكر اقوم اعمل هالشغله وبقول وينك يا ام السوس لتيجي تساعديني

احنا بنسميها رضى :)
انا مرضيه الله يرضى علي لان هاد نفسه كان يصير مع ماما و تيتا :)

اللي بحكي عنه بينك وبين انسان غريب عنك تماما... كيف بس تحسي انك بتعرفي هالانسان او راح تعرفيه مستقبلا انه حيكون اله تأثير بحياتك ...مش عارفه اوصف الشعور بالزبط :$

 

عادي تدقّيش , مرات الواحد بتصوّر انه بعمل خير او بجامل حدا اذا حكاله اشي

ذكرتيني مرّة كنت في الباص مروّح عالبيت , طلعت شحّادة عالباص استلمته من اوله
مشان الله
والله يخليلكم احبابكم
وساعدوني
وماكلة هوا

وما في حدا رد عليها ولا تطلّع جهتها اصلا

تا وصلت اخر الباص - عندي , فا انا ذوقا قلتلها : الله ييسرلك يا حجة

والا هي بتتطلع علي شزر وبتقول

الله ييسرلي؟
الله لا يوفقكم
الله لا يرزقكم
الله ...
الله...

وسحبت حالها ونزلت

عزائي الوحيد كان انه كلامها كان بصيغة الجمع

 

LUNAR.

له له له الله يسامحها على هالدعاوي

هو صحيح ما شاء الله عليها مش من الاولياء الصالحين و دعوتها مش مستجابه والله اعلم بس برضه مش وقتها عاخر هاليوم

مرّه ابن خالتي اجته شحاده صغيره و لزّقت و يا عمو و تبوس بايديه و هو يبعدها و مش راضيه تحل عنه و بعدين صرخ عليها ومشي, شوي اجت البنت هي و امها و الام تصرخ و ماسكه الحفايه بدها تضربه ال ليش تصرخ عليها لولا في شرطي شاف و مسكها :$

مش ورطه

 

لويش كل التعليقات لطيفة!

إه

قال مغامرات قال

أقعدي بالبيت و كافينا خيرك شرك

و بسسسسسسسس

الواحد مش طايق حالو

سيبي الناس بحالها

أما ناس فضوليين

---
و شكرا ً

 

تحياتي وسبر ذكرتيني بقصيدة لوالت ويتمان

أيها الغريب! إذا أردتَ أن تحدثني، وأردتُ
أن أحدثك، فلم لاتحدثني ولم لاأحدثك!؟

 

بعرف شو قصدك
ويلي كتبت عنه ويلي أعطيتك اللينك إله بيحكي عن التخاطب الذهني ولما تتفرجي عليهم بتحسيهم كأنوا بيستنوا يشوفوا وجهك عشان هيك كأنك تطلعتي فيهم لهاي الغاية .. التخاطب الذهني ما بيفرق بين حد بتعرفيه أو ما بتعرفيه

 

Sheeshany

O_O
الواحد مش طايق حالو!!!!


ليش بتصرّخ اه :(

الحق علي اللي بدي اكون منيحه مع العالم, فعلا خيرا تعمل عراسها عفرت و الباب اللي بجيلك منه الريح سده و ارقص بالعتمه

جفراء

اهلا وسهلا يا قمر
اول مره بسمعها..حلوه كتير

يا ريت الموضوع بكون بهالبساطه في الحياه اللي بنعيشها

 

نورنياتي

"
ا تتفرجي عليهم بتحسيهم كأنوا بيستنوا يشوفوا وجهك عشان هيك كأنك تطلعتي فيهم لهاي الغاية"

ايون هاي هي :)
شكله الامور دخلت عبعضها عندي
المهم هاد اللي بحكي عنه انا
اذا اسمه تخاطب ذهني :)

كأنك بتصرخي علي انتِ كمان :(
كُلُك علي ....ابااااااااااااااااه

 

هههههههههه
معلش لا تتضايقي...ما نحنا متعودين انه اي حد غريب اذا ابتسم او صبح علينا معناتو بدو يبيعنا شي ....او يشحد بطريقه حضاريه :))) يعني
من هدول اللي بيوقفوا العالم بالطريق ع اساس انهم ولاد عائلات ومقطوعين وبدهم دينارين يرجعوا بالباص ع اربد او الكرك
....بيجوز الست فكرتك منهم ههههههههههههه

 

Naysan

ههههههههههههههههه شكلها هيك فكرت :$ لان ردّ فعلها كان كتير عنيف

هههههههه جد ضحكتيني من كل قلبي يا قمر :))))

 

والله كنت بدي اوديلك أسألك عن رزان!
شو اخبارها صح؟

 

منيحه والحمد لله...بالايميلات بنتحاكى :)

بركي رتبنا نشوف بعض قريب

 

في احساس غريب بيجيلكم ان في شي مشترك بينكم او ممكن يجمعكم, و بتشعرو ان هالشي همه كمان حسوه من نظرتهم او من رجوعهم المفاجأ للنظر الك كأنهم شافو شي بوجهك

I thought I was the only one who felt that!
w 3adtan b2ool l2 bala habal I'm imagining things...bs a7ianan jd,there's just something about them

t7sheesh had el post :D

 

W ana kaman kont mfakreh 2enno la7aly ba7es bhalshee ...6le3na kteer w 2elo 2esem 3elmy kaman :D

It's a feeling I/we can't describe it in words...sa7 :)