Things I Like To Whisper About

Would You Hear Me Whispering

اجواء ورحلات ربيعيه

الحمد لله ربنا يسر وصبحت منيحه الجمعه الماضيه و رحنا رحله و كانت كتييير حلوه مع كل اقسامها...... اقسامها لان الرحله عنا بتنقسم ل 3 اقسام

قسم التجهيز ما قبل الرحله, انا و ماما بنجهز اغراض الاكل و الشرب في الرحله و اخوي بجهز السياره باغراض الرحله من طاوله وكراسي و منقل..... وخلافه و بابا يشرف على التجهيز و بضل يذكرنا بالوقت مع تكرار كلمه "يلا" 1500 مره :)

القسم التاني قسم اختيار المكان المناسب للرحله و الشبه طوشه
دائما وابدا لازم يصير مشادات كلاميه و اصوات بتعلى واصوات بتنخفض وكله من بابا مع نفسه على اعتراضنا على اختياره لمكان الرحله, بابا بترك كل الخضار اللي بالعالم و بقرر يوقف ببقعه حجار وتراب وبنتكون بالعاده مايله :$ يا بابا يا حبيبي يهديك يرضيك مش حلو هالمكان, بزعل و بتدايق و بنرجع نلفلف وهو يتأفف و بنزلنا على موقع اسخم من اللي قبله و بنضل ساكتين زي الشاطرين ولا بنحكي شي علشان ما يزعل

و بالعاده بنروح احنا و عيلة خالتي و نفس السيناريو بتكرر عندهم زوج خالتي بكون عامل عندهم نفس الفيلم, و نفس السيناريو بتكرر مع خواني كمان مش عارفه هي صفه عامه بالرجال ويلا بس برجال عيلتنا, لو المشادات مش عالموقع بدها تصير على شي تاني, يعني لازم ينعجقو الرجال بعيلتنا بالرحلات ليش ما بعرف و لهيك خبرت مرتات خواني بهالشي وصار العادي انه تصير هالعجئه و الاختلاف بتوقيتها و ننبسط بس نخلص منها بسرعه و باول الرحله :)

بننزل من السيارات و ما حد بسترجي يتخنفس بكلمه التنين - بابا و زوج خالتي - معصبين و مش طايقينّا و وجوهم حمرا من الشوب و منا :) بنحضّر الاكل و بنتمشى انا وبنات خالتي و بنكتشف كم من بقعه حلوه بنقعد و بنحكي عن كل شي و بنقعد نقارن بردود افعال بابا وعمو و همه بالطريق واللي سبحان الله بتكون نفسها و بنقعد نضحك على تكرار هالفيلم بكل رحله.

القسم الثالث و الاخير وهو احلى قسم واللي بصبرنا على البدايات الغريبه للرحل, بعد ما نخلص اكل و شاي بنضب الاغراض و بننتقل لمنطقه جديده و سبحان الله بتكون خضرا و مبسطه و نظيفه و لطيفه, للقهوه و الشيبس و الكيك وكل اللخبطيطات اللي بتتاكل بالرحلات و اهمها شعر البنات :)
بس تصير الدنيا ليل بنولّع المنقل و عليه بتبدا قعدتنا, هالقعده عباره عن غنا و نكت و قصص ايام الشباب من بابا و زوج خالتي سبحان الله كلنا بنقعد جنب بعض و كلنا بتصير قلوبنا بيضاااااااااا وصافيه و بس بنضحك من كل قلبنا, اعترافات وقصص غريبه عجيبه عن احلى الايام و المغامرات المضحكه


رحلتنا استقرت بالاخر على طريق السلط ياما ماشينا :)






الموقع خدمة 5 نجوم و فيه علاقات كمان :)



سبحان الله كيف الورده طالعه بوسط الصخره :)




وبما ان الكل حط صور شجر اللوز فحبيت ادلو بدلوي انا كمان :)






المنظر عجبني بمنطقة صويلح

باقي الصور بدي انزلهم عالفليكر ان شاء الله :)

21 التعليقات :

يا الله الي زمان ما شفت شي من الاردن ما احلى الربيع ذكرتيني لازم اصور اجواء الربيع هون في آن أربر

 

ذكرتيني برحلات عيلتي. والدي بركب السياره قبل ما يتأكد انه كل شيء جاهز وبصير يزمر ووالدتي لسه بالمطبخ بتجهز الأغراض.ـ
شكرا على الصور بترجع الواحد لذكريات حلوه. اذا صور فليكر مش برايفت كيف ممكن نشوفها؟

 

نفس السيناريو سبحان الله...يالله 5000 مره والقعده دايماً لازم تكون مايله,,,بس في الاخر بتنتهي ع خير وبنروح مبسوطين

الرحله لازم تكون جماعيه...أحلى,,,,في فرنسا كنا نروح ع أماكن زي الجنه بترتيبها ونظافتها وخضارها و اشجارها بس لما نكون لحالنا ما ننبسط ابدا.....بعد الغدا نزهق ونلملم اغراضنا ونروّح...هون بنروح ع اماكن زي المزابل...بلا مؤاخذه:)) وبيكون ما لنا نفس نرجع عالبيت.

 

Sozan

اه يا ريت....الربيع عندكم لونه اخضر طبيعي احنا بهالفتره بكون هيك وبعد اسبوعين بتغبر مش عارفه ليش :$

Jaraad

هههههه اه بابا بعملها هالحركه و هلأ مع الموبايلات 100 مرّه برن

الله يخليلنا اياهم و يعملو اللي بدهم اياه :)

في لينك للفليكر في اااااااااااااخر المدونه :)

و هي اللينك لصور الرحله و الربيع

http://www.flickr.com/photos/37699270@N05/sets/72157626338387943/

 

Naysan

هي انت و جراد طمنتوني ان مش بس الرجال بعيلتنا بعلو هيك :)

احنا عيلتنا اساسا صغيره, من غير شر بس 4 فاكيد مش حلوه لحالنا, يعني فطور بالحدائق ماشي لكن رحله لأ,فبالعاده بنروح مع بيت خالتي

متحكيليش عن المزابل...قررت ما اكتب ولا اصور شي منها....اشياء غريبه عجيبه مرميه عالاراضي :$

 

نفسسسسسسسسسسسسسسسسسسسسسس السيناريو

مع أخذ العلم إنه هلأ مزرعنا بدها سواقه ساعه وشوي ف منصحى من صلاه الفجر,, مع تكرير ال
ياللااه,, خلصو,, تأخرنا,, هلأ مناكل شمس الطريق

تسألنيش كيف رح ناكل شمس الطريق,,


لوووووووووووول,, تتهنو يارب والحمدلله ع سلامتك عسوله

 

زمان عن الرحلات
:)

أحلى شي صورة العلاقة!

لووول

 

ويسبر

مساء الخير

كلهم قاريّين على شيخ واحد

اضيفي عليهم دعوات امي يوم الرحلة

من الصباح المبكر

يا رب تقضي هالنهار على خير !!!!1

طب ليش هالنهار بالتحديد ؟؟

للآن ما عرفتش

دمتِ بخير

 

LOOOOL 3al 3alla2a
el sowar amoora 5soosan el looz <3 *_*

 

Hana

Thanks :D

UmmOmar

يا سبحان الله ...كلهم زي بعض اذا :)

اه صح نسيت الحوار عن "الشمس اللي حرقتنا " :$

تسلمي يا قمر...اذا الحال من بعضه يلاا منيح هالشي بهونها شوي ان مش بس احنا اللي بنعيش هالقصص :)

الله يسلم عمرك يا حلوه :)

 

Sheeshany

يا الف الحمد لله عالسلامه...ان شاء الله تكونو دعيتولنا وما نسيتونا :)

مش فاهمه مين اللي فكر يجيب علاقه معو عالرحله....مين لابس شي بدو تعليق !!!

بس ما عرفت انت بتعمل عجئه لام هيام بالرحلات ويلا لأ؟؟

Yosef

الله يمسيك بانوار النبي
"كلهم"!!! يعني انت مش منهم صديقنا يوسف :)

هههههه ماما بتدعي بهالدعاء كمان :)

لانه من النهارات اللي بنعجقو الرجال فيها....زي اعراس العيله اللي بجبرونا نروح عليها قبل بساعه علشان ما نتأخر و كالعاده بنكون اول الواصلين :(

 

Rain

:)

Shakelhom nas 2a5er anaqa elly kanoo 2abelna ;)

Elloooz 5ososee 2elek....ana kteer b7eb manzar shajar elloz ...jad ka2eno 7ayah jdeedeh bedha tebda

 

خديها مني كل الرجال هيك.. حتى الوالد الله يرحمه كان يعمل نفس الأفلام!
وحدة من الصور فيها جندب لو إني معاكم كان صدته أكيد!
حلو التغيير والانبساط..

 

كيكي

اهلا وسهلا بصاحبه العيد ميلاد :)
كل علم وانت بالف خير يا قمر ...العمر كله يا رب

الله يرحمه و يسكنه فسيح جنانه

شكلهم كلهم هيك....المشكله ان خواني كانو يتدايقو بس بابا ينعجئ و هلأ بس صارو همه البهبهات صارو يمارسو نفس الدور :$

اه ...لو شفتيني وانا بصورة بين اني بدي ابين اشجع الشجعان وبين اني مرعوبه لينط بخلقتي :)

 

!!!! يا مولاي
كلهم نفس الشي
وبيعجئوكي
وبيكدروكي
وبينفخوا قلبك
وبعدين بيحكو انتو مو خرج رحلات أساساً !!!
عم يتصدقوا علينا يمكن!
::
صورة الوردة خياااااااااااال والله
بدي احتفظ فيها (:
أما صور زهر اللوز فاا بحس بينكسر خاطري بس شوفهااا
):
مافي منن هون ): لأني بعشق شكلهاا كتير
::
أهم شي انبسطوا (:

 

بنعمل طوش مع هيام!

بدها على الحديقة
و بعد دقيقتين على الألعاب

و بعدها على محل البوظة

أو الكوكتيل

و هكذا و هكذا!!!!
لوول

 

Bullet

ههههههههههههه اه و بحملوكي جميله اللي طلّعوكي و طلعو معك :)

سبحان الله صورة الورده كتير عجبتني...ما عرفت اصورها منيح لانها كاميرة موبايل :$

بعيد الشر عن خاطرك يا قمر :)
احضري فيلم
memory of a geisha
في منظر احتفال بالربيع و شكل الشجر و الورد اللي بسقط زي التلج اشي من الاخر :(

الحمد لله كتييييييييير انبسطنا :)

Sheeshany


لااااا فروووحه مزبطه امورها اكتر ...موووول ناني آآآآب و كيكا

يعني مول نجيب كاندي ونلعب عالالعاب و بعدين نروح عالحديقه :)

ما في خيارات هو هيك ترتيب الطلعه وهو اللي بمشي :)

علشان تعرف ان كل قوي "هيثم" في اللي اقوى منه " هيام " :)

 

:)
بتقبليها مني بدون حكي ؟

 

هديل

الله يسعدك...انت كل شي منك مقبول
وجودك بسعدني و لو حتى مرور :)

 

صور جميلة و الطبيعة رائعة واجمل شيء في الدنيا
ولكن المشكلة في عدم الاهتمام وضعف الخدمات في هذه الاماكن
صورة العلاقة بتجنن :)

علاقات عامة من الآخر