Things I Like To Whisper About

Would You Hear Me Whispering

اختلافنا لا يعني خلافنا


في هالايام اكيد في كل جلسه بين اي اشخاص و حتى بين الشخص و نفسه التفكير مستمر في الاحداث اللي صارت يوم 25 الشهر , المشاعر ما بين الفرحه بشباب 24 اذار و بين الصدمه و الغضب من اللي صار و الحزن على الشهيد و المصابين ربنا يرحمه و يشافيهم ويعافيهم يا رب.

وهالشي طبعا صار ببيتنا كتير خصوصي مع الزيارات العائليه اللي كترت للسلام على بابا وماما اللي رجعو من السفر, اخر زيارة كانت لبيت خالتي و بنت خالتي هي و زوجها, زوج بنت خالتي ما شاء الله عليه اخلاق و شخصيه و طيبه , ملامحه فيها شوية قساوة و نظرته حاده و بتخوف, من اللي بتشوفهم بتحكي ولا بدي اتعرف عليه و بس تتعامل معه بتحبه و بدخل قلبك على طول.

زوج بنت خالتي من الكرك و بنت خالتي من نابلس, التوضيح هاد اله سبب, وهو اني بدي اوضح انه ابدا مش عنصري ولا عنده هالافكار المفسده الهدامه اللي "بعض" اللي حوالينا بنادي فيها هاليومين, ولكنه ضد المعتصمين و بشدّه, و اطلق عليهم مسمى "مخربين" طبعا الحوار اشتد بيني انا و بابا كطرف مؤيد و بين زوج بنت خالتي كطرف ضد المعتصمين ومع اللي صار ضدهم, الصوت علي و المناقشات قويت , الطرفين ما كانو بالموقع و كل اللي بنحكيه سمعنا و قرأنا, هلأ هو مش شايف ولا فيديو من اليوتيوب و مش قارئ ولا لحد من الشباب اللي كانو معتصمين و انا استغليت هالشي و صرت احكيله عن الاحداث اللي صارت و كيف ان الكل اجتمع على نفس الاحداث و الفيديوهات بتأكد هالشي, و تقريبا حكيتله اللي صار مع صديقنا ناصر بالحذافير لاني حفظتها قد ما قرأتها للناس, هو اعتراضه على موقع الاعتصام و على موضوع الملكيه الدستوريه, و ردينا عليه بان الموقع لازم يكون حيوي وان الشباب ما نزلو عن الرصيف بتأكيد الجميع الا بس صار في رمي حجارة وبابا حكاله " وين بدك اياهم يعتصمو.....بالصحرا؟؟؟؟؟ " و اصريت افرجيه الفيديوهات ولكن بنت خالتي حكتلي ما تحاولي لانه ومع المشاهد اللي بجيبوها عن ليبيا فهو مؤيد لمعمر القذافي و ضد الثوار!!!!!!!!!!!! انا انصدمت وقتها و نقلبت الموجه للحديث عن ليبيا , و من وجهة نظره بالنسبة لليبيا ان الشعب ما بصير يقوم بثورة على الحاكم , وصار حوار على هالموضوع مطول و انتهى ,و انتقلنا لمواضيع تانيه و ضحكنا على قصصه بالشغل وحكالنا عن قصه سرقه سيارته و شربنا القهوه و احنا بنضحك على ابنهم الصغير كيف برقص و بغني وكملنا السهره بنفس الروح اللي استقبلناهم فيها.


اللي صار مش تصرف فردي او خارق للطبيعه, اللي صار هو الطبيعي اللي المفروض يصير, اي نعم احتد الحوار ولكنه ما كان جارح ولا كان مبالغ فيه, كل واحد فينا بين وجهة نظره و اعطا ادله و حاول يقنع الطرف التاني بكل عقلانيه , وعدم اقتناع الطرف التاني ما خرّب العلاقات و لا خلّى حد فينا يطلق احكام عالتاني و مش بس نوع من انواع الذوق والاخلاق, لأ , النفوس ما تأثرت ولا صار في نقاط بالقلوب ولا بالعقول.

الطبيعي انّا نسمع بعض و انّا نختلف , كل شخص اله مرجعياته واله طريقة تفكير خاصه فيه ولكن اختلافنا هاد ما بصير ابدا انه يعني خلافنا مع بعض, و الطبيعي ان الاختلاف لا يفسد للود قضيه.


16 التعليقات :

ياااااااااااالله عليكي يا وسبورة !!
اليوم اليوم .. لا من شوية زغيرة قصدي كنت بتناقش في هالنقطة ! ما تقوليلي صدفة 0_0 !!
من الحق يبدي رأيه و يعبر عن اللي بيدور في خلده بشكل لا يجرح حد ولا يإذي حد .. و مش لازم كلنا نهز راسنا على نفس النقطة و نقووول تمام .. و اذا كان عند حد المنطق و الحجة للاقناع من حقه يحاول و من حقه نسمعه .. و ان ما قتنعنا مش من حقه يزعل ..
و دمتي و دامت مدونتك عامرة بالتشابه الباعث على الابتسام :)

 

هاي الناس اللي بتفهم الاختلاف في الرأي مش لازم يفسد الود وهاد لانه اصلا هاد الشخص ما عنده مشكله من الاول ويمكن انه يكون متعلم ومثقف !
انا بلاخظ انه هاي المشكله موجوده بين غير المتعلمين او لنسميهم غير المثقفين اللي عمره ما طلع من محافظته اللي عمره ما فكر في يوم انه في ناس تانيين وانهم بيعملوا متله تماما وممكن نحكي المشكله تكمن في التعليم الحفظي لا التعليم التطبيقي او التعليم المنطقي او التعليم اللي من الممكن انه تطبيقيه على ارض الواقع من خلال تعليم الطفل قدرات مو تعلميه أ ب ت

 

عارفة يا ويسبر .. كثير باتفاجأ بردات فعل بعض الناس تجاه الاحداث اللي جرت وعم تجري في عالمنا العربي من ثورات وتحركات شبابية ، يمكن انا اؤيدها جميعها ماعدا اللي بيحصل في البحرين لاسباب قد تكون معلومة للجميع ، بس انا باستغرب من رفض البعض للثورات على الحكام الظالمين ، يعني ممكن تلاقي حدا بيؤيد معمر القذافي وبيؤيد بشار الاسد وبيدافعوا عنهم ،،!! ممكن الشي هذا يضايقني لكن في النهاية كل واحد حر في رأيه والاختلاف في الرأي لا يفسد للود قضية ،، كل واحد عنده افكاره ومعتقداته ، نحن نختلف معهم ولكن لا نختلف عليهم ،، بتظل المحبة والاخوة هي الاساس ..
ربنا يديم المحبة بينا يارب ومانختلفش خالص ..ههههههه

 

بدنا "شوية" وقت + خطوات تا تصير المعادلة مقبولة + مطبقة

الاختلاف = الخلاف = الخصام = البغض عندنا للأسف!

:(

--
الصورة "طقع" *هيثم يعود لجذوره الزرقاوية" :)
و أحلى #ArabicTuesday #ثلاثاء عربيّ
على تويتر "دعاية"

 

اولا اشكرك على الصورة الرائعه
رغم ان هناك انواع اخرى من العقول
لكن هذه تفي بالغرض
للاسف اصبح اختلاف الرأي يفسد للود بخناق وزعيق وقضايا ومحاكم وجرائمم انتقام
ربنا يشوف من الحال
تحياتي

 

السلام عليكم
في البداية بشكرك على تشريفك لمدونتي

الحوار عنا نادرا صعب جداً بسبب تعنت كل واحد برأيه و الكل بعمل حاله أفهم واحد . بتمنا نكون أكثر أدب بالحوار و خصوصا إنه يكون لحوارنا هدف و غاية ؛ كتصحيح خطأ و توضيح أمر مهم و اللي مقابلك يقتنع مو بس الكل بحكي و ما في نتيجة

دمت بود

 

هديل

محكيتلك انّا بنشبه بعض ما صدقتيني :)
الافكار والقلوب عند بعضها

من حقي ابين وجهة نظري ومن حق الطرف التاني يحكي قناعاته, بنتناقش و عدم اقتناع طرف ما بعني انه عدوي

تسلميلي يا قمر....و دام التشابه بينا دائما :)

Sozan

الشب دارس حقوق و واعي ولكن اله وجهة نظر خاصه فيه

انا وبابا كنّا تماما ضد اللي بحكيه الشب ولكن بعد ما تناقشنا و كل واحد حط الادله اللي برتكز عليها انتهى الحوار بدون اي ضغائن وهاد الطبيعي

في ناس مخهم زي اللي بالصورة فوق, لا ارسال ولا استقبال, تناحه بعيد عنك وبس

التعليم لوحده مش كفايه لتوسيع المدارك و ليصير عندي ثقافه عامه و اجتماعيه, اسلوب الحوار و الكلمات اللي لازم ننتقيها ما بتتعلم بالمدارس, هاي بنكتسبها من خبراتنا العمليه من اختلاطنا بالمجتمع

 

هو هيك المفروض
مش ضروري كل تنين مختلفين بنظرتهم لموضوع معين يموتوا بعض

بنتناقش وبنتجادل يا بنقنع بعض يا بنضل مختلفين وكلو بكون بكل ود

 

وجع البنفسج

انا بنصدم بس اعرف ان في ناس ضد الثورات و مع الدكتاتوريين اللي الهم سنين ظالمين شعبهم ولكن بضل هاد حقهم و رأيهم الخاص طول ما همه مش متعدين على حريتي انا كمان

عنّا كتير ناس اختلاف الراي يفسد كل ود و كل قضيه :$

اميييين يا رب العالمين :)

Sheeshany

بدنا كتيييييييييييييير وقت شكله يا هيثم...يعني بعد اللي صار انصدمت انا, كنت افكر هالعالم قلّة و لكن لاسف شباب و صغار وجيل جديد راسة معبى بالفساد و بحب التخريب ..عمره الاعتداء عالناس ما كان حرية رأي

_______
الصورة فجأه لقيتها قدامي وبتعبر تماما عاللي ببالي :)

بديت الصبح و هلأ رجعنا...استنوني جاي اتطاوش انا :)

 

شهر زاد

العفو يا قمر....معك حق في انواع مش مذكوره بس اغلب اللي بنعاني منهم بحياتنا موجودين :)

اختلاف الرأي بخلي الاخ يقتل اخوه هالايام :$
ربنا يصفي القلوب و الاذهان ليصيرو يعرفو يفكرو منيح
اهلا فيكي دائما

Alirbidi

وعليكم السلام ورحمة الله وبركاته

بشرفني تواجدي في مدونتك دائما

تمسكي بالرأي من حقي وعدم اقتناعي بوجهة نظرك برضه من حقي ولكن اني اتعدى على رأيك و حريتك و عليك شخصيا هون المصيبه

وبالعكس اسلوب الهجوم عمره ما حل مشكله وبخليها ما تنتهي

اهلا وسهلا فيك :)

 

همسة

مش ضروري اقتنع ولا ضروري اغير رأيي علشان ارضي الطرف الثاني, عندي قناعاتي و مش تعنت متمسكه فيها لأ مقتنعه تماما فيها و فكرت بحججك وما اقتنعت و زي ما حكيتي بنضل مختلفين بالراي ولكن بكل ود

 

ويسبر

يا ريت الامور بهذه السهولة

الموضوع ليس اختلاف او خلاف

الموضوع الازلي عند المواطن العربي

اما ان تكون معي او فانت حنما ضدي

توارثته الحكومات والانظمة من زمن الجاهلية

وورثته للشعوب والقبائل

 

Yosef

طيب كيف بدنا نخلص هالعالم منه؟؟؟
لانه مخرّب و مفسد كل شي جميل وقاتل لكل بذرة خير بتحاول تطلع

باعتقادي...ان كل شخص لازم يبدأ بنفسه, بتحكيم عقله و قلبه و تشغيلهم و فتح مجال الحوار البنّاء مع التجهيز لاحتمالية الاقتناع بوجهات نظر ثانيه او عالقليله التفكير فيها بمنطقيه واما قبولها او رفضها بكل رقي وادب

 

هاد اللي اسموا الحوار الحضاري انوا كل واحد يسمع التاني للأخير وحتى إذا ما قدر يقنعوا ما يقلب عليه!!
بس وجهة نظروا غريبة

 

يبدأ كله بالتعليم ومن ثم السفر والتعرف على حضارات مختلفه لكن في البدايه يجب علينا ان نعلم الانسان ان الاختلاف لا يعني انني اكرهك او احقد عليك بكل بساطه انا انظر الى الموضوع من جهة اخرى كما ان الهدف في النقاش هو اثراء الحوار والتوصل لنقطة وسط للاتفاق لكن ليس بالضرورة تغيير وجهة نظر الشخص الاخر للاسف عنا في المجتمع العربي النقاش يعني غصب عنك لازم توافقي على رايهم والا انت تكرهيهم

 

Hana

وهاي هي الطريقة الطبيعيه اللي المفروض يكون الحوار فيها....مش ندبّح بعض لمجرد اختلافنا بالرأي

جدا غريبه :$ لو تشوفيني وانا بقاتل و بابا يدعمني

بس بتضلها وجهة نظره

Sozan

معك حق, زي ما الكره و الفتنه و العنصرية مزروعه ممكن الاستماع للاخر و تعلم حرية الراي ينزرع برضه

اه اذا انت مش معي اذا انت ما بتفهم ولا بتعرف اشي و انت الذ اعدائي صرت :$