Things I Like To Whisper About

Would You Hear Me Whispering

انا اكره الحيوانات :(


علاقتي السيئه مع الحيوانات بدت من زماااااان, انا بكره - بخاف :( - من كل الحيوانات الطائر و الزاحف واللي بمشي على 4 واللي بمشي على 2 - قرد كنجر وفي مقولة تانيه كنغر - كل شي ,وبعد تفكير متعمق توصلت انها كلها عقد طفوله مبنيه على قصص واقعيه





البسس

وانا صغيره لما كان عمري 5 سنوات - بصف تمهيدي كعكه بايدي - كنا بزياره لبيت عمتي و كان في بسه والده بحديقتهم و بسس صغار بوقتها كنت شايفتهم بجننو :( كل واحد من خواني و اولاد وبنات عمتي يمسك وحده منهم ويلاعبها وانا مش مسترجيه,بعدين تشجعت ومديت ايدي امسك وحده وعينك ما تشوف النور.... البسه الام نئحت عليها امومتها بهاللحظه و نطت عايدي و خمشتني ودم وحاله والبنت الوحيده ودلع وقلبتها دراما ومن يومها وانا والبسس بينا عداء وللاسف همه عارفين فبطلو يخافو مني :(




‏ الكلاب

يوم جمعه وكنا رايحين نتغدى بالتلال السبعه وكنت زغنونه, مش عارفه شو طلب مني بابا لاجيبله اياه من السياره يا دوب بطلع من الباب ويلا كلب واقف, بابا كان حاكيلي اني المفروض ما احسس الكلب اني خايفه واني اضل واقفه مكاني وانه جبان وهالحكي بس على مين ,انا شفته من هون وبديت اركض من هون والكلب ما صدق وراي عطول, وبابا يصرخ علي اوقف وصاحب الكلب يصرخ عكلبه ليوقف ولا انا ولا الكلب وقفنا و الحلو اني طلعت عالشارع وسيارات ربنا ستر والكلب سمع صاحبه ورجعله وانا اكلت بهدله يومها :( بكرههم ما بطيقهم وبخااااف.... كيف بدي اخفي الخوف ؟؟ :(




الغنم او على رأي فروحه "الغلمه"

هاي ايام الصف الثالث, كنت رايحه عالدكان اللي جنب بيتنا اشتري اشي زاكي , وانا طالعه من الدكان بعرفش من وين اجت الغنمه وماشيه باتجاهي, انا صرت ارجع ريفيرس فجأه صرت بين سياره صافه والحيط وانا ارجع و الغلمه جاي علي ,السياره مش صافه مستقيم فصارب بالاخر زي مثلث انا بطلت اقدر ارجع واعطيها الصوت العجيب :( انتبه العمو اللي بالدكان واجا زاحها وانا عيط والعالم التمو وانا صرت اركض عالبيت :(

وهاي كانت اخر تعاملاتي مع هالكائنات المتوحشه , واكيد بعد 50 سنه من كره هالكائنات بس تجيب بسه عالبيت وحتى لو كانت بيضه وكلبوزه ونظيفه برأيك وتحاول تقنعني مش اني المسها لأ اني اتواجد انا و اياها بنفس الغرفه فأكيييييد لا والف لا <<<< هالكلام موجه لابن خالتي اللي اجا هو ابنه يختبرو تحسن علاقتي بالبسس :(

38 التعليقات :

معناتو نصيحه لا تزوري امريكا. هون الكلاب شيء اساسي بكل بيت. الصبح او بعد الدوام بتشوفي الامريكان بمشوا كلابهم عشان يغيرولهم جو. ـ يعني شبه مستحيل تمشي بالشارع وما تشوفي كلب.ـ
وطبعا اوعك تحكيلهم انك ما بتحبي الكلاب او بتخافي منهم لأنهم مش راح يفهموا هاي الظاهره الغريبه :) ـ
بس كلو كوم وانك بتخافي من الغنم. الغنم اكثر الحيوانات اليفه حتى شكلهم بدل على انهم حيوانات مش يمكن انها تإذي حدا.ـ

 

وانا كمان بخاف من كل الحيوانات واولادي بيسموني سكردي كات :)

 

أول شي قبل أي تعليق... يعني انتي مختارة كم صورة، حتى اللي بموتو بالحيوانات حيصيرو يكرهوهم من ورا هيك صور... من وين جايبتيهم هدوووووول؟؟؟

ولله اني حاسة فيكي....
أنا يمكن ما في أجبن مني بالعالم، كتير بخاف من الحيوانات بشكل عام، و من ضمنهم اللي انتي ذكرتيهم، بس أنا الوحش بالنسبة الي هو كل شي بطير :s :s :s
و طبعاً الرئيس الرئيس الرئيس هو الحمام،
أنا بقول انو عندي فوبيا مو خوف عادي، و يمكن هالشي بضحك، بس أنا عنجد عندي مشكلة و مو عارفتلها حل، و يا ريت اني بتذكر أي مواقف أو شي كان صاير معي زمان... أنا بس بعرف انو أنا عنجد بخاف من الحمام، لدرجة اني بغير طريقي اذا كان في حمامة قدامي...خصوصاً هاد الأزرق الكبير اللي معبي البلد هون، هاد ولا في أتنح منو، يعني عندو استعداد تدعسي عليه و ما يزيحلك :s
بعرف انو هلأ في ابتسامة عريضة :D :D و أنا كتير بتضايق من حالي بس مو بإيدي، و هون بالإمارات في كتير أماكن بتلاقي فيها تجمعااااااااااااااات حمام، و أنا هاد بالنسبة الي فيلم رعب...
بتذكر مرة كنت رايحة عصلاة العيد مع أخوي عمسجد قريب، و اضطرينا نمر من منطقة فيها رصيف عريض و كان مليااااااااان (حمائم السلام)، متل اللي بالبلاد الأجنبية..
و أنا ضليت أبعد عن الرصيف شوي شوي لحد ما لقيت حالي صرت بنص الشارع اللي عرضو 5 مسارات، و السيارات صارت تزمر و حفلة :s و طبعاً اخوي عصب علي و قالي الله يخزي اللي بدو يرجع يطلع معك، و فضحتينا، و شو هالهبل و من هالحكي...
أنا عنجد كنت رح أندعس يومها بس كان أهون علي من اني امشي من جنب الحمام، مش بقولك فوبيا!!!!!
بعرف اني كتيييييييير طولت، بس الموضوع حمسني (زي ما تقولي ما صدقت عفشة خلق)، و طبعاً إلي كتير بطولات تانية كلها هيك (اشي بخزي)... بس بكفي لهون :)

 

خووووويفه ّ!!!! البسه, ماشي لانها بتخرمش...الكلب, ماشي لانه بيعض ...بس حدا بيخاف من "غلمه"؟؟؟

 

ويسبر صباح الخير
أنا ما عندي مشكلة مع الحيوانات و لكنني لا أحب تربيتها
قد أهتم يوم يومين ولكن بعد هيك يصيبني الملل

 

يعني موضوعك كوم و الصور كوم ثاني
تحششششششششيش

 

لااااااااااااااااااااااااااااااااااااااااء
لااااااااااااااااااا

كلاااااااااااااااااااااااا

أنا موافق بدرجة 100% على معطيات البوست

لااااااااااااااااااااا


:(

 

ياصباح الهنا ياصباح الهنا

من دخلة العنوان..
مع كل سطر شبعت ضحك
أضحك الله عباده خيراً..

الخوف من الاشياء،من الحيوانات ليس بالفطرة..بل هو شئ مكتسب من خلال تجربة بالصغر..
ونحن صغار لانخاف من اي شئ حتى الثعابين
لكن ما ان يخيفنا شئ او حيوان حتى تصبح عقدة نفسية من الصعب معالجته او التخلص منها.
هذا ماحدث معي بالنسبة للكلاب لغاية ما قررت انه علاجي هو بتربية جرو..
ولكني تعديت جرو واحد بحيث صار عندي دستة كلاب بالخارج..
يبدأ كل شئ بالشفقة عليها والاحسان اليها ثم بعدها حبها.

اختي الاصغر سوكا حدث لها مرة
ان خدشتها قطة تسكن معنا بمدينة حيث يعمل والدي..وصارت مرة كل اسبوع تاخذ حقنة .
لكن الغلطة منها لانها عفصت على القطة وكان رد فعلها طبيعي..
انا بخاف من الحيوانات الاخرى موووووووت
لكني احياناً اتشجع لمواجهة خوفي القهري
كخطوة ضرورية لمواجهة مخاوف اخرى..

0.0

الله يضحك ايامك ويسبر

 

It seems to me like you were already afraid of them as a little girl!
Animals are beautiful sensitive creatures,they are amazing if you look closely and they'll grow on you once you do :)

 

لوووول
الصحيح ما عندي ولا ذكرى سيئة مع أي حيوان
بس ما بحبهم وبس :)

 

Jaraad

عنّا بالاردن صار هيك :)
ما بتمشي بالشارع الصبح او بالمسا الا بتلاقي عالقليه 10 اشخاص "بغيرولهم جو" لكلابهم :)

ويلا ليش بطلت امشي :(

بشوفهم بالافلام بس حد يحكي انه ما بحب الكلاب بشهقو شهقة تعجب و ما بعجبهم O_o

بالنسبة للغنم... بعد هالقصه قعدت ليالي وانا احلم بالغنم اللي بلحقني و لهلأ :( خلص عقده و صارت

Sozan

يعني في حد زيي :)
بيني وبينك بخوفو :(

 

Hanadi

لازم ابين كيف انا بشوفهم :)
فاخترت الصور بعناية تامه

الحمام بيجي من ضمن "الطائر" بكرههم وحتى العصافير...كان عنّا عصفور و يضلو خواني يسكرو الابواب و يطيروه من القفص, المسكين ينصرع و انا انصرع

العصافير مكانهم برّه و بالجو من بعيد لبعيد احلى شكلهم :)

فعلا كتار بالامارات وخصوصا جنب البحر...عادي بتمشو الشباب ولا هاممهم, لكن كان اخوي يمشي قدامنا ليهشهم قبل ما اوصل لاني برضه بس انفعل ممكن اصير اركض بنص الشارع :)
طبيعي جدا انك تمشي بنص الشارع...صارت معي كتير :$

الحق على اخوكي...المفروض يعمل اجراءات احترازيه للتخلص من مسببات الرعب هاي

خدي راحتك عالاخر و خصوصا انك بتأيدي افكاري :)
المدونه تحت امرك

 

بخاف من البسس مرة بنت خالي قالتلي انو الجن اكتر شي بتتلبس البسس :D
و هات الواحد حتى لو على كبر ترجع تتغير افكاره

الكلب لا بعجبك انا .. بخاف منو بس ما بتحرك لو قرب عليي وفعلا عمر ما كلب لحقني
(والغلم) ما بخوف :( بس يضل بعيد بكل الاحوال

واصلا كل الكائنات الحية منيحة وهيي بعيدة .. ممنوع الاقتراب وكل اشي بكون ماشي

 

Naysan

ايون...انا خوّيفه :)

عفكرة مش بس انا اللي بتكره الغلمه :)
مميتي الها قصه برضه معهم و بتكرههم و بتحلم فيهم لهلأ حبيبتي

ماما من هي صغيره ما بتحب العوج...لهيك ما عجبها دنب الغنمه وهو اعوج فحبّت تعدله قامت رفصتها الغنمه ومميتي كانت صغيره و نحيفه قام اغمي عليها , وهداك يوم و هاد يوم ومميتي بتخاف من الغنم, ولأ مش من قصتها صرت اخاف من الغنم, لانها ما حكتلي عنها الا بس كبرت و بعد ما صار عندي عقدتي الخاصه :)

جعفر

يا صباح الخيرات و الليرات على رأي تيتا الله يرحمها :)

ملل!!!
يمكن ملل من مسؤوليتهم , همه ولا تشبيه ولا تشبيه زي البيبي بدهم عنايه يومي و متابعه دائمه

الحيوانات مكانهم الغابات.....خلوهم هناك ليش بتجيبوهم هون :(

 

W7l

بحبشت عليهم بحبشه...بدي ابين كيف انا بشوفهم و ليش بكرهّم

واعتقد ان الصورة وضحت :)

Sheeshany

ههههههههههههههههههههههههه
مستحيل...هاد يوم تاريخي يجب ان يسجّل :)

بدنا نعمل جمعيه "الرفق بالحيوان ولكن من بعيد لبعيد" :) بلاش هلأ يثورو علينا العالم

 

لاتـي Lati

صباحك ومساكي هنا و رضا يا رب

امين يا رب...ان شاء الله على طول الضحكه ما تفارق وجهك و تبقى بقلبك كمان

هو بضل في فضول و خوف عند الطفل و بده حد يشجعه, تشجيع بابا ما مشي معي و هالقصص خلتني اخاف وما احاول اجرب مره تانيه و حاليا الوقت فات على التجربه :)


انتي كنتي ما تحبي الكلاب!!!!!
انا من مدونتك حسيت انك بتستلطفيهم همه و القطط و متعلقه فيهم كتير :$
كتييييييييييييييير عندكم كلاب و قطط بالبيت :$
حملت هم زيارتكم يا اختي ... عأساس اني بكره جاي يعني :)

هاد موضوع تاني لسا ان الحيوان يكون مريض او يسبب اذى اكبر من خدش بسيط
يا اختي خلي المحبه من بعيد لبعيد....20 كم فما اكثر يعني :)

الله يسعدك كمان وكمان يا رب


Rain

Beautiful... sensitive...Ok I'll pass it but "look closely" :( kteer kteeeeeeer ....maaa beddy nothing can grow now it's toooooo late
بعد 14 سنه خدمة بثانوي بتقلي ءاقف !!!! :)

 

Saleh

واضح انو مش لحالي...يا اخي ما بنحبو ليش الحكي :)

مياسي

هههههههههههه :)
الحال من بعضه اذا

 

همسة

:( ما بحب هالقصص انا
اللي بخاف منه اكتر من البسس هو هالقصص ...الله يسامحها

مهو حكولي انه بشم ريحه الخوف, ريحه الهرمونات اللي بتفرز من جسمنا بس نخاف, هاي كيف بدي اتحكم فيها !!!!! لهيك بهرب :)

بالزبط...كله منيح وحلو وهو بعيد ولو من ورا التلفزيون بكون برضه احسن :)

 

عن جد؟حتى الخيل؟

 

بالتلفزيون بس :)

بحب بيبي الباندا والبطريق و الدولفين كتيييير كتييييير

الاشي الوحيد اللي ممكن و بتمنى اتعامل معه هو الدولفين :)

 

LOOOL 7ilweh hay bil TV w bas XD

 

هي هيييييي

تقرفوناش!

هلكتو علبة الوارد الخاصة بي!

خلص فكوها سيرة!

:أبو نكد:

 

Sheeshany

ت ق ر ف و ن ا ش !!!
الملافظ سعد يا هيثم

يعني اذا ما وصلك تعليقات ما بعجبك و اذا وصلوك برضه ما بعجبك

شوووووووووووووووو بدك؟؟؟
فش نت...سكر النت و عغرفتك فكر باللي عملته >:|

 

أنا .. أنا

أنا آثف

ما بعيدها إلا و إنت ما عم تتطلعي

----

أنا كان قصدي على خالتو رين!

و بعدين أنا عندي غرفة!!!!!

:×_×:

 

التعليق هاظ مشان هيثم باشا... جكر يعني

 

و هاد كمان جكر بهيثم
بكرهك

 

:)
ومين كمان حابب يشارك بالعقاب الجماعي لهيثم ؟؟؟

 

أعوذ بالله من الشيطان الرجيم..
يعني أنا شفت بحياتي بسس وكلاب... بس مش هيك!!!
ممكن أتفهم الخوف من البسس والكلاب خاصة الجربانة منها بس العنزات؟
طيب ولا مثلا العناكب.. الفراشات.. وز أو بط؟ دجاج؟
مش معقول بتخافي من كل شي!!!

 

كيكي

علشان تعرفو ليش بكرهم و ما بطيقهم :(

العنزات شريرات بس انتو ما تعاملتو معهم وجها لوجه .... العناكب انسي بطلع من كل البيت, الفراشات ماشي بس من بعيد لبعيد
وز بط...تحت بند اي شي بطير :)

كل شي ....خويّفه ضرب الليفه :)
ايون انا

 

loooooooooooooooooooooooooooool انا بتفهمك 100% لأني انا كمان بكره كل شي في روح غير الأنسان طبعا :P
بس بصراحة انا ما عندي قصص معقدتني من الطفولة بس خلص بخاف منهم وبسة ممكن تخليني أركض بنص الشارع والناس يطلعوا ويقولو مالها هاي المجنونه ( صارت على فكرة) :P

 

Hana

كل شي فيه روح غير الانسان

جميل التعبير...مع ان في من ضمن "انسان" بخاف منهم برضه :$

ههههههههههههه يعني الحمد لله مش بس انا ممكن اتهور بس اشوف بسه او كلب :)

 

هااهاهاااااااااااااي أنا عكسك بمووووووووت بالحيوانات وعندي ببغا مربيته كمان :)

 

b 59o9 el comment el sabeqa :
o-----> orangee
hehehee :D

 

O----> Orangee :)

حبتك العافيه يا رب...

وكمان بالبيت, ممتاز ممتاز خلص بس اجي عاربد ان شاء الله بتعزميني برّه :)

ممكن طبيعه شغلك بتخليكي تتقبلي كل شي؟؟؟
كتير بفكر بشغلك و الشغل الطبي بشكل عام وبحكي الله يعينكم , لو انا ما بستحمل يوم :$

 

ههههههههه :-)
شووو برا ما برا إحنا بنطلعوا بره وإنتي اللي بتفوتي وبتتفضلي بصدر البيت إنتى ما عليكي أوصلي اربد وأعطيني خبر والباقي عندي أصلاتن أنا شغلتي التنسيقات والتنظيمات :)
بتعرفي مرات بفكر بنفس الموضوع إنو هنجد الشغل كتيير قوّالي قلبي مزبووط :)
الله يعينّا مزبوووط والله بنشوف كتيير :)

 

تسلمي يا رب....متأكده انك ما بتقصري و قول وفعل كمان :)

نفسي ازور اربد :$

جد الله يعينكم, لانه مضطرين تلغو اي مشاعر لانكم لازم تتصرفو و فورا

الله يعطيكم العافيه :)