Things I Like To Whisper About

Would You Hear Me Whispering

كل شي و اله وقته



كل سنة بس اهلي يتسهلو على الامارات بضل انا واخوي لحالنا و اخوي بستغل الفرصه لينطلق و دائما بضل لحالي, انا بيني و بينكم ما عندي مشكلة اطلاقا, التلفزيون و النت بكونو عاملين عجئه ويادوب ملحقه ولكن مشكلتي باني بحمل همّه وخصوصي بس يتأخر الوقت كتير و بكون تاني يوم عندي دوام و مش عارفه انام فبصير حكي كتير عالموضوع و بتوعّد اني احكي لاهلي كنوع من التخلص من المسؤوليه و لكن لما نحكي مع اهلي ما بحكيلهم اولا لان من صغري انا و اخواني متعودين ان الفساد على بعض كتير غلط :) لهيك دائما بوقع اللوم باي ضربه بننضربها من بعض على حفّة التخت :) و ثانيا اني مش ضروري اقلقهم و همه هناك و خصوصي ماما...

السنه كتير اشياء غير...اولا اني معطله و هاد شي مسعدني كتير و الحمد لله و تاني شي ان اخوي تغير, عنده التزام مش طبيعي فيي اولا و في البيت, يعني باليوم بتصل اكتر من مره يتطمن علي, بساعدني و بسألني شو بدك دائما , تقريبا يوميا بنطلع مع بعض اذا مش عند ناس عازمينا عالغدا بس درايف نلفلف بالشارع مع كاسة نسكافيه من عند مش عارفه شو اسمه عالدوار الثامن او سحلب من عند كريما كريم, و غير التزامه بانه ما يتأخر على البيت بس يطلع مع صحابه :)

كتير بنلح على الشباب و بنقر فوق روسهم و ما بنتوقع انها ممكن تكون مرحله طبيعيه من حياته و بتمشي بحالها , ما بننكر انها مرات بتطول عند البعض و بتزيد عن حدها ولكن بالاغلب في نقطه هو لحاله بصحى فيها و بعيد ترتيب اولوياته بالحياه بالطريقة الصح.

بالعاده اخوي بستلم الدي جيه و يا بنضل ساكتين وكل واحد بعالمه يا بنضل نحكي قصص و نضحك ونقطّع بعض 100 مره بتداخل القصص و المواقف,قبل كم يوم كنّا بالدرايف الشبه يومي تبعنا و بالعاده ببدا عال 10 بالليل , بحكي لاخوي عن حبي الكبير للمشي بالليل, ان مرات بكون الواحد مفرفطه روحه و بدو يطلع, مشي نص ساعه لساعه بغير مزاجه, بس تمشي مع انسان بتحبه ولو حتى ما حكيتو شي بس هيك شعوركم انكم مع بعض بكفي, بحكيلي "بتعرفي انا شو بحب, بتخيل اني بتمشّى عالشط " -طبعا هو بحكي وانا بتخيل حالي بالموقع مع صاحب الظل الطويل المجهول - و كمّل انه" بكون عالشط و بعدين بروح على جسر فوق البحر و الدنيا غروب" - انا بعقلي يا سلااااااااااااااام بجنن هالمنظر - و كمّل " و اطول سيجارة و ادخنها بس بشرط اكون لحالي وما حد معي" انا زي اللي حد شحط بريك بتخيلاتي, لحالك!!!! طب ليش لحالك!!! حسيت زي الحد مسك محايه و محاني من الصوره :( ما استلطفت تخيلاته :$

لكن برجع و بحكي.....اتركوهم يجربو و بعد فتره لحالهم برجعو للطريق الصحيح :)

مسائكم فل و ياسمين و نرجس اللي بتحبه مميتي :)

31 التعليقات :

زي اللي حد شحط بريك بتخيلاتي
عجبني التشبيه هاد بشكل :)ـ
في مثل ما بعرف من وين اصله بس بحكي الجنه بدون ناس ما بتنداس
الانسان وين ما يكون اذا ما في حدا يشاركه السعاده ما بشعر فيها

 

الله يخليكم لبعض يارب و يديم عليكم الألفة و ما تفتنوا ع بعض ..
انا و اخواتي كنا ما نحكي لماما بس نقول لبعض تزكر انا معي "سلاح" لعند ما نصير كلنا مسلحين :)

يعني لما قال شط و بحر قلنا هيو في شباب رومانسيين لسة .. بس خرب اهل اهلها بالاخر ههههههه

صباحك باقة ورد من اللي بتحبيه :)

 

الله يخليكم لبعض:)
حلوة هالتخيلات وبكره بتصير ذكره وبتصيري تحكي اله فاكر زيي هلا انا
فيها مشاعر حلوه المحادثه
الله يخليلك اخوكي وميمتك ويرجعها هي وعمو بالسلامه ان شاء الله :)
الهديه على النص هه

 

الله يخليكم لبعض يا رب ويديم المحبه ع طول

معك انا...لازم يعيشوا كل مرحله ويجربوا وبالاخر سبحان الله بيهدوا لحالهم
هاد الحكي بقولوا لماميتي انا اللي دائما متمشكله مع اخوي الصغير بسبب سهراته وتاخيراته
وهو مش صغير ....صار بالواحد وتلاتين وخلص يعني عارف مصلحته

انا بقول كتر الزن والتدخل بيعطي نتيجه عكسيه والشباب بيعاندوا اكتر على خطأهم

عجبتني:شحطة البريك على التخيلات :) والمحايه

 

هههههه...
عجبتني شحطة البريك :)
بس عفكرة ... أنا من تجربتي الشخصية...
نحنا البنات بس نكون بدنا نستمتع بشي لحظة أو موقف منحب يشاركنا حدا فيها...
بس لما الرجال بدهم يحسو باللحظة، بحبو بكونو لحالهم، ما بعرف ليش!
فما تنصدمي أبداً :) :) :)

 

كل شي بوقتو حلو
و مع شوية إرشاد و توجيه و "رشاوي" كله بيصير عال العال

برافو نانا ويسبر

:]

 

السلام عليكم ورحمه الله و بركاته
ما احب المسؤلية احس الكلمة بحد ذاتها ثقيله و تخوف ههههه ^^

اتركوهم يجربو و بعد فتره لحالهم برجعو للطريق الصحيح

صحيح ,


الله يديم احبابك يا جميلة
ق1

 

يعني شو ؟ لازم تشاركونا باحلامنا و تخيلاتنا كمان!! خلي الزلمة بحالوا حابب يدخن سيجارة بدون مقاطعه ! حاب يوخذلوا نفس! ول!!

 

7abet el post ktiiir.. So warm
Allah ykhalekom la ba3ad..

 

ههههه.. عجبتني ما بنفسد على بعض :)
هاي مش أخوة أبدا :))))
الأخوة الحقيقية إنكم تنتفوا بعض وتفسدوا كل ما سنحت الفرصة :)))
بس جد الله يخليكم لبعض ويخلي الوالدين يا رب.. ومسائك نرجس وأنا كماااان بحبه :)

 

Jaraad


اهلا وسهلا بالناس المشغولين بالدراسه :)
ربنا يعطيك العافيه


هاد بالزبط اللي صار لمّا خرّب الصوره اخوي بخيالي

بديش اكون مفلسفه وخصوصا ان ما عندي مصدر تأكيد :$ لكن مره حكولي ان هالمثل ممكن يكون حرام بما ان الجنّه الكل بتمناها ولا يمكن حد يرفضها والله اعلم....لكن لو اخدنا المعني بالجنه انها قمة السعاده و الراحه فأكيد الواحد بتمنى حد بحبه يشاركه وما حينبسط انه يكون لحاله :)

هديل

امييييييييييين يا رب
تسلمي يا قمر, ويخليلك كل اللي بتحبيهم حواليكي و جنبك

لااا احنا كان في قواعد و اسس للطوش, قولي انا نادرا ما ادخل بطوشه بس حتى خواني كان عندهم اشياء مش مسموحه بالطوش, مثل لوي الايد و شد الشعر مثلا :)

انا كان يصحلّي ضربه واحنا بنلعب :)

شفتي بالله عليكي....حتى الموسيقى التصويريه للمشهد قلبت :$

صباحك معطر بكل شي حلو و بتحبيه يا رب :)

 

Sozan

تسلمي يا رب :)
و يخليلك اهلك و حبايبك يا قمر

انا بحكيلو محلاك و انت متزوج قبلي :$ ممنووووووووووع مش حلوه بحقي يعني ...ههههه بمزح طبعا

ربنا يهدّي باله وان شاء الله بنفرح فيه عن قريب ...هو لسا 25 سنه و بكوّم نفسه :)

هو في هديه بصراحه :) لانهم راجعين قبل عيد ميلادي بكم يوم و بابا حكالي ان في هديه :)
خلص عالنص ولا يهمك :)

Naysan


امييييييييييييييييييين يا رب...تسلمي يا ذووووووق :)

انا بوقتها كنت مش فاهمه انها مرحله ولازم يعيشوها, يمكن لاني كنت متحمله المسؤوليه هلأ سبحان الله هو اللي متحمل مسؤوليتي :)

مهما كبرو الابناء و خصوصا اخر العنقود ما بكبر بعين الام سبحان الله...بضلّه الصغير :)

الله يخليلكم اياها يا رب و يطمن قلبها عليكم كلكم :)

معك حق, النق مش حلو بالمره و بزيد الطين بلّه

هههههه....مش عارفه كيف طلع معي التعبير :) وهو حرفي للي صار

 

الله يخليكم لبعض يا رب ويرجعلك اهلك بالسلامة

صح مع كل سنة بكبر فيها الواحد بتأثر على شخصيتة وبصير انضج و اهتماماته مختلفة ، واولوياته مختلفة
وكل شي الو وقته وما في داعي نستعجل الامور

وعفكرة انا شوي كنت بتخيل حالي مع صاحب الظل الطويل ( غير عن اللي كان معك ما بدنا لخبطة )
وكمان البريك ما عجبني
بس كمان كل شي لوقته

 

Hanadi

اهلا وسهلا باهلنا في ابو ظبي :)
كيفك يا قمر و كيف الحياة الجديده؟؟؟ ان شاء الله كلّه تمام و تأقلمتو على الجو و بداية الشوب :)

O_o جد
طب ليش؟؟؟ مين بحب يكون لحاله وهو مبسوط؟؟؟
اشي بصدم و بحبط بصراحه :$

Sheeshany

اي شخص بالدنيا المعامله الحلوه و النصيحه اللي بوقتها و مكانها كتير بتأثر عليه و بطريقة ايجابيه جدا

رشاوي؟؟؟ كيف يعني
يعني سيارتي معه طول الوقت؟؟؟
ويلا معناته تحويل رصيد من الموبايل؟؟؟
ويلا امدادات اخر الشهر؟؟؟
سابقا طبعا :) لانه هلأ اللي بصير هو العكس
الله يخليلي اياهم اللي مهونين عيشة البطاله :)

 

CHERRY

وعليكم السلام ورحمة الله وبركاته

اهلا وسهلا فيكي صديقتي و بكل صديقاتي وخواتي من اهل السعوديه الشقيقه

كل سن اله مسؤولياته اللي بتتناسب معه, بتفكري حالك ما عليكي مسؤوليات ولكن اكيد في ولو اشياء بسيطه....هي صحيح بتخوف الكلمه ولكن مع الوقت بتصير امور متعوده عليها وبتعمليها :) بتلقائيه وبدون تفكير

تسلمي يا رب.... و يديم المحبه بينك وبين اهلك وحبايبك

W7l

حاسه ان في اختلاط بين تعليقك و تعليق هيثم O_o

له له له يا دكتور....و كمان بتشجع عالتدخين!!!

طبعا لازم يكون النا دور ولازم نكون بالصوره دائما :)
مياخد نفس شو راح يأثر وجود شريكة حياته بنسبة الاوكسجين اللي حتدخل عالرئه؟؟؟

بحكي لاخوي انا بحب مرتك من هلأ وقبل ما اعرفها وقبل ما اشوفها.... وهي زاد عالليست وحده جديده :)

 

Tareq

:)
Thanks Tareq....mashallah it's obvious that u have the same warm relationship with Ashraf :)
Allah ydeem elm7abbeh

كيكي

زي ما حكيت لهديل....في قوانين ولوائح ماشيين عليها حتى بعزّ الطوش :)

الفساد من ضمن القائمة السوداء....بالاضافه لجملة "الموضوع حياة او موت" بتعني نفذي المطلوب و بعدين بشرحلك :)
مش عارفه من وين جبناها بوقتها

تسلمي يا قمر...ويخليلك اهلك واحبابك يا رب

وانا كمان بحب النرجس
صباحك ومسائك احلى من النرجس و الفل :)

 

همسة

تسلمي يا رب :)

سبحان الله ,لكن احنا مرات ما بنعطي فرصه للي قدامنا و بنستعجل كل شي :$

تأثير جودي ابوت عالجميع شكله :)

بنعطيه فرصه كمان كم سنه....بركي بوقته رجع لطريق الرومانسيه الصح :)

 

كل شي بوقتو حلوووووووووووووووووووووو أنا كتيييييييييييير بحب هاي الجملة وهاد اللي شجعني أقرأ البوست
المهم ... انا برأي كملو الخيال لحالك ;p
الله يخليكم لبعض ويديم الصحبة :)

 

Hana

انتي دائما بتنوريني بزيارتك و انتي مش ضيفه انت صاحبة بيت :)

حاولت بس هو دمّر الصوره لابنيها من اول وجديد بدي لفّه جديده :)

تسلمي يا قمر و يخليلك كل اللي بتحبيهم :)

 

Thank you for posting the link to my blog for the source of this photo.It is the shadows of my husband and myself on the beach in Nelson, New Zealand.
Have a good day.

 

What a lovely picture

Thanks u for the picture....hope u don't mind that I used it without ur permission :$

It was the perfect picture to use,because I mentioned in the post some thing about imagining my self walking on the beach with my long-legs-shadow man :)

Thanks for passing by ...have a wonderful day

 

يا جماعة! يااااااااا جماعة
الشب قول إنو بدو خصوصية و يكون لحالو و إنتو نازلين دعاوي

"الله يخليكو لبعض" !!!!

إه

فعلا ً إنكم @$#%$^$^^%&%& و كمان :( و هع

* مين غيران قولتولي
:]

** الرشاوي و لو قليلة تؤتي أكلها كل حين

:P

 

مهو اللي ما عندو خوات هيك بصير فيه....بضل مقهور :)

الله يسعد الاخوات كلهم و يرضى عليهم يا رب

الرشاوي ولو قليله المهم تكون هي المطلوبه بوقتها :)

 

men take like forever to grow up(no offence)
enshallah ya rb y5aleekom la ba3ad w tdallo mbsoo6een :)

 

مساء العطر

محادثة حلوة وعفوية

وعلاقة حلوة بين الاخ واخته

دمتِ بسعادة

تحياتي

 

Rain

LOOL...YES some of them 3alashan ma 7ad yez3al :)

Teslamy ya amar ...Ameeeeeeeeen ya rab

همس الحنين

اهلا وسهلا بالمبدعه همس الحنين :)

مسائك فل و ياسمين...تسلمي يا رب, ربنا يخليلك اهلك واحبابك

 

أهلين فيكي حبيبتي...
الحياة الجديدة منيحة الحمد لله... بس انا عم بمر بكام يوم... أففففففففففففففف.. الله لا يفرجيكي.. مو طايقة حالي و متضايقة (لأبو موزة) و طبعاً مو عارفة ليش...
ولله انو مدونتك بتخفف علي.. و بتخليني أبتسم و أنسى شوي.. الله يفرجها يارب..
انتي صار معك شي جديد؟؟؟

بالنسبة لتعليقك...هلأ هاد مش الوضع دائماً بكل الأشياء، بس في كتير مواقف بحبو الرجال يكونو فيها لحالهم أو على الأقل مش مع (وحدة).. مش لإنهم مو مناح، بس يمكن بحبو يكونو مع أصحابهم لإنو طريقة انبساطهم غير عنا!!!
أنا هيك تفسيري للموضوع، و الله أعلم :)

 

@رينو

كل هااااااااااااااااااظ و نو أفينس!

آآآآآآآآآآآخ بس عليكنّ

و عمتو ويسبر بصمت عالسريع

يا ويلكما

 

Hanadi

حبيبتي....الحمد لله ان في اشي بمدونتي بساعد ولو بشي بسيط انه يسعد يومك

طبيعي اللي بصير معك....حياة جديده و شغل جديد وناس جداد , شعور طبيعي وان شاء الله بروح بسرعه
ربنا يفرجها عالجميع

انا بستنى رد الشركه و لسا بدور و ببعت السي في و قررت ما ارجع لشغلي القديم الا اذا خلصت الاجازه و انا لسا مش مشتغله, يعني لشهر 10 ان شاء الله, بيني وبينك القعده عجبتني و لسا مش ملّانه منها :)

كلنا بنحب نقعد ولو لحظات لحالنا....بالغرفه مثلا.....بس لمّا يكون شط و غروب و جسر ومي لازم يكون معنا حد بنحبه :$

Sheeshany


انا حكيت
some of them 3alashan ma 7ad yez3al :)

وانت من ضمن >>>>>ماحد يزعل....ليش استثنيت حالك!!
انا شريره صحيح بس بحفظ خط الرجعه :)
وااااااااااعيه انا

 

الله يخليلك اخوك
ذكرتيني بأمي و أختي لما يقولولي بليل قوم تمشى معنا على أساس إنك زلمة
وكيف بنضحك كلنا بعد هالعبارة
أيام حلوه ، صقلة و الصيف جاي و راجعلهم
موقف ثاني لما الواحد بحب يقعد لحاله ؛ أنا بتخيل لما أروح عالأردن إن شاء الله أشوفلي هيك أرض بريت إربد و يكون فيها غرفة ودايما غروح اعتزل الدنيا لبعض من الوقت فيها
دمت بود

 

تسلم يا رب....وربنا يخليلك الوالده و الوالد وكل الاهل يا رب

هههههه شكله كلنا استخدمنا هالجمله بوقت من الاوقات...

ان شاء الله بترجع للاهل و بلتم شملكم عن قريب و بتعيدو احلى الايام

كل واحد منّا بحب يقعد لحاله ولو للحظات قليله يصفّي ذهنه و يعتزل العالم

بس المهم ما يصير يفضّل هالعزله و تطول زياده
حلو يكون اله مكانه الخاص مع انه بالعاده اول مكان بياخد الواحد شريك حياته الجديد عليه هو هالمكان السحري اللي كان يرتاح فيه :)

اهلا وسهلا فيك :)