Things I Like To Whisper About

Would You Hear Me Whispering

نفسي....ونفسي...ونفسي



نفسي اكون معاهم....نفسي اوقف معاهم في ميدان التحرير و اصرخ و اهتف لحتى يروح صوتي زيهم
نفسي احط ايدي بايد اللي جنبي و نمشي بالشوارع و اصرخ وانادي باعلى صوتي برفض الظلم
نفسي اوزع المي و الاكل.....نفسي افرش الارض و انصب الخيمه
نفسي اقعد بوسط عيله و اضم الصغير بحضني و اسمع شكوى اهله
نفسي اعرف كل واحد وكل وحده فيهم
نفسي امسك الشرطي واصحيله دماغه اللي انغسل و اقتنع بان اخوه اللي قدامه عدو للوطن
اخوه اللي بطخه...واللي بدعسه...واللي برشه بالمي و بالقنابل
اخوه...وقريبه...وجاره...و صديقه
نفسي ارفع على كتافي نعش الشهداء و اكبّر مع اهله و اصحابه
نفسي اصرخ باعلى صوتي
الشعب
يريد
اسقاط الرئيس

ارحل ارحل يا مبارك

ومن هناك

و بعد ما يسقط الرئيس باذن الله و يرحل
اقطع المعبر السحري و اروح هناك
لمكان ما شفته لكنه مزروع بقلبي
احط ايدي بايد اللي جنبي
و يعطيني الحجر و ارميه
و بصدري اصد الطلقات
و يحملوني على كتافهم و يزرعوني هناك
و نضل سوى
هو بقلبي
وانا بقلبه

نفسي....ونفسي...ونفسي

10 التعليقات :

الله عليكي...
ولله كإنك بداخلي...
حكيتي كل شي حاسة فيه بس ما كنت رح أعرف أعبر عنه بطريقة أحلى من هيك...
الله يكون معهم و مع كل المظلومين و المحتاجين يااااا رب....

 

إن شاء الله خير
بركي احنا صحينا كمان !

 

والله انا نفسي كمان
خصوصاً...الجزء التاني
للمكان المزروع في قلوبنا جميعاً

بس شكلها قربت يا قمر
هالشعله الي بدات من تونس ...ان شاء الله حتكمل لما توصل لفلسطين

 

كلنا و الله!
بنحس إنو كلامنا / كتاباتنا زي اللي بتخنقنا و إنو .. مستحيين منها!فاهمة علي!

عقبالنا كلنا :)

 

كلنا نفسنا نعمل نفس الشي و نكرره حوالي العشرين مرة في أماكن مختلفة، و على الرغم إنه الطريق طويل و لسه مش مضمون، شايف شعاع الشمس بيشرق بعد ظلام طال قرون

و إن شاء الله راح يكون الشروق بأسرع ما نتخيل،شكراً يا أهلنا في تونس، شكراً يا أهلنا في مصر، شكراً لكل من رجم إبليس بحجر، أو بكلمة في العلن أو بالسر، أو بلحظة صمت كي لا ينطق كفراً و يُؤله طاغية

 

بعد رجعتك من السفر صايرة نفسط طرية :)))

كل هاي اشياء نفسك فيهم
لا ووين الشطارة انك وصلتي للي بدك اياه
شفتي نحنا الفلسطينيين بنستغل اي وضع لنوصل هناك
بس مو طالع بايدنا شي :)

صباحك سكر ويسبر

 

كتير مؤثر ومعبر كلامك

مش عارف شو احكي
بس ان شالله بينرفع الظلم عن الكل .. وبترجع كل الحقوق لصحابها

:)

 

رائعه ويسبر الله معاهم ان شاء الله

 

اخواني و اخواتي
متأكده ان الكلام اللي كتبته نابع من عقولنا كلنا و قلوبنا كلنا

ما في بني ادم طبيعي برضى باللي بصير

ربنا ينصرهم و ينصر كل مظلوم يا رب و ان شاء الله الحرية تنتقل بين كل الشعوب المغلوبه على امرها المظلومه من حكومتها

اللي بدعيه بجانب النصر لهالشعب القوي المحارب ان ربنا يجعلنا جزء من التغيير اللي باذن الله حيصير و اللي ان شاء الله راح نشهده و نصنعه

____________

ما عرفت وين ارد لانه ما في ايميل ارد عليه
ايميلي هو
my_loud_whispers@yahoo.com
الفكره عجبتني بس حابه اعرف اكتر عن التفاصيل اللي ببالك