Things I Like To Whisper About

Would You Hear Me Whispering

Home Sweet Home :)



نعم....ايون....صحيح
ويسبر عادت الى ارض الوطن سالمه غانمه - هو اي نعم ما وقعت اي عقد بس برضه غانمه :)

الحمد لله كانت اجازه سعيده, و السفره كانت منيحه وكالعاده تأخرت الطياره ساعه, بس هاد الطبيعي و المفروض تعودنا عليه, تعرفت على بنت اموره كانت تبكي لانها مفارقه اهلها, ومع اني مش من النوع اللي بدخلو بالعالم بسرعه بس حسيت اني لازم اهدّيها شوي وخصوصا ان معها بيبي من بكاها صار هو التاني يبكي, و الحمد لله صارت احسن, هو اي نعم بعتت مسج لاهلها من موبايلي و قامو اتصلو فيها وصارت تبكي من جديد :( بس اجمالا الحمد لله مشيت, ساعدتها بحمل الاغراض مع انو معي هاند باج 17 كيلو, شكلأ هاند باج كانت, و سبحان الله ربنا يسرلي حد يحمل عني الهاند باج, اتمقلب المسكين :)

طبعا من يوم ما وصلت و احنا عالجزيره 24 ساعه, ربنا يقويهم وينصرهم و يحققو مبتغاهم يا رب, شعوب عربيه بترفع الراس, جيل جديد يعيد امجاد الماضي, ان شاء الله سنة 2011 تكون سنه تحرر عالجميع.

نزلت من الطياره لابسه بلوزه شتوي والجاكيت من كتر ما حكولي الدنيا برد, طلعت مش برد و متت شوب, و بعد ما قعدنا و وزعت الهدايا - هو مش مفلسه مفلسه يعني بس هااا قربو يخلصو القرشنات :) - و زي ما بنعمل بالعاده بس يجي حد من السفر, قهوه و شوكلت اللي بنجيبه من السوق الحرّه, صحيح هو الفريرو روشيه و الرافييلو نفسهم اللي بالسوبرماركو و لكن بضل الهم نكهه مختلفه, من الديوتي فري بضلهم :)

المهم لبست بيجاما شتويه و لسا الدنيا شوب, نمنا مش عارفه انام الدنيا برررررررررررررد كمان حرام ما زبط كمان حرام ما زبط, كمان دفنه تحت البيجاما و جرابات يا دوب مشي الحال لحتى ماما جابتلي الاختراع اللطيف هاد



اشي زي المخده مقطع ل 3 اجزاء, بدل ما يكون فيه قطن بكون فيه قمح :) بنحط بالميكرويف 3 دقائق و بصير سخن و بتتدفي عليه, هو زي اختراع "القربه او الئربه " بس مش مي و له له له انفتحت و عبّت الدنيا و بتحتفظ بالدفا وقت اطول - عجبتني بتحتفظ :) - الله يخليلنا بنت عمي اللي اجت من المانيا و عرفتنا على هالاختراع :)

فااا 3 حرامات و الكويلت و 50 قطعه لبس و هالاختراع, هيك بدو الجو حاليا مع الصوبة اللي مشعوله 24 ساعه و التدفئه اللي بتشتغل طول الليل لنعرف نقوم عالفجر و نتوضى

سبحان الله, قبل كم يوم كنت لابسه صيفي و مشغلين الكونديشن بالسياره, تاني يوم رجعت للبرد...... ربنا يسقينا الغيث ولا يحرمنا ....بس ايمتا بدو يجي الصيف!!! :"(

شو بدكم بطولة السيره....المهم الحمد لله على سلامتي و الاردن المنور بوجودكم يوم الخميس نوّر نقطه زياده لا تنكرو :)


34 التعليقات :

الحمدلله على السلامة يا ويسبر شو جبتيلنا معك :D هاد السؤال المهم

راح ترجعي عالامارات بعدين ولا كيف ؟

 

الله يسلمك احمد :)

الووو...الووو الخط مش واضح ومش عارفه اقرأ السؤال :)

الاسبوع الجاي عندي مقابله و بناءا عليها ببين راجعه ويلا لأ ....مع انو بيني و بينك ما حبيت الغربه بالمره :(
اشتقت لاهلي وخصوصا ماميتي كتير :(

ربنا يجيب اللي فيه الخير, بركي شغلوني بفرع الشركه بالاردن
معقول تزبط!!! :)

 

^^
أكيد نور ما القمر طل،
بالنهار مافيش فرق.
الحمد على سلامتك، ولكني مندهشة لانه المفروض انه كان..
يعني مافيش شغل!!
هو فضول اصدقاء لا خيار لك.

الجو ايضاً برد عندنا مووووووووت
وشوية امطار.
لكني الغريب لست منتظرة او في لهفة للصيف!
ربما اريد ان يكون دافئ وفي نفس الوقت مطر!!!!!!!

حمد الله على سلامتك كمان مرة،
وشكراً على التفاصيل لاني بامووووووت على التفاصيل.
^^
تقول الجدات بيت الواحد لايعوض.

شكراً ويسبر

 

الحمدلله على السلامه
طبعا ما في مثل الهوم بس الواحد ما بيعرف وين بتكون رزقته.ـ
كثير منيح منك انك طمنتي وساعدتي الست. الله يجزيك الخير على عملك.ـ
يلا اشتغلي بسرعه عشان تمسعينا مغامراتك في العمل :)ـ

 

الحمدلله على السلامه يا بطه
أكيد تورت عمان...نورت و امطرت كمان
بعد طول اشتياق

 

حبيتو الاشي هاد تاع القمح بدي اجيب كبشة رز و احطهم في كيس و اجرب هههههه

الحمد ع السلامة انا متأكدة انها نورت مش نقطة وحدة نقط كتيييييير :) :)

 

تحيه لقد تم نشر التدوينه في تجمعنا مدونات من أجل التغير

 

الحمد لله على سلامتك :)
ان شاء الله ربنا يجيبلك اللي فيه الخير وين ما كنتي

المهم انك غيّرتي جو , وان شاء الله انها بتزبط اكيد

يالله عشان تعوّضي الانقطاع النسبي لمدونتك وانتي هناك

 

ويسبريييييييييييتو!!
حمدلله عالسلامه بردانه بـاشا:)
جايه مع المنخفض شكلو:))
ومتى بدنا نشوفك آه؟

 

هلا يا ويسبر
قلنا صرنا جيران بس شكلها ما زبطت لهلا
اكيد نورت الاردن
و الله يقدملك الخير
شو بعرفك بلكن بتزبط
:)

حلو هالاختراع
بس ما اخترعوا شي للشوب
احنا عنا مطرت و هينا رجعنا للرطوبة
شوفي تعي نبدل انا و اياكي
بما انك من مغرمين الصيف و الشوب و انا بحب الشتا

بس تبديل شتوي و يعود الحال كما هو عليه لاني ما بستغني على التكييف

 

حمدالله على السلامة :) نورت عمان :)
وبالنسبة للأختراع الجديد عجبني :)

 

ايوااا و انا بحكي ليش يوم الخميس كان غير شكل اتاري ويسبر بعمان !!! اجت و جابت الشوب ! لا بالعكس الدنيا شتا هالاسبوع هاد , خير خير
على كل حال حمدالله عالسلامة و صدقيني خلي الامور تمشي لحالها و ربنا بيسرها , الناس الكويسة دايما ربنا بوفقهم

موفقه

 

Lati

حبيبتييييييييييييي...انت القمر والذوق كله
مهو النهار مغيم كان فبرضو نوّر ....واثقه كتير من نفسي ما شاء الله علي ههههه

تسلميلي يا رب

سبحان الله يا اختي...ممكن ما في الي رزقه هناك, قدمت لكتير شركات طالبن تخصصي و عملت مقابلتين بس :$

لو في امطار بخف البرد شوي ...ربنا يسقينا الغيث سقيا رحمه لا سقيا عذاب

انا بحب الربيع...لكن الها كم سنه ما في ربيع, شتاء او صيف اختفى الربيع و الخريف من الفصول :$

الله يسلمك يا رب....ههههه ما انا حسيت اني خضت بالتفاصيل كتير فحكيت
"شو بدكم بطولة السيره" :)

شكرا الك يا قمر لانك بتنوريني بمرورك :)

Jaraad

الله يسلمك :)

معك حق ما حد بعرف وين رزقته....الغربه بتنفرض عالواحد و ما بختارها الا في حالات معينه
ربنا يرجعكم كلكم بالسلامه

مسكينه كانت بتحزن...متغربه بالاردن ومن سنتين مش شايفه اهلها وابصر ايمتا تشوفهم مره تانيه

ادعولي ربنا ايسرلي اشي منيح وما ارجع لشغلي القديم :(

 

Naysan

الله يسلم عمرك يا رب
منورة بوجودكم يا قمر...الحمد لله عالمطر
اهلي هيك حكو...جيتي و جبتي الخير معك :)

هديل

ههههههه ما بعرف بزبط بالرز ويلا لأ....بس نصيحه بلاش تجربي لينحرق هو التاني...مش ناقصك بصراحه :$

الله يسلمك يا زوووووووووووء

 

مدونات من اجل التغيير

شكرا جزيلا :)

Abu Zaina

الله يسلمك :)
امين يا رب العالمين...ربنا يجيب الخير للجميع و الواحد ما بعرف وين رزقته, بتيجي بوقتها المكتوب

تغيير جو كتيييييييييير ناجح كان خصوصي بعد ضغط الشغل, الحمد لله كانت كتير حلوه الله يسعدهم خواني و عيلتهم ما قصرو وخلوها احلى من ما كنت اتوقع

هلأ بفضى لاكتب اكتر ان شاء الله لانه عندي كتير مواضيع ما كتبت عنها :)

او بعد فتره لانه هلأ بابا وماما بدهم يعوضو الفتره الماضيه اللي ما كنت فيها ...قهوه و فطور وغدا و كل شي سوا سوا لازم نعمله :)

 

مياسي

الله يسلمك يا رب....الحال من بعضه اكيد :)
بعرفك بتعزّي الشتا كتير, ما بنسى ان موضوع حبنا للشتا هو اللي جمعنا :)

لااااازم وقريبا جدا ان شاء الله
بركي رجعنا خططنا للقاء جديد
كتير مبسوطه اني رجعت علشان نروح سوا عالعرس :)


Jafra

هلا فيكي يا حلوه
ما زبطت :$
مش عارفه حتزبط ويلا لأ
ربنا يجيب الخير للجميع

تسلمي يا قمر...هاد نوركم اللي بيجي مع خطوط الانترنت :)

لاااا كلّه الا الرطوبه :$ جربت كم من يوم بالامارات و انخنقت
الشوب كوم و الرطوبه كوم لحالها
الله يعينكم

اذا شوب لحاله ببدل :)

 

Hana

الله يسلم عمرك ....منوره بوجودكم يا قمر

الاختراع الجديد بطلت استغني عنه, اول شتا ما بضلو ايدي و رجلي متلجين كعادتهم بالشتا :)

اختراع ممتع وسهل التصنيع :)

W7l

اجا الشتا مع شمس الجمعه علشان نروح عالصلاه براحتنا :)
الله يديم الخير يا رب

الله يسلمك يا رب....المكتوب بدنا نشوفه و وين رزقتنا ربنا كاتبها بدنا ناخدها
والنعم بالله

شكرا...شكرا جد اسعدتني بكلماتك
ان شاء الله اكون كويسه و ربنا يوفقني

شكرا :)

ملاحظه ع الهامش

قربت الاجازه تخلص ...حضّر حالك :)

 

والحمدلله ع السلامه يا قمر:)
كلماتك ضحكوني كتير الله يخليكي لاهلك ويخليهم االك
بس جد وين شوكولاتي !!

 

7amdella 3al salaaameh :D allah yjeblek elli fi el 5eir bel shoghol sawa2 in UAE wella 3amman :)

o sho bel nesbeh lal ejra2at el 3askareyyeh abel el nom? battalt anzel 3amman men hon la shahar 6 :p

 

الحمدلله على السلامه ... وانا بقول ليش الاردن نورت :)

بتمنالك كل التوفيق في موضوع الشغل وانشالله بتسمعي الاخبار الطيبه عن قريب يا رب :)

يسعد صباحك

 

بدون انقطع الخط ... شو جبتيلنا؟
ترا في شوكلاطة بدون سكر بالدويتو فريدوم "مش دا اسمه برضك" ؟

لوول

ألف حمد لله على السلامة
أنا بقول ليلة الأربعاء إجانا لحد عنا شعاع غريب عجيب لطيف
أتاريكي إنت :)

الغربة مو زيزي أبدا ً بس الله يوفقك بالمقابلة و يكتبلك الرزقة الحسنة وين ما تكون
و زي ما هونت على الصبيّة "حلوة صحيح!" هييي

يهونها عليكي و على كل مغترب / ة

 

نسيت أسولف عن الاختراع
هاذا ممتااااااااااااز لأمثالي و لمثل الجوّ هون!

فرصة نتعرّف :)

 

حمد الله على السلامة ام السوس

نورت والله نورت

:)

 

اهم اشي انك غيّرتي جو , وقعدتي مع فرح واخوانك والجميع هناك

لأ يا عمي , الأهل اولا , خذي راحتك معهم وعوضيهم غيابك عنهم , واحنا بنستنى مش مشكلة
؛)

 

الحمدلله على السلامة

وانا مبارح رجعت للاردن
كنت باجازة نص السنة .. طبعا بالشام , مالي غيرها :)

بتعرفي انه برغم الشتا اللي هناك والمطر ما حسيت بالبرد بالمرة
يمكن هون أبرد لآنه جبال

المهم .. ضايل اسبوع للعطلة
الاحد الجاي دوام
:)
مالحقت اعطل

الحمدلله ع سلامتك مرة تانية

 

ولك الحمدالله ع سلاااااااااامتك وسبوورتي
^_^
الله يفتحها بوجك يارب و تتسهل ان شاءالله
أنا كمان رجعت ع البيت .. قصدي يعني في حالة استقرار بما انو خلصت من مصايب الامتحانات D:

نورتي واهلا سهلا فيكِ بيتك ومطرحك (:
ياريتني كنت حدك كان بوستّك وعملتلك أحلى جاتو يا غالية (:

موفقة يارب

 

bedy minno had el ishy!:(

7mdellah 3al slaaaaaaaaaameeeeeh :***

 

Sozan

الله يسلم عمرك :)
تسلمي يا رب و يخليلك كل احبابك يا قمر

موجوده بالحفظ و الصون....هيها انضافت لعزومة الكنافة اللي متفقين عليها بس تيجي الاردن ان شاء الله :)

hb

Allah ysalmek ya rab....Ameeeeeeen ya rab :)

loool ana barredeh kteeeeeeeer la heak bedha 2ejra2at 3askaryyeh bsara7a :D
be 4 bekoon eljaw bejannen ...bs tejy 3ala 3amman bet5abrena ok :)

 

أشرف

الله يسلمك...هاد نوركم :)

تسلم يا رب...ربنا يجيب اللي فيه الخير

يسعد صباحك و مساك

Sheeshany

ولا كأني قرأت بداية التعليق......

الله يسلمك ....اه نوري انا...مهو مرّت الطياره فوق السعوديه :)


ابدا ابدا :$ الله يعينكم و الله اعلم شو ربنا كلتبلي

مين الشوكولاطه!!! اه كلها سكر وما بتنفعلك
انا طلبت رقم ام هيوم من قبل بس هلأ صار ضروري تعطيني اياه....في مكالمة فساد و نميمه لازم تصير :$

امين يا رب

Sheeshany 2
كتييييييييييييييييييييير مفيد هالاختراع و ممتع بصراحه....خصوصي للي رجليهم و ايديهم ما بدفو طول فصل الشتا امثالي....بجنن :)

كتير بشجعك انك تتعرف عليه

 

نادر

الله يسلمك :)
منوره بوجودكم صديقي

Abu Zaina

من تأخري بنشر التعليقات و الرد بتعرف اني ما قصرت بتعويضي و تعويض اهلي عن الفتره الماضيه...وما زال العمل مستمر :)

الحمد لله كانت كتير ممتعه الاجازه, و خصوصا مع الصغار :)

تسلم يا رب....وجودكم دائما بسعدني و بشرفني :)

Ahmad

الله يسلمك....والحمد لله على سلامتك انت كمان :)
شفت الصور عالفيس بوك ...شكلكم انبسطو والحمد لله :)

سبحان الله بس تحب المكان ما بتفرق معك وما في شي بغير مزاجك :)
المهم انك انبسطت بالاجازه القصيره :)

هيك اجازه نص السنه....شبة اجازه ما بتلحق تاخد نفس

الله يسلمك و بالتوفيق بجامعتك :)
فصل جديد ...تسجيل....مشاكل جديده :$
ان شاء الله ما تواجه مشاكل زي كل فصل

 

Bullet

الله يسلمك يا قمر :)

امييييين يا رب...تسلمي حبيبتي , ربنا يسر امور الجميع

الله يعطيكي العافيه....انبسطي بالاجازه القصيره لتقدري تكملي الفصل التاني :)

حبيبتيييييييييي....اعتبريها وصلت و الك مني بوسه و عبّوطه كمان على رأي فروحه :)


Rain
Sahel....mammety 3amlatelna menno :D

Allah ysalmek ya amarah :)

 

ههههههه
يعني شفتي الفضايح
انا حكيت لصحابي ما ينزلوا الصور .. لآني كنت بأشنع حالاتي

مومشكلة
:)

بالنسبة للتسجيل ..الحمدلله
هالمرة سجلت 18 ساعة وكلشي تمام
:)

عجيبة .. صح
:)

بالتوفيق

 

الحمد لله على السلامة :)

والاختراع هذا عن جد افضل اختراع للي مثل حالتكم في منطقة برد في برد

اول مره اعرفه :)

 

الله يسلمك

زمان ما بين القمر...شكله الدراسة ماخدتك منا ....ربنا يعطيكي العافيه

البرد يمكن طبيعي بس اختك برّيده زياده شويتين :)

بصراحه حلو ومفيد :)