Things I Like To Whisper About

Would You Hear Me Whispering

ان الله يهدي من يشاء




بعد ما تخرجت من الجامعه قعدت سنه كامله بالبيت بدور على شغل و من غير ترتيب اجا الشغل, كنت رايحه زياره لبيت عمي و اجا ابن عمي اخر الزياره اول ما شافني بحكيلي " كيف رحتي من بالي!!" طلعو بدهم بالكليه اللي بدرّس فيها محاضر حاسوب و اتفقنا تاني يوم اروح عالكليه و اقابل مساعدة الرئيس وفعلا و بعدها قابلت الرئيس و وقعت عقد و بديت تدريس تاني يوم فورا :).

مرحله التدريس كانت لسنه اولى و سنه تانيه و كانت كتيييييييييير حلوه وفيها مواقف كتيره خصوصي اني كنت بال23 فكنت تقريبا بعمر الطلاب و احيانا اصغر منهم, وكانت كتيييييييييييييييييييييييييييير متعبه و سبحان الله عأخر الفصل طلعلي بالحكومه و طبعا على رأي المثل .....مش متزكره منه الا الميري واتمرمغ فيه :$ المهم خلصت الفصل وطلبو مني اراقب شامل و فعلا كان لسا في وقت لبداية الدوام بالحكومه.

خلال مراقبتي للشامل تعرفت على مدرسات من كليات تانيه, وحده منهم اول ما شافتني انصدمت وانا قلبي من جوا فرح - ببقى احكيلكم قصتها بعدين - المهم وحده من المدرسات كبيرة بالعمر و كان الكل بباركلها عالحجاب و هي صارت تبكي , حكتلنا قصة حجابها

تزوجت مباشرة بعد التخرج , زوجها كان متخرج من روسيا تخصصه بشي بخص الديانات مش متزكره شو بالزبط و معه دكتوراه و كان شيوعي و معلنه هالشي, و اهلها بوقتها ما عارضو وما كان عندهم مشكله و اول ما اجا عالاردن اشتغل بجامعه من الجامعات الاردنيه و افضل ماده قريبه من تخصصه كانت الثقافة الاسلاميه :$ كان يدرس الطلاب الماده و يحكيلهم انه مش مقتنع باللي بدرسه و يحاول يدخل افكار شيوعيه من خلال المحاضره, طبعا ما كان معترف باي ركن مطلوب لا صلاة ولا صوم ولا اشي, وهي كانت ملتزمه بالصلاه و كانت توصل فيه انه وهي بتصلي يحط ابنها على ظهرها لحتى يدايقها, كانت تحكيله عن رغبتها بلبس الحجاب و كان ردّه " يوم ما بدك تحطي هالشريطه على راسك فورا بتروحي عبيت اهلك" و كلنا بنعرف ان ايام زمان كانو الناس مش كلهم ملتزمين بالدين, كان العادات و التقاليد و ثقافة "العيب" هي اللي بتحكم مش "الحرام", و طبعا فكرة الطلاق مرفوضة تماما بوقتها و لهلأ, فأستمرت بحياتها زي ما بده, كانت تصلي لانه ما بقدر يمنعها من الصلاه بس دايما يحاول يعيق هالموضوع.

بيوم كانو طالعين يسهرو كعادتهم براس السنه الميلاديه, كانو ساكنين فوق بيت والدته, و لازم قبل ما يطلعو يمرو عوالدته يسلم عليها و يحكي معها و يطلع, وبالفعل نزلو وحكو و ضحكو و ودّعوها و طلعو, بوقتها ما في موبايلات كان روحو لقو عجئه و ناس, اكشفو ان والدته توفت بعد ما ودعوها بفتره قصيره, و كانت هاي اول صدمه اله, تاني يوم وقت الدفن وبما انه لازم المحارم اللي يحطو المرحومه بالقبر نزل هو عالقبر, ومن وقت ما حط والدته بالقبر لرجعو عالبيت و هو منهار و ببكي, عرفت زوجته و راحت لتهديه و تواسيه , بعد ما هدي حكا لزوجته انه حس بشي جوا القبر بسحبه و كأنه مش قادر يتحرك و حس قديش الدنيا ما بتسوى شي و كيف اخرنا كلنا للقبر, وفورا حكالها بتمنى انك لسا بدك تتحجبي و فعلا من يومها تحجبت و هو التزم بالصلاه بالمسجد و كل سنه بروحو عمره و ربنا رزقهم بالحج

ما حد بعرف شو نهايته و شو نهايه غيره, كتير منا بطلقو احكام على غيرهم وممكن توصل انهم يلعنو و يسبو على ممثل او ممثله و احنا ما بنعرف شو مقدار الدين اللي بقلبهم, تذكرت القصه هاي لموقفين مرو بهالفتره, اول شي جديد حضرت فيديو لحلقه اللقاء مع حلا شيحه و زوجها على قناة الناس عاليوتيوب و جد هزني كلامهم و طريقة هدايتها و اشي تاني تعليق ما نشرته بناء على طلب صاحبه وصلني على بوست بكفي تقييم للعالم و حبيت احكي هالقصه لعل و عسى هالقصه تريّح البال

اللهم احسن خاتمتنا


14 التعليقات :

عن جد بدني اقشعر من القصة
والحمد لله ربي هداه

شكرا على التذكير عن نهاية كل شخص في هذه الدنيا

 

أحكامنا بتطلع من باب إنه إحنا عنا خبره واااااااااو ف الدنيا

وكل العالم لازمن يمشو ع قصصنا ويتعظو منها وياخدو خطانا على إنها مسلمات

واللي مابكون هيك,, بكون إما غبي,, اومابده يتعلم,, أو ابصر ماله

 

موضوع رائع واسأل الله أن يهدي به ويجعله في موازين حسناتك، بالنسبة لموضوع انو الشخص ما يحكم على مين ما كان، كنت مرة بتفرج على قناة مصر (قبل 10 سنوات على ما اذكر) وكان في لقاء مع سباحة مصرية اسمها رانيا علواني وهي تتحدث عن انجازاتها وميدالياتها وهي اصلاً من عائلة ثرية وانا اشاهد بدأت افكر بيني وبين حالي أنه هاي البنت مش ممكن تتحجب بعد كل هالشهرة والجمال والمال، والله بعدها بحوالي 3 شهور على ما اذكراتحجبت البنت واعتزلت السباحة تماماً وكملت دراسة الطب. صدقيني بقدر فرحتي بقدر ما قررت اني ما احكم على أي شخص، فالله يهدي من يشاء.

 

يسلمو يا ويسبر
القصص من هذه الشاكلة بحبها أنا ... تعزيزية و مشجعة

اللهمّ أحسن خاتمتنا و اجعل خير و آخر كلامنا من الدنيا شهادة أن لا إله إلا أنت

 

حتى الرسول صلى الله عليه و سلم ولا عمره حكى عن واحد باسمه انه حيروح الجنة ولا النار،الله بس اللي بيقرر هاد الاشي مش أي حد تاني

و بنضل ما بنعرف شو بقلوب الناس،ولو شو ما عملوا ممكن بالاخير يطلعوا احسن منا

شكرا عالبوست الحلو مع إنه استغربت و ما عجبني انها تتزوج واحد شيوعي مع انها متدينة

 

White Freedom

دائما هالقصص بتأثر فينا ...الحمد لله ان النهايه كانت سعيده :)

الله يحسن خاتمتنا اجمعين

UmmOmar

دائما ما بننسى نتطلع على انفسنا و نراقب تصرفاتنا لانّا منشغلين بتصرفات الناس التانيه

و بنعتبر نفسنا امثله لازم يحتذى فيها :$

 

MTayseer

اللهم امين

سبحان الله... ما حد بعرف شو في بقلوب هالعالم و للاسف بعض منا بحكم بالشكل الخارجي بس

معظم اللي ربنا هداهم بس يحكو قصصهم بنعرف ان الدين كان املي قلوبهم بس لسا تايهين

كل انسان في بداخله بذرة خير و بس يصحى بتنمو هالبذره
الله يهدينا و يهدي الجميع يا رب

Sheeshany

الله يسلمك... هالقصص بتخلينا نفكر باللي بنعمله و بتصحينا احنا كمان و فعلا بتشجعنا لنعمل اكتر

اللهم امين

 

Rain

صلى الله على محمد صلى الله عليه وسلم

في ناس مبشرين بالجنه اكيد و لكن كله بعلم رب العالمين و اذا الواحد عرف يمكن كطبيعه انسانيه ممكن يتخاذل او يتطمن و يبطل يشتغل على حاله اكتر


زي ما حكيت بالبوست, زمان مش كل الناس كانت تنتبه لهالنقطه,العيب مش الحرام, انه شيوعي او حتى متدين بصلي او لأ مش مهم, كانت مقاييسهم غير عن هلأ و الحمد لله الوعي الديني
هلأ اكبر

Wafa'

اللهم امين :)

 

صباح الخير يا قمر

انا بعرف واحد قصته بتشبهه كتير هاي...والحمدلله ربنا هداه الى صراطه المستقيم
الحلو بالموضوع انه الناس اللي بتفكريهم أنهم كتير بعاد عن طريق الحق والهدايه لما الله يهديهم بيكون تدينهم كتير حلو...مش تعصب لا...تديّن راقي ...اذا بيزبط هذا المصطلح
يعني بتلاقيهم بيحببوكي فعلاً في الدين وما بيحلالك الا أنك تقعدي معهم وتسمعي منهم وتستفيدي منهم

 

أكيد في مبشرين بالجنة بس الله اللي بشرهم عن طريق محمد صلى الله عليه و سلم
مش محمد نفسه
:)

 

Naysan

صباح الورد

الحمد لله ....ربنا رحيم و بعطي لكل واحد فرصه ليراجع نفسه و تصرفاته

معك حق....التعصب مرفوض بكل شي بحياتنا

Rain

اكيد...وما ينطق عن الهوى ان هو الا وحي يوحى :)
كله بعلم رب العاليمن و زي ما حكيتي بس ربنا اللي بعرف شو اللي بالقلوب

مساكي سكر :)

 

حلوة كثير القصة هاي , ان شاء الله ربنا يثبتنا ويحسن خاتمتنا

بس عندي تعليق بسيط برضه على جزئية الأحكام اللي بنطلقها

هسه احنا متفقين انه ما بصير بأي شكل من الاشكال نطلق احكام على الناس , لأنه النا اخطائنا ومش ملائكة

بس برضه ويسبر , يعني معلّش , يعني الرقاصة فلانة لما تحكيلك انه كل سنة بتروح عالحج وما بتقطع فرض وبتصوم رمضان والخ الخ
ومع ذلك لسه بتمارس مهنتها
يعني ببساطة : ان الصلاة تنهى عن الفحشاء والمنكر

مش حاكيلك انها راح تدخل جهنم , بس بنفس الوقت , مش حاس انه اللي بتعمله من الناحية الدينية بنعكس على مهنتها

الله يهدينا جميعا يا رب

 

امين يا رب العالمين

كتير فكرت بهالموضوع و النتيجه اللي طلعت فيها هي ان اكيد في منهم الحياة ماخده كل تفكيرهم وفي منهم ناسيين الاخرة تمام ولكن برضه ما بنقدر نحكم عليهم
لان في نماذج لناس اتدينو و ما توقعنا بان الدين ممكن يخطر في بالهم

يعني شمس البارودي و كيف كانت و كيف بقضل الله صارت


نفسها فلانه بتحكيلك علشان رضا رب العالمين و رضا امها فتحت كباريه جديد....وهاد شي هي مقتنعه فيه مش بتحكيه هيك :$


انّا نستنكر افعالهم الحاليه اعتقد انه مش غلط و لكن نحكم على اخرتهم هاي اللي ما بنقدر نحكي فيها

قصه سمعتها من صاحبه الي عن جدّه صاحبتها
كانت مش مسلمه وفجأه وهي بال60 اقتنعت بالاسلام و اسلمت قبل رمضان بكم يوم و بعدها ربنا كتبلها الحج و بعد العيد بكم يوم توفّت....ما بعرف صدق القصه بصراحه ولكن مش حاسستها مستحيله :)

الله يهدي الجميع يا رب