Things I Like To Whisper About

Would You Hear Me Whispering

بكفي تقييم للعالم....



موضوع لبس الحجاب كان من المواضيع المصيريه بحياتي, لبسته وانا بسنه رابعه جامعه, كنت افكر فيه من سنوات ولكن قبل ما البس الحجاب بشهر خلص وصلت للاقتناع التام انه لااااااازم اتحجب, و سبحان الله ربنا بعتلي عدّة رسائل, يمكن متهيئلي و ممكن فعلا صارت بس انا مقتنعه تماما ان ربنا ببعت لكل واحد فينا رسائل بكل شي بحياته لحتى يهدينا للطريق الصحيح و احنا اللي بنفهمها او ما بنفهمها و احيانا كتير بنفهمها بس في منّا بطبقها و منّا اللي ما بطبقها.

كنت كل ما اجرب البس حجاب الاقي حالي ابشع وحده بالدنيا, حتى يوم ما اشتريت الحجابات كنت اقيسه و احكي يا الله ما ابشعك و اعطيه للبياع اني بدي اشتريه

من القصص اللي صارت معي و اعتبرتها رسائل, قبل ما اتحجب باسبوع كنت راكبه بالباص مروحه من الجامعه, ركب الباص حج كبير بالعمر, كبير كتير وماشي على عكازات, قام واحد من الشباب علشان يقعد حكاله اشي بما معناه انه ليش نقعد وما في وقت لنقعد و الدنيا ماشيه ولازم ما نضيع اي وقت ولازم تعمل لاخرتك لانها جاي و شو خمس دقائق واقف وشو 10 دقائق واقف والعمر كله بمشي, انا حسيت الحج بحكي معي انا...انو شو بتستني ولايمتا!! روحت حكيت لماما هلأ بدي انزل عالسوق اشتري حجابات و هاد اللي صار, اشتريت حجابات و طبعا اشتريت اواعي جديده, مش لان اواعيي مش مناسبه للحجاب هو كان بس ناقصني الحجاب و لكن لحتى نفسيتي تتحسن شوي

يوم ما قررت البس الحجاب طلبت من صاحبتي انها تستناني بالمجمع لاني بدي اياها تكون معي بس الكل يشوفني, و فعلا تلاقينا هناك , ردود الفعل انقسمت لعدّه اقسام, اشي حكالي انهم كأنهم متعودين على شكلي بالحجاب و انه ما في شي تغير, و جزء باركلي بحراره جد فرحتني وكان عنّا استاذ مساعد كان في بيني و بينه مشكله في ماده بحوث العمليات عاسلوب المناقشه المهم شافني من بعيد ضحك و رفعلي اشارة الابهام انه جود فور يو :) كتير انبسطت يومها هو اي نعم ردينا تمشكلنا وقت مناقشة مشروع التخرج بس عادي .

هلأ الشباب يمكن ما بعرفو معاناة لبس الحجاب مش النفسيه لأ السمعيه :) اول فتره كل بنت متحجبه جديد بكون صوتها شوي اعلى من قبل, مش للفت الانتباه لا سمح الله لأ بس لانها بكل بساطه مش سامعه غير صوت حالها :), تخيل ان فجأه في شي على دينيك مرافقك بكل حركه, حتى صوت حت القماش ببعضه جنب دانك بكون بقوه 10000 فولت , و اشي تاني ان في بنات متحجبات جديد مع العجئه و مع قلّه الاحتراف بحط الحجاب فجأه الشعر بنطلق للخارج من كل جهه من دون قصد - هون بعني اللي مش قصدهم تبين غرتهم و طراف شعرهم لان لهلأ في ناس بعملو هالحركه الغريبه عن قصد - فأنا طبيعي لسا اول يوم و كل شوي لازم اروح ازبط الحجاب, شافتني بنت من بنات " المصلّى " بتحكيلي شو هالحجاب اليوم بس و يلا لكل يوم, حكيتلها طبعا لكل يوم, بتحكيلي طيب مدام تحجبتي بلاها تطليع الغرر هاي, قهرتني و كنت لساتني من اللي بكتمو بنفسهم و ضليتني ساكته.

شوي رحت عالمصلى كعادتي من قبل ما اتحجب لاصلي الظهر, شافتني صاحبتي اللي معي بالقسم واللي معي بمشروع التخرج وبرضه من اللي يطلق عليها "بنت مصلّى" اتطلعت علي من فوق لتحت و رفعت حاجبها و حكتلي " لساّ....قدامنا كتير لسّا لنوصل" و كبّرت و بدت تصلي !!! شو هالاحباط!!!

مشكلتنا ان في بعض الناس حوالينا بفكرو حالهم ختمو العلم بالدين و وصلو للقمه مع اني مقتنعه ان بعد رسول الله صلى الله عليه وسلم ما في حد بوصل للقمه و اللي بفكر حاله وصل يعرف انه كتييييييييييييييير بعيد عن الدين الحقيقي, ناس بتفكر حالها بموقع يسمحلها انها تقّيمني و تقّيم ديني و تديني, بحكولي انتي مش مجلببه وانا الي الظاهر و الظاهر اللي مبين مش كامل لهيك انتي دينك مش كامل!!! ومين انتي لتقيميني؟؟؟ ومين حضرتك لتفكري ان انا ما الي انتقادات على تصرفاتك!!

المشكله ان في ناس ايمانهم بكون ضعيف او متزعزع و تصرفات مثل هالنوع بتخليهم ينفرو و يبعدو عن الدين بدل ما يقربو و يتمسكو اكثر و يحاولو يستزيدو , دائما بحد ربنا الغفور والرحيم اللي خلّى المحاسبه و العقاب و الثواب بايده هو مش بايد واحد من هالبشر....


ملاحظه ع الهامش

كنت متصوره صورة لكتاب التخرج و تحجبت بعدها و ربنا يسر اني اعطيهم صورتي بحجاب و اللي طلعت دمار مع اني اخدت صاحبتي لتتأكد ان شكلي منيح....عجييييييييييييييب منظر الحجاب طلع اشياءات طالعه و مزيوحه و ملفوفه :)

27 التعليقات :

أنا بشكل عام مع حرية اللبس، لكن بافرح كثير لما أشوف أي واحدة باعرفها إتحجبت، و دائما بادعيلهم إنه ربنا يصبرهم و يتمملهم دينهم.

في بلاد لبس الحجاب فيها عادي، لكن في بلاد ثانية إللي بتلبس الحجاب مثل القابض على الجمر، مش سهل بالمرة.

الله يصبرك و يتمم عليكي و علينا الدين يا رب

 

it's good to know enno mesh ana la7ali elli kont (o la azal) a3ani men hal mawdoo3 :)

 

It's funny you mnetioned the hearing problem, I remember how much I suffered from it right after covering! hehe
After I met my husband, he taught me a lot about not being judgmental about the looks. Here you find a lot of muslims who look a lot different than us and wear really strange outfits but they are all muslims. Plus, who are we to judge whether they are good or bad muslims?!

 

كنت بفكر بنفس الشي هاليومين

إنه,, اسفه
بس مين حضرة جنابك ت تحكم إني بستاهل أو مابستاهل,, أو تحكم عليّ من خلال طريقه لبسي إني مش ملتزمه مثلن,, بس لإني مش ملتزمه بعبايه او مابلبس جلباب؟؟

يعني ,, ليش في ناس بتخيلو حالهم إنه ربنا أعطاهم القوه والمقدره على الحكم على الناس,, وميززززززززهم بهاي القصه

بس لإنه إلهم لحيه,, أو لإنهم بصلو بالجامع,, أو عشنهم أكبر منا بالعمر

حتى أنا ,, أدرى الناس ف حالي من جوا,, مابعرف احكم على حالي,, وعلى نفسي
كان بالدين أو بالثقافه أو بغيره
ف أشحال حدن لا بعرفني ولا بعرف بشو بفكر أو ليش أنا عامله هيك ف حالي

صباح الخير...

 

صباح الخير

بتعرفي , مرّات بحس انه الناس اللي على شاكلة "بنات المصلّى" همّه اللي بنفروا العالم من كل اشي منيح بهالدين

عدم المؤاخذة هو انتي من يوم يومك متدينة والحجاب زبط معك من اولها وما زليتي عمرك ولا غلطتي؟؟ - الحكي لبنت المصلّى وأمثالها

اذا هيك , معاكي كللل الحق تقيميني , وبرضه مش معناه الحكي هاذ انك تحبطي اهلي بتقييمك واسلوبك الاخص

التديّن عمره ما كان معناته انك تكون مكشّر دايما بوجوه الكل وبس بتضحك لما تشوف "اخوانك" بالدين اللي زيّك

انا شخصيا بعرف شب كان عنا بالشركة , متديّن لأبعد الحدود ما شاء الله , والدين عنده خط احمر , وملتحي والخ الخ , بس بتيجي تحكي معاه , الشبّ مزّيح وروحه مرحة وجد جد تحشيش , حتى لما بده ينصح حدا , بحرص انه ما تكون النصيحة قدام الكل عشان ما يجرح هالشب

همّه موضوعين بس شابكات ببعض : التقييم والتطرّف اللي بخليك تقيّم الكل عن جنب وطرف

وسامحونا
:S

 

وكمان بدك تطلعي حلوه بالحجاب
عن جد لسا اقدامك كتير لتوصلي
هههههه

صادقه في الي قولتيه
مين يعرف يمكن اكون انا الي مو ملتزمه احسن عند الله من الي قاعده تقيم الناس
وكانها من المبشرين بالجنه

 

Salah

معك حق....اللي بتتحجب ببلد مش اسلامي, او بلد بتنادي بترك الحجاب فهو عمل كتير صعب ...الله يصبرهم و يجزيهم الخير

رحمة ربنا فينا و علمه بحالنا بيعطينا راحه نفسيه ...طبعا بدون ما نكون مقصرين بحقه سبحانه وتعالى

امين يا رب العالمين

Hb

How r u ya amar...I miss u kteer

We all ben3anee men halmawdoo3 yemken :$
w 7atta mesh bemawdo3 el7jab...fe taqyeem la kul she b7ayatna

 

Nido


Yeah me too and this period stayed with me for months :)

Unfortunately some of us still judging people about every thing specially the look, I hate that and I hope I'm not one of those people.

We should judge ourself and our behave and try to improve that for sure will not give us the time to judge others :)

have a wonderful day and thanks for passing by :D

UmmOmar

وكتير ناس بعطو لنفسهم الحق انهم يقيموكي و انتي الك 1000 نقطه بتقدري تنتقديهم فيها

الشكل الخارجي اللي الناس بتقيم عأساسه هو ابشع شي, ياما ناس تخبو ورا هالمظاهر ليعملو اللي بدهم اياه و الناس بتنقرص منهم و بدل ما يميزوهم لأ بفرضو ان كل اللي بشبهوهم بالمظاهر زيهم
زي اللي بكون متخبي ورا لحيه ليعمل شي و بعدين بنسبو فعلته على كل الملتحين

صباح الورد :)

 

انا محجبة يمكن عادات لانه انتي عارفة الوضع كيف هنا في السعودية, لكن حتى لما خرجت مرة لدبي برضه استمريت في الحجاب. عموما انا اعتقد انه فعلا المسئلة فعلا خيار و انه الحجاب الحقيقي هو حجاب و حشمة داخلية اكثر من داخلية و الكلام دا مو كليشية بس لانه فعلا باشوف اوضاع سيئة هنا. وللعلم الحجاب هنا لانه فرض صار عادة, ففعلا تلاقي العجب العجاب من النساء في محاولة اظهار ماداخل الحجاب و داخل الوجه المغطى , بالرغم من انها لو كشفت او شالتها حجابها كان اسلم لها.
و برضه اقولك بالرغم من كدا, دائما اقول اللي مكمل في جزء دائما يكون منقص في جزء تاني فمين فلان او علان لما يجي ينقد تاني في اي شيء, اي شيء , لانه لو فعلا حبينا نقعد لبعض ماراح نخلص و زي ماهما بيعتقدوا انه الشخص اللي امامهم غير كامل او عنده العيب التالي و التالي فالشخص اللي امامهم برضه يقدر يطلع فيهم عيوب اكبر
دائما ما كامل الا وجه, لااله الا هو
اما احنا فخلينا مشغولين في انفسنا افضلنا
Everyone thinks of changing the world, but no one thinks of changing himself.

الله يثبتنا على طاعته

مقاله جميلة ياقمر
:)

 

Abu Zaina

صباح الورد
للاسف في كتير بنات كانو مش كتير فاهمين الدين و عندهم لسا شوية ضعف بايمانهم و بتمسكهم بالحجاب من ورا بنات المصلى و الطرقه المنفره باللي بعملوه و باعتقادهم انهم بعملو اشي منيح و بدعو للدين ...البنات بعدو و في منهم للاسف شالو الحجاب

غير عن البنات اللي بتكون الها شهر متحجبه و بتصير تعلق عالمش متحجبات !!!
انو من وين لوين ...امبارح اللي تحجبتي

بنات خالي كلهم متنقبات...وما تعاملت مع بنات اخف دم من هيك ولا بذوقهم و طريقة تعالمهم
و بالعكس دينا حث على التبسم و التعامل الحسن مع الناس

امل


هههههه ...شفتي بالله عليكي :)
طماعه انا

هلأ انو انا مقصره ما بنكر, يعني اكيد كلنا لسا قدامنا كتير لنعمله و لكن طريقة الطرح و الموقف كله كان غلط
غير انو اي حد ما بقدر يحدد مين منيح ومين لأ دينيا قصدي غير رب العالمين لانه اعلم باللي بالصدور

اهلا وسهلا فيكي :)

A7mad

Allah ybarek fek..Thanks
I'm wearing Hijab - head scarf - since 1999 wal7amdolellah :)

 

امبارح قرأت البوست ولغاية الآن وانا افكر بالجمله اللي قالتها البنت قبل ما تصلي " لساّ....قدامنا كتير لسّا لنوصل"ـ
كيف قدرتي تتحكمي باعصابك على هالوقاحه المطلقه.
للأسف في منها كثير في العالم الاسلامي.ـ
وان دل على شيء يدل على عدم فهم الأغلبيه من المسلمين للمعنى الحقيقي للاسلام وهو طهارة القلب نحو اخوانا واخواتنا المسلمين.ـ
الجمله اللي حكتها البنت تدل على اغترارها بحالها. في كثير من علماء المسلمين نبهوا لهذا الأمر انه الانسان ممكن يغتر لكثرة صلاته وقراءته القرآن مثلا وهذا خطأ.ـ
واحد من الشباب العرب اللي ما بصلوا الله هداه وإجا على المسجد وبعدين بطل. بسأل عنه صاحبي ليش بطل يجي على المسجد حكالي انه لما اجا على المسجد الكل صار يعلق واللي يقله اخيرا واللي يقله كلمه من هون يعني احرجوه.ـ طبعا ممكن الواحد يقول انه هو ما بصلي للناس ولازم ما يهتم بس الناس عنا ما بترحم وانا بقول انه الناس كان الها ضلع ولو لحد ما انه بطل يجي على المسجد.ـ
معلش طولت بالحكي بس الموضوع هاذ مهم جدا. بعض الناس بيعتقدوا انهم لما يصلوا خمس صلوات صاروا من اولياء الله الصالحين بدون ما يعرفوا انه صلاتهم انحسبت او لأ.ـ شكرا على طرح الموضوع.ـ

 

A very important topic.. Unfortunately ppl like only to judge and interfer in ppl's life.
In my opinion , one should what he/she sees is right.

 

A very important topic.. Unfortunately ppl like only to judge and interfer in ppl's life.
In my opinion , one should what he/she sees is right.

 

مشان الله لا تذكريني ببنات المصلى!!
أنا محجبة من زمان يمكن ومن أنا عمري 14 سنة وبصلي وبصوم والحمدلله بعرف الأمور الأساسية عن ديني وزيادة شويى ورغم هيك كان لازم أتلقى بعض الملحوظات لما أروح عالمصلى: مثلا " مش هيك الواحد بيركع لازم ظهرك مستقيم" "ومش هيك الواحد بيكبر" وبتعملي درس توضيحي وإنه مين اللي طلب رأيك؟ وأنا أصلا بعمله أحسن منها!

وكان عندي صاحبه لبسها ممكن يعتبر (جريء) بس هي هيك متعودة في بيئتها وكنا أصحاب بشدة بس كان لازم أسمعلي كمن تعليق: وكيف بتصاحبيها هاي والمرء على دين خليله وهي أكيد سيئة وصايعة... مع إنه نفسيتها كانت أحسن وأنظف من نفسيات كتير حوالي، ببساطة كنت أحبها وبرتاح معها، وين المشكلة؟ وليش الموضوع أصلا عامللكم مشكلة؟ وانتو شو دخلكو؟

يمكن استرسلت شوي بس والله بفهم شعورك شو ما تكوني الا ما تتعرضي للانتقاد والتوجيه ودايما في حدا بيعلّم عليكي وبعرف أحسن منك وبينصحك..

الله يعين العالم على نفسياتها المريضة !!

 

لأ عادي تسأليش ، بعرف انها صعبة كثير و مرات أنا بقدرش أواجه الناس اللي زي هيك ، في مرة قعدت في البيت 3 أيام من وراء انتقادات و نظرات بس بعدين الواحد بفكر انه مشان الله شو دخلكم بالموضوع حيلتي وحر فيها ، لبسي وحر فيه
دائما الناس نتعبين حالهم بالناس الثانية كثير هيك ليش؟؟

 

Wafa'

للاسف "بعض" البنات بالخليج بس يطلعو بره البلد بشلحو الحجاب و مرات بشلحو كل شي :$

انا مع ان البنت تتحجب وهي مقتنعه تماما بالحجاب لانه بس بهاي الحاله بتضلها متمسكه فيه و طبعا مع تأكيدي ان الحجاب فرض ومش اختياري
الله يثبتنا و يهدينا يا رب

بالزبط ....كل واحد فينا اله تقييم للشخص اللي قدامه و لو بلشنا بالانتقاد ما بنخلص وما بنشوف و بنعترف بعيوبنا و بنحاول نصلحها

اللهم امين :)

 

Jaraad

مهي لانها بدت بالصلاه فورا هالشي اعطاني وقت لاهدى شوي يمكن غير اني ما كنت لسا باديه بالمرحله العدائيه الجد :)

المشكله انها كشكل خارجي ملتزمه جدا و لكن للاسف تصرفاتها كانت سيئه....مش
وقاحه لا سمح الله و لكن الكذب و النميمه
و برضه الانتقادات لتصرفات الناس و بس كنا نبدا نشتغل عالمشروع تصير تدعي و تسمّي و هي هلأ مكزبه على الدكتور المشرف هالمشروع

و ليش تاخدي معها المشرع!!!
لانه للاسف ما في حد ماخد مشروع غيرها و الدكتور حطنا مع بعض :)


دينا بنادي بحب الخير للجميع و بالتعامل الحسن و بمحبة اخوانا المسلمين اللي بنحبه لانفسنا
لكن للاسف مجموعه كبيره مش فاهمه هالشي
ومش فاهمين ان الدين لازم نطبقه بحياتنا و ينعكس على التصرفات و
طريقه التعامل مع الناس

كتير شفت بنات بعدو عن المصلّى ومنهم للاسف تأثر ايمانهم من ورا هالتصرفات, صح المسؤوليه عالشخص نفسه و تصرفاته بس برضه الجديد بدو حد يشدّ على ايده و يمشي معه مش يحسسه انه بعيد لسا و قدامه طريق طويل

شكرا عالتعليق ....و انا اللي حكيت كتير هون :)

 

Tareq

People like to spend their time correcting others life and forget to start with themselves

We have brains to distinguish between right and wrong ...can't deny that some times we r wrong in our choices but the way of advising is what going to effects

كيكي

الكل معاني معهم....
معاني من معاناة مش من معان.....علشان ما حد يزعل يعني
نغاشة اخر الليل معلش سامحيني :)
وتزكرت...اليوم اكلنا مناغيش عالفطور


14 :)
ما شاء الله...الله يثبتك يا رب و يثبتنا اجمعين

الصلاه و الصوم الحمد لله من زمان ملتزمه فيهم و صلاة الفجر التزمت علة صلاتها بوقتها من الصف العاشر :$
الحجاب ببالي بس كانت خطوه كبيره الي...
الحمد لله

طريقة التوجيه وبوقتها هي اللي بتأثر و للاسف الناس ما بتعرف توجّه

زكرتيني لمّا كانو يحكولي " سافره" يقشعر بدني و اصير بديش ادخل المصلى

الدين بحكي انّا نتقبل الناس و نتعامل معهم بالحسنى مش انّا ننفر منهم و انفّر الناس

ياما صار مناقشات بيني وبين دكتور الثقافه الاسلاميه على هاد الموضوع...كنت مش محجبه و يحكيلي انا اللي الظاره...انتي مش ملتزمه

دائما بحكي الحمد لله ان ربنا اللي بحاسبنا ومش البشر :)

خبر

اللي صار اني ما كنت اعرف شو ارد...بس هلأ كبرت و صرت عدائيه اكتر فصارو يحكو عني معقده :)

ما بنكر انه كثر النقد بأثر لكن بما انّا بنعرف الصح من الغلط المفروض ما نتأثر

لانهم فاضيين اشغال :)

اهلا و سهلا فيكي و ما يهمك :)

 

كتير حلو هاد البوست ويسبر:)
و يا الله شو معك حق،أديه الناس بتفكر إنه كونك مسلم يعني توجّه الانتقادات للناس طول الوقت
بستغرب منهم كيف بيزكّوا نفسهم عند الله هيك!و بعدين تقولي معهم سجلّ بمين حيدخل الجنة و مين حيدخل النار
لو يسيبوا الناس بحالها و يشتغلوا عحالهم بالأول بس شوي

 

الايمان في القلب والافعال وليس بلبس الحجاب
شكلك لبستي الحجاب لمصالح تريدي تحقيقها مثل الزواج وأشياء اخرى لا داعي ذكرها... ولا اعتقد اتك لبستيه عن قناعةوالدليل على ذلك انك استعنتي بصديقة لك لموجهة باقي اصدقائك في الجامعه وهذا كام فاضي
المسلم المؤمن حين يسير على سنة الله ورسوله لا يهمه رأي الناس في لبسه او مظهره
ولا داعي لتبرير لبسك للحجاب لأن هذا الموضوع حرية شخصية ولا يحق لأي مخلوق التدخل به
ربنا يساعدك على فعا الخير وأن تكوني مسلمة صالحة

 

Rain

حبيبتي انتي هلأ بالجامعه وعايشة بالزبط اللي بحكي عنه :$

في ناس بعطو لنفسهم حقوق غريبه و المشكله بفكرو حالهم انهم بعملو اشي منيح

لو كل واحد يشتغل على حاله كتير بتحسن و ضعنا

Sheeshany

الوضع ما بدو اكتر من هالسمايلي :)

Anonymous

رأيك و بحترمه اكيد
اي نعم ان في افتراضات و تحليل لنفسيتي و لتصرفاتي ...

الحجاب و فرض الحجاب ما راح اخوض فيه لان الخوض بالمسلمات بكون حكي كتير عالفاضي

و بالعاده بحكولنا لا تتحجبو لتتزوجو بالاول ...جديد موضوع الحجاب لهدف الزواج

اشي وحيد استوقفني... حاولت اعرف شو هي " اشياء اخرى لا داعي لذكرها" و مش
قادرة اتوصل لشي

امين يا رب
ربنا يقدرنا على فعل الخير و لنكون مسلمين صالحين

 

Anonymous,
You are just another one of those who mess up the image of Islam..you are an exact example of Whisper was talking about in the post!
How do you know the reason she wore Hijab for and how can you judge her like that?you don't know her!
and so what if she asked her friend for support?don't you need support when you go to a new restaurant or when you meet new people or...etc
wella you are perfect and strong and don't need anyone?
I say please don't talk about Islam and don't talk in the name of Islam..frankly I am not proud..not one bit, that you and I share the same religion
thank you

 

Rain

Thanks ya amar for the support :)

 

انا بس هلأ قرأت البوست, هلأ بعرف أني كتيير متأخرة بس هلأ شفتوا لما قرأت عنو بالبوست الجديد
المهم.. أننا معك أنو هدول الناس اللي زي هيك وبيحكموا على الناس من برا عنجد ما بينطاقو!!
وطبعا أنا كان إلي مواقف مع هيك ناس أيام الجامعة " جزء من بنات المصلى" اللي كانوا مستغربين أني بصلي!! بس لأني مو مجلببه!!

like the post :)

 

Hana

المهم انك نورتيني بالنهايه :)

شكله المعظم في عنده قصص مع هدول الناس

اسهل لبعض الناس انهم ينتقدو غيرهم و يراقبوهم من انهم يراقبو نفسهم