Things I Like To Whisper About

Would You Hear Me Whispering

جلسة صالونات





مع اني ما بعرف كيف امسك السشوار و اوازن بين الفرشايه و السشوار لاسشور لحد شعره لكن اليوم قدمت السيرة الذاتيه تبعتي لصاحبة الصالون.

بس السيرة الذاتيه مش لشغل, لأ لعريس :)

وانا بالصالون اليوم و كالعاده بالصالونات - يمكن بصالونات الستات اكتر- الحكي اللي بكون شغّال وكل اللي بالصالون بسمعوه بكون شيق جدا

كانت وحده قاعده و بتحكي لصاحبة الصالون اللي بتسشورلها شعرها عن اخوها اللي بدو يتزوج, واللي تبين بعدها ان عمره 26 سنه و انه بكفيه و حلّه يتزوج, مواصفات العروس كانت بدايه انهم بدهم اياها قد حالها, لانه بصراحه كتير طيب و هادي فلازمله وحده قد حالها, هيك اتفقو الام والاخت, وبما ان صاحبه الصالون بمر عليها "روس" كتير فبركي وفقت راسين بالحلال

الاخت بتحكي, هو ما بشرب عفكرة, اخوي الكبير بصراحه بشرب و اله عالسهرات و هالقصص, لكن هلأ ربنا هداه, صحيح مرته مش محجبه بس هلأ هدي كتير و بطل تخبيص وصار يصلي الفجر بالمسجد, بس "مؤيد" - العريس- كتير هادي, و بصراحه ما اله تجارب, يعني تخيلي ان البنت اللي بدو يتزوجها حتكون اول تجربه اله - عأساس الموضوع صار غلط كبير و نقطه ضد الشب بهالايام - وبعدين هو ما بدو اياها حلوه, المهم تكون مقبوله و بنت عالم وناس, اهم شي تكون بنت عيله و بنت عالم وناس, والفلوس ما يهمك عندو محل و ابوي بدو يتكفل بكل شي, و هو حتى لو كبيرة مش مشكله 23 او 24 مش مشكله, و حتى لو متعلمه ما عندو مشكله, سألتها الكوافيره هو شو مخلص, حكيتلها يعني اذا هي ما عندها مانع تتزوج واحد مش دارس ما عنده مشكله تكون متعلمه, و بعدين زي ما حكيتلك موضوع الفلوس انسيه, معه و معه كتير - بمعنى الفلوس بتشتري كل شي و بتعمل العجب - و بعدين ابوي بدو يجبله شقه يعني لا اجار ولا اشي, زي ما حكيتلك هو بسيط كتير ..مسكين..مسكين, و انا وامي بدنا نزوجه قبل ما يصير لابوي اشي, لانه بصراحه لا انا ولا اخواني حنفكر نأمنله اللي ابوي حيأمنله اياه, بتعرفي الدنيا كل واحد بصير بدو يفكر بحاله بس يصير معه فلوس, بس برضه هو عندو محل و معه فلوس كتير فلا تحملي هم.

خلصت سشوار و كل اللي بالمحل سمعو قصتها, و طلعت على وعد من صاحبة الصالون تشوفلها عروس قد حالها, انا بدت تسشورلي شعري وحده تانيه متعوده انها تعملي اياه, اجت صاحبة الصالون تساعدها, حكتلها الكوافيره انها قربت تخلص, لكن صاحبة الصالون اصرّت, و بدا الحوار, ما شاء الله عليكي,انتي متزوجه او خاطبه؟؟؟ طيب في عريس هلأ بحياتك؟؟؟ وين ساكنه, شو دراسه, وين بتشتغلي, و كم اخ و كم اخت, وانا بجاوبها و على وجهي ابتسامه عريضه, لاني بستنى سؤال اللي حصدمها فيه , بتحكيلي هيك صار عندي السيرة الذاتيه كامله بس ضل شي واحد, حكيتلها العمر ويلا اني قد حالي ويلا لأ :) ضحكت ضحكه احراج و بتسألني كم عمرك, حكيتلها 33 اختفت الضحكه و بصوت شبه صراخ," ايش!!! قولي و غيري " , هالكلمه سمعتها كتير عفكره ودايما نفس الرد " لو قلت و غيرت حيضل 33 ما في مجال :)"

طبعا بدت بما شاء الله عليكي و انت حلوه و ليش ما في عرسان و الشباب انعمو و ..... و هالحكي
بس انا هلأ صرت متطمنه....موزعه السيرة الذاتيه عالشركات علشان الشغل و عالصالونات علشان العرسان :)




ملاحظه ع الهامش

اكبر غلط انك ما تسمعي كلام مميتك و تشربي قهوه بعد الساعه 11 المسا لانه ما حتعرفي تنامي للفجر زي ما صار معي هلأ...عرأي اخوي " الام دائما تعرف"
يلا خليني اصلي و انام, تصبحو على خير :)

اه صحيح...اللي بتحب او بحب احط السيرة الذاتيه تاعته عند صاحبة الصالون يبعتلي اهم المعلومات ومن عيوني بوصلها :)


32 التعليقات :

صباح الخير ويسبر
بوست كتير حلو.. ما إلي تعليق لأنو بوست نسائي تماما :)
بس رجاء..يا ريت تستخدمي علامات الاقتباس "" لما تكتبي على لسان حدا تاني و خصوصا لما يكون الحكي زي فقرة

الاخت بتحكي, هو ما بشرب عفكرة, اخوي الكبير بصراحه...

أنا فكرت إنو "عفكرة" هي فاصل منك لتعلقي إنتي و انصدمت.. بعدين رجعت و فهمت القصة

:)
بعدين ليش زعلانة من القهوة.. ما عندك دوام :)
يلا انتي نامي و احنا الغلابا كل واحد لدوامه

 

وين عنوانها,, بدي احط عندها سيرتي الذاتية إحتياطاً


sc:

 

ليش حاس من حكي الأخت انه الشغلة تلبيس بتلبيس
يعني اصرت اكثر من مرة انه مسكين
والمصاري مش مشكلة
والعمر مش مشكلة نسبيا
والشقة موجودة
ومسكين

يعني مش عارف , في اشي غلط بكلام الأخت

الله يجيب اللي فيه الخير للجميع يا رب

 

حكي الستات ما بيخلص .. بس أحلى حكي

تحياتي لك

 

أنا بدي مؤيد
ما دخلني!
محجوز لإلي
:p

تعرفي ويسبر،،، هو أنا صحيح صغير و غرير في عالم السيرة الذاتية و الموارد البشرية بس جد أول مرة بسمع عن هالطريقة
لوووول

إشي تمام و الله

أفتحلي صالون أحسنلي شكلو

*هل من شريك مضارب*
:]]]

 

ههههههه يا حرام يعني انا سهرتك امبارح وضليتي للفجر :((((
بس والله انا انبسطت بدردشتنا
وسبوره
الصالونات النسائيه حدثي ولا حرج
"نسووووووووووان "
انا بروحش الا بالمناسبات السعيده
وعلى عيني بكون

 

أحلى اشي القهوةة بعد الساعة 11 :)

بس على فكرة انا عجبتني انو الاخت بتحكي "اخوي ما بشرب" تخيلي عاد لو يحكو هالحكي قدام حد ، طيب مين جاب سيرت الشرب ؟!! و الله عن جد نكته

شغلة تانية ، شو بالنسبة انو هو ما عندو مشكلة يوخذ وحده متعلمه ؟!! على اساس يعني هو بشروط (بكسر الباء وفتح الشين و تشديدها) شهادات

 

صالونات الشباب على العكس
180 درجة الاختلاف
ما بيكون في حكي الكل ساكت
وا بقراء جريدة او بتفرجوا على الجزيرة الرياضية

حتى في مثل بحكي مالكو ساكتين زي الي قاعدين عند الحلاق

 

أهلييين ويسبر .. يعني بغيب كم يوم بلاقي البوستات ع راسي وكتروو ماشاء الله (: (: بس بتعرفي الجامعة وقرفها

هلاْ أنا بصراحة بس روح ع الصالون بحاول أتجنب الموجودات .. مش تكبر بس مابحب هيك شغلات لأنو و يا سبحان الله بتحسي حالك عند خطابة مش صالون !!

للأسف صارت هالشغلة بتستحوذ ع تفكير الناس .... ليكي يعني أنت كيف استحملتي حرارة السشوار وهالأستجواب في آن واحد ههههه لأنو أنا بس حدا يستجوبني هيك بتولّع فيني الحرارة لقمة راسي :D

 

بما انك نايمه الفجر....يعني هلا عندك ,,,صباحوووو,صباح الفل يا بطه

انا بقول خلي دائماً معك بالشنته نسخ احتياط من السيره الذاتيه عشان الزيارات والاعراس والمشاوير الطارئه :)

 

hehe jd sar 3endy fdool ashoof sheklek!

t7sheesh ta3oon el salonat ana sha5seiian ba23od w batsmma3 3al essas w bad7ak
bs ino mshroo3 5otbeh fel saloon lol msh m32ool!
w b3dain sha'3let el CV ya waily jd 7ashashet l2eno el mwqef cliche b 6reeqa msh 6be3eieh!!

 

بصراحة مش شايف انو الموضوع غلط
يعني ليش لأ خلي البنات يتجوزو
يعني اعتبريها واسطة خير

 

عجبتني هاي عندك السيرة الذاتيه موزعتيها على الشغل للوظيفه وع الصالونات للعرسان طيب ويسبر والبلوج لشو!!!
وعجبتني قولي وغيري كانه العمر مفاصله والله يعطيكي العمر كله والفرح كله

 

جعفر

يا صباح ومساء الخير :)

اهااا معك حق.... مش غلطه, الله لا يبلينا يا رب و يحماهم لاخواني :$

هههههههه بموضوع الدوام معك حق
جد الحياة بتجنن بالعطله :)
نمت لل 12 اليوم ....جميلة الحياة كتير :)

الله يعطيكم العافيه يا رب ....قبل اسبوع كنت من اللي بصحو بكير :)

UmmOmar

O_o احتياط.....
و نازله غالي و غوالي !!
ما في.....
احسن من الغوالي اللي عندك ما حتلاقي صدقيني....السوق شاحح هالايام :)

 

Abu Zaina

شكله هيك شي, في معنى مش فاهمته لكمله "مسكين" اللي عادتها 30 مرّه

و في شغلة تانيه هلأ تذكرتها
الاخت بتحكي , انه حيجيبلها شبكه محترمه و مين بتزوج هالايام و مين معو يشتركي شبكه بهالايام , وهو جاهز لكل شي...

يعني فلوس...فلوس...فلوس...وما تطلعو على اي شي تاني

امين يا رب....ويبعتله وحده بتستاهله و بيستاهلها ليعرفو يعيشو مع بعض

المجهول

هههههههه معك حق....ما بخلص ابدا
مش دايما احلى حكي, لكن اجمالا مسلّي :)

اهلا و سهلا فيك

 

Haitham

هههههه ولا يهمك...بعطيهم السيرة الذاتيه ....من هون لتسأل عنه بتكون هيّوم صارت بال 23 :)

علشان تعرف ان الانسان بعيش و بضلّه يتعلم يا " غرير" ...عجبتني الكلمه فلازم استخدمها :)

فكرة برضه بلالك من هالتدريس ...و كل راسين بتحلقلهم و بتوفقهم الك الحلاوه....مكسب ذهب

انا بدخل شريكه بالمشروع, بقدرتي على اقناع البنات بالعرسان :)

ميسم

لا بالعكس يا قمر...كتير انبسطت بالحكي معك امبارح, انا اللي اخرتك يمكن, كل ما نحكي تصبحي على خير افتح موضوع جديد :)

انا ما بحب هالكلمه "نسوان" بس بصراحه زابطه عليهم تماما :)

انا رحت لانه كان في عنّا حفلة لبنت صاحبتنا اللي خلصت توجيهي و انقبلت بالجامعه :)

 

بالنسبة للتجارب بعترف بكل فخر انه ما عندي تجارب مع البنات ، أنا آسف لكل الشباب بس هيك تفكيري
و لا تزعلي 33 عمر مناسب للزواج :)
و بحساب العريس طيب و مسكين و مش مهم العمر عنده كثير
مشكلة المجتمع بدخل بكل اشي عمر الزواج المناسب ، وامتى لازم يجبو ولاد و نوع الدراسةو البيت لو بصحلهم يدخلو بنوع الكنب ما قصروا

 

Dr.Mohammed

مشكله تكون نعسان وتعبان و عيونك مفنجرين ولا الهم دخل :)
بالزبط.....شو جاب السيره عبالها و ليش لتحكي عن اخوها التاني!!

الله يهدي الجميع
مشكله بس يصير هاد مقياسنا للشخص, انه ما بشرب ممتاااز خلص موافقين :)

هلأ انا بعرف ان الشهادات ما بتقيم بني ادم بس هي حسّت ان هاي صفة ممكن تعيب اخوها و بما انها بتصوره مثالي فحتى بهاي بدها تطلعه مثالي

Shaheen

جد!!
عاد ببينو بالتلفزيون ان الحلاق ما بسكت و من قصه لقصه بضل :)

لاااااا عنّا, سشوارات و اغاني و احاديث
ما بتطلع الوحده الا دينيها مسكره و راسها بوجعها من كتر الحكي و الشعتله ما بين غسيل الشعر و الشد بالسشوار :)

مغامره....جد مغامره :)

 

Bullet

الله يعطيكي العافيه يا قمر....يلا بتمشي و بكره بتصيري تشتاقي لهالايام,فأنبسطي قد ما بتقدري :)

انا بالعاده ما بحكي كتير , وبمسك مجلّه و بضل اقرأ فيها ....لكن من صوت السشوار يمكن بصيرو الستات يصرخو و همه يحكو, غير ان الاخت اسمها نفس اسمي, فكل ما حكت معها صاحبه الصالون افكرها بتحكي معي :) فضليت عالخط

الحمد لله الدنيا امبارح كانت براد فخفيف كان الوضع...غير اني كنت مستمتعه بالحديث :)
شغله جديده علي بصراحه

Nysan

يا صباح ومسا الفل على احلى نيسانه مدونين

هيك المفروض اعمل.... مهو الواحد لازم يشتغل على نفسه

بس فكرك كل مرّه بتنطلب السيرة الذاتيه المفروض اضيفها على الخبرات :$
عأساس اني مطلوبه يعني :)

 

Rain

اول شي...ايش هالحلاوه هاي يا قمر :)
ما شاء الله عليكي

تاني شي....هي صحبه الصالون الله يجبر بخاطرها حبّت ترفع من معنوياتي, انو اي نعم ببين اصغر من عمري بس مش بهالفرق الشاسع :)

لكن برضه هاد لا يمنع انّا لازم نعمل جمعه نتلاقى فيها كلنا هالمره

شفتي... انا بكتب علشان تستفيدو و دائما تحملو معكم ال cv's
ما بتعرفي شو بتواجهي

بنعيش و بنشوف...شو بدنا نعمل :)

W7l

موضوع صاحبة الصالون ممكن مش غلط و ما فيها اشي
وما بنكر ان في بنات الصالون هو المكان الوحيد اللي بروحوه و باخدو راحتهم فيه

انا مشكلتي باخت العريس :)
طريقة الحكي و الاعلان و نوعيه الحكي هي اللي كان غريب اكتر منه مزعج

اهلا و سهلا فيك بمدونتي و بعالم التدوين
ومبروك المدونه الجديده
و شكرا عالمتابعه :)

 

Sozan

بدنا نمشي امورنا

الكل بحكيلي لو انك تتشطري شوي كان زمان تزوجتي....مش فاهمه شو يعني تتشطري !! يمكن قصدهم توزيع السيرة الذاتيه وانا مش فاهمه

البلوج لحتى اخبركم شو بصير معي و انوركم بأخر الصيحات الماشية بالبلد :)

لو تشوفي كم مرّه انحكتلي .... مش حيتغير صدقوني مش حيتغير

تسلمي يا قمر...و ايامك كلها فرح و سعاده يا رب

Anonymous

المفروض انك تفتخر بهيك شي و بالعكس انا بشد على ايدك, و متأكده ان ربنا حيرزقك زوجه صالحه بتستاهلك
الموضوع انه صارت تنحكى هالنقطه عأساس انها مشكله, الاخت حكتها و هي خجلانه بقلّه تجارب اخوها...

الله يجبر خاطرك....هو تعدى المناسب بشوي ... لكن اكيد هالشي مش مشكله بس نكون متأكدين ان هالموضوع بأيد رب العالمين و مش لازم نشغل بالنا بالتفكير فيه :)

ههههههههههههه....معك حق 100% و المشكله بشبابنا - شباب و بنات - بردو على كل التدخلات هاي :)

 

عن جد بتحكي؟
والله مسخرة! يعني هاي مقاييس الشب اللقطة؟ فلوس ومحل والحمدالله ما بشرب وبدون تجارب! والله كثر الله خيره ولأ كمان بيقدم تنازلات وما عنده مانع تكون متعلمة؟ لا إله إلا الله! والله كفرت اللي بترفض هيك عريس.
عجايب!!!

 

كيكي

هاد الاشي اللي خلاني اكتب عن الموضوع
المقاييس اختلفت و جد بحملو الناس جميله :$

هلأ هي معجبة باخوها التاني اللي ربنا هداه.... اللي بطل يخبص هلأ

و انه هاد مش زيو فبدنا وحده تكون قد حالها ليعرف يعيش

 

جد تحفه!!

بس ليش كنت متخيله موضوع السن هاد والصدمة التي تلتها:)

ذكرتيني بحالي لا بعرف اسشور ولا ما يحزنون
بس مؤخرا اشتريت سشوار وسترايتر
عشان اوفر ع حالي وجع الراس والدوشه والأسئله الفارطه تاعت الصالونات

وبالنسبه للعريّس
واضح انو بدهم يدبسوه في جوازه والسلام

وبالنسبه للشرب
الظاهر انو الشرب في عمان منتشر كتير وانا مش عارفه:)))

 

بعض من حلاوتكم
:P

عن جد فكرة حلوة والله،لازم ان شاء الله ليوم نلتقي
بس حاولوا تحضروا حالكم نفسيا قبل هيك لأنو أنا نوعا ما عالخفيف عبارة عن لوح لووول

 

مياسي

الله يجبر بخاطرك يا رب...هي بالغت شويتين برضه :)

انا بعرف اسشور لحالي بس لحد تاني ...انسي
ما بعرف اسيطر بالمره

احسن بالبيت بس بالمناسبات بدك اتقان مش تمشاية حال :)


الشرب هاد صتير عجبه بصراحه...بحكي لاخوي بحكيلي هلأ صاير موضه و الشباب بتفاخرو في هالموضوع

الله يهديهم

Rain

ان شاء الله نرتبها و تزبط
المره الماضيه كتير انبسطنا :)

ازكى لوح بالدنيا ...بعيد عنك يا قمر :)

 

على أساس الشب لقطة والناس حتقتل حالها عليه. ما شاء الله مو متعلم ومعاه مصاري وما بشرب. أكيد إنت تمنيت لو كنت أصغر بكم سنة حتى تلقطيه!!الله يصبرك على هالعالم.

 

Rana

اهلا و سهلا بعروستنا الحلوه

شفتي بالله عليكي....طار من ايدي الشب
جد كان لقطه وما بتعوض

الله يعينهم على حالهم...الحمد لله اني بعيده عنهم :)

 

هاد اكتر شي بكرهه بالصالونات

لأنه لازم اللي بتعملك شي تعرف كل شي عنك و ازا فكرتي انو تحسسيها الموضوع خاص و مش شغلك اعرفي انك حتطلعي شيتا...


ويسبره
بحب احكيلك انه التحقيق بصير مو بس بحالات تجميع الروس بالحلال يعني انا بروح بحكي متزوجه
من متى ؟ لسه ما عندك ولاد؟
كيف حماتك؟ ساكنه عندها؟
و اخر سؤال و بعد ما عرفت شويه تفاصيل بالديتلز بتحكيلي اللي وصلك قبل شوي جوزك ؟؟
انووو ليه تعبتي حالك و خليتيه اخر سؤال...

:)

عادي كووووول

 

Euphoria

صح....اي مجتمع او اي مكان بجتمعو فيه ستات لازم يقلب الى لقاء تلفزيوني لادق التفاصيل

و بالعاده سؤال الاكشن هاد بكون بأخر الحلقه...قصدي الجلسه :)

وانا ما بحب ازعلهم لانه فعلا بتروح فلوس السشوار عالفاضي :(

 

I blv this is gonna be my very last comment for a long while.

I don`t know why I stumbled upon this one exactly, maybe bcoz 10-10-2010 , maybe bcoz of Mo2ayyad hehe, bcoz of the (project) we agreed to start but still looking for a (location) I guess to kick start our en6rapronerial initiative ,, don`t know .. I just picked it o 5alas.

أستودعك الله

كوني دومًا بخير
و كما عهدناك؛ متألقة
بسيطة و لكن خارج النمط

سلام.
:دموع و كزا مزا:

O_e_

 

الله يسامحك يا هيثم على هالعملة :(
:دموع و كزا و مزا: حصلت بس بحب احطك بالصورة

ان شاء الله ربنا بوفقك و بترتب امورك و بترجع بتنورنا
العالم التدويني بدونك راح يكون ناقصه كتير كتيييييييييير
يا خوفي تلاقي العدوى انتشرت و ترجع تلاقينا مختفيين كلنا
ترى الفكره تطرق الابواب و عملتك راح تخلينا نتشجع