Things I Like To Whisper About

Would You Hear Me Whispering

مش حياة زوجيه






قبل فترة كنّا بنحكي انا و صاحباتي و كل وحده بتشكي من زوجها , قصصهم بصراحه بتكئب, بالذات قصص صاحباتي اللي ساكنين عند او قريب من اهل الزوج, ما بعرف شو هالقصه اللي مش راضيه تنتهي, موضوع الحماه, قصص جد مزعجه و بتخليني احمد ربي اني مش متزوجه, وجع راس و هم و نكد, لكن بعد ما سمعت القصص و طريقة التفكير حسيت ان طبيعي يصير هيك معهم.

من ضمن الحكي بحكيلهم ان الحياه الزوجيه المفروض تنبنى على مبدأ ان كل واحد بده يعمل جهده ليرضي الطرف التاني و ليثبتله محبته , نطت وحده منهم بتحكيلي " غلطانه" وقعدو يعددولي اسس الزواج من اول يوم, و من وجهة نظرهم ان الزلمه من اول يوم بفكر كيف بدي اجيب مناخيرها الارض و كيف بدي افرجيها مين الزلمه و الست بتفكر كيف بدها تخلي زوجها يمشي عالعجين ملخبطوش و انها مش زي باقي البنات و كرامتها ما بتسمح لحد يدوس عليها - هاد تقريبا حرفيا للي حكوه - انا بصراحه انصدمت, شو هالحياه هاي اذا!!! و طبيعي جدا توصلو للي وصلتوله اليوم.

انا ما بدي احكي مثاليات, بدي احكي عن واقع قدامي, عن النماذج اللي قدامي وهي علاقه بابا وماما و علاقة اخواني مع زوجاتهم, انا ما بنكر ان اي حياه بين زوجين فيها ايام هيك و ايام هيك, فيها ايام بكونو كتير متفاهمين و ايام تقريبا مش مستحملين كلمه للتاني, ولكن ما شاء الله اجمالا كتييييييييييير حلوه حياتهم, بابا متقاعد من 8 سنين و بعد التقاعد حسيت بابا وماما قربو من بعض اكتر, ماما لمّا تزوجت اختارت تيتا - والده بابا الله يرحمها - انها تسكن عند بابا مع انه مش الكبير, ولهلأ عمري ما سمعت عن اي مشكله من هالنوع حصلت بينهم, لان بابا كان موضح علاقته بوالدته و بزوجته من اول يوم, خواني نفس الشي بيجو بالعطل عنا او احنا بنروح هناك, زوجات خواني ما في منهم و حتى انهم بشكو الي و احيانا لماما و طبعا تلقائي انا وماما بنوقف بصفهم :) , صاحباتي بحكولي ان ماما حماة من نوع خاص و يا ريتهم زوجات خواني يكونو مقدرينها, وانا متأكده ان مميتي اكيد مميزه لكن بالنسبة لوضوع الحماه فأكيد في كتير بتعاملو مع زوجات اولادهم كبنات الهم, الموضوع بده الطرفين يكونو عاقلين, البنت بدها تعتبر والده زوجها ام الها و الحماة بدها تعتبر زوجة ابنها بنت الها, طبعا لمّا حكيت هالجمله لصاحباتي فقعو ضحك, طيب اذا انتي هاد موقفك و اكيد هاد اللي موصلتيه لام زوجك فأكيد هي التانيه حتتعامل معك بنفس الطريقه, انا ما بنكر ان في امهات بخربو بيوت اولادهم بدون سبب و في ستات ببعدو زواجهم عن اهلهم.


علاقه الرجل بأمه شي و علاقته بزوجته شي, ومحبته الهم تختلف تماما ولا تتقاطع ابدا مع بعضها, ما في مجال للمقارنه لهيك ما في مجال للغيره اللي بتصير, وانا بحمل الزوج كامل المسؤليه, المفروض ما يكون طرف متفرج و في اساسيات بالحياه المفروض يكون الو رأي فيها لتنهي هالمواقف الغريبه, المفروض يوازن بعواطفه و يعطي كل طرف حقّه منها, غير اني مقتنعه تماما ان اذا الزوج ما كان اله خير بأهله فأكيد ما حيكون اله خير بأي حد تاني.



ملاحظه ع الهامش
الصورة كيكه عيد زواج بابا وماما ...5\10 صادف عيد زواجهم ال 38 ما شاء الله ...العمر كله يا رب :)

21 التعليقات :

الموضوع حلو ومهم بس المشكلة انو أغلب البنات وزي ما حكيتي من قصص حولي بفوتوا على عائلة الزوج زي كأنهم فايتين حرب أو أثبات ذات وانوا هي لازم تكون غير شكل طبعا غير عن التمثيل اللي بيصير بس مشان يحسسوا العريس وأهلو أنهم كلاس ومافي مثلهم
يعني انا قصدي انو لو البنات يصيروا متفاهمين اكتر بتنحل كتير قصص

 

عزيزتي ويسبر:)
اي علاقه في الدنيا مبنيه على الاخذ والعطاء زي ما بتعطي بتوخذي تطلع عنا بعض الشواذاللي بتخل في الميزان واللي بتصير يا اما تاخذ من دون توقف ومن غير عطاء يا اما تعطي ومن دون اخذ وهون بيصير الخلل واللي بيؤدي للحالات اللي بتشوفيها
المشكله في الزواج الشرقي التقليدي انه مبني على علاقه السيد يعني لما بتزوجوا مين بدوا يكون الرجال او الآمر والناهي لهيك بتصير المعارك بين الام والكنه
وانا باعتبر الحل الامثل انه الابن ما يسكن مع امه وابوه وان حب يسكن بنفس العماره بس مش بنفس البيت والعلاقه الزوجيه في المجتمع الشرقي علاقيه دكتاتوريه من قبل الطرفين لكن العاقل اللي بمسك الحبل من النص بس من وين يجي العقل

 

والدي ووالدتي كمان احتفلوا بعيد زواجهم ال 38 مؤخرا:)ـ
الله يديم المحبه بين جميع الأزواج. أهم شيء انه الأزواج لازم ما تنبني علاقتهم على العناد يعني كل واحد عنده رأي ومش مستعد يغيره.ـ

 

يسلملس العقل و الرزانه
تماما متل ما حكيتي .. الموضوع موضوع تفاهم من اول لحظة و اتفاق ... ما بعرف ليه في ناس بتتفنن في صنع النكد سواء حماي او مرت ابن و بالنهاية كل شخص بطريقة تفكيره بيرسم مسار حياته اما السعادة او المشاكل و النكد

 

أوافقك 100% و الله يخليلك الماما و البابا و إخوانك و هائلاتهم ء يخليكي إلهم و يظلوا هيك متفاهمين طول العمر

 

لأ أحلى اشي لما أقعد مع متزوجات و يقعدوا ينصحوني مشان لما أخطب و أتزوج
ورجيه العين الحمرا
اوعك تتنازلي أو تسترخصي بحالك
اوعي تمدي ايدك عاشي عند إمو
اوعك تحسسيه انك بتشتاقيله أو بتغاري عليه
إوعك تحاولي تساعديه ماديا ولا بياخد عليكي

والله ما عم أبالغ..و هاي بس نقطة في بحر و هاد كلّه غي:اوعك تاخدي أردني الأردني بيسيطرا..و اوعك فلسطيني هدول بخلا

انسي الموضوع!لأ و الناس بتتسائل ليش احنا مش مبسوطين؟ليش الطلاق عم يزيد؟ليش كل يوم و التاني بنسمع عن واحد قاتل مرتو ولا ولاده؟ليش ربنا مش مبارك بفلوسنا؟؟

بس ما حد بده يتنازل أو يتغير الكل بدو بس يثبت مدى حقارته في هالدنيا

ما بقدر أقلك أديه عندي احباط و خوف من الزواج
احيانا حتى بقول أضل عند أهلي مبسوطة و معزوزة ولا أصير تحت رحمة غرب

 

بدون ما اطول بالحكي.. إذا كان واحد من الزوجين ماخد الموضوع للسيطرة فقط.. ساعتها فشلت الحياة

الكيكة واضح انها زاكية
تحياتي

 

الحياة الزوجية تعتبر نقطة تحول بين الحياة السابقة العزوبية وبين المسؤولية من كلا الطرفين

وفي كلا الأحوال تعتبر خطوة مهمة لابد من المرور بها

 

Hana

للاسف هاد اكبر خطأ بعملوه هالبنات
ليش حرب داخلين!!

و موضوع التمثيل للشب و البنت والله اعلم بدخل بقضية الخداع,خصوصا بالزواج

هاد كذب مش تجمّل

البنات والشباب بدهم دروس ليفهمو معنى الزواج الصحيح

Sozan

المشكله نفسي اعرف مين اللي مقنع شبابنا بهالمبدأ....ان الرجل سي السيد لازم يكون
مين حط هالقاعده؟؟

زي ما حكيتي هي اللخذ و العطاء....حقوق و واجبات المفروض تنعمل مع بعض والا بصير في خلل

لكن للاسف في بعض الرجال و الستات بنسو واجباتهم و بس بركزو عالحقوق

بعد سماع القصص ثبتلي انه كل واحد منهم يسكن بجهه, اهل الزوج و الزوجين واهل الزوجه...هيك احسن و خليهم يشتاقو لبعض بدل ما يقطعو ببعض :$

في عاقلين....بس بدنا ندور منيح :)

 

Jaraad

ما شاء الله...العمر كله يا رب يقضوه سوا و ربنا يدبم المحبه و الوفاق بينهم على طول :)

امين يا رب العالمين

كل شخص بدو يجي من بيئه ومن خلفيه و افكار مختلفه فلازم يلاقو نقطه لتتلاقى مع بعضها

Marwa joe

ما بعرف ليش بس قرأت " يسلملي العقل و الرزانه
"
تزكرت جمله بكرروها بالمجلات

انا فتاه اقدّس الحياة الزوجيه
هههههههههههههههههههههه
بعد قراءة الموضوع حسيت ان هالجمله ناقصه :$
مع انو ما كان قصدي الاتجاه هاد بالمره :)

ايوووووووه...تفنن بصنع النكد, بعد ما تفكري بأصل المشكله بتلاقي انه ما في مشكله عظيمه وما الها حل, بس في ستات و رجال, وبالغالب ستات بعزو النكد زي عينيهم :)

 

Saleh

تسلم يا رب
ويخليلك اهلك وكل احبابك ....اللهم امين

و ما بعرف شو وضعك الاجتماعي بس ان شاء الله ربنا يرزقك/ رازقك زوجه صالحه و تعيشو حياة سعيده و مبنيه عالتفاهم :)

ملاحظه ع الهامش
في عليك ,واجب

بس للتذكير يعني :)

Rain


اه مهي حرب ومعارك و تكتيك و خطط :$

يا الله شو بكره هالقعدات
و بعدين بعد كل هاد بحكولك....انتي ليش مش متزوجه لهلأ

كتر الزن بخلي البنت او الشب ينسو عقلهم و يتصرفو بطريقه غريبه

لااا لا احباط ولا شي....في ناس عاقلين حوالينا بس احنا وهمه مش شايفين بعض :)

 

جعفر حجير

مش زواج لانه....معركه و حرب هاي

الكيكه كتيييييييييير زاكيه ...لدرجة اني كنت صايمه يومها بديت بالتمر و فورا هجوم عالكيكه :)

اهلا وسهلا جعفر

المجهول

الحياة الزوجيه مبنيه بكل تفاصيلها على شخصين و اذا شخص طغى بتصرفاته على حساب الثاني اختل توازن الحياة

 

Homework done. Lets see what mark we will get.

 

loooool 7ilweh hay mo shaifeen ba3ad!!! XD

 

Saleh

FULL mark :D

Excellent plus 3 stars kaman :)

Rain

LOOL

maho kull elly shayfenhom 3ayyenat mesh wala bod bsara7a :$

 

مساء الخير يا بطه
ان شاء الله تكوني انبسطتي عالشتوه؟ هيني عم اكتبلك هالتعليق والدنيا كابسه وانا مروئه عالاخر ...قدامي كاسة شاي بنعنع وناقصها قطعه من الكيكه اللي فوق ...يا رب يخليهم لبعض ويخليهم لكم وعقبال اليوبيل الذهبي ان شاء الله

خليني مروئه وما بدي ادخل بتفصيلات كيف وليش بينجح الزواج او بيفشل
الشي الوحيد اللي نفسي اقوله ان الزواج هو سلسله طويله ومعقده ومتتابعه من التفاعلات والاحتكاكات اليوميه ولا ينفع معها ما تربيتي عليه ولا اللي شفتيه من اللي حواليكي ولا نصائح فلانه ولا اقتراحات علانه لكن ما ينفع اكيد هو الكثير من العقل والحكمه في مواجهة الكثير من المواقف . الكثير من العقل و الحكمه
وهذا سر نجاح والديكِ الله يحفظهم ...عاقلين كتير وفي حكمه وتدبير متزن للامور

عقبالك يا بطه

 

مساء الخير يا بطه
ان شاء الله تكوني انبسطتي عالشتوه؟ هيني عم اكتبلك هالتعليق والدنيا كابسه وانا مروئه عالاخر ...قدامي كاسة شاي بنعنع وناقصها قطعه من الكيكه اللي فوق ...يا رب يخليهم لبعض ويخليهم لكم وعقبال اليوبيل الذهبي ان شاء الله

خليني مروئه وما بدي ادخل بتفصيلات كيف وليش بينجح الزواج او بيفشل
الشي الوحيد اللي نفسي اقوله ان الزواج هو سلسله طويله ومعقده ومتتابعه من التفاعلات والاحتكاكات اليوميه ولا ينفع معها ما تربيتي عليه ولا اللي شفتيه من اللي حواليكي ولا نصائح فلانه ولا اقتراحات علانه لكن ما ينفع اكيد هو الكثير من العقل والحكمه في مواجهة الكثير من المواقف . الكثير من العقل و الحكمه
وهذا سر نجاح والديكِ الله يحفظهم ...عاقلين كتير وفي حكمه وتدبير متزن للامور

عقبالك يا بطه

 

يا ويسبر كل العلاقات الانسانية تشوهت و صارت حرب ما وقفت على الازواج
و ان شاء الله عقبال الذكرى 100 للبابا و الماما

 

Nissan

يا مسا الورد و الفل و الياسمين :)

بتجنن و صورتها فيديو و صور و بدي انزّلهم فورا كنت بس طلعت مصورة الفيديو جنّابي :$

شتا مع جو ربيعي اشي بجنن, كان نفسي اطلع امشي تحت الشتا بس ما حد كان بالبيت :( فما طلعت
صحه صحه عكاسة الشاي بالنعنع :)

تسلمي يا رب...اليوم صحيت لقيتهم مش موجودين بالبيت - من غير شر- طلعو رايحي يجيبو دبل جديده :)

الزواج تجربه جديده بالحياة و مواقف ما بتوقع الواحد يواجهها ولا ممكن
يتحضر الها و زي ما حكيتها بدها عقل وحكمه.....
وعلى رأي سوزان...من وين يجي العقل :)

Jafra

على رأيك :(

امين يا رب...تسلمي يا قمر و عقبال ما نفرح فيكي يا رب :)

 

يوم زواج سعيد :)
ما شاء الله 38 سنة

ما ظل حكي على التعليقات :]

بس أنا متأكد إني حماية ممتازة :P

 

تسلم يا رب :)
عقبالك انت و ام هيوم لتقضو احلى السنوات مع بعض ان شاء الله :)

لنشوف شو حيصير بعريس هيّوم ... في رجال حموات برضه :)

الله يعينه من هلأ بحكيها :)