Things I Like To Whisper About

Would You Hear Me Whispering

بس بالافلام...



ليش دايما بالافلام و المسلسلات البنت بس تدايق من شي و تزعل, بتدخل غرفتها و بتسكر الباب و بتتركى عالباب و بعدين ايهيء ايهيء و بترمي حالها عالتخت !!!

يعني انا البنت الوحيده وانو يعني عايشة الدور بموضوع الدلال عالاخر, و الي غرفتي الخاصه و عمري بحياتي ما عملت عالمنظر, ارمي حالي عالتخت !!! ليش خير؟؟؟؟ جد لو بعملها كان كرهت حالي

اشي تاني, غرفتي عفكره مش معبيّه دباديب ولا مخده عشكل قلب O_o اي نعم بحبهم و عندي زاويه بالغرفه حاطه فيها دبدوب كبير جبلي اياها اخوي على عيد ميلادي وانا بالاول اعدادي و عندي كمان سلحفاة بتجنن هدية من مرة اخوي محطوطه عالتسريحه, بس ما في غيرهم, ابدا ابدا ما في عالتخت شي و لا عمري حطيت شي, عندي لعب السيندي و الباربي بس محطوطين بكرتونه بالمخزن مش مرميين على كل زاويه من زوايا الغرفه, ونفس الشي سياراتنا, فيها معطّر فيها لمسه بنّاتيه اه بس برضه ما فيها 100 دبدوب

وليش غرفة بنت اذا لازم تكون كل الحيطان صوري و صور الفنانين وصور اطافيل؟؟ عندي بالغرفه صورة عائليه ببرواز صغير عالتسريحه ما في غيرها, بحب صور الصغار بس اكتر من سكرين سيفر للكمبيوتر و الموبايل ما في مكان الهم

غرفنا و سياراتنا حلوة و مرتبه و كل شي بمكانه و انيقه و مزينه "بالعقل"....
لكن هالاشياء اللي بجيبوها بالافلام.....كلها حكي افلام مش اكتر :)

و اذا في حد من البناويت بعمل هيك او بتعرفو حد بعمل هيك احكولي...ليكون انا الغير عن العالم :$

22 التعليقات :

لوول بلا تخت بلا هم
انا بعمل فيلم هندي وبس

ولا عمري حطيت دبدوب عالتخت
بس انو صور وهيك بالزمانات كنت احطهم واختي كمان
هلأ ما في شي لا صور ولا براويز ولا غيرو
يتيمه يا عيني الغرفه:)

 

انا لاحظت هاد الاشي كمان .. انه بالواقع ما شفت هيك غرفة بهيك ديكور .. وجنات -اختي الوحيدة كمان- غرفتها اكتر من انها مرتبه ما بحكي .. مافيها هالشغلات

هي بس بروزة مسلسلات ع قولتك
تحياتي

 

أناشد الست همسة اطلاق سراح السلحفاة, و تركها لتعيش في الغابة بين أبناء جلدتها السلاحف, نظرا لما بشكله حبس السلحفاة من اعتداء واضج و صارخ على حرية الحيوان و على مشاعره الفطرية في الحياة الحرة و الكريمة

ثائر جبر
سكرنير الجمعية الدولية لحماية الحيوان و مؤلف كتاب الحياة بلا سلاحف شتاء بلا ملاحف
و الحائز على السلحفاة الذهبية و جائزة نوبل لأصدقاء السلاحف

 

السلام عليكم يا أحلى ويسبر (: وكل عام وانتي بخير وينعاد عليكي يارب

أنا تقريبا متلك مافي هالعجقة بالغرفة عندي يعني هالغرفة الواحد بيرتاح فيها مش فاتحتها سوبر ماركت ولا استوديو :D
أنا عندي أختي بتحب هيك شغلات و تختها ولا ديزني ههههه بس يعني مابترمي حالها ع التخت واهئ اهئ .. لا ما في هيك شغلات هههه يعني حتى أنا بحسها بس بالافلام
حلو يكون عندك لمسة بناتيه بس مش هالقد .. أنا بصراحة في عندي عيب انو اذا شفت شي قميص مرسوم عليه دبدوب او من توابعه بشتريه دغري بس مش هوس ولا شي
(:
موضوع حلو كتير يعطيك العافية ويسبر(:
Bullet

 

Hehehe a cute post i dont think you are alone :)

 

كل عام وانتي بخير ام السوس
انا غرفتي ميمعة، فيها صور لعيبة كمال اجسام على لعيبة كرة قدم _ طبعا صور الممثلات وهاالشغلات كلها جوى الخزانة، في الركن الموسيقي، الأورغ والجيتار، وفيه طبعا البلاي ستيشين، وفي الركن اثقافي اللي في الكتب والروايات، طبعا فيها كمان دامبلز لما كنت العب كمال اجسام، وفي على الحيطان عبارات غريبة متل (لو أن التوجيهي رجلا لقتلته) او (سأهزمك يا عامر) طبعا عامر كان كابتين الحارة اللي جنب حارتنا ودايما كنا نلعب معهم قدم واللي بفوز بيطلعلو صندوق بيبسي، وبعد المباراة تنتهاوش والفزيعة تشرب البيبسي
:)
لا بس بصراحة هاي كلها من مفرزات عصر الجاهلية، يعني لما كنت مراهق
قبل ما يبلش عصر التنوير
:)
اسف ويسبر هاد ادراج مش تعليق
بس اندمجت في الموضوع

 

i guess u r normal.. l2nu ana hek kman bs fe bnat hek
http://hana-ihjoul.blogspot.com/

 

لا حبيبتي انت طبيعية
هم مش طبيعيين
:)
كل عام و انت بخير

 

عجبتني كلمة البناويت :]
كأنه البوست اليوم المفروض يكون بس للبنات؟

 

شوفي خليني أحكيلك! غرفة البنات في بيتنا عاش فيها سبع بنات مع بعض بالأضافة لستي الله يرحمها كانت تنام معانا، لذلك غرفتنا كانت مليانة سراير، وسراير طوابق يا دوب توسع وفيه ناس كانت تنام عالفرشة عالأرض -وهذا معناه إنه أكيد ما فيه دباديب ومخدات قلوب حب وين بدنا نحطهم؟ - بالاضافة لخزانة كبيرة من الحيط للحيط وارتفاعها للسقف علشان هيك الغرفة ما كانت متحملة وإذا كان حطينا فيها صور وبراويز كان أكيد راح تنفجر فينا!

أما بالنسبة للباربي فآخر مرة لعبت فيها بالعرايس يمكن كان عمري 9 سنين وبعدين انطلقت للبرية، يعني بلعب بالشارع او فوق السطح او بتشعبط عالشجر واهم لعبة هي صيد الجنادب! والله كنت صيّادة ماهرة وكل يوم اصيد كوم جنادب بس راحت مني ما احتفظتلي بكمن واحد بمرطبان جنب السرير بدل الدباديب!
وأكيد مع هيك شخصية ما راح أرمي حالي عالتخت... اهئ اهئ...

اليوم بعد ما تزوجوا البنات ( ولله الحمد ) وانتهت الازمة السكانية اللي عنا، صارت الغرفة إلي لحالي بس برضه ما فيها اكتر من سرير ومكتبة وبسكليت الرياضة لتخفيف الوزن والحيطة ناصعة البياض!

 

انا عارفه انه هاد الإدراج مبطن,,, وقصدك عني :c2:

بكرررررررررررررررهني انا :c2:


ليش الواحد بس كان يكتئب شو كان يعمل
يطلع ع السطوح ويزت حجاره ع الناس مثلن

 

مياسي

ههههههه...النا حركاتنا ما بنكر بس مش هاللي بجيبوها بالتلفزيون...اكيد مش زيهم :)

الصورة الوحيده حطيتها وانا صغيره كنت انا و خواني بنفس الغرفه و اخوي حاطط سيارات و التاني مغنيين فأنو هاي غرفتي فحطيت صورة بنت ومعها صيصان :)

ماما مستغربه كيف لسا متذكره الصورة لان عمري كان يا دوب كم سنه :)

Ahmad Al-Mahrouq

ما شاء الله...يمكن حكيتلك من قبل بس اسم جنات بجنن :)

انضاف لقائمه اسماء البنات اللي بحبهم :)

يعني طبيعيين طلعنا :)

 

ثائر

هههههههههههههه
جد ضحكتني

للاسف ما حلبي اي نداء....لان هالسلحفاة بس اتفرج عليها بتغيرلي مزاجي على طول
حتى اني حكيت عنها ببوست قديم

http://hamsati.com/2008/11/things-makes-me-smilelaugh.html

انت بس شوفها و احكم....ما في مجال لاطلاق سراحها ابدا ابدا

بس عجبني المناصب و الجوائز
اشي من الاخر :)

Bullet

و عليكم السلام ورحمة الله وبركاته
اهلا و سهلا يا قمر
و انتي و اهلك و احبابك بالف خير يا رب
هي خلص العيد و رجعنا للدوام :(

هههه عجبني " سوبر ماركت " حلو التعبير

جد بس بالافلام هالحركات

الدباديب المرسومه...هاي لمسة بنوتيه, بس انك تحطيهم كلهم بالغرفه هاي اللي ممكن زياده

الله يحلّي ايامك يا رب

 

M!R@CHK@

Ahlan be Mira :)
Thanks and welcome here :)

نادر

و انت بألف خير يا رب
ههههههههه زكرتني بغرفة خواني
صور الممثلات يمكن في ما بعرف...لانه عمري ما شفت فيمكن جوا الخزانه مثلك :)

و بنك الحديد مع الدامبلز

الكتابات هاي مش موجوده...بس جد بتفش القلب :)

خود راحتك كل المدونه تحت امرك

 

Hana

Thanks for assuring that I'm normal :)
yes there is some girls like to live in the middel of this.. but I'm sure they r few

Jafra

و انت بالف خير يا رب
الحمد لله اللي طلعنا طبيعيين...فكرت حالي مش نغشه :)


بالنسبة للعيديه فالسنة اول مره بيجي عيديات هالقد :)))
فوق ال 200 دينار اجاني عيديات, الحمد لله لاني جد كنت فقيرة قبل العيد لاني اشتريت اشياءات كتير
خلص...الك نصهم :)

 

Ahmad Merie

جمع تكسير و تحطيم هاد...ما اخدتو بالمدرسة !!!!

لااا ممكن تشاركوني برأيكم...ليكون هالحركات نغاشة من وجهة نظركم مثلا O_o
او مشاركه بوضع البناويت بعيلتكم :)

الكيل بمكيالين

ما شاء الله

يمكن انتي مش حاسة انو حلو ...بس انا جد بحسدك على خواتك :(
نفسي يكون عندي اخت و لهلأ :((((((

الله يخليكم لبعض و عقبال ما نفرح فيكي و تتحول الغرفه لغرفة قعده :)

هلأ انا عكسك :)
انا بديت بالسبع حجار و الجلول و الطابه و المسدسات وتسلق الشجر, جنادب لأ مش لهدرجه و على تقريبا عمر 6 سنوات ماما انتبهتلي و بديت العب بالباربي :)

ما في احلى من الحيطان البيضه ليش الحكي :)

 

Um Omar

بتكرهيني و يلا بتكرهي حالك!!!
الرجاء تحديد المواقف :)

هلأ اي شي او اي رده فعل بتخطر ببالي ...لكن تطلعي عالسطوح و ترمي حجار عالناس مش مستحيل..لا مستطييييل اتوقعها :)
و مستغربة ليش بيسو حركه ما شاء الله عليها
مهي جايبته من برّه اظني :$

 

أنا برضو عمري ما سويتها إني أقعد أبكي على التخت,,

غرفتي لونها أخضر وبني ومافيها ولا صوره,, ولا حتى صوره عائليه,,

اللعبه الوحيده إلي عندي إياها هيه "SpmgeBob"
حاطاه على تختي عشان لابق مع ألوان الغرفه,,

سيارتي كنت حاطه فيها معطر بس رميتو بعد أسبوع عشان حسيتو بجمع غبره,,
أنا سيارتي كانت معبيه سيديات بس بعد حادثة السرقه ضبيتهم بجيبه ,, السياره فهلأ فعليا السياره مافيها إيشي..

همه بالأفلام بحبو المبالغه بس غالبا بتعطي نتيجه مبتذله للفلم..

 

مسا الفل يا قمر

تخيلي بالله عليكي...يعني حتى ابسط اشي بدو يطلع منا بعفويه بدنا نعملّه قصه و حكايه :)

اه والله بجمع غبره...فأنا جبت من اللي بنرش :)
بس اطلع من السيارة برش منه, و لمّا اركبها مرّه تانيه بتكون ريحتها حلوه

بس هلأ البركه بأخوي من وقت ما نطلع بالسيارة لنوصل شغله وهو هات يا رش بتصير ريحه السيارة غير شكل لتاني يوم :)

 

أنا بخبرتي الطويلة بعالم النساء .... ما راح أعلق ،، لوووول

ما خلوا شي الجماعة ... طلعت لا خبير و لا ما يحزنون :]]]]

 

ههههههههههههههههه
له له له يا هيثم....طلعت بتصدق حكي الافلام!!!