Things I Like To Whisper About

Would You Hear Me Whispering

أوهام في الظلام



كنت قاعده لحالي بالبيت و اهلي رايحين يزورو الجيران , جهزّت اموري لتاني يوم, كويت الاواعي - بكرّرررررررره الكوي انا - وجهزت الشنطه و بعيد عنكم الكندره و وكل شي تمام, ما خلصت من هون بفتح التلفزيون من هون لاشرب فنجان القهوه على شي, هب قطعت الكهربا, وكان هاد القطع للمرة السادسه بهداك اليوم, من قبل بيوم بتقطع و يومها اتصلنا بشركة الكهربا المحترمه, ال هاد قطع مبرمج, اي اذا عشؤائي ما بطلعلنا 6 مرات, فكيف مبرمج و هالقد قطعت عنّا !!!

المهم انا مش خويفة بالمره - و افهمولي بالمرة منيح - عادي عادي يا بنت اخدت موبايلي و اللّوكس و مج القهوه و رحت اقعد عالبرنده, طبعا كل الشارع مقطوعه عنهم الكهربا, ما شاء الله ضو القمر كان منور بزياده, و منظر الشموع من ورا شبابيك الجيرن اللي فتحو الاباجور كتير حلو, وصوت اولاد الجيران القاعدين بالحديقه ومبسوطين عالشمع بجنن.

فجأه سمعت صوت زي باب فتح, ما عرفت من وين, المهم فجأه ضو احمر صغير بيّن في بلكونة الجيران, شوي بين و يختفي, و بقوة ملاحظتي ما شاء الله علي لقطت انه ضو سيجاره, في النا جار بطلع عالبرنده بدخن, وطول ما هو بدخن و هو مرّة بتركى على رجل اليمين و مرّة بتركى على الرجل اليسار, فبصير شكله كأنه بمشي وهو واقف مكانه, المهم مع السواد المعبّي الدنيا و الباب الاسود اللي وراه, قدرت اميز حركته هاي حتى و هو ما بسحب نفس من السيجاره, يعني ضو السيجارة بروح و بيجي بس ياخد نفس و لكن بعديها بختفي.

المهم ضلّت حركته موجوده و شايفتها بوضوح, شوي شوي حسيته بقرّب O_o و شوي حسيت حالي كأني بديت اشوف ملامح وجهه, لا اخفيكم اني خفت, غمضت عيوني و رجعت فتحتّهم اختفى, بركز شوي ضو السيجارة ضوا, لا ابدا ما خف عقلي ولا انو قلبي بدو يوقف, مش فاهمه ليش , مهو ببيته وانا ببيتي شو قصتك, حاولت اقنع حالي و بعد خمس دقايق طلعت بقرار

أبااااااااااااااااااااااااااااااااااااااااااااه.....بدي مامااااااااااااااااااااااااااا :(

بعد بربع ساعه رجعو اهلي, وبدت ماما " يا على امك" .."تقبري امك" و ديما بحكيلها " بعيد الشر ..ما تحكي هيك" بتحكيلي " مش اليوم...بس يصيرو ولادك كوم :) " حبيبتي لسا عندها امل مني هههههه ما علينا المهم بتحكيلي وانتي شو صار فيك, اتطلعت فيها و في بابا اللي بستنى جوابي, حكيتلهم " ولا اشي شو بدو يصير يعني...شربت قهوتي عالبرنده وكله كان عادي ...عاااااااااااادي "

__________

بس كيف العنوان....المفروض يكون عنوان لرواية من 458 صفحه :)
عجبني بصراحه :)

24 التعليقات :

صباح الخير ويسبر

عن جد العنوان حلو :)

الظلام مخيف وسبب في حدوث أوهام كتيره وخيالات بتصير مرعبه أكثر كل ما صارت هواجس الخوف اللي جواتنا أكبر

فعلا دايما بسأل حالي كيف كانوا الناس عايشين قبل الكهربا :)

نهارك سعيد

 

"غمضت عيوني و رجعت فتحتّهم اختفى
أي صف إنتي؟
شو هالخوف هاد :)ـ
يعني لما تصلي مرحلة انك تغمضي عيونك من الخوف مش عارف شو بدي اقول :)ـ
بس العنوان اجى مناسب جدا

 

أشرف محيي الدين

صباح الورد أشرف

الله يحلّي ايامك, مش كتير مناسب للموضوع بس يلا في ظلام و في ظلام :)

انا ما بحب العتمه اجمالا, وما بعرف انام من غير ما يكون في ضو نواسّه عالقليله, فما بالك وانا لحالي بالبيت :(

كانو يعيشو جماعات مش افراد :)

نهارك اسعد ان شاء الله

 

Jaraad

بصراحه...وبعد تعليقك...حسيت حالي بصف تاني ب :(

طبيعي بس تخاف من شي تغمض عيونك ...هيك ردّة فعلي انا :)

هلأ يمكن ما شاء الله عليك انت متعود من غير شر عالعيشة لحالك, وممكن من اللي بحبو العتمه, انا بحب النور, و اعتراف تاني, وانا لحالي بالبيت بحب اشغّل التلفزيون او الراديو انو يكون في صوت
بكره الهدوء

من الاخر...انا خوّيفة بس ما بعترف للناس وجها لوجه :$

حاسة حالي تهزّئت و ببرر...لو بعرف هيك كان حكيت لبابا واخدت اللي فيه النصيب :)

نيجي للعنوان..كيف بس ...بطلع مني اشي :)

 

ما بعرف ليش أول شي قرأت العنوان "مسرح في الظلام" :)) بس أوهام في الظلام بتزبط عنوان فيلم :) .. بعدين بما انه ما حدا عارف مين أنا فاااا بعترف و بكل ثقة إني خويفة عتمة و يمكن أكتر منك :)

 

Hb


"مسرح في الظلام".. حاسسته اشي كان يجي بالمناهل كأنه :)))

هههههههه
الله يسعدك يا رب....للحظه حسيت حالي غريبه :$

 

ما قريت العنوان جهزت حالي نفسياً لقراءة ٤٥٨ صفحة غير المقدمة إللي كنت ناوي أطنشها بلاش تطلع من وزن مقدمة ابن خلدون، بعدين طلع الموضوع إنك خايفة من سيجارة! و شو فيها أنا كمان بخاف من السجاير و ما باطيقهم.

نيجي للجد:

بيتهيألي إنه الخوف نابع من جهلنا بالمستقبل و تخيلنا لهيك مستقبل، الظلام بيوفر السبب الأول، و هاظ بيمشي ع الجميع، لكن الفرق بين إللي بيخاف و إللي ما بيخاف هو تخيلاتنا، إنتي بتتخيلي إنه إللي ورا السيجارة قصده شرير (برضه لجهلك بإللي ممكن يعمله) و لهيك خفتي، بس لو كان إللي ورا السيجارة معروف عندك (مثلاً أبوكي) كان ما خفتي، أنا لما كنت صغير كنت خواف كثير، مستحيل أطلع بالعتمة مثلاً، بعدين لما كبرت شوي و بديت أفكر بهالأشياء و وصلت للإستنتاج أعلاه صارت الأمور أفضل، و لما ضفتلهم إيماني إنه ما بيصير إلا إللي كاتبه ربنا تَمْسَحِت و بطلت أخاف، بس برضه بأكون مستعد لكل الإحتمالات بدون خوف أو ارتباك.


و كل إنقطاع كهربا و إنتي سالمة... ست مرات في اليوم... يا نيالك

 

آه مسرح في الظلام كان فقرة بالمناهل الله يسهل عليهم :)

 

أنا لما قرأت العنوان فكرتك ح تكتبي خاطرة .. مو قصة شخصية

بس القصة هاي .. ذكرتني بقصة صارت ببيت خالتي ببلودان - بالشام- .. سميناها انا واختي قصة الضو الاحمر .. هي تقريبا مشابهة .. بس اللي كنا بالبيت وقتها انا واختي وبنات خالتي وصاحبتهم .. هم هدلاك كلهم كبار .. وانا واختي صغار
اهالينا كلهم كانوا طالعين .. ضلينا لحالنا .. ع اساس البنات يطلعونا مشوار بالليل انا واختي .. بلودان تعتبر مصيف ما بعرف اذا زرتيها .. وبيت خالتي جاي تقريبا على آخر قمة .. وتخته وادي سحيق يعني .. والمنطقة قديشها حلوه بالنهار ... شجر وخضار وطبيعة .. وقديشها تخوف بالليل .. بتسمعي صوات من جوا الشجر ما بتعرفي هدول شو الحيوانات

المهم .. بلا طول سيرة .. انا قاعد بخوف بالبنات طول الوقت .. وبحكيلهم "جني" .وهلق بيجينا الجني .. ومابعرف شو .. كنت صغير وقتها .. حوالي 7 سنين

المهم .. الكل جهز وبدنا نطلع .. كلنا اجتمعنا بالصالون بالطابق التحتاني لنطلع من باب الجنينة .. ولا في صوت باب بالطابق اللي فوقنا بيطبق .. وقطعت الكهربا .. والكل صار يصرخ ويبكي .. بعدين بنت خالتي بتقلي .. اطلع شوفلنا شو صاير فوق .. انا عامل حالي وقتها الرجل .. طلعت ع اول درجتين .. صاروا البنات يصرخوا .. وركضت لعندهم
بنت خالتي صارت تنادي اذا في حدا فوق .. وصارت تقله اذا بدك مصاري منعطيك .. بس لاتقتلنا

كل ما اتذكر هالجملة بفرط ضحك

المهم .. قررنا كلنا نطلع ع الجنينة .. عشان اذا صار اشي .. يسمعونا الناس ع الاقل
طلعنا من هون ... طبق باب الجنينة من هون .. وبطل يفتح
نحاول نفتح ما قدرنا .. والكل بيبكي ومش عارف شو ... بعدين جبنا واحد -نسيت اسمه بس اسمه غريب وبضحك- المهم بدنا ياه بفتحلنا الباب .. ما منلاقي ولا كسر القزاز ومد ايده وفتح الباب
كنا بمصيبة صرنا ب2 ... شو بدنا نحكي لأهالينا لما يرجعوا .. مالنا غير نحكي انطبق الباب وهر القزاز لحاله

ودخلنا ورجعت الكهربا .. طلعنا لفوق لنشوف ليش الباب انطبق فوق وعمل هالصوت؟؟؟
طلعت وحدة تاركة الشباك فوق مفتوح على مصراعيه والهوا عم يلعب .. وما كان في حدا فوق ولا ما يحزنون ... القصة اسمها الضو الاحمر لآنه كان في ضو احمر ضاوي والكهربا مقطوعة .. مش متذكر ضو شو


طولت بالحكي .. بس انتي رجعتيني لهديك الايام

 

والله ما بلومك, الواحد بهيك مواقف مخو ببلش يلعب كرة ويروح ويجي بأوهام وأفكار ظلامية زي عنوان الرواية إم ال 458 صفحة اللي ما كتبتي غير صفحة وحدة منهم

 

حلو العنوان بس ماتوقعته لقصة مرعبة

بس عن جد انا اموت بحالات الرعب هادي, يعني بعيد الشر عنك معايا حالة تبلد احب اخاف ههههه

عيشتني بجو فيلم مرعب ياويسبر

:)

 

Saleh


اهلا و سهلا بالسيد صالح :)

ما هون الفكرة, المفاجأة بخفّة الظل في الكتابه
هاد نوع جديد من السسبنس :)

انا معك باللي حكيته, لكن بالموقف اللي صار ما كان في اشي بخص المستقبل ولا في ضعف ايمان و الحمد لله, الموضوع ان العتمه و التواجد لحالي هو كان عامل تنشن و اجا العمو كمّل, في و بغيرو انا كنت قاعده على مضض و مشيّه الموضوع

هلأ بشكل عام, فعلا بعد ما زاد ايماني بالقضاء والقدر و انّا ما حنشوف غير المكتوب قلّ الخوف من المستقبل بالخصوص, بنتوكل على الله و بنمشي :)

وانت بخير يا رب...اه رقم قياسي جديد ...جد نيالنا يومها
كانت اكتر يوم شوب بالحياة :$

Hb

يا الله...اشي كتييييييييييييير زمان :)
هي اكتشفت ان ذاكرتي لسّا فيها امل :)

 

Ahmad Al-Mahrouq

والله مغامرة هاي كانت....الله يعينكم لانكم كنتو صغار و يمكن بس شفتي بنات خالتك صارو يبكو انتو خفتو بزياده

يلا الحمد لله انها صار ذكرى تضحكو عليها :)

بالعكس ....شكرا لمشاركتنا بهالقصه و طول قد ما بدك ولو :)
ان شاء الله دايما تضل ايامك و ذكرياتك حلوه

Ahmad Hamdan

بالزبط...زي ما حكيت انا كنت جاهزة لفيلم رعب بدون ضو سيجارة ولا جار ولا اشي, بس بقنع حالي اني مش خايفه :)

باقي الصفحات بتيجي بالمغامرات الجايه :)

 

Wafa'

بعيد عنّك...في ناس ما بتأثرو بهيك مواقف و ناس بحبو مواقف الرعب, انا بكرّهم لانو بنهزّبدني و بضل قلبي يدق و مسموم بدني :(

خوّيفة :)

 

معلش ويسبر ...الخوف بيعمل اكتر من هيك ....اقل صوت واخف حركه اكيد بتتحول لاوهام ...ومع الظلام ولحالك بالبيت ...ما بلومك
انا لما اكون لحالي بالبيت ...كمان بضوي التلفزيون وبعلي الصوت حتى لو ما تفرجت على شي المهم ما يكون حوالي سكون وهدوء لانه بيخف عقلي مع اقل صوت
اوهام في الظلام
عنوان مناسب...ان شاء الله بتحوليه لروايه في يوم من الايام

 

قطعت الكهربا؟؟
انا جيت
.... و الله انتم دائما في البال بكهربا و بدون كهربا

ثم ان نوركم كفاية و الله

باين ان الحكومة نجحت في مساعيها في تحقيق شعار - نحو مواطن رومنسي و غامض - على اعتبار ان الرعب نوع من انواع الرومنسية

رمضان كريم

 

Nissan

العتمه و وجود الشخص لحاله, مع شويّة خوف موجودين بتعمل اكتر من هالاوهام

انا بحب اشغل التلفزيون حتى لو مش قاعده قدامه, تفاديا لاني اسمع اي صوت او يتهيئلي اني سمعت شي و يخف عقلي على رأيك :)

تسلمي يا رب :)
مساكي و صباحك نرجس

ثائر جبر

اهلا و سهلا ..نورّت :)

تسلم يا رب, وجودكم بنوّرني دائما
كيفك و كيف امل؟؟ ان شاء الله تكونو بخير

اه رومنسية ...هو الصحيح قلبي ما وقّف عن الدق من الرومانسية فأكيد الرعب نوع من انواع الرومانسية :)

علينا و عليكم....سلام خاص لأمل :)

 

هههههههههه العنوان مناسب جداً لسلسلة أفلام بوليسية :)

أنا كتير جبانه ومستحيل أضلبلبيت لحالي.. وإذا لزم الموضوع وضليت بضوي ضواو الدار كلها وبقعد بالصالة وبعد ١٠ دقائق ببدأ أتخيل اني بسمع أصوات فيا بروح عند بنت عمي أو صاحبتي :)

 

هههههههههه العنوان مناسب جداً لسلسلة أفلام بوليسية :)

أنا كتير جبانه ومستحيل أضل بالبيت لحالي.. وإذا لزم الموضوع وضليت بضوي ضواو الدار كلها وبقعد بالصالة وبعد ١٠ دقائق ببدأ أتخيل اني بسمع أصوات فيا بروح عند بنت عمي أو صاحبتي :)

 

انا هيك حسيته...عنوان اشي خطير :)

الله يسعدك...طمنتيني اني مش لحالي هيك خويفة :$
مع اني بحب اضل لحالي, بس مع صوت و ضو مش من غير شي هيك

انا ما في حد قريب حولي فلازم اضل بالبيت و اتخيل يللي بتتخيل :(

 

الله يسلمك و يرضى عليكي

الحمد لله أمل بخير و تمام التمام
هي هلأ مشغولة في بناء بعض الاسنان
آخر الانجازات
تمكنت من قول الجمل الآتية

بابا أكو: بمعنى أجلس يا ابي

بابا مامي: أخلد الى النوم يا ابي

يو جني: طيور الجنه

هاليب هاليب: "نداء استغاثه" مزيدا من الحليب

نونو: بمعنى هات يا أبي نونية ابن كلثوم لنقرأها

تسلمي يا ويسبر كلك ذوق

 

حبيبتي ما شاء الله عليها
الله يعينها على السنان, جد بعانو الصغار و ما بعرفو يعبرو

مامي هاي بنت اخوي برضه بتستخدمها للنوم :)

و طيور الجنّه عندها...لا لاااه لحن انشوده يعني

هههههه عجبني تفسير نونو :)
مثقفه حبيبتي
الله يخليلك اياها و يخليك الها يا رب

 

زنخة كتييير ومفلسفة

 

شكرا عالتعليق لانه بسببه رجعت عالمدونه و اكتشف تعليقات الاصدقاء و الصديقات اللي ما كانت منشورة و اللي كنت مو راده عليهم :)