Things I Like To Whisper About

Would You Hear Me Whispering

حتى تترك اثرا



على مدى دراسة 12 سنة بالمدرسة و 4 سنوات في الجامعه, حاولت افكّر بمدرّسة او دكتور ترك اثر ايجابي في نفسي, وللاسف ما لقيت غير 3 معلمات, معلمة الصف الاول و معلمات الانجليزي بالصف الاول اعدادي " السابع" و الثاني الاعدادي " الثامن" , ما بنكر ان حبي لمعلمات الانجليزي فادني كتير بدراستي و بالتوجيهي جبت 95 بالانجليزي, مع ان البعد عن الممارسه خلّاني افقد كتير من المخزون و خصوصا القواعدي, بفهم قرأة و محادثه ولكن بالكتابه, الاخطاء الاملائية و القواعديه بتخليني اعيد كتابه اي شي اكتر من مرّه.

هالشي خطرلي بعد درس الدين بين ركعات التراويح امبارح بالمسجد, الشيخ سأل الحضور عن مدّرس تربية اسلاميه ترك اثر ايجابي في نفسك و خلاك اقرب للدين, وللاسف ولا واحد من المصليين اجاب بأسم, و حكا الشيخ اللي طلع عامل دراسة عن الموضوع انه بعد سؤال عدد كبير من الناس, و بعد سؤالهم عن اي مدّرس ترك اثر في نفسك, كانت اعلى اجابه هي 3 مدرسين و من ناس قلال جدا.

للاسف مدرسين و مدرسات في مدارسنا بدخلو الصف بأدّو واجب تلقين و حشي المعلومات في دماغ الطالب, مع عدم مسؤوليتهم عن مدى استيعاب و فهم الطالب للمادة او مراجعه التفاصيل المهمه مع الطالب, فما بالكم بماده مثل التربية الاسلاميه, اللي بتبدا من الصف الاول الابتدائي, هلأ لو كان تأسيسنا الاسلامي صح من صف اول و هالموضوع اخذ رعايه زياده لاهميته الكبيره على حياة الانسان بعدها النفسية و الاجتماعيه و الاخلاقيه, كيف ممكن يطلع الجيل الجديد و شو ممكن يطلع منه.

تطرق الشيخ لاساليب التدريس و انها بتستخدم اسلوب التدريس احادي المحور, وهو التلقين فقد ومخاطبه العقل , و هاد السبب بخليها فيها جمود وما توصل للطالب بسرعه, و قارن مع اسلوب المعلم الاعظم, سيدنا محمد صلى الله عليه و سلم, واللي كان طريقة تدريسة ثلاثي الابعاد, فكان يخاطب العقل باعطاء المعلومه, وكان يخاطب الوجدان والقلب, مثل موضوع الصيام , لمّا فرض الصيام, و عرض رسول الله صلى الله عليه وسلم الموضوع على المسلمين , كان المخاطبه العقليه بأوامر الله سبحانه وتعالى , ومخاطبة القلب بحيث كل الموجودين طلعو من الجلسة وهمه مش بس مقتنعين بالصيام لأ و بحبو الصيام و نفسهم يطبقو هالعباده بأقرب وقت, و المحور الثالث هو المحور العملي, بحيث كان الرسول الكريم صلى الله عليه وسلم يطبق الاوامر امام المسلمين حتى يكون تركيزها بالعقل اكبر, فمثل الوضوء, طبّق الرسول الكريم خطوات الوضوء امام المسلمين و من وقتها لهلأ عم نتناقلها من جيل الى جيل.

فيا ريت يصير اهتمام اكبر بالتعليم عموما وبتعليم التربية الاسلاميه خصوصا ليتأسس الطالب منذ الصغر و يتعود على اساسيات الدين, وما يكبر و هو اقل تطبيق عملي مثل الصلاة مثلا ما يكون بعرف يعملهم, و انا بحكي هالشي لاني شفت ستات و رجال دارسين و متعلمين - المقصد انهم اخدو المعلومه بالمدرسة - و بس ربنا هداهم على كبر و بدو يصلو ,بدون مبالغه ما عرفو كيفية اداء الصلاه ...

29 التعليقات :

كلام سليم و رائع
فعلا ً كم واحد ترك فينا أثرا ً من هؤلاء؟
القليييييل القليل
:(

كلمات محورية في إدراجك هي : أسلوب التلقين و الاتصال ذو الاتجاه الواحد

لا يكفي أن نلوك الظروف (ظروف المعلمين / المدارس / و كل ذلك) و يبقى ذلك حديثا ً يخدم كمسكن للمسألة و لا يساهم في الحل! مؤسساتنا التعليمية بحاجة لتغييرات جوهرية و ليس رتوشية
!

طبيعة إيصال المعلومة + الاستفادة من الكم الهائل من الثورة المعلوماتية أساسان مهمان برأيي
ينطوي تحتهما أشياء مثيرة و متداخلة، من شاكلة: تغيير المناهج و تحديثها باستمرار + عدم الاحتكام الزمني و المكاني لغرفة الصف كمورد وحيد
هناك أساليب خلاقة و احتمالات واسعة + بديعة لتغيير النشأ الذي نحن عليه
و لا يحتاج لمعجزة ما أو حتى استيراد قوالب تعليمية جاهزة

نريد تخطيطا ً سليما ً و بعض الإصرار و كثيرا ً من التفاني! للأسف نتكلم كثيرا ً عن أهمية التعليم و لكن حين التطبيق يكون واضحا ً أن الاهتمام به صوري و لا يعد ّ أولوية
:(

حدت عن الموضوع، فعذرا ً و شكرا ً لك للإدراج المهمّ

*** أنا لا أتذكر إلا أستاذا واحدا ً -المرحلة الإعدادية- + أستاذيْن جامعييْن
كان لهم فضل عميق علي. في شخصيتي و تعليمي
ما أزال على تواصل جيّد جدا ً بالثلاثة
:)

 

متذكره كتير من معلماتي ايام المدرسه ...وبعضهن كنت احبهم كتير ....لكن بصراحه ولا أثر تركوه في نفسي ...ولا وحده فيهم شجعتني على العلم ولا الدين ولا حتى المهنه نفسها ...لولا لطف الله فينا يا ويسبر
بصراحه المدرسه كانت للعلامات عشان الجامعه والوظيفه غير هيك ... يفتح الله

ميرسي يا قمر على النصيحه الفنيه*^*
كنت ناويه اسألك بس انتي سبقتيني يا معلمتي ...شو بدك احلى من هيك أثر ...سباقه للخير على طول

 

Haitham

وجودك في مهنة التدريس و وجود مثب هالافكار و تحديد اهمية الموضوع ببشر بالخير, بعرف ان مرات المناهج و نفس الطلاب و احيانا الادارة بتحدّ من تطبيق جميع طموحاتك ولكن وجود البذرة الاساسية عندك حيكون الها اثر كبير ان شاء الله :)

فعلا معك حق...في تغييرات جوهرية لازم تصير ليتغير الوضع التعليمي عنّا

بتعرف ان انا مثلا ما تعلمت استخدام الانترنت , الا بس اشتغلت :(
وانا خرّيجه علم حاسوب!!!
لا بالمدرسة ولا بالجامعه عودونا على الاستفاده من الانترنت بدراستنا ولا بأبحاثنا
الله يديم المحبه...هاد لانهم فعلا تركو اثر و واضح في حياتك

 

Nissan

للاسف كان تأثيرهم آني و مش من التأثير الفعلي على مسارك و حياتك

دينيا عمره ما حد نصحني او وجهّني لا بالمدرسة ولا بالجامعه :$

بالزبط...هي تجميع علامات لندخل الجامعه بغض النظر عن اي شي تاني


العفو يا قمر :)

المهم ان شاء الله تكون زبطت معك :)
انا صارت معي قبل و لمّا حولت لل
Wordpad
كله زبط :)

ان شاء الله على طول نترك اثر :)

 

الدروس وسط صلاة التراويح عادة محببة نفتقدها في السعودية فبها الفائدة وتجديد النشاط
اشكرك على مشاركة هذه الدروس معنا.

إذا اردنا تنشئة جيل التغيير، يجب أن نهتم بالتعليم ثم التعليم ثم التعليم بشكل متواصل لفترات زمنية طويلة وبرعاية حكومية، صدقيني لو اولادي حطيتهم في البيت وما وديتهم المدرسة اقسم بعزة الله ما في أي جهة حكومية راح تحاسبني وتقلي ليش ما وديتهم، كيف يا ربي راح نغير إذا ما تغيرنا، أنا همي مش اللي قادر يودي اولاده على مدارس خاصة أو عالمية همي المواطن المسحوق اللي ما عندو "وقت" :)وبالاخر بقولولهم لا تخلفوا بدل ما .... ولا اقلك خليني صايم، وكل عام وانتي وعيلتك والكل بخير
أبو تيسير

 

mtayseer


اهلا و سهلا و كل عام وانت و العيله بالف خير

كنت بدي احكيلك من زمان ما زرتني...بس جملة
" اللي ما عندو وقت"
قد ما ضحكتني ...قد ما ابسطتني انك متابعني ولو حتى بصمت :)

وبالنسبة للدروس...بدي ازيدك من الشعر بيت
حكالنا الشيخ ان ابتداءا من 8 رمضان ان شاء الله حيجي الدكتور زغلول النجار يحكيلنا كل يوم عن الاعجاز العلمي في القرآن :)
ان شاء الله بحاول احفظ قد ما اقدر و اجي اكتبه :)

عنّا للصف العاشر التعليم اجباري...و الاجباري يعني حضور الطالب, امّا شو تعلّم مش مهم, بطلع من العاشر ما بعرف يكتب اسمه بسبب النجاح التلقائي مش مهم, المهم اجا عالمدرسة :$

!!معك حق...كيف حنغيّر اذا ما تغيرنا

رمضان كريم :)

 

في المدارس اذا المدرس ما بحب مهنته أكيد ما راح يترك اثر على طلابه. وللأسف مين من الدرسين في العالم العربي بحب مهنته؟ وزي ما ذكرت التدريس عنا تلقين فقط.ـ
اما في الجامعات فالأمر ليس بأفضل. انا شفت دكاتره حاولوا يغيروا بس ما قدروا لأنه صار عليهم ضغط من المجتمع ومن زملائهم المدرسين والحديث عن هذا الموضوع طويل جدا.ـ
بالنسبه لمدرسين التربيه الاسلاميه ليس فقط ان لا احد منهم ترك اثر عندي ولكني اكتشفت ان بعضهم كان يعلمنا امور غلط في الدين.ـ
انا في الفصل بخلي الطلاب دائما يشاركوا مش بس عن طريق اني أسألهم في طرق كثير. اذا بشوف ما في تجاوب بعطي كل مجموعه (3 او4 طلاب) مسأله صعبه شوي (كل مجموعه سؤال يختلف عن المجموعه الأخرى) بحيث يتشاركوا في حلها وبعدين بمر على كل مجموعه وبناقش معهم وبساعدهم في طريقة حل المسأله. لازم يكون في تغيير دائم في طريقة التدريس الروتين يقتل روح التعلم.ـ
وشكرا على هذا الموضوع. بصراحه حاب اكتب اكثر بس حكيت كثير وبدي اذوق على حالي واسكت :)ـ

 

ويسبر يا ويسبر

صراحة دخلتي واحد من الميادين اللي احتلت مساحة كبيرة من دماغي الصغير

قضية التعليم.. هي إحدى القضايا التي يرتكز عليها تاريخ أمة

إذا حاولت تطبيق هذا التساؤل.. فأجد أنه لم يمر علي في دراستي أحد المدرسين الذي حببني بتخصصهم سوى مدرس الأحياء الذي درسني في الصف التاسع و حتى الحادي عشر..

منه عشقت ذلك العلم.. كنت "أبصم" الكتاب اختيار لا إجبارا.. بمقدمه و صوره و حتى المصطلحات العلمية اللاتينية فيه
كنت أحضر كل ما يمكن تحضيره.. حتى إنني حفظت عبوة طعام أخي البيبي الصفير في حينه و كانت عن فواكه مهروسة.. أخذت العبوة بما فيها من بقايا الطعام.. و أخفيتها في مطوى الفراش ثلاثة أشهر حتى حان موعد درس الفطريات لأراها عفنها تحت المجهر

"أتصوركم جميعا و أنتم تقولوا يعععععععععععععع
ههههههههههه

صراحة ذلك الأستاذ ساعدني على وضع تصور أولي لحلم حياتي.. حينها كنت أحلم بالهندسة الجينية

 

والله صايرة تخوّفي , حسيت حالي بقرأ بمقال بجريدة او اشي
حلو كثير

للأسف كمان , يعني اجا ببالي كثيييييييير اساتذة ودكاترة جامعات
يعني خوف الله كان استاذ الدين بالاول ثانوي هو احسن مثال للمدرس الحقّ

ما كانت المادة تلقين , كانت اقرب للفهم والاستيعاب

الله يسهل عليه وين ما كان

بذكر وانا بالمدرسة كان في استاذ درسني فن وعربي ودين على مدى 3 سنين

انه كيف زبطت معه جد

:|

 

المشكلة انو اغلب المدرسبن بعلموا الطالب انو الدراسة علامات و بس ... حتى لهلأ بالجامعة كل همنا انو نجيب العلامة و ننجح بالمادة حتى لو مش فاهمين منها اشي. ممكن لأنو كل النظام التعليمي و الوظيفي عنا بالبلد غلط خصوصا بعد ما يتخرج الواحد ... ما بشوفوا الطالب اذا فاهم او لأ بس بيطلعوا على تقديره و علاماته.

 

حتى تترك أثرا!
فيه معلمات كتير تركو في نفسي اثر وما بيتنسوا بس أثر سلبي والله!
وحده كانت تبهدلني عالطالعة والنازلة وعامليتني ملطشة الصف، وحدة بتهددني بالعلامات ليل نهار. الله يسامحهم.
اللي بتذكره عن المدرسة اني بكرهها وبكره كل شي بيتعلق فيها - باستثناء الصاحبات -وكل شي عرفته وتعلمته عن الدين كان من خلال القراءة او برامج التلفزيون.

 

كيفك ويسبر
انا ما الي زمان بدرس بس اي طالب درستوا حتى لو طلع من المدرسة الا ما ييجي و يسلم علي بزيارة الي خاصة
بالمدرسة
و اكتر من مرة طلبوني مدارس تانية من كتر ما بذكروني الطلاب و اهاليهم
بتعرفي الاحساس اللي بصيبني وقتها ما بينوصف و بوصل لحد اكبر من الغرور
المشكلة مش بالمعلم العملية النربوية عنا كلها بدها اعادة خلق و ناس متخصصة
لتعمل خطوات تحديث بس بدك مين يفهم و يسمع


ابقي ادعيلنا بالصلاة بلكن حسوا

 

صباح الخير ويسبر

كلام جميل وفعلا الاجيال الجديدة بحاجة إلى مثل هذه الاساليب التعليمية ثلاثية الأبعاد

ولكن أعتقد أن هنالك عاملا آخر شديد الأهمية ألا وهو شخصية المعلم فقد لاحظت بالادراج أن المثال الواضح الذي استند إليه الشيخ هو رسول الله صلى الله عليه وسلم المعلم الأول ولكن رسولنا الكريم كان لديه سر في التأثير بالناس يمكن معرفته من خلال الاية الكريمة :
"ولو كنت فظا غليظ القلب لانفضوا من حولك"
159 الآية رقم
سورة آل عمران
ولذلك أعتقد أن كل أساليب التعليم التي تحاكي العقل مهما كانت متطورة فإنها إذا لم تقترن بالجانب الانساني للمعلم في قدرته على اجتذاب محبة تلاميذه فإنه سيعجز عن التأثير فيهم

نهارك سعيد

 

Jaraad

انا ما بنكر ان في ناس بعزو هالموضوع لسؤ رةاتب المعلمين عنّا,مع اني بالعادة ما بحب احط السبب على سؤ الحالة الماديه لمّا يكون التقصير من نفس الشخص

لهيك معظم المدرسين بروحو واجب عالمدرسة بدون اي تحضير نفسي ولا تربوي و هالشي اكيد بنعكس على طريقة التدريس و على استيعاب الطلاب

غير زي ما حكيت ان مرات الادارة او المناهج ما بتسمح للمعلم انه يبدع و يغير

هاد الشي اللي صدمني لمّا الحمد لله ربنا اكرمنا انّا نعرف بالدين اكتر, و بعد موضوع الاحاديث الضعيفة اللي كتبت عنه, فعلا كانو يعلمونا معلومات غلط :$

الله يجزيك الخير...وهيك لا يمكن ينسو المعلومه و بترتبط بحدث معين و ممكن بهالطريقه لو شخص مش فاهم جزئية معينه وجود طلاب اقل بعطيه الفرصه يسأل و يستوعب ..عجبتني الفكرة :)

شكرا الك عالتعليق, و انا كنت حابه تكتب اكثر, خصوصا انك بالمجال التعليمي :)

غير اني بحب التعليقات الطويله :)
بتفتح مجال لنقاش جديد و بنذكر فيها نقاط جديده

 

جعفر

اهلا و سهلا بالمدون الجديد جعفر :)

التعليم مهم جدا في حياة الافراد وفي حياة الشعوب

امبارح كان في برنامج عن الشهيد عمر المختار و كانت بدايته بالتعلّم, و ان والده وصّى العائله انه يتعلم الدين, وحسب ما حكا المذيع انه بعمر صغير صارت حصيلته العلميه بمختلف العلوم كبيره وهاد اثّر بشكل ايجابي على شخصيته :)

الله يجزيه كل الخير هالاستاذ ...لكنك عشت الدور بزياده كأنه :)
زكرتني بأخوي الله يسهّل عليه, كان اله كتير حركات من هالنوع

ان شاء الله بيجي اليوم اللي بتحقق فيه حلمك..كتير اشياء بالحياة بتحدّمن طموحاتنا و لكن المهم تضلّها ببالنا وبأول فرصه نحقق ما يمكن تحقيقه منها

صباحك سعيد :)

 

LUNAR

الله يسعدك يا رب .... ماهو بس ما حد يتركّى علي بالمسجد و اركز شوي بطلع مني :)))

ما شاء الله...يعني استاذ دين :) حلو كتير
امين يا رب و يجزيه كل الخير ان شاء الله

سبحان الله.. لانه كان منيح اجالو دعاوي برمضان من غير ما يعرف :)

هههههههه...بتعرف اني عدّت قراءة المواد اكتر من مرّه....انو شو دخل O_o

Fazlakat

للاسف هاد اللي بصير, تجميع علامات مش اكتر
المهم التقدير مش مهم كم مستوعب من الماده, و نفس الشي بالشغل بعتمدو عالتقدير بالدرجة الاولى

الله يصلح الحال
كل عام وانت بخير ...ورمضان كريم :)

 

الكيل بمكيالين

جد والله اشي مؤسف هالشي
للاسف في مدرسات الله يهديهم, فاهمين التدريس فتونه و صوت عالي و كلام زفر, زكرتيني بمدرّسة العلوم بالصف العاشر كنت منتقلة جديد عالمدرسه,من اول يوم و هي بالممر بدت تسب و تغلط و تصرخ

اخدت اجازه امومه في بداية الفصل الاول و رجعت عالفصل الثاني, كنت جايبة 100 بالعلوم عند البديله, بتحكيلي هيني رجعت لاشوف من وين جبتيها هال 100, و جبت عندها 100 ولكن هالمرة بدون نفس و مش مبسوطه عليها كنت :(

انا كمان كنت اكره المدرسة, وزي ما حكيتي الاشي الوحيد الحلو كانو الصاحبات, واللي لهلأ لساتنا بنتلاقى :)

معلش استرسلت بالرد...بس فتحتي جروحي و ذكرتيني باللذي مضى :)

 

Jafra

اهلا يا قمر...انا بخير والحمد لله
انتي كيفك ؟؟


من متابعه مدونتك و متابعه اخبار المشاريع و الفيديوهات و النشاطات والاشياء اللي بتعمليها للطلاب طبيعي جدا انهم يحبوكي و يتعلقو فيكي وبالماده, ما احلاهم وهمه ما بحبوكي اصلاطن :)

و معك حق انك تحسّي بهالاحساس لانه نتاج تعبك و سهرك

التحديث مهم جدا و كتير غلط ان المناهج و الاسلوب التعليمي يضّل نفسه من سنين و ما يتغير ولا يتطور

ان شاء الله..ولا يهمك
و عفكره - مش تحميل جمايل - بس كتير بتزكرك بدعائي :)

أشرف محيي الدين

صباح النور أشرف :)

ما حد بقدر ينكر ان شخصية الرسول صلى الله عليه وسلم مميزة جدا, و الدلائل كثيرة منها انّا لهلأ بنتعلم من الرسول الكريم و لهلأ بنتأثر بكل ما هو منقول عنه, فتخيل التعامل المباشر مع الرسول كيف !!

معك حق...وللاسف في معلمين ما بخاطبو عقل الطالب حتى, مثل اللي حكت عنهم الانسة كيّاله :$

 

انا لو بدي اتذكر، كان في مدرسة انجليزي درستني بالصف السادس، و كانت هي الوحيدة اللي علمتني الإنجليزي صح، و خلتني ممتازة جداً فيه من جميع النواحي، بوقتها و لما كبرت.
بالجامعة، كان في كتير دكاترة الهم تأثير علي، في واحد درسني مادتين أول فصل و كان الإنسان اللي نقلني من مرحلة المدرسة لمرحلة الجامعة و فهمني كيف انو الحياة الجامعية ما الها دخل بالمدرسة ابداً، و لهلأ انا و صاحباتي بنتذكر فضله و بنذكره بالخير.
كمان كان في دكتور دين، ما شاء الله كان رائع، و كان الو تأثير كبير على كل اللي درسهم، و أنا بعترفلو بالفضل بكتير أشياء، حتى انو كتير بنات اهتدو و تحجبو على ايدو، بس للأسف، الجامعة طلعتو لما لاحظت هالشغلة، آل يعني ممنوع التعرض لمواضيع و حوارات دينية خارجة عن المنهج، عشان ما يصير في حساسيات دينية و أبصر شو و من هالهبل... بس ضل تواصانا معه حتى بعد ما طلع، لانو أعطانا رقم تلفونه و حكالنا نلجأله إذا احتجنا لأي مساعدة دينية، و كتير بنات صارو يروحو عالمسجد اللي بخطب في عشان يسمعو خطبه و دروسه.
الله يجزيكي الخير ذكرتيني فيه :) و الله يجزيه الخير عن كل الأعمال الحسنة اللي بعملها

 

Mrs H
الله يجزيهم كلهم كل الخير ان شاء الله, و بالنسبة لمدرّس الدين
الله يجزيه كل الخير هالاستاذ, و ربنا يتقبّل منه

ما بعرف ليش الادراة بالعاده بتكره هالتصرفات و لكن لو تصرّف مخلّ حصل بتتعامل معه بأهون الطرق هاد اذا اعترفت بوجوده اساسا

يلاااالحمد لله اللي ترك أثر في نفوسكم
لتضلو تدعوله و تدلو عليه

امين يا رب :)

 

ويسبر..
أي حلم هذا اللي أحققه.. ما راحت علينا.. و بدل الجينات درست هندسة كمبيوتر و تخرجت و اشتغلت و زهقت الشغل..

 

معناته فرصة تروحي وتخليلي حجتين يتركو عليكي من هون ومن هون

:D

اه والله كان قمة بالادب والاخلاق , الله يسهل عليه وين ما كان

بس كانت عنده شغلة ما بعرف ليش
مرة حكالنا انه اذا شفتوني بالشارع ما حدا يسلّم علي
:|

مع انه هو مرة شافني وهو سلّم علي

فصمني
:D

الاستاذ ابو ال3 مواد ترقّى وصار سكرتير المدير

ولا تسأليني كيف حتى
:D

 

سؤال...انت حكيتي انو زغلول النجار راح يعطي دروس ، بأي مسجد؟

 

جعفر حجير

ليش لأ...انت خلّي الموضوع ببالك وما بتعرف, مش يمكن يجي اليوم اللي تقدر تدرس جينات بيوم

يعني المفروض تمشي بالحياة و نستنى الفرصه
و بعدين شو زهقت!!
لساا قدامك طريق طوييييييييييييييييييييل :)

LUNAR

يتركّو!!!
قصدك بلاش ابدع و افكاري تضلّها محشوره :(
الله يسامحك
امبارح اول ركعه اجو حجتين و حشروني, قلت لأ شكله الدعوة زبطت, بس لمّا سجدنا و قمنا كل وحده اخدت مكانها :)

الحمد لله

O_O له...طيب ليش يعني؟؟

يمكن هو بدو يحدد مين يحكي معه :)
يلا مبروك, انت من الناجحين طلعت

اهاااا سكرتير مدير...احكي هيك, هاد واصل شكله :)

 

Dr.Mohammed

ان شاء الله ابتداءا من اليوم و حيستمر لخمس ايام او اسبوع حسب اجازته

المسجد اسمه مسجد ابو غزال, في ضاحيه الامير راشد
قريب من نادي السيارات الملكي
مقابل العيادات الخارجيه للخدمات الطبيه

العشا بنصليه بعد الاذان بربع ساعه و المحاضره بعد اول 4 ركعات من التراويح :)

 

ويسبر
صراحة ما أتوقع انو بعد الفطور بلحق أوصل من نابلس لمسجدكم.. يمكن أتأخر 5 دقائق على الدكتور زغلول و محاضرته.. فيا ريت تسجليلي بس أول خمس دقائق
ههههههههههه

بالعربي بدنا مقتطفات بسيطة من المحاضرة :)

 

الله يسامحك لو جربت كان وصلت :)
تأخر الدكتور نص ساعه

طبعا عأساس ان موضوع انّك تيجي تفطر عنّا مش مطروح اطلاقا , راحت عليك الباستا و شوربة المشروم

كتبت المقتطفات اللي تزكرتها...ان شاء الله يكون فيها النفع :)

 

أنا أول مدرسة إنجليزي درستني بتذكر كنت بالصف السابع :بمدارس السعودية ببدو يدرسوا إنجليزي بالصف السابع: كانت رهيبه شاطرة وأسلوبها بالتعامل والتعليم حلو.. كانت تعطي أشياء زاكيه :شوكلاتة وبسكوت: للي بسوو مجهود أضافي :يطلعو جمل عن كلمة جديدة أخدناها: وجد هية حببتني بالمادة كتير..
هية كانت واحده من الأسباب اني درست :أدب إنجيليزي: بالجامعة..

 

الحمد لله اللي كان بحياتك مثل هيك مدرّسة تشجعك و تنمي حب الماده عندك

في كتير ناس خلصو مدرسة و جامعه و بالعكس الاثار كانت سلبية بحياتهم , وشكل المدرس كان مشوّه

بحكي لماما عن الموضوعقبل كم يوم, صارت تحكيلي عن ذكريات ايام المدرسة, الله يعينها على المعلمات و المدرّسين اللي مرو بحياتها
جد قصص بتشيب الراس :(