Things I Like To Whisper About

Would You Hear Me Whispering

لكل امرئ من اسمه نصيب





قبل كم من شهر صار حوار بين قريبتين كبار بالعمر حول الاسماء, القصه عن بنت طول حياتها معترّه من هي صغيره و تزوجت و انفصلت عن زوجها, فأخدوها اهلها عند شيخ حكالهم ان اسمها مش مناسب ولازم يغيرولها اسمها, وفعلا غيروه و فجأه انفتحت ابواب الهنا قدامها و طبعا تزوجت مرّه تانيه - لانه هاد بنظرهم قمّه الهنا للبنت - وصارو ينتقلو من قصه لقصه تأكد عن هالموضوع

من انا صغيره عرفت ان بابا اول ما نولد ضلو يبكي و اخدوه عند شيخ, و حكالهم لازم تغيرو اسمه و يكون الاسم ببدا ب "عبد" بابا كان اسمه "فؤاد" و سموه "عبد اللطيف" - ايون عبووود اسمه عبد اللطيف على اسم بابا :) - المهم و لأجل الصدف ماما صاير معها نفس الشي :) , بس ماما القصه كانت من حظها, هلأ سيدو -الله يرحمه و يرحم جميع اموات المسلمين - كان بدو يسمي ماما "مسعوده" على اسم والدته فتيتا حكتله لا وحرام عليك, فسمّاها "دنانير" :$ ال لانه سنة ما ماما انولدت كانت الدنانير جديد نازله عالبلد , و ضلت ماما تبكي اخدوها عند شيخ, حكالهم غيرو اسمها لاسم ببدا بحرف السين و سموها "سلوى" :)


قبل فتره حضرت محاضره بعنوان " الشباب و العادات السبع" للاستاذ صالح الحموري المحاضره كانت عن الكتاب "The Seven Habits of highly effective people" وعن النظرة الايجابيه و العادات اللي بتساعد الانسان على التقدم بمختلف نواحي الحياه, من ضمن المحاضره حكالنا عن منطقه بأفريقيا - مش متأكده من الموقع - المهم عندهم اعتقاد بأن اللي بنولدو بيوم معين من الاسبوع بكونو سعيدين الحظ وبسموهم اسماء معناها منيح و اللي بنولدو بيوم تاني معين من الاسبوع بكونو تعيسين الحظ و فاشلين وبسموهم اسماء بتدل على هيك, و بعد مرور سنين عملو دراسه ليشوفو كيف عاشو هالمجموعتين, وفعلا كل اللي اسمائهم منيحه عاشو حياة سعيده وكل التانيين عاشو حياة تعيسه, و منهم بس بسبب الاسم الكل اتعامل معهم على اساس انهم تعيسين و تشائمو منهم.

هلأ بأختلاف التفاسير العلمية النفسية و الغير علميه - زي نظره الكبار عن موضوع الاسماء و تأثيرها على "نصيب" الاشخاص- هل بتؤمنو بأن فعلا "لكل امرئ من اسمه نصيب" ؟؟؟ و هل بتحس/ي ان اسمك اله تأثير على مجريات حياتك؟؟


32 التعليقات :

موضوع جميل
:)
لكل حدا من اسمه نصيب
نعم لنفس السبب اللي زكرتيه
الانسان بتبرمج داخليا انه هو
بشبه اسمه او انه فيه صفة من اسمه
اخوي مثلا اسمه حارث
من فترة عم نسمع مع العائلة شرح حن حديث النبي عليه السلام
"أصدق الأسماء حارث وهمام
كان فيه وصف للي اسمه حارث
اصابنا ذهول حقيقي من شدة شبه الوصف بطبيعة اخوي
كأنه عم يشوفه ويحكي عنه

بالنسبة الي انا
بحب أسمي وبحس انه من الاشياء الجميلة
جدا وما بقبل يكون الي اي اسم تاني :)

 

ربى حجازي

مسا الورد..او صباح الورد ربى :)

فعلا انا اكتر من شخص قابلتهم و حسيت ان اسمهم ملائم لشخصياتهم, ما بعرف اذا في تفسير علمي بحت للموضوع, لكن سبحان الله في ناس بكون الاسم صح الهم

اول مرة بسمع هالحديث :$...اسم حارث حلو و مميز

انا اجمالا بحب الاسم اللي بتكون من 3 حروف :) بحس ان شخصية صاحبة هالاسم مميزه, جد والله مش مجامله

و عفكره اسمي مش من 3 حروف , ومع هيك برضه بحب اسمي وما بتمنى انو يكون اسم تاني :)

 

اعتقد انو الشغلة نفسيه مش اكثر ، يعني ممكن الاسم يأثر بالشخص فقط في حين اقتران هاد الاسم بشخصية عظيمة او كمثل أعلى ، يعني الواحد مثلا اذا كان اسمو عبد الرحمن او اسم احد الانبياء فاذا ضل هذا الشيء ببالو انو اسمو يقترن باسم نبي و بالتالي يجب على تصرفاتو انها تتوافق مع الاسم اللي حاملو فباعتقادي انو هاد راح يغير بنمط حياتو

هلا من ناحية تانية ، ما اعتقد ابدا انو الناس طريقة معاملتها بتتغير بتغير اسم الشخص ،شو ما كان اسمو يكون

ممكن يكون الاسم هو بوابة لبداية الحديث مثلا ، زي ما بسمو
ice breaker
بس مش اكثر ،يعني لو كان اسم شخص مميز ممكن اني ابتدي الحديث معو عن معنى اسمو او مثل هيك

بس هاد الحديث لقيتو عالنت بناسب الموضوع

قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( تَسَمَّوْا بِأَسْمَاءِ الأَنْبِيَاءِ ، وَأَحَبُّ الأَسْمَاءِ إِلَى اللَّهِ عَبْدُ اللَّهِ وَعَبْدُ الرَّحْمَنِ ، وَأَصْدَقُهَا حَارِثٌ وَهَمَّامٌ ، وَأَقْبَحُهَا حَرْبٌ وَمُرَّةُ )

 

طب انا دادي سماني اول شي سنكوح وبعدين ودوني لشيخ سماني قط البكتريا ؟؟؟ شو يعني حياتي كلها طفيليات ؟

 

انا سمعت بهاي المقولة قبل هيك
بس للاسف بدون احداث مرافقة
لهيك لازم الواحد ياخد حذروا لما يسمي
عندي قائمة من الاسماء بعتولي اياها بالايميل اغلب الاسماء فيها بترمز للشيطان او اله او افعال بذيئة
بس ما سمعت شو صار لاصحابها
بصراحة
بس هيك زودتينا بالامثلة
انا اسمي بسيط
و بحبو:)

 

Dr.Mohammed

هو اعتقد انه نفسي, زي الطفل اللي بتضلك تقنعه و تحكيله انو ذكي, تلقائي بصير يتصرف على هالاساس و بصير يهتم اكتر و العكس برضه , دائما بنصحو الاهل ما يحكو للطفل انه غبي لانه بصير يتصرف على هالاساس

جميله فكرة ربط الاسمي بشخصيه معينه :) ومش غلط بالمره هالتفكير

صح...بس مرات بحس الناس بتكره اشخاص بأسم معين بس لانهم بحملو اسم شخص همه بكرهوه...كتير بتصير هاي :$

شكرا عالحديث...انا بعرف بدايته بس :)

قط البكتريا

قلتلي " دادي" اه ماشي..الله يرحمهم جدودنا :)


والله يا صديقي انا حاسة انو " دادي" و الشيخ مش كتير بعزّوك :)

 

Jafra

هو واحد من حقوق الابناء على اباءهم انهم يسموهم اسم منيح
لكن في ناس بسمع عنهم, خصوصا بمصر بس يتوفى اكتر من ولد الهم بس يجيهم ولد جديد بسموه اسم مش حلو علشان يعيش :)

اه وصلني ايميل بهيك اشي, الله اعلم اذا صح ويلا لأ :$

اكيد اسمك بجنن و بنحب.... اذا من غير ما نعرفو بنحبك :)

 

ميحباااا

انا مع إنه لكل شخص من إسمه نصيب
برغم إنه الإسم هوه مجموعه ورق او أحرف او حتى ارقام عشوائيه صارت إلنا

لكن,, من اللي شفته حوليّ ومن تشابه القصص للناس اللي اسمائهم متشابه,, ايقنت إنه الواحد يتأنى بس يختار لإبنه إسم

 

Um Omar

يا 100 الف اهلا وسهلا...شوووو طولتي علينا الغيبه هالمره, الحمد لله على السلامه و ان شاء الله اللي اخرك عنا يكون كل الخير

صح مرات بتزبط...ومرات بتنصدمي بان حامل هالاسم مختلف عن الباقي...كأنه فعلا قانون و عكسه هو الخطأ :)

عفكره....انا بحب اسم عمر كتير :)
الله يخليلك اياه يا رب

 

مرحبا ويسبر

أنا صراحه مابحب اسمي كتير بس عمري مافكرت بوجود علاقة بين اسمي وبين الصعوبات اللي بتمر عليي في الحياه بس بعد ما قرأت إدراجك بديت أفكر إني لو غيرت اسمي يمكن حظي يتغير :)

نهارك سعيد

 

أشرف محيي الدين

اهلا وسهلا أشرف

بالعكس...ما شاء الله اسمك اله معنى كتير جميل, واسمك مع اسم الوالد او اسم العيله مش عارفه " أشرف محيي الدين" جميل جدا :)


في مقوله بحكوها الكبار " بنولد الولد و بنولد اسمه معه" سبحان الله بكونو مجهزين الاهل اسم وعأخر لحظه بتغير

فلأ لا تغيره...

نهارك اسعد

 

:)

ع فكره انا بآمن بهاد الشي
خليني أعطيكي شوية ملاحظات

أحمد: دايمن عصبيين شرار ونار
إيمان: دايما شخصياتهم قويه ومعنعنات بالعربي
صهيب: مخهم أعوج وصعب تتفاهمي معهم

معن: الاعتقاد دايمن انهم هبايل او برياله:) خصوصا وهم صغار

يوسف: دايما حلوين:)

هلأ بالنسبه لتغيير الاسم، مرة ابن عمي غيروا اسمها وهي صغيره عشان تبطل تبكي


صح وشو بالنسبه للناس اللي الهم اسمين؟ واحد رسمي وواحد متعارف عليه؟

وبسمع انو الناس اللي ما بيعيشلهم اولاد بيسموهم اسماء حيوانات مثل عقاب ذيب (على فكره واحد من هادول الناس حكالي قصتو شخصيا)

هلأ الخلاصه: بما انو عندي اسم امك وابوكي انا ناويه اعملك عمل:) بس الحمدلله اللي رست على سلوى بالاخر

 

أكيد الاسم إلو تأثير على صاحبو... يعني أنا ما بعرف إذا عنجد ممكن يأثر على حياة الانسان انو يكون سعيد أو تعيس، بس كتير سمعت عن قصص زي اللي حكيتها عن أسماء إمك و أبوكي الله يخليلك اياهم....
بس أكيد من حق الابن على أهلو انهم يسموه اسم مناسب و معقول و الو معني منيح و ما يحطو بمواقف محرجة مع الناس بالمستقبل، لانو هاد الاشي ممكن يأثر على نفسيتو و شخصيتو...
و بجوز سمعتي عن القصة اللي صارت مع سيدنا عمر بن الخطاب (منقولة):
جاء رجل إلى عمر بن الخطاب"رض" يشكو إليه عقوق ابنه، فأحضر الخليفة الولد وأنَّبه على عقوقه لأبيه، فقال الولد: يا أمير المؤمنين، أليس للولد حقوق على أبيه ؟ فقال: بلى، أن ينتقي أمه، ويحسن اختيار اسمه، ويعلّمه الكتاب، فقال الولد: إنَّ أبي لم يفعل شيئاً من ذلك، فأُمي زنجية كانت لمجوسي، وقد سمَّاني جُعلاً"خنفساء"، ولم يعلّمني من الكتاب حرفاً، فالتفت عمر إلى الرجل وقال له: لقد عققته قبل أن يعقك وأسأت إليه قبل أن يُسيء إليك.
أنا الحمد لله رب العالمين راضية عن اسمي، و عمري ما حسيت الو تأثير علي لا منيح و لا عاطل...
و الله أعلم :)

 

والله همسة مش دايما زابطة هالقصة بجيبلك ناس أسمائها من أفضل الأسماء وتعذبو في هالدنيا لحكو بس, بالأخر القصة نصيبك وتعبك وشو اللي أنت بتختارو بحياتك

 

انا ما بعتقد في علاقه بين اسم الشخص وتأثيره على مجريات حياته. بس الاسماء الها ثقافه معينه فمثلا في بلاد الشام ناس كثير بتسمي عبدالرحمن وعبدالرحيم وعبداللطيف بس ما حدى بسمي عبدالجبار مع العلم انه هاد الاسم ممكن بسهوله ينوجد بالعراق. في بلاد مثل المغرب وتونس (مع احترامي لأهل البلدين) الالتزام بالدين اقل من دول زي الأردن وسوريا مع ذلك اسماء بناتهم دائما اما خديجه او عائشه او فاطمه (حتى وان كانوا يعيشون في اوروبا) وهاي الاسماء للأسف لم يعد الجيل الجديد في بلاد الشام يسمي بها.ـ

 

و الله يا ويسبر موضوعك حلو كتيير
بتذكر ماما قالتلنا وقت كانت صغيرة قديش كان عندها عقدة مع اسمها
ماما اسمها بلقيس و كان اكره ما عليها حد يناديها في
و بدها تغير اسمها و تخليه رولا و لا ابصر ايش و الله ناسية شو قالتلي
المهم كانت متعقدة رسمي من الموضوع
مع انو اسم حلو و راقي
بنظي هي ملكة و لها من اسمها نصيب و الحمدلله
و انا بنظري صح
انو كل واحد الو نصيب من اسمو
و ما بحب احكي عن حالي احين تعدو تقولول شايفة حالها بس امبلى بحس الي دور في اضفاء الفرح على البيت
و هاي الي من اسمي نصيب و الحمدلله

 

مياسي

لا حرام عليكي....سيدو اسمه احمد وكان طيوب و بجنن ومش عصبي بالمره :)

ايمان...في منو :) الاغلب هيك بكونو :)

صهيب ومعن...ما مر علي حد اسمه صهيب او معن

يوسف....مش دايما :$

كبيره بالعمر ويلا صغيره؟؟؟؟ يعني لسا لهلأ بعملو هيك ؟؟

ما بحب هالشي انا.... والله لخبطه اسمين, بالمدرسه اسم و بالبيت اسم والاوراق الرسميه اسم...اشي بلخبط

هههههههههه....عمل مرّه وحده , يلا اللي منك مقبول
اه شفتي...مسعوده و دنانير :)

Mrs H

تسلمي يا رب و يخليلك حبايبك و اهلك....اه هالقصص كتير كاينه منتشره من زمان
هلأ ببكي البيبي بروحو عالدكتور مش عالشيخ :)

حسب جوجل الله يخليه طلع معنى اسمك كتير حلو :)

 

Ahmad Hamdan

معك حق...هي مش قاعده بس في ناس بتزبط معهم :)

Jaraad

التأثير على بعض الناس هو نفسي, في ناس بتشائمو او بتفائلو بالاسم وفي ناس ما بعتبرو الاسم دلاله على شي

فعلا كتير بسمو هالاسماء بتونس والمغرب ..

اذا في حد بسمي بهالاسماء هلأ فبكون على اسم الجدة بالعاده :)

 

Farah

الله يحلي ايامك يا قمره :)

بلقيس اسم كتييييييير حلو... وجميل تعبيرك انها ملكه :) الله يخليكم لبعض

ان شاء الله يكون في الك من اسمك نصيب و تكون حياتك فرح على طول :)

 

بعتقد الإسم ممكن يأثر على حياة حامله مش من ناحية الشخصية، بس ممكن زي ما حكيتي إنه الأشخاص حوله يتعاملوا معه بطريقة مختلفة تؤدي إلى اختلاف شحصيته مع مرور الوقت زي المثال تاع أفريقيا.
مثلا صاحبتي عايشة في انجلترا دخلت وحدة عندهم عالمحاضرة، أيوا يا فلانة عرفينا على حالك... أنا اسمي استشهاد!!! هلأ ماشي الشهادة شرف لأي مسلم ومن المعاني السامية في اللغة، بس الإسم (خصوصاً مع اللباس الإسلامي المتشدد) بوحيلك إنها جاية تفجر الدنيا، وبالنسبة لناس ما بعرفوا عن الإسلام أي شي، بصير الإسم مصدر تهديد، شو استشهاد!
أنا بحب إسمي، مع إنه مش كتير مألوف لبعض الناس، بس من 3 أحرف ;)

كيفني وأنا عم بكتب بالعربي؟ إجيت أكتب بالانجليزي لقيت الكل كاتب بالعربي انخزيت، صارلي ساعة عم بطبع اتخيلي ينمحي بموت :S

 

Rand

يا مسا و صباح الفل على احلى رند :)
احلى عربي...شو ينمحي ما ينمحي
بعيد عنك يا قمر

بالزبط...استشهاد اسم حلو و لكن بين الغرب اكيد بشكل مشكله كبيره لصاحبته

اسم بنت صاحبتي اللي بحبها كتير رند :) و زي ما عرفتي انا اي اسم ب 3 حروف بحبه :)

 

حكاية ابوك تمام زي حكاية والدي الله يرحمه، لما انولد كان اسمه يوسف وضل يبكي ونصحهم الشيخ بتغيير اسمه قال اسمه ( مش على هواه ) فسموه محمد بس ما تنازلوا عن الاسم الاول وسموا عمي يوسف كمان مرة بس هالمرة الاسم اجا على هواه!
هسه انا ما بعرف اذا لكل امرئ من اسمه نصيب ولا لأ احيانا بتكون زابطة واحيانا الاسماء ما الها علاقة بالشخص ابدا. الي ابن اخت اسمه عبد الرحمن بس اسم لله عليه شيطان ومخرب! حكيت لاختي لازم تغيري اسمه ل عبدالجبار او عبدالقهار بيلبق عليه اكثر.

 

الكيل بمكيالين

ما بعرف شو كان تفسير الشيوخ بالزبط, لكن المشكله ان بس يتغير الاسم الطفل ببطل يبكي :)
في ناس بحتفظو بالاسمين مع بعض, لكن برضه الموضوع فيه خربطه بصير

حتى عبود...عبد اللطيف ابن اخوي, دمااار شامل حبيبي :)

صباح الورد

 

انا بوافق د.محمد انه الشغلة نفسية
واللي بحس اسمه حلو بيعرف معانيه بيمشي معه

هلق عنا بالعيلة صار تغيير نوعا ما ع الاسماء

فاخوي الكبير .. ابوي كان بده يسميه آدم .. بحب حرف الألف .. بس امي ما عجبها .. وخلته يسميه الحسين .. ببدا بالالف والاسم مميز وبتحسي صاحب هالاسم شخصيته قوية وقيادية .. وهيك اخوي

نيجي لاختي .. نولدت بالاسراء والمعراج .. لهيك قرر ابي انه يسميها اسراء .. بس بهديك الفترة توفت خالتي الله يرحمها بالسرطان .. وسموها ع اسمها .. جنات
واسمها لهلق مميز .. جنات المحروق

نيجي ع تعيس الحظ .. انا امي كانت بدها تسميني نور .. بس هالمرة ابوي ما وافق .. ولحبه بحرف الالف سماني احمد .. بس كمان اسم احمد حلو .. بس مش مميز متل ما بدي
:(

 

Ahmad Al-mahrouq

وانا معكم انه التأثير نفسي بالعاده, على صاحب الاسم وعلى تعامل اللي حواليه معه

الحسين...فعلا فيه قوه الاسم
جنات حلو برضه...مميز

احكيلك بصراحه...احمد احلى من نور :$ ما بحب الاسماء اللي بتتسمى للشباب و للبنات بنفس الوقت , لانه مرات بتحسه اقرب لشي اكتر من التاني, ونور بحسّه لبنت :)

غير ان اسم احمد حلو و قديم جديد و طبعا احلى اشي انه اسم النبي صلى الله عليه وسلم :)

 

أنا اسمي ميس و معناه الشجرة التي تأكل منه الرحالة و انا انسان ن
معطاء و ودود كالشجرة التي تأكل منها الرحلة و كل عام و انت بخير
:P:P
مش لهدرجة يعني

 

Mais

اهلا وسهلا بميس :)

اول مرّه بعرف معنى الاسم...هههههه جميل انك بتعرفي هالصفات عن نفسك :)

و انتي بالف خير يا رب :)

 

صح اسم احمد حلو .. بس مش مميز كتير .. نص العالم اسمهم احمد ومحمد ومحمود

 

صراحه ما بعرف.. مش قادره أعطيكي رأيي بهالشيئ..
بس إسم رولا معناه:
إسم قبيله عربيه..
مأخود من بيت الشعر:
رولا عرب قصورهم الخيام ... ومنزلهم حماة والشآم

 

اول مرّه بعرف معنى الاسم :)

اذا المقولة صح...اذا انتي حيكونلك نصيب من صفات هالقبيله :)

 

يمكن عشان هيك طالعه بحب أهاوش خاصة وأنا سايقه هههههه :)

 

ههههههههههه...يمكن :))

عجبتني أهاوش...زابطه مع قبيله :)