Things I Like To Whisper About

Would You Hear Me Whispering

زغلول النجار....1



مثل ما خبرتكم قبل كم يوم بأن الدكتور زغلول النجار حيكون ضيف عالمسجد اللي بصلّي فيه التراويح, و ان شاء الله النيّه انه يضل يجي من 5 ايام لاسبوع و انا حابه اني الخص اهمّ الاشياء الجديده اللي بحكيلنا اياها بالثلث ساعه اللي بين ركعات صلاة التراويح, حكتب المعلومات الجديده عالقليله علي وحكتب اللي بقدر اتذكرة و ان شاء الله النيّه اني حركز كتير :)
اكيد في منكم من هو اعلم مني بالدين , فلهيك حتكون المعلومات قديمة الهم , ريت اذا بعرفو اكتر عن الموضوع ينورونا احنا كمان :)

امبارح كان يحكي بشكل عام عن رمضان, و معظم المعلومات اللي بنعرفها عن فضل هالشهر الكريم و مضاعفة الاجر في الحسنات, وعن نزول القرآن بهذا الشهر و عن الجهاد و الغزوات والفتوحات اللي صارت بهذا الشهر

من ضمن الحكي في معلومتين حكاهم الدكتور الله يجزيه الخير انا اول مرّه بعرفهم

اول معلومه بموضوع قرأة القرآن الكريم و تدارسة, انه من السنّه انّا نتدارس القرآن بالاضافه لقراءته اسوة برسول الله صلى الله عليه و سلم , كان الرسول الكريم يتدارس القرآن هو و سيدنا جبريل كل رمضان,المعلومة الجديده هي ان مضاعفة الحسنات تختلف بحسب طريقة قراءة القرأن, اللي بقرأ القران يكون في ملك يسجّل قراءته ويضاعف الاجر 10 اضعاف,و اللي بقرأة مع تدبير بعض المعاني و البحث عن تفسير بعض الايات بكون في ملكين يسجلو قراءته و يضاعف الاجر 20 ضعف و حكالنا الشيخ عن فضل قراءة القرأن مع تفسيبر معانيه بشكل كامل بكون في 4 من الملائكة بسجلو و يضاعف الاجر 70 ضعف , للاسف مش متزكرة شي من الحديث :$ وما قدرت اتأكد من صحته, ولكن الله اعلم ان الدكتور مستحيل ينقل حديث ضعيف.

الاشي التاني و هو بختص بعلم الفلك, حكالنا الدكتور ان بداية الشهر الهجري تقاس بتكون الهلال, وبالعادة الهلال يمكن رؤيته وقت المغرب, لهيك يعتبر اليوم بدا من المغرب, فأول صلاة باليوم هي المغرب و بتبعها العشاء و بعدها الفجر, وصلاة الفجر هي الصلاة الوسطى وليس العصر...انا اول مرّه بعرف هالمعلومه, علشان هيك بنصلي التراويح بس يعلن شهر رمضان, لانه يعتبر بداية اليوم بالشهر


وحكا الشيخ عن لزوم توحيد يوم الصيام, وان اسلامنا دائما يدعو - الامة الاسلاميه - يدعونا للوحده ويشبهنا بالجسد الواحد, ولكن احنا ما بنستغل هالشي و دائما متفرقين, مع ان في اشياء كتير بدينا بتوحدنا و بوحدتنا اكيد حنكون اقوى

________________

اشي تاني عجبني حكاه الشيخ السابق قبل بيوم, اللي حكا عن اثر المعلم في حياتنا, حكا انه من اعلى صوت في بيوتنا نحدد نهجنا بالحياة و هل تربيتنا صحيحه او لا, فهل صوت تلاوة القرآن هي الاعلى او صوت دروس العلم والنقاشات فيها, وحتى لو تلفزيون وهو الاغلب صاحب الصوت الاعلى ببيوتنا, هل هو صوت قرآن او صوت شيوخ افاضل دروسهم وبرامجهم ويلا صوت اغاني و افلام!!

12 التعليقات :

طبعا ً زغلول النجار ذخر للأمة بكل معنى الكلمة
أسلوبه شيق و علمه غزير

و تواضعه ما يعجبني فيه أكثر شيء

بصراحة نيالكم إنكم حتشوفوه
:)

بالنسبة للصلاة الوسطى المسألة فيها قول إنو صلاة العصر هي المقصودة

أنا برناح لرأي إنها صلاة الفجر
لأن الليل سابق النهار كما في القرآن العظيم

ويسبر ... اكتبي رؤوس أقلام و أول ما ترجعي اكتبي التفاصيل لأنو حتنسي
;)

بانتظار المزيد إحنا
:)

 

Haitham

ان شاء الله لازم اخد ورقة وقلم واكتب , لانه حكالنا اليوم حيتعمق اكتر بموضوع الاعجاز العلمي, و اختك يا دوووب تحفظ اخر جمله :$

برضه توضيحك لموشوع صلاة الفجر فيه وجهة نظر...والله اعلم طبعا

ع الهامش ...الحمد لله على سلامة الغياب مسبقا :)
يوصلو بالسلامه ان شاء الله

 

ما بعرف ليه حسيت حالي من كوكب تاني .. بس مين هاد؟

ع كل نحن بانتظار المعلومات اللي رح تنقليلنا ياها .. لحتى تكون الفايدة للكل

شكرا ويسبر

 

ماشاء الله يعجبني اسلوبه روعه
وكيف يشرح و يسرد الاحداث يخلي الواحد يعيش مع القصه
في انتظار ما ستنقليه لنا مما سيمليه عليكم
تحياتي
^_ ^

 

والله رائع ...انا بحبو كتير وبحب طريقة ربطه العلم بالدين ...والل يجزيكي الخير انتي كمان ح تنقليلنا شويه معلومات اكيد بحاجتها....معلومه صلاة الفجر جديده علي...واقتنعت باسلوب شرحه للمعلومه


الله يجزيكي الخير مرة تانيه

يسعد مساكي وربنا يتقبل صيامك وقيامك

 

Ahmad Al-Mahrouq

لااااااا...معقول ما بتعرفه!!

هو دكتور مصري متخصص في الاعجاز العلمي في القرآن
ما شاء الله عليه عنده اسلوب رائع لشرح الايات و ربطها بالاكتشافات العلمية اللي بتحدث بعصرنا الحالي


دور عالنت و اقرأ مواضيعه...كتييير مفيده

 

سفيرة المحبة

اهلا وسهلا بك اختي في مدونتي المتواضعه :)


فعلا اسلوب الدكتور زغلول النجار اكثر من رائع في توضيح وتفسير الايات

لقد تم كتابة تلخيص لدرس اليوم, اتمنى ان تنال اعجابك :)

نورتيني

 

Nissan

اه ما شاء الله عليه, بحكي بكل سلاسه وهدوء و بافكار مترابطه جدا بتخلينا نعيش معه وما نفوت اشي

و طول ما هو بحكي و بشرح واحنا نحكي " سبحان الله"

امين يا رب..واياكم ان شاء الله
مسا و صباح الفل و الياسمين
منّا ومنكم ان شاء الله

 

" وبالعادة الهلال يمكن رؤيته وقت المغرب"
This is wrong, you can see the crescnet moon anytime of the night OR DAY. It's just a matter of reflection of light from the Sun

Zaghlool is wrong in more than 90% of the junk he says. Ya3ni Ramadan kareem, ya rait nirta7 min el dajjaleen elli zayyoh. El moshkeleh inno i7na nas tayybeen oo bin7ib nsadde2 kul ishi

Ma tiz3ali minni, had ra2yee el shakhsi oo ana kteer 7azeen 3ala 7aletna ka muslimeen.

Asef kteer, ma tiz3alo minni

 

انا بسميه بهلول النجار

لكل اللي ما بعرفه، فثلاث ارباع المعلومات اللي بيحكيها من نسج خياله وهو مرفوض عند العلماء العلميين والشرعيين كمان! الاسلوب الشيق ما بيعني انه على صواب

 

Qwaider

رمضان كريم و كل عام وانت والعائله بالف خير

انا بحترم وجهة نظرك اكيد :)

 

عمر

اهلا وسهلا فيك ان كانت اول زياره او اكتر

الهدف الاساسي من كتابه الموضوع هو الاجر ان شاء الله, فياريت اذا في عندك مواقع لعلماء شريعه و علم ثقه انك تزودنا فيهم,بلاش اكون بنشر شي غلط لاسمح الله وانا مش عارفه
وكل عام وانت بخير