Things I Like To Whisper About

Would You Hear Me Whispering

4 Life Goals Tag



اول شي بحب اشكر الانسه كيّاله على ال Tag و اللي هو اني احكي عن 4 اهداف بحياتي بحب اعملهم قبل المونديال الجاي يعني خلال 4 سنوات اكون محققتهم ....انا من محبين ال Tag :)


اهم هدف بحياتي هو اني ان شاء الله اروح عمره و اروح حج...الله يكتبلي اياها يا رب.

الهدف التاني و الثالث مرتبطين ببعض
اني ان شاء الله اغيّر شغلي عن قريب, بعرف اني اكلت راسكم بموضوع تغيير الشغل لكني دورت كتير و سبحان الله ما في الي رزقه بولا مكان تاني, الله يجيب الخير و بدي اغير شغلي لاني بدي اشتري شقه :) اشرحلكم وجهة نظري بدون اي تزويق , هلأ الله اعلم اذا راح اتزوج ويلا لأ, فأنا و الله يخليلي بابا و اخواني ولكني ما بدي اعتمد على حد بصراحه, خواني متزوجين و كل واحد ملتهي بعيلته وما بدي اكون زي الهم بحياتهم, بدي اكون مستقلّه و معتمده على نفسي, هلأ براتب شغلي الحالي ابدا ابدا ما حقدر اعمل اشي, و لوقت التقاعد برضه حيكون راتب بخزي ما بكفي لشي, هلأ وضعنا المادي والحمد لله منيح و خواني كتيييييير مناح واهلي ربونا انّا نكون قراب من بعض و الحمد لله كتير قراب ولكن سبحان الله الدنيا بتتقلب و بتلهي.

الهدف الرابع بحياتي هو بالعمل التطوعي ....في مجموعه بنات بعرف وحده منهم كانو يعرفو عن عائلات فقيره يروحو يزوروهم ويتأكدو من وضعهم وبعدين يجمعو فلوس عن طريق بعت ايميلات و مسجات لاصحابهم وقرايبهم عن الحاله اللي بدهم يساعدوها و يجمعو الفلوس و يروحو يساعدوهم, شوي شوي كبر شغلهم لمّا الناس عرفوهم اكتر, صارو يجيبو اواعي صلاه او معجنات وحلويات او اي شي بعملوه عائلات بحاجه للمساعده و يبيعولهم اياهم , و كبر الموضوع انهم هلأ استأجرو مخزن وصارو يحطو فيه الملابس اللي بجمعوها من الناس ليوزعوها و للاشياء اللي بشتروها, مثل شنط للمدرسه كتب للجامعات, من دفع اجارات بيوت لمساعدات شهريه لتوزيع ملابس و غير نشاطاتهم برمضان, والحلو انهم بزورو البيوت وبتأكدو من اوضاعهم لتكون الفلوس بتروح للناس الصح, نفسي اكون انا وصاحباتي زي هيك, احنا فعليا والحمد لله بدينا هلأ على قدنا انا و صاحبتين بالشغل والله يقدرنا نعمل اشي اكتر و يزيد ونوصل لمثل هالبنات الله يجزيهم الخير.

ما بعرف مين ضل ما انعمله Tag فأنا حترك الحريه الكم, اللي بحب يشاركنا بأهدافه يشاركنا...ويا ريت تشاركونا, اكيد حنستفيد من الافكار :)

سلسلة عرسان - الحلقة 14



في عنّا موظف كان يداوم اول ما اشتغلت قبل 9 سنين و كان في مشاكل قانونيه عليه وعلى زملاء اله, و اللي عرفته انهم وقفوهم عن الشغل لحتى يحكم القضاء ببرائتهم او باثبات التهمه عليهم, مشاكل ماليه كانت, قبل شهر تقريبا حكمت المحكمة ببرائتهم ورجع الزلمة لشغله نفسه عنا, و اللي عرفته انه قانونيا برجعولهم الرواتب عن السنين الماضيه بأثر رجعي, و انه خلال فترة هالعشر سنين كان يشتغل و فاتح محل ساتلايت بيع و تصليح و محل بيع و تصليح خلويات.

المهم انا ما بتعامل معه بالمره, مش بقسمي وما في شغل مباشر بيني وبينه, مع اني كنت الاحظ انه كتير بصدف اشوفه بالمكاتب اللي بروح عليها, ودائما مبتسم بطريقه غريبه, و حتى وانا بستنى سيارة الشغل برّه بس يكون في عندي مشوار للشغل, بشوفو واقف عالبلكونه و على وجهه هالابتسامه ذاتها, انا بطنش الموضوع و ولا كأني شفته.

قبل اسبوع تقريبا اجت زميلتي اللي بالقسم , بتحكيلي انها خجلانه تحكي معي بموضوع واني زي اختها و انها بتعرف ردي بس لازم تحكيلي, انا فكرتها جاي تشكي عن موظفه جديده عنّا دائما بتعمل مشاكل, بحكيلها شو عملت فلانه اشي جديد!!! , بتحكيلي لأ الموضوع بخص فلان - الشب ما غيرو - بحكيلها ايش ماله, بتحكيلي انه معجب فيكي كتير وحابب يتقدملك, حكيتلها مش هو متزوج؟؟؟ وبعدين انا بحسّه عمو O_o حكتلي اه متزوج و عنده 3 اولاد و 3 بنات , حكيتلها طيب وشو بدو بالزبط؟؟ حكيتلها اول شي بتحكيلو اني ما عرفت مين الشخص منعا للاحراج, وان الموضوع مرفوض تماما.

تاني يوم اجت عندي عالمكتب بنت بتشتغل مع الشب بنفس القسم, بس شوي او شويتين ما بنطيق بعض انا والبنت, سبحان الله ما تعاملنا بس ما بنحب نتعامل مع بعض, دخلت عالمكتب بتحكيلي بتعرفيني, حكيتلها طبعا واهلا وسهلا , بتحكيلي انا جاي احكي معك بموضوع خطبه, بدت تحكيلي عن ظروف "الفليح" - بما انو خلص انضم للقائمه- حكيتلها لا تحكيلي مين هو منعا للاحراج, واني جاوبت البنت امبارح, ال هو مش مقتنع حكيتلها الموضوع المفروض انتهى و جوابي كان واضح, العمو متزوج و عندو قبيله, يهدى شوي و ينتبهلهم, بتحكيلي بس مرتو موافقه و عندو قدرة ماليه, حكيتلها اذا مرتو موافقه فيا اما بكون مشوفها نجوم الظهر لهيك بدها تخلص منه, او مهددها بالطلاق و وين تروح ب 6 اولاد, و بعدين انا عندي قناعه اللي بتزوج التانيه خلص باخد عالوضع وانا هالموضوع رافضته تماما.

ضليت اشوف الفليح برضه و اتعامل عادي ولا كأني بعرف انه هو, امبارح اجت نفس البنت بتحكيلي انه اكل راسها و ارجعي احكي معها و احكيلها مين انا و حكتلي اسمه وانه متزوج صغير و بدها تحكيلي ظروفه, و بتحكيلي انه الشب "حبّك" من اول نظره وهو فكرك مراجعه و كان بدو يحكي معك بس شافك بتوقعي عالساعه وسأل عنك و هو كتير مكركب و حتى انه حكا لمرته و حكتله اذا بدك بروح اخطبلك اياها وهيك اكيد بتوافق, ال اول ما يشوفك زي كهربا بتدق بقلبه و ببطل مركز... حكيتلها المفروض هالكلام يفرحني؟؟؟ انا حاسه حالي بدي استفرغ, شو هو هالزوج اللي بشوف وحده وبصير هيمان فيها وبروح يحكي لمرته وهي التانيه مالها شو اللي صايبها, و بكره سنتين تلاته بشوف وحده جديده و بهيم شو هالقصص الطرمه, حكيتلها احكيله اني مش ممكن اغير رأيي و الموضوع انتهى, ما في نصيب, بتحكيلي بس هو حكالي ان انا هالبنت" ماخدها ماخدها" واذا ما وافقتي بدو يجي عالمكتب يحكي معك و يقنعك...انا هون عصبت شو اللي ماخدها, وشو هالمصيبه هاي , حكيتلها لا يجي ولا يروح واحكيله اني حكيت ما بدي يحكي معي ولا يجي عالمكتب واذا اجا هاي نقطه جديده بتنضاف لاسباب الرفض و ان الموضوع انتهى.

اليوم رن التلفون , الو مين ويلا هو فليح, ال بدي احكي معك واشرحلك ظروفي, حكيتله انا اسفه انا مش فاضيه, بحكيلي طيب بس تفضي, حكيتله ما في اشي نحكي فيه والموضوع منتهي, ال بدي اشرح ظروف و يا بقنعك يا بتقنعيني, حكيتله الموضوع ما في اقناع, الموضوع مرفوض شكلا ومضمونا و الاسباب ما راح تتغير فرجاءا خلص, سكت و بعدين بحكيلي طيب زي ما بدك

ما بعرف ليش حسيت بالخوف من لمّ البنت اجت , حاولت احدد من شو خايفة ما عرفت, انا مش من الجبنا ولا الخويفين , بس قلبي كان يدق بسرعه و مرعوبه, ولما حكيت لماما بتحكيلي من شو خايفه, مش عارفه

هلأ الموضوع هون في نقطتين و تكررو اكتر من مرّه معي
موضوع انه اول ما يصير في فلوس مع الرجال فورا بفكرو يتزوجو على زوجاتهم, طيب ليش؟؟ مش المفروض تحسّن وضعك و وضع ولادك ومرتك؟؟ مش المفروض تصرفهم على اشي يفيد عيلتك, شو موضوع الزواج التاني هاد بالزبط

و شغله تانيه هي موضوع اللي بتزوجو صغار, طيب ما مرتك برضه متزوجه صغيره, حملت و ولدت و انهلكت وهلأ صرت حاسس حالك شب وما بتنفعك مرتك, هدّيت حيلها حمل و ولاده و طبيخ وغسيل و...و... وهلأ صارت مش منيحه, كتير من الموظفين عنّا بدورو على زوجات تانيه لانهم متزوجين صغار, وبنسو عر الاولاد اللي وراهم, وجزء متزوجين ستات اكبر منهم بكم سنه فالاخ حس حاله انظلم, بعد عشرطعشر سنه حس حاله مظلوم.. ما بعرف كيف بفكرو هالعالم..بتمنى انه ما يرجع يحكي بالموضوع ولا يحكي لناس جداد يحكو معي, جو الحكومه بموتو بالقيل و القال و انا ما بحب اكون جزء من حواراتهم, يحللو و يبررو و يبدو رأيهم بأمور ما الهم فيها.




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


ملاحظين هالشي ??




هلأ انك تكوني بتسوقي و فجأه تطلع بسه من بين السيارات بتحصل, انك تكوني بتسوقي و الاخت البسة بتقطع الشارع و بتتمشى على اقل من مهلها برضه بتحصل, انك تكوني بتسوقي وفجأه بسّه هبوله توصل لنص الشارع و بعدين تتردد تكمل ويلا ترجع و تضلها تتقافز رايحه جاي و انتي بتستني بالاخت تقرر برضه بتحصل.

الاشي الجديد اللي ملاحظته ومش عارفه اذا في حد غيري ملاحظه, ان العصافير و الحمام بالاردن بطل يخاف
جد بكون سايقه والحمامه ماشيه وبتهز براسها وانا ببطئ انو هلأ بتطير هلأ بتطير وبحكي خلص اكيد دعستها لكن بأخر لحظه بتقرر اتطير, و نفس الشي العصافير منتشرين عالارض و بأخر لحظه بطيرو, ومرات وانا ماشيه عرجلّي بمشي جنب الحمامه او العصفور, ولا كأني موجوده, وبتضل بتاكل و ولا بتتحرك, مفكرين حالهم بروما الشباب..ما بعرفو ان لو حد مسكهم خلص راحت عليهم

حد غيري لاحظ هالشي, ويلا انا بس اللي الحمام بطل يخاف مني زي البسس بهالبلد, على رأي اخوي اللي بس حكيتله اني بلف من الكراج لاطلع عالسياره لان البسة فارده حالها قدام الباب الرئيسي...بحكيلي " يا ام السوس شكلها البسه مخاويه عليكي" :(
معقول الحمام والعصافير برضه هيك بفكرو !!!!

حتى القمر؟؟




دخل غرفته مسرعا, كان في قمّة الغضب
" كيف تجرأ ان تقول لي هذا الكلام, كيف تجرأ ان تناقشني في قراري؟؟؟"
احس بخدران يسري في الجزء الايسر من جسده, بدأ يحدّث نفسه " ما الذي تفعله؟؟؟ اتريد ان تقتل نفسك؟؟"
جلس على حافة السرير و اغمض عيناه, فجأه انتقل بالزمن الى خمسة عشر عاما مضت, لاول مرّه رأها فيها, كانت جميله جدا, لم يكن هنالك شيء واضح يميزها عن غيرها من الفتيات ولكن لحظه ما وقع نظره عليها استوقفه هدوءها و رقتها, حتى في طريقة امساكها للقلم و طريقه كتابتها طريقة رفع خصلات شعرها عن عينها, كان فيها رقّه لم يستطع بيوم ان يصفها لاحد.

كانت في السنة الجامعية الرابعة , انتسبت الى الدورة التي يدرّسها في المركز التعليمي لتساعدها لانجاز مشروع التخرّج, ملامح وجهها كانت تقول الكثير, كان يعرف متى فهمت الشرح ومتى صعبت عليها نقطه ما, حتى يوم ان قرر ان يفاتحها في موضوع الزواج, عندما سألها هل هي مرتبطه ام لا, حاولت ان لاتظهر خجلها ولكن حمرة وجهها فضحتها.

"ماذا!!!" حاول ان يتذكر السؤال الذي كرره عليها اكثر من مرّه لتصف له مدى حبها له, سألها هذا السؤال يوم الخطبه ويوم الزفاف, حتى انه نسي متى توقف عن سؤالها...."نعم ..نعم...تذكرت " و ابتسم ابتسامه ملئت وجهه, فكّر قليلا " هل من المعقول ان اكون بالغت في رد فعلي؟؟" حاول ان يسترجع الاحداث, اخذ يهز رأسه وهو نادم " معها كل الحق, لقد نبهتني الى ذلك اكثر من مرّه وانا الذي اكرر هذا الفعل و فعلا صبرت كثيرا و انا ما زلت اكرر نفس الخطأ, واليوم جئت الومها!!!"

فتح باب الغرفة وجدها تجلس امام النافذه و هي الاخرى تفكر, جلس بجانبها لم تتحرك و بقيا صامتين لفتره, امسك يدها حاولت ان تسحبها ولكنه كان يمسكها بشدّه, نظرت اليه بعيون كلها حزن قال لها " حتى القمر؟؟" تحولت نظراتها الى حنو وطيبه..نظرت الى الارض و بدأت اطياف ابتسامه ترتسم على شفتيها, نظرت اليه وقالت " ذهابا و ايابا"

ونستمر...




وتمضي السنين

كأوراق الخريف تتساقط سنواتنا

كأوراق تتطاير من بين ايدينا

نتمسك بجزيئاتها

واكثرها يتفلّت من بين اصابعنا

كصفحات الكتب نقرأها

حينا بشغف..وكثيرا بتثاقل

ودائما ننسى ان نعيشها

و تتقلب الصفحات سريعه
اين!!!

متى!!!

لا نعلم

نغمض اعيننا...

ونستمر...




*من وحي الصوره.... سامحوني عالركاكة :)

اللي بدها تتستر... تتستر





الصيف هاد مناسباته قليله نوعا ما, و الي فترة حابه احضر حفله مع اني بالعاده بندم لكن اشتقت للحفلات, و صدفت الخميس يكون عندي 3 حفلات 2 خطبه و زواج - عقبال عند العايزين - رحت عالخطبتين و للاسف ما قدرت اروح عحفلة الزواج لانه الخطبه للقرايب و الزواج لاخت صاحبتي, مع اني كنت كتير حابه اروح :(

هلأ احنا باعراس خواني اجو ناس قرايب - سكان عمان - ونامو عنّا بالبيت, و للحق كنّا فرحانين بوجودهم, يعني عجئه البيت ما بتتأثر بوجود ناس اضافيين, و بما انه بابا - مع انو مش اكبر واحد بخوانه - من اول ما تزوج حكا لمميتي انه العيلة بعتبروه كبير القوم " وكبير القوم خادمهم" فالكل بالعاده بيجي و بنام وبلجأ لبابا وخصوصا ان تيتا - الله يرحمها- كانت ساكنه عنّا, المهم هلأ خطبة بنت عمي, وبرضو الناس اختارت تيجي تنام عنا :) حجتين كبار بالعمر, بس حكياتهم وقصصهم بتجنن فماشي الحال


الخطبه الاولى لوحده من قرايب مميتي و الخطبة التانيه لبنت عمي, فبابا طبعا صرعنا رسمي, هلأ هو ما بدو يتأخر على خطبة بنت عمي واللي بتبدا بعد الخطبة الاولى بساعه, فخلانا نطلع عالخطبة الاولى بكير و كنّا اول الواصلين :$ بس الحمد لله بنت خالي اجت بكير و قعدنا ندردش و حكيتلها عن موضوع شاغلني حاليا واعطتني نصيحه كتير فادتني الحمد لله, كأنه مقدّر اروح بكير و الاقيها :) المهم الخطبة الاولى مشيت وكلو تمام و بابا اتصل بالوقت المناسب اللي كنّت بديت املّ من الحفله.


روّحنا عالبيت و غيرنا و طلعنا عخطبة بنت عمي, كل شي تمام و عيلة العريس الكل تقريبا لابس عبايات, و قاعدين وماشاء الله عليهم, وبس بدت الموسيقى قبل ما يدخلو العرسان و نزلو قرايب العريس عالبيست, تقريبا 90% منهم لابسين لبس اقل ما يمكن اني احكي عنه انه "بخزي" يعني في خط بين اللبس الحلو اللي بتفشي قلبك فيه اسمه الحفله مش مختلطه وبين اللبس اللي بتشوفيه و بتحكي مين اللي بترضى عحالها تلبس هيك لبس, اشي مقزز بصراحه, مرة اخوي بتحكيلي " بدي اسألك...هدول قرايبكم؟؟؟" حكيتلها " اطلعي على وجوه قرايبنا اللي سلمتي عليهم بتعرفي :) " الكل منصدم, حتى فروحة حبيبتي منصدمه, هلأ بتحكيلي حرية شخصيه, بحكيلك ماشي بس ما تتعدى على حريتي انا, وحتى دينيا في حد للبس بين البنات و الاخوات متجاوزين الحد بنص متر :$ اشياء غريبة عجيبه, احلى شي بس وقفت الموسيقى كلهم قعدو على طرف البيست, يعني مش هيك عرض العرايس بصراحه, مرة اخوي بتحكي " ايتها الام..انتبهي شقفه على الجدار " :)

هلأ كل هاد بنحاول نبلعه مع انو ما بنبلع, اجو العرسان والبنات لبسو وقعدو , المؤسف انه بس رجع العريس للمرة التانيه للحفلة, المسؤول عن ال DJ اعلن ان العريس بدو يدخل الصاله و حكا " الستات اللي بدها تتصتر تتصتر" تتصتر= تتستر , ضحكنا عالكلمة وعلى انو كيف يعني اللي بدها, وطلع معو حق لانه في بنات ما بدها, لبسو البنات العبايات وماشاء الله عليهم , لكن مجموعه منهم بس لبست العبايه بدون ما تسكرها , و رمت الحجاب على شعرها و صارت ترقص حول العرسان, وكل شي بالشارع و العريس المسكين يغض بصر و يلف وجهه, والحجاب يسحول وترجع ترفعه ونص شعرها مبين, جد اشي مقزز


ما بعرف هالامهات اولا و هالبنات كيف بفكرو , وكيف بعتبرو حفلات الاعراس فرصه لعرض هالبنات بهالطريقة المبتذله, يعني ماشي اعرضي حالك بس بالعقل, ترتبي و بيني حالك انك نغشة و اطرشي وجهك لتبيني بيضا وشقري الشعرات و البسي عدسات, ماشي بغصب حالي و ببلعها..... بس هيك...جد كتير

ملاحظه عالهامش..... ما بعرف ايمتا عماتي بدهم يبطلو يسمو بدني بطريقة تعبيرهم عن محبتهم الي بانهم يصيرو يدعولي بابن الحلال و شوي وبدهم يبكو علي اني مش متزوجه وبناتهم و بنات عمي الاصغر مني بتزوجو :( جد بحسهم بشحدو علي... صحيح ببتسم و بشكرهم عاهتمامهم ومرات بحكيلهم انه نصيب واذا في نصيب حيجي بوقت ما ربنا كاتب ,بس جد بسمو بدني , ومهما ماما حاولت تقنعني انه هيك طريقتهم بالتعبير عن محبتهم ما بهون الموضوع, وما بصدقو اني بكون فرحانه من كل قلبي بحفلاتهم و اني بس اشاركهم فرحتهم ابدا ابدا ما بتكون مجامله... بنظرهم المفروض اقعد عجنب و احط ايدي عخدي و اندب حظي :)


أصبحنا و اصبح الملك لله


صباح الخير عالجميع
اليوم حسيت حالي صاحية مبسوطه
قلت لحالي لأ شو مبسوطه ما مبسوطه ..
لازم سمّه بدن على هالصبح
فقررت اعمل جوله على صحفنا الكريمه
و حبيت اجيب ملخص للي قرأته

منشان الله انتخبو

المؤسسات الحكوميه ما بتجيب فلوس و يا دوب تغطي الرواتب

لهيك بدهم يخفضو الرواتب او الحوافز او العلاوات...مش ضروري هالموظفين يتبحبحو

شو يعني ارتفاع مقبول للمحروقات؟؟؟؟ لهلأ مش فاهمه...هو ضل اشي مقبول

احمدو ربكم اللي ما رفعنا سعر الغاز...ومنشان الله انتخبو

وزير التربيه مدعوم عالاخر و قراراته صح الله لا يردهم هالمعلمين...وابدا مش علشان اعتصمو انطردو

وخبر عن الشفافيه اللي بنتميز فيها بس مسؤول يزور البلد شو بصير

الخبر الوحيد اللي بشرح القلب و المنطق ....فتوى الفيس بوك


والخبر اللي برجعك لمود الانبساط ....محمود عباس...منشششششششششان الله بطل وزّع ابتسامات :)

Congratulations


Congratulations to our friend Saifallah :)
Actually he is a friend of a friend, he is Ahmad Hamdan's friend

He and his friend won the first place award in the Robotics category in the third National Technology Parade 2010 :)

Details of the project as contained in the website of the German Jordanian University

The work involved building and development of a Quadrotor UAV that uses four-fixed propellers. It was built from the ground-up using commercial components, and is capable of vertical take-off and landing (VTOL), hovering, and advanced aerial maneuvers. This UAV can be used for various remote sensing applications including; search & rescue, mapping, aerial photography, and scientific exploration.

For more information about the project, visit:
https://sites.google.com/site/quattrinoproject/








تفشّش



لا ابدا مش شوب بالمره الدنيا :(((

و بما انه الموضوع مش سر هلأ و الكل بعرف اني بشتغل بالحكومه, فيااااا سلاااااااام عالمراوح اللي بتهف عليك كل 30 ثانيه هوا و سخن , واما سيادة السيرفر ف 3 كونديشنات عندو, حاولت اقعد بغرفة السيرفر, متت برد :(,
و المدرا طبعا عندهم كونديشنات , بتعرفو انهم همه بني ادمين واحنا لأ, همه مساكين عندهم ورق كتير يوقعوه, اما احنا اللي بننحت كل شي آلات , فطبيعي اصير اقاتل دبان وجهي زي ما بحكو, و شغل كتير و مدير كتير حكي, ومصرّ يحكيلي كيف بعمل قلاّية البندوره :( وانا ما اهلي!!!!!! كرهتها...شوي وبدي احلف ما عمري ادوقها

و بوصلني عالايميل انه في صاحبه الي عاملتلي Tag صورة, وانا ما بتطمنلها هالبنت وكل شوي بوصل تعليق من حد شكل عالصوره و "هههههههههه" ...و " فعلا ما انتي قليله يا فلانه" و الاخ الفيس بوك بدوش يفتح اشوف هالصوره, بدي الغي ال Tag مش عارفه شو حاطه و بديش يوصلني 500000 ايميل بأنه فلان علّق عالصوره تبعتك :( , لازم يحطو قانون زي ما حكت رند قبل يسألوكي بتقبلي فلانه تعملك Tag ويلا لأ وانتي تختاري .

و الصبح سايقه ما الي ولا علي- ملاك ما شاء الله علي- انا عالدوار اخت الله يهديها مصرّه تلزق بالدوار, ما بعرف هالعاده بالناس, يا اختي امشي في مسارب كتيره, لأ ...ابدا...هيك حافظه الاخت, زمرت خفيف, ما في فايده, شوي بدها تضرب السياره, زمرت قوي بتطلع علي و بتحكيلي " عما يعميكي" ..... O_o
هو انا ناقصتك يختي....ما بعرف ليش صرت اضحك , شكلي ماخده ضربة شمس :) بس عما يعميكي على هالصبح مش بداية موفقّه ابدا



لكن.... برغم كل شيء ايامنا فيها شيء بيعشق الحياة :)
وصلني ايميل نكت جديده - عالقليله جديده علي :) - جد تحشيييييش , فبعد النكد اللي نقلته الكم ...لازم نختم بضحكه :)


محشش راح يزور مريض بالمستشفى سأل عنه بالاستقبال ، سألوه شو عنده ؟
قلهم اوبل فكترا زرقا



واحد كركي بده يشتري سندويشه من مطعم يعمل فيه مصري
ساله المصري (مقالي؟)
فأجابه الكركي لا والله معايطه


واحد محشش قاله الدكتور: تخفيف الوزن يحتاج إلى عزيمة يا اخي!
قاله المحشش: على راسي يا دكتور بكرة عشاك عندي

ذكرى الاسراء و المعراج


كل مرّه بسمع الدعاء اللي دعاه سيدنا محمد صلى الله عليه وسلم وهو راجع من الطائف بعد الاذى اللي تعرضله و اللي بناءا عليه وعلى وفاة سيدتنا خديجه و ابو طالب عم الرسول الكريم, لمكافئته و لتصبيره صلى الله عليه وسلم, أيده الله بالاسراء و المعراج , كل ما اسمع هالدعاء ما بقدر اقاوم دموعي

اللهم إني أشكو إليك ضعف قوتي ، وقلة حيلتي ، وهواني على الناس
أنت رب المستضعفين وأنت ربي ، إلى من تكلني ؟
إلى بعيد يتجهمني ، أو إلى عدو ملكته أمري ؟
إن لم يكن بك غضب علي فلا أبالي ، غير أن عافيتك هي أوسع لي
أعوذ بنور وجهك الذي أشرقت له الظلمات وصلح عليه أمر الدنيا والآخرة
أن يحل علي غضبك ، أو ينزل بي سخطك . لك العتبى حتى ترضى
ولا حول ولا قوة إلا بك

رسولنا الكريم علمنا انّا لازم نصبر على الابتلاءات, و كل ما الواحد كان بدعو للحق و كان للدين اقرب الناس بتتكالب عليه اكثر , فلازم يصبر و يتأكد انه على حق و ان شاء الله ربنا حيكافئه.


دعاء تاني كتير بأثر فيي

الهم لا تسلط علينا بذنوبنا من لا يخافك ولا يرحمنا

لو فكّر كل انسان بهالدعاء لربط قصص كتيره بتصير معه و مشاكل بأعماله, يا الله ما اصعب انه حد ما بخاف ربنا ولا في قلبه رحمه يستلم انسان و يعملّه مشاكل, ما في اشي ممكن يردعه, وما في حد ممكن يوقف عنده



كل ذكرى اسراء ومعراج وانتم الى الله اقرب
وان شاء الله نكون مشاركين وموجودين في التاريخ الجديد اللي حينكتب على الرزنامه لذكرى استرداد بيت المقدس

غباء اجتماعي





الذكاء الاجتماعي مطلوب للبنات و للشباب, في مواضيع مشتركه مهما اختلفت الاعمار و التخصصات والاهتمامات ممكن ينحكى فيها ليبدا اي حوار, بس تتكرر دقائق الصمت اذاً في شي غلط وما في انسجام, ممكن ننتقل من موضوع لموضوع لنلاقي اشي ننسجم فيه, بس برضه نوعية الردود على المواضيع اللي ما صار فيها انسجام بتعطي فكرة عن طبيعه تفكير اللي قدامنا

انا بطبيعتي مش من الناس اللي بسرعه بنسجمو مع حد جديد و باول لقاء, ما بعرف هو حذر او استكشاف للي قدامي, بس بنفس الوقت مش من الناس اللي بضلو ساكتين وما باخدو وبعطو, يعني اجتماعيه بحدود - بس اذا انسجمنا بالحكي هات سكتوني :) - بالبدايه بكون بدي استكشف اللي قدامي فالمفروض انه يصير حوار بسيط لاعرف شو الاشياء المتشابهه بينا لنحكي عنها, واشوف ابسط الاشياء بشخصية اللي قدامي واشوف ممكن تتلاقى افكارنا او لأ.

اكتر اشي بكرهو بس اصير انا اسأل واللي قدامي يجاوب على كل اسئلتي ب "اه" او " لأ" او بكلمة, كيف الشغل...منيح, شو طبيعه شغلك....عالكمبيوتر, جد بنرفز وممكن ابطل احكي بالمره, يعني كيف ممكن ننسجم بهالطريقه, خصوصا بس انا احكي نص ساعه عن شغلي مثلا و بس هي تحكي تجاوب بكلمه :$

و برضه ممكن اسكت اذا الحوار بالاخر صفى على لبسة فلانه, و حفلة علان, واخر كليب....هيك برضه بتخسرني للابد اللي قدامي,و مشكلتي ان الانطباع الاول عندي باخد فترة لاغيره, ان كان ايجابي او سلبي, وما شاء الله علي اذا حبيت حد بحبه كتير و اذا كرهته بكرهو كتير, لهيك ياما انصدمت بالناس :)

كتير في ناس مثقفين و متعلمين بس ما عندهم ذكاء اجتماعي وهالشي بأثر و بنعكس على شخصياتهم, ممكن يكون في خجل و ممكن يكون في انطواء, وهون بيجي دور الشخص التاني بأنه يخلي اللي قدامه ينسى هالشي و ينسجم وهاد باختيار المواضيع , المفروض ما ينحكى باشياء شخصيه, او اشياء ممكن تكون مخجله للي قدامنا, بنختار مواضيع عامه شاغله الكل بوقتها وبنبدا نحكي فيها, بس اذا ما صار انسجام وما صار اخد وعطا فالموضوع منتهي والافضل نروّح : )

سعاده من نوع اخر :)


قبل فترة كنت بحالة مش كئابه بس نفسية مش كتير حلوه, مش عارفه شو السبب, او اسباب كتيره مش عارفه احدد مين فيها اللي مخليني احس هيك, لكن فجأة تحسنت نفسيتي ومش عارفه ليش, اليوم فكرت شو الاشي اللي عملته جديد ليغير نفسيتي لهدرجه و يخليني مليانه طاقه من جديد ولهلأ مستمره :)

اتزكرت اني قبل اسبوع رحت مع صناع الحياة على جمعية الايتام اللي بنتعامل معها, وشفت البنات والاولاد, و حكينا واتحدثنا و عملنا اشياء كتير حلوه

قبل بيومين من روحتنا اجتمعنا في مقر صناع الحياة و اجو بنات متطوعات علمونا كيف نعمل اشياء فنيه , من رسم و تلوين لعمل اقنعه للصغار, لعمل جزادين و محافظ للموبايلات وهاد اللي تعلمته :)
علمونا لنطبق بعدها مع الصغار, زي نشاط فني يجمعنا معهم ,انا ما عندي اي ميول فنيه اطلاقا مطلقا, فحاولت ابدع طلع معي اشي عجيب :) مش فاهمه هي سفينه هو جزدان انتو قررو :)







و هدول اشي من اللي عملوهم المتطوعات





المهم كل وحده فينا عملت شي ولمّا رحنا عالجمعيه فرجيناهم للبنات والاولاد وبعد احلى استقبال للبنات والاولاد النا, كتير بحب بس ينادوني مس.... مع اني بكره التدريس بس تدريسهم كان احلى اشي عملته بحياتي, واني اشوف التحسن اللي صار بعلاماتهم كان يعطيني شعور بالسعاده غريب ما حسيته من قبل باي مرحله بحياتي :) المفروض ان البنات همه اللي حيشتغلو معنا بموضوع الجزادين لانه فيه شويه خياطه, والمفروض ان البنت تختارك مش انتي تختاريها علشان ما يكون اشي فرض, بالعكس يكون فيه متعه, والحمد لله "فطوم" حبيبتي اختارتني انّا نعمل اشي, وكتير عجبها اللي انا عملته :) انصدمت بس حكيتلها اني انا اللي عملته , خيرتها باشياء تانيه نعملها اذا بتحب , واصرّت على نفس الشكل اللي انا عملته, انا مهمتي الاشراف و القص والمساعده, وهي مهمتها تختار الالوان والشكل وطريقة التزيين وهي نتيجه شغلها و مساعدتي البسيطه الها :)








و بعد ما خلصنا قررنا نعمل زي دفتر زكريات و كتيييييييييييييييييييييييييييير طلع حلو :)



الموضوع اني كل مرّه بروح عندهم بكتشف صفة جديده فيي ما كنت اعرفها, يعني طولة البال ما كنت افكر اني بتميز فيها, لدرجه ان البنات اللي تحت 4 سنين دايما بكون ترتيبهم معي تلقائي, وهمه الحمد لله بحبوني كتير, و التدريس اللي كنت افكر حالي بكرهو بعد ما درّست لفصل بكليه, اكتشفت اني بستمتع فيه معهم, وبحضّر لوحات و نماذج اسأله و احيانا العاب , واشي جديد ان ممكن يطلع معي اشي فني وهاد اخر شي كنت اتوقعه بالدنيا :)

انا كنت اتجنب الحكي عن هالموضوع و حكيت قبل هالمره هالشي, بس جد جد جد السعاده اللي بحسها بس اتعامل معهم بتمناها لكل شخص بالدنيا, فقررت ارد احكي عنهم لأشجعكم على هالخطوه اللي ببدايتها صعبه ,لان انك تكسب محبه و ثقة طفل اجمالا صعبه, غير ان هالاطفال متعودين عالناس بيجو و بختفو من حياتهم و متعودين على محبة الناس الوقتيه, وان الناس " بيجو علشان يكسبو حسنات" زي ما حكالي ولد من الاولاد قبل, و بس تكسب محبتهم لا يمكن تخسرها ابدا :)

بدكم افكار...احنا بنعطيكم افكار



انا شخصيا مش عارفة هالخبر سعيد ويلا تعيس

يعني هل هو انه العالم حسّت انّ المواطن خلص فلّس و ما ضل اشي يتم اقتطاعه للضرايب, ويلا انهم بطل عندهم افكار جديده للضرايب, ويلا حسو انّا قربنا ندخل جينس بعدد الضرائب علشان هيك تراجعو...طيب كان حكو الله يسامحهم كان ساعدناهم, في اشياء كتيره لسا ممكن ينحط عليها ضرايب, ومش مهم في فلوس ما في فلوس, بندبرها, يعني مثلا كل اردني مغترب - اسمهم معبيين مصاري و الاشاعه منتشرة بقوه - لازم يدفع هو او اهله عنه ضريبه عن كل شهر بقعد برّه البلد, شو نسميها هالضريبه....امممم اه بدل جنسية :) و علشان يستفيدو اكثر كل واحد ببعت بعملة البلد اللي هو فيها وبهيك بتيجي بالدولار و باليورو دراهم ريالات...

ايش كمان...ايش كمان.. اه ممكن بدل اقتناء طفل, وهاي مراعاة للطبقة الفقيره , كل عيله بقل عدد اطفالها عن 3 بدفعو هالضريبه :) علشان انو بس الاغنياء اللي يدفعو, الله يسامحكم و بتظلمو هالعالم وبتحكو انهم ما بحسو بالمواطنين اللي تحت خط الفقر.


وفي ضريبه بدل حكي, اللي بزيد عدد كلماته عن 1000 كلمة باليوم بدفع مبلغ عن كل كلمة زياده, وبهيك بخف وجع الراس من الناس كتيرة الحكي...وهاي مفيده قبل ما تبدا الانتخابات, فكل مرشح بس بحكي اللازم وما بنضل نسمع الخطب الرنانه و الوعود الوهمية اللي بحكوها.

يعني اذا بدهم افكار بنعطيهم, وما يحملو هم ابدا ابدا...المواطن تعود و اكتر من موته وحده ما راح يموت و هي راس مالها جلطة - بعيد الشر عنّا وان شاء الله اللي بكرهونا -




حتى موبايل ما عندها




وهو اخوي هون - الله يسهّل عليه :( - اجتمعنا مرة مع اخت زوجة اخوي و زوجها واللي بكون ابن خالي - انا ما حكيت مع ابن خالي ومرته لانه احنا بالعيله مش متعودين انّا نكون صحبه مع شباب العيله وانو يكون في بينا حكي واخد وعطى واكتر من السلام عليكم ما في بينا , لكن سبحان الله النسب خلّى فرص الاجتماع اكتر - من ضمن الحكي صارو يحكو عن صاحب ابن خالي اللي خطب من كم يوم, ابن خالي و صاحبه بشتغلو بمدرسة خاصه بعمان, المدرسة من اللي بدفعو الاهل مبلغ مهول لطالب الروضه , و اخوي كان يدرب الطلاب سلة بالصيف بالمدرسة, وبنت خالتي اللي زي اختي بتشتغل بهالمدرسة, فأنا بعرف الشب اللي بحكو عنه منيح وخصوصا من بنت خالتي , المهم بحكو انه الشب عمره 31 سنه خطب جديد بنت عمرها 18 سنه و احسن صفة برأيه "انها ما عندها موبايل ولا بتعرف شو هو النت " بسألني ابن خالي شو رأيك, انا اول جواب كان اني بكره هالشخصيات من البشر, هالكلمه سمعتها من شخص من قبل وما حبيتها بالمره وهي تكررت مرّه تانيه, حكيتلهم انه المعنى انه الشب شاف وعمل بلاوي و بدو وحده من اللي " يربيها على ايدو " و لانه بمنتهى البساطه ما عنده ثقه لا بنفسه ولا فيها هيك عمل, انا معي موبايل وبعرف بالنت...هل هاد بخليني بنت قليلة ادب لا سمح الله !!!! تعريف الزوجه الصالحه صار مختصر على هالشي!!!

ابن خالي ما عجبه رأيي واللي طلع نفس رأي زوجته و زوجة اخوي, بحكيلنا انه الشب صاحبه وهو بعرفه, وان الشب جدا مؤدب, و فسر هالشي بجمله " عمره ما صاحب" ,المشكله انه تعريف الادب والاخلاق صار كتير مشوه عند بعض الناس و بختلف مقياسة من شخص لاخر, انا بعرف ان الشب بتعامل مع بنت خالتي بكل ادب واخلاق, مش لانه هو مؤدب لأ لانها بتفرض عليه هالطريقه بالتعامل, وفي معلمات بصير يتوشوش هو وياها ويتضحوك وممكن يتمادى بالمجامله والمدح لدرجة المغازله, وممكن يحط ايده على كتفها وممكن يمزح معها بالايدين ...
هلأ انا بعرف الشب و بعرف قصص عنه من بنت خالتي لكن ما حبيت احكيها, لاني ما بصير ادخلها بالموضوع, كانت وجهه نظري انه اذا هو راضي فيها زي ما هي وما بدو يغير فيها اشي ممكن نحكي ماشي مع بقاء احتمالية المقارنه بينها وبين المعلمات بالمدرسة, واللي للاسف كتير منهم ما بنفع يكونو قدوة للطلاب والطالبات, او انه يقارنها بزوجات صحابه , ابن خالي اصرّ على انه بدو اياها زي ما هي, و انه هو بدو وحده يحكيلها " روحي روحي .........تعالي تعالي "

جد بستغرب كيف بعض الشباب بفكرو, المفروض الزواج يكون متكافئ من كل الجهات والا بكون في اشي غلط وما بتستمر الحياة, الزوجه المفروض تكون بتفهم, انسانه بتاخد وبتعطي معها , مش بنت تربيها على ايدك, انسانه بتاخد برأيها و بتستشيرها, بتعينك و بتعينها على هالحياة, توقعت ان طريقة هالتفكير خلصت من زمان بس للاسف لساتها موجوده..

ال ايش ال ما معها موبايل....يا سلااااااااااااااااام هيك صارت مؤدبه واخلاقها عاليه, على هيك قبل كم سنة قبل ما يدخل النت والموبايل عالبيوت البنات كانو قطط مغمضه و هلأ فتحو بعصر التكنولوجيا...