Things I Like To Whisper About

Would You Hear Me Whispering

سلسلة عرسان - الحلقة 14



في عنّا موظف كان يداوم اول ما اشتغلت قبل 9 سنين و كان في مشاكل قانونيه عليه وعلى زملاء اله, و اللي عرفته انهم وقفوهم عن الشغل لحتى يحكم القضاء ببرائتهم او باثبات التهمه عليهم, مشاكل ماليه كانت, قبل شهر تقريبا حكمت المحكمة ببرائتهم ورجع الزلمة لشغله نفسه عنا, و اللي عرفته انه قانونيا برجعولهم الرواتب عن السنين الماضيه بأثر رجعي, و انه خلال فترة هالعشر سنين كان يشتغل و فاتح محل ساتلايت بيع و تصليح و محل بيع و تصليح خلويات.

المهم انا ما بتعامل معه بالمره, مش بقسمي وما في شغل مباشر بيني وبينه, مع اني كنت الاحظ انه كتير بصدف اشوفه بالمكاتب اللي بروح عليها, ودائما مبتسم بطريقه غريبه, و حتى وانا بستنى سيارة الشغل برّه بس يكون في عندي مشوار للشغل, بشوفو واقف عالبلكونه و على وجهه هالابتسامه ذاتها, انا بطنش الموضوع و ولا كأني شفته.

قبل اسبوع تقريبا اجت زميلتي اللي بالقسم , بتحكيلي انها خجلانه تحكي معي بموضوع واني زي اختها و انها بتعرف ردي بس لازم تحكيلي, انا فكرتها جاي تشكي عن موظفه جديده عنّا دائما بتعمل مشاكل, بحكيلها شو عملت فلانه اشي جديد!!! , بتحكيلي لأ الموضوع بخص فلان - الشب ما غيرو - بحكيلها ايش ماله, بتحكيلي انه معجب فيكي كتير وحابب يتقدملك, حكيتلها مش هو متزوج؟؟؟ وبعدين انا بحسّه عمو O_o حكتلي اه متزوج و عنده 3 اولاد و 3 بنات , حكيتلها طيب وشو بدو بالزبط؟؟ حكيتلها اول شي بتحكيلو اني ما عرفت مين الشخص منعا للاحراج, وان الموضوع مرفوض تماما.

تاني يوم اجت عندي عالمكتب بنت بتشتغل مع الشب بنفس القسم, بس شوي او شويتين ما بنطيق بعض انا والبنت, سبحان الله ما تعاملنا بس ما بنحب نتعامل مع بعض, دخلت عالمكتب بتحكيلي بتعرفيني, حكيتلها طبعا واهلا وسهلا , بتحكيلي انا جاي احكي معك بموضوع خطبه, بدت تحكيلي عن ظروف "الفليح" - بما انو خلص انضم للقائمه- حكيتلها لا تحكيلي مين هو منعا للاحراج, واني جاوبت البنت امبارح, ال هو مش مقتنع حكيتلها الموضوع المفروض انتهى و جوابي كان واضح, العمو متزوج و عندو قبيله, يهدى شوي و ينتبهلهم, بتحكيلي بس مرتو موافقه و عندو قدرة ماليه, حكيتلها اذا مرتو موافقه فيا اما بكون مشوفها نجوم الظهر لهيك بدها تخلص منه, او مهددها بالطلاق و وين تروح ب 6 اولاد, و بعدين انا عندي قناعه اللي بتزوج التانيه خلص باخد عالوضع وانا هالموضوع رافضته تماما.

ضليت اشوف الفليح برضه و اتعامل عادي ولا كأني بعرف انه هو, امبارح اجت نفس البنت بتحكيلي انه اكل راسها و ارجعي احكي معها و احكيلها مين انا و حكتلي اسمه وانه متزوج صغير و بدها تحكيلي ظروفه, و بتحكيلي انه الشب "حبّك" من اول نظره وهو فكرك مراجعه و كان بدو يحكي معك بس شافك بتوقعي عالساعه وسأل عنك و هو كتير مكركب و حتى انه حكا لمرته و حكتله اذا بدك بروح اخطبلك اياها وهيك اكيد بتوافق, ال اول ما يشوفك زي كهربا بتدق بقلبه و ببطل مركز... حكيتلها المفروض هالكلام يفرحني؟؟؟ انا حاسه حالي بدي استفرغ, شو هو هالزوج اللي بشوف وحده وبصير هيمان فيها وبروح يحكي لمرته وهي التانيه مالها شو اللي صايبها, و بكره سنتين تلاته بشوف وحده جديده و بهيم شو هالقصص الطرمه, حكيتلها احكيله اني مش ممكن اغير رأيي و الموضوع انتهى, ما في نصيب, بتحكيلي بس هو حكالي ان انا هالبنت" ماخدها ماخدها" واذا ما وافقتي بدو يجي عالمكتب يحكي معك و يقنعك...انا هون عصبت شو اللي ماخدها, وشو هالمصيبه هاي , حكيتلها لا يجي ولا يروح واحكيله اني حكيت ما بدي يحكي معي ولا يجي عالمكتب واذا اجا هاي نقطه جديده بتنضاف لاسباب الرفض و ان الموضوع انتهى.

اليوم رن التلفون , الو مين ويلا هو فليح, ال بدي احكي معك واشرحلك ظروفي, حكيتله انا اسفه انا مش فاضيه, بحكيلي طيب بس تفضي, حكيتله ما في اشي نحكي فيه والموضوع منتهي, ال بدي اشرح ظروف و يا بقنعك يا بتقنعيني, حكيتله الموضوع ما في اقناع, الموضوع مرفوض شكلا ومضمونا و الاسباب ما راح تتغير فرجاءا خلص, سكت و بعدين بحكيلي طيب زي ما بدك

ما بعرف ليش حسيت بالخوف من لمّ البنت اجت , حاولت احدد من شو خايفة ما عرفت, انا مش من الجبنا ولا الخويفين , بس قلبي كان يدق بسرعه و مرعوبه, ولما حكيت لماما بتحكيلي من شو خايفه, مش عارفه

هلأ الموضوع هون في نقطتين و تكررو اكتر من مرّه معي
موضوع انه اول ما يصير في فلوس مع الرجال فورا بفكرو يتزوجو على زوجاتهم, طيب ليش؟؟ مش المفروض تحسّن وضعك و وضع ولادك ومرتك؟؟ مش المفروض تصرفهم على اشي يفيد عيلتك, شو موضوع الزواج التاني هاد بالزبط

و شغله تانيه هي موضوع اللي بتزوجو صغار, طيب ما مرتك برضه متزوجه صغيره, حملت و ولدت و انهلكت وهلأ صرت حاسس حالك شب وما بتنفعك مرتك, هدّيت حيلها حمل و ولاده و طبيخ وغسيل و...و... وهلأ صارت مش منيحه, كتير من الموظفين عنّا بدورو على زوجات تانيه لانهم متزوجين صغار, وبنسو عر الاولاد اللي وراهم, وجزء متزوجين ستات اكبر منهم بكم سنه فالاخ حس حاله انظلم, بعد عشرطعشر سنه حس حاله مظلوم.. ما بعرف كيف بفكرو هالعالم..بتمنى انه ما يرجع يحكي بالموضوع ولا يحكي لناس جداد يحكو معي, جو الحكومه بموتو بالقيل و القال و انا ما بحب اكون جزء من حواراتهم, يحللو و يبررو و يبدو رأيهم بأمور ما الهم فيها.




ملاحظه: اي تشابه بالاسماء او بالاحداث فهو من محض الصدفه البحته, والاحداث جميعها من وحل الواقع


34 التعليقات :

خليني أنطم و أضلني ساكتة عشان إذا حكيت رح أفقع

يعني هذا الموضوع و الناس التعبانه هاي بالذات بتجيبلي الضغط

زي الله مرة أجت تخطبني لزوجها! و زي اللي متزوج و جاي عباله يتني مش لإشي بس لأنه جاي على باله تقولي أنا صحن كنافة

يا مثبت العقل و الدين!!!

الله يعينك

 

ويسبر يا ويسبر
احكي رايي بصراحة الشب جريئ و نادرا ما حدا يصمم على بنت بهاي الطريقة الا من رحم ربي
بس الو كم ولد ؟؟؟؟ يحرق ....... مش هيك الوقاحة
بس صار عندي فضول اعرف ظروفوا هالمعتر
انا بهيك مواقف و احراج بردوا بحس بتوتر او خوف مش عارفة
بس معك حق و حاسة فيكي
لا و مرتوا شو مالها يا انجنت يا الافندي مدوقها المر لتقول خليه يحل عني

الله اعلم
بس بتمنى انو تخلصي على خير
و ديري بالك :)

 

Palestinian Princess

بعيد عنك يا قمر
هو شي بجلط بصراحه :$

قصص كتير مرت علي, معي ومع غيري بنفس الظروف تقريبا, واللي بقهر انهم عينهم قويه بالحكي كمان

ههههههههههههههههه عجبتني صحن كنافه :)
الله يسعد مساكي و صباحك وكل اوقاتك

Jafra

ممكن هاد اللي خوفني..انه جريء زياده!
بعدين حبك..بحبك..كهربا..كلها كلمات زياده بصراحه و خصوصا مع وسيطة الخير ,مأسااااااااااه


هو عمره 43 و عندو 6 اولاد و وضعه المادي ممتاز :) فأخر نقطه المفروض تخليني انسى كل الصفات التانيه ...هيك بفكرو

ان شاء الله يكون الموضوع خلص :$
جمعة مباركه يا قمر :)

 

الله يسعد كل أوقاتك يا عسول
:)
الله يكون بالعون و يهدي بالنا جميعا

p.s. عندي غلطة في تعليقي الأول
كان لام أكتب زي مرة وحدة أجت تخطبني

إقتضى التنويه لأنه اسم الجلالة مكانه كان خطأ في الجملة

 

الله يعينك يا ويسبر بس والله بحييك على جسارة قلبك يعني عرفتي تصديه وتجاوبيه صح لما حكا معك عالتلفون لو انا كان انخوثت وما عرفت اتصرف!
يمكن شعورك بالخوف جاي زي ما حكيت من انه جو الحكومة بيموتو بالغيبة والقيل والقال، يا الله ما اسوأها لما يصيروا يحكو ويتهامسو وخاصة بمواضيع الزواج، وانا بعرف شعورك والله لاني زيك مريت في هيك مواقف في الشغل.
ان شاء الله يمر الموضوع بسلاسة وما يرجع حدا يحكي بالموضوع.
بس والله تساؤلك في محله، ليش الزلمة بس يصير عنده شوية مصاري زيادة بصير بده يتجوز؟ طيب ولاده مش بدهم مدارس ومستقبلا جامعات؟ وما بيفكر بمسؤلياته؟ طيب بكره بس يتجوز وحده تانية راح ياكل هوا وكيف بده يفتح بيتين؟
الله يجيرك ويبعد عنك هيك عاهات يا رب.
تصبحي على خير...

 

معلش يا ويسبورة ضحكتيني :)لا تخافي ولا ع بالك وعلى فكره فيه رجال بس تكبر بتخرفن وبيفكر حاله عنتر زمانه يعني لا تهتمي
بدها تخظب اله من شان تخلص منه ما اكيد مزهقها عمرها الافندي
الله يعينك يا ويسبر على هيك نوعيه وشو بدي احكي الله يثبت العقل والدين

 

بتعرفي انو قصصك بتهون عليي كتير من الافلام الي بشوفها
الحمدلله اني ما وصلت ل درجة الاكشن اللي عندك
الله يطول روحك ويصبرك
واخرتها بتفرج وهالناس بصير عندها شوية زووء
تحياتي

 

بتعرفي انو قصصك بتهون عليي كتير من الافلام الي بشوفها
الحمدلله اني ما وصلت ل درجة الاكشن اللي عندك
الله يطول روحك ويصبرك
واخرتها بتفرج وهالناس بصير عندها شوية زووء
تحياتي

 

يسعد صباحك ويسبر
والله هالعيّنات اللي بتيجيكي سودت وجهنا احنا الشباب

على فكرة.. من فترة سمعت أنو هند صبري إلها مسلسل بنفس فكرة السلسة هادي..
احتمال كبير انو كاتب المسلسل لاطش الفكرة منك..
تابعي الموضوع يمكن يطلعلك كم مليون

تحياتي

 

وأنا بقرأ بهالقصة تذكرت حلقة من الفصول الأربعة قريبة من هالموضوع(شخص مرتو بدها تخطبلوا) بس الأسباب بالحلقة كانت مختلفة

بالنسبة للنقطتين:

1- لأنهم بفكرو أنو هيك راح يجدد شبابو الضائع وأنو الزلمة طرزان وعلى بالو أنو الفلوس بتشتري كل شي

2- النقطة الثانية أعتقد جوابها نفس الأولى

 

شيء يضحك و يبكي بنفس الوقت
ناس عديمةاحساسو زي ماقلتي بدل مايساعداهله بالقرشيناللي معاه , كل اللي يفكر فيه انه يتزوج
!!!!

قبل فترة صارمعايا شيء مشابه, بس المرة دي كان الولدكويس وطيب بس مايشتغل؟؟؟ هو يحسبني جالسه على بنك و لا؟؟

يلا الله يفكك منهانشاءالله ويشغله بشيء تاني, و انا لو كنت مكانك كنت برضه احس برعب و توتر شويةبس انشاءالله خير

:)

 

Esma3i... Enjalatet :( shooooo haaaaai el waqa7a? Allah y3eenek.

 

و الله يا سيتي اللي بوخذ ثانية ما عندو مانع يوخذ ثالثة و رابعة و خامسه كمان (اه ممكن بعد ما يطلق الاولى

يعني انتي لازم واجهتي وجه لوجه عشان البهدلة تيجي بنص وجهو ، و هيك بغير نظرتو فيك 180 درجة ، لانو بهدلة التلفون مش كفاية بصراحة و زي ما حكيتي انتي ، الحكي ما راح يتوقف ، بس لما تحطي حد للموضوع مباشرة هيك بترتاحي ، يا خوفي بس يضلو حاطط الفكرة براسو و بكرة بتلاقي موظفة ثالثة جايه تقنعك ، او المدير شو بعرفك؟!!!!!

 

"يا بقنعك يا بتقنعيني
دخيل الفهم والذوق.ـ فعلا الله يكون بعون البنات عنا.ـ

 

This is my first time on your blog, and I just liked the way you told the story!
I agree about how unfaithful some men can be. And I always ask myself how can some girls accept to marry such men.
Take care dear :)

 

Palestinian Princess

تسلمي يا قمر....امين يا رب :)


الكيل بمكيالين

كان لازم اكون كتير جدّيه لينتهي الموضوع...وان شاء الله يكون استوعب, انا كنت خايفة اني انعجئ وما اعرف انهي الموضوع بس ربنا يسرها

ايوه انتي بالذات بتقدري تفهمي عن شو بحكي بالزبط :$ الله يعينا على هالجو اللي بنشتغل فيه
ان شاء الله ما يبعت مندوب جديد ولا يفكر يجي يحكي

صح كتير بتحصل هالقصص!!! كل ما يصير في فلوس فورا بتزوج :$

ان شاء الله كل ايامك و اوقاتك خير يا رب

 

سوزان

هو مش كبير بالعمر كتير ...بس برضه خرفن عبكير الزلمه :)

انا هيك حكيت برضه...شكلها مش مصدقه وهي تخلص منه, الله يعينها على ما بلاها

امين يا رب..الله بعين شو بدنا نعمل

حياة تستحق الانقاذ

والله يا ام الميس شكله كلنا بالهوا سوا...الله يعينا شو بدنا نعمل

امين يا رب, مع انو بديت ازهق من هالقصص :(

 

Jafar

الله يسعد صباحك و مساك وكل اوقاتك :)
اهلا وسهلا فيك زمان ما نورتني بالمدونه...بالعاده عالفيس بوك بنشوفك :)

لا بعيد عنكم...همه عينه مسوده وجه حالها, و بيني و بينك انا ما بكتب الا عن النهفات و القصص الغريبه اللي بتصير معي, في قصص عاديه و بكونو شباب مناح ومحترمين لكن ما بصير اتفاق على كل الامور من ناحيتي و من ناحيته مرات :)

اه ...شكله حيكون حلو
هو عن مدونه بنفس اسم المسلسل :)
في مرّه حد علق بحلقه من الحلقات عندي ان اللي بكتبه بشبه اللي بتكتبه صاحبه مدونه "عايزة اتجوز" و صدقا انا ما كنت اعرف عن هالمدونه قبل ما ابدا بالسلسله, لكن من قبل ما ابدا التدوين كنت احكي لصاحباتي القصص و يحكولي لازم تكتبي كتاب انتي, وهاد اللي شجعني اكتبهم

ما بتعرف بركي بعد كم سنه شويت كتاب و بعدها صار مسلسل...الله يوعدنا :)


Ahmad Hamdan

مع اني كنت مفكرة حالي حضرت كل حلقاته لهالمسلسل اللي كتير بحبه...لكن للاسف شكلي مش حاضره هالحلقه

اي تجديد شباب, هو بس خراب ديار بحسه انا خصوصا اللي هيك من غير سبب, دمار مادي و بصير يكره حياته و مشاكله الجديده
ههههههههه حلوه طرزان :)))) عجبتني

 

Wafa'

بالبدايه كان الموضوع مضحك بالنسبه الي وبعديها بس دخل الخوف -اللي لهلأ مش مستوعبه من شو بالزبط - بطل مضحك بالمره :(

يمكن هاي لحالها بتثبت انو اناني و تفكيره سطحي جدا
كلنا البنات مع اختلاف المكان بنعاني من نفس النوعيات شكله :(
بس حلوه هاي ما بشتغل...يا سلاااااااااام ولشو بدو يتزوج؟؟؟؟

امين يا رب العالمين...الله يجيب الخير للجميع :)

اهلا وسهلا بصديقتي وفاء...نورتيني :)


Rand

B3eed 3annek ya amar....inshallah 2elly bekrahokee
Hay jor2a :S Allah ye3enna ya rab

 

Dr.Mohammed

انا هالشي مآمنه فيه 100% بستسهل الموضوع بعد المره التانيه

المشكله بالدوائر الحكوميه ان المكاتب فيها موظفين كتير و فجأه بتلاقي موظف واقف فوق راسك, وغير انهم حشريين كتير, فالافضل تلفون علشان افشّ قلبي و اقدر انهي الموضوع بأني اسكر الخط, لوقدامي شو بدو يطلعو من المكتب و شو بدو يفهمو انه ما يحكي بصوت عالي :$

ان شاء الله يكون فهم انو ما في امل بالمره...انا هاد اللي خايفه منو , المشكله انو مديري بدو ينقله عنا عالقسم و هو كان رافض, الاربعا اجا و حكا انه موافق :(((( ما بدي يجي عالقسم

Jaraad

شايف بالله عليك :(
الله يكون بعونا...شكله البنات كلهم مواجهين مواقف مشابهه :(

Susu


You honored me with a previous visit , and insha'allah it will not be the last :)

This is some thing puzzled me a lot, how come the girl and her family accept such a thing, and the girl to start her life destroying another life !!!

 

عاهات يا سوسو..

كيفك؟

 

اهلا بسيران :)

الله بعين شو بدنا نعمل..بدنا نستحمل :)


انا والحمد لله بالف خير, كيفك انتي و كيف الدراسه, النا فتره ما حكينا مع بعض و حتى اخبارك عالفيس بوك من فتره ما قرأتها لاني مش كتير بفتحه :$
ان شاء الله بشوفك قريب :)

 

Yes, you're right. I was here before! Excuse me; I'm pregnant and I think pregnancy hormones affect my memory :)

I'll be glad to come back, and I hope you visit my blog too soon. TC

 

بحسّ معظم اللي بتجوزا الثانية , بحس انه بس بتجوز بس عشان يحرق راس الاولى رسمي
وقولتك , يمكن بكرة يوخذ عالوضع ويتجوز ال3 وال4 , وتصيري ضايعة بين 600 بني ادم

الله الغني عنه, لا تنامي بين القبور ولا تشوفي منامات وحشة , الله ببعثلك اللي احسن منه ان شاء الله

المشكلة ما ارتحت لموقف مرته الحالية , انه حتى لو بتحبيه , بس مش لدرجة تخطبيله

غريب وضعه ,

الله يعينك , انا ارتفع ضغطي وانا بقرأ

 

Susu

It's ok...Allah ye3enek specially that u r in the last few months :)

I already visited ur blog :)

I love all the baby's "abdul rhman" clothes, the recipes and the decorations :) mashallah what a comprehensive blog u have there :)

BTW I love the name 'abdul rahman"

LUNAR.

قهرتني بهالفكره :(
وليش يحرق راسها يعني!!! و يلا احكيلك بستاهل لانها بالاخر حتطلع هالعمله على جلده ...وهو اللي حينحرق راسه ويندم
كتير صارت قبل, بس تيجي التانيه ولا
اسهل من تكراراها

موقف مرته بدل انها بدها تخلص منه..شكله قارفهم بالبيت و بدها تخلص منه

شو بدنا نعمل...بدها تصير قصص نضحك عليها مع انها بتجلط بوقتها :)

 

شو هالعالم هاي؟
يعني "الحمار" بيفهم من أول مرة .. هاد ع قولة دكتور عنا ... مخه تيفال لا يلصق

الاشي المقرف بالقصة هو انه مرته موافقة

قولتك بدها تخلص منه وترميه ع غيرها

تحياتي

 

Ahmad Al-Mahrouq

الله يعينو و يعينا على عقله :$

ههههههههههههه...عجبتني جمله الدكتور :)
دمه خفيف هالدكتور

اكيد هيك ويلا في ست عاقله بتخطب لزوجها !!!

 

هي المشكلة صارت انه "الزلمة" بتكون مرته الاولى مغلبته وعناد ونكد وابصر ايش , فا بتجوز عليها عشان تجلّس - اسف عالكلمة

هسه بتصفّي الشغلة نسبية , انه هل هي منكدة عليه جد او انها ببساطة بتقاتل عشان حقوقها

بس بجميع الاحوال , بتخيّل الجيزة عشان هاذ السبب شوي ما فيها اخلاق
بدك تتجوز الثانية لأنك مقتدر او لأسباب ثانية , هاذ اشي ثاني

 

LUNAR.

طيب هلأ اذا هو مجننها و مقززها شو تعمل المسكينه؟؟؟

انا بحكي انو التنين بدهم يستحملو بعض و يلاقو نقطه يتلاقو فيها, لا يتجوز و لا تتطلق :)

انا بكره اللي بتزوجو على زوجاتهم :( بعرف انو شرع وحلال بس بكرهو :$

 

اذا هو مقززها ومنكد عليها وبده يتجوز عليها كمان , بتصير فلة حيا بعيد عنك

ما بقدر احكي عن اثرها النفسي الصراحة , بس بتخيل انه المسلسلات والافلام العربية خلّت شغلة الزواج المتعدد والحموات اشي مكروه

يعني حتى نظرتنا لهاي الشغلات تحورّت مع الزمن
مع انه لو جيتيها من ناحية شرعية , فهي حلال

غريب صح؟

 

1. it's allowed in islam, man dont need a reason to marry more than one, why don't you accept it?
2. other girls will marry him happily, just watch him getting married in a while
3. you're generalizing, i mean: all men will get married if they got the money for it? will you're so wrong, is this how you judge people? from one experience?
you see the world as men-women only, where women represent all the good and pure traits and men are pure evil

BTW, i am a girl

 

LUNAR.

للاسف في ناس هيك :$

في رجال بتزوجو التانيه علشان يخلو الاولى اللي تركتهم تغار و ترجع و بعدين بطلقو الجديده.....صارت مع قريبه الي و كانت الجديده:(


هي حلال وما في نقاش اكيد....بس ان البنت ترضى او ما ترضى بهالوضع مش حرام شرعا :)

كتير غريب :$


Anonymous

First of all welcome to my blog :)
let me answer ur comment one by one

1. I'm not discussing the mater as if its 7aram or not, I'm saying my opinion about it, and not accepting it doesn't make me a less religious Muslim, I'm putting my self in the first wife shoe and I can't imagine sharing my man with someone else

2. Yes, there is out there some girls don't care about the man situation
الله يسعده و يبعده :)

3. I'm not generalize, BUT it was not only one experience , not ALL men but MOST of them do so, and I'm not judging anyone I'm just saying my point view about this phenomena

Now u r judging me here :)
For sure I don't have this narrow view for the world, and from ur opinion I can be sure that this is ur first visit to my blog :)

BTW there is no one totally pure or evil in this world, we are all a mix :D

 

ههههه مشان هيك أحسن شي تخلي الزلمة مديون لراسه وبفكر كيف يسد ديونه مشان ما يفكر بالجيزه نهائيا ....:-)

 

Orangee

هههههههههه فكره برضه :)
في ستات هيك بعملو ..بضلهم يخلصو على فلوس زواجهم اول بأول لحتى ما يعرف يرفع راسه من الشغل ليجيب فلوس :$
مش حياة بصراحه

اهلا وسهلا فيكي ..زمان ما نورتيني :)