Things I Like To Whisper About

Would You Hear Me Whispering

ضحية مين بالزبط؟؟




بنت خالي بتشتغل مدرّسة في مدرسة حكوميه في منطقه فقيره, دايما بتحكيلنا قصص عن البنات ومستواهم المتدني وكيف بس توصل وحده منهم العاشر فورا بتتزوج, واذا كملت توجيهي اكيد اكيد بتكون مخطوبه.

كل مرّة بنلتقي بتحكيلنا مغامرة جديده, بس هالمرة القصه كانت عجيبه فحبيت اشاركم فيها, سامحوني لان الموضوع طويل.

حكتلنا عن بنت بصف تاسع انتقلت لمدرستهم نقل تأديبي من مدرستين قبل, يعني مدرستهم كانت الثالثة, و بالصدفه بنت خالي كانت مربية الصف, بتحكيلنا حاولت احتوي البنت و اشركها بكل شي, ودائما احكي معها بلطافه مع انها جدا دفشه بالحكي, بالاذاعه...عريفة نظام...بتوقيع الحضور والغياب, حتى بجائزة الملك عبد لله للتفوق الرياضي حطوها مع انها مش متفوقه رياضيا بس علشان يرفعو من معنوياتها, لكن ابدا البنت دائما عنيفه مع الطالبات, وحتى المرشدة الاجتماعيه يأست انها تحكي معها, لان البنت ما بتتجاوب بالمرة, اضطرت بنت خالي تكتّبها مجلسين ضبط, مرة لانها ضربت بنت بعصايه و البنت اغمى عليها و اجو اهلها عالمدرسة, ومرة لانها هددت معلمة ,حكتلها " احفظي ملامح وجهك منيح لانك راح تشتاقيلو بس ارمي عليكي ميّة نار " :$

المهم بنت خالي بتحكي انه بسبب مجالس الضبط ردت انتقلت نقل تأديبي لمدرسة رابعه, البنت كرهت بنت خالي و يوم احتفال المدرسة بعيد الاستقلال نطت من السور وصارت ترمي على البنات وبنت خالي حجار و اوساخ, بتحكي بنت خالي طنشتها وبعدت و اخدت البنات حكيتلهم احنا بنحتفل بيوم وطني و ما بدنا تخرب الفقرات, بتحكي بنت خالي فجأه صارت كراسي تنرمى علينا, و ما لقت البنت الا هاجمه عليها, بنت خالي بدها تهجم اجو معلمات وطالبات مسكوهم, بتحكيلنا بنت خالي مش منظر اهرب منها او ما اعمل شي, انا لساتني مدرّسة بهالمدرسة و منظري ما راح يكون منيح قدام الطالبات, هدي الوضع وراحت بنت خالي عغرفة المعلمات, شوي بحكولها اهربي اهربي البنت جابت "قنوة" وبدها تضربك, برضه ما هربت و البنات والمعلمات مسكو البنت و مشي اليوم.

بنت خالي بتحكي لاهلها اللي صار, اخوها نصحها تروح تشكيها بالشرطه, بلاش تاني يوم تأذيها البنت ومش متأكدين لوين ممكن توصل بتصرفاتها, وفعلا تاني يوم من الصبح راحت عالمخفر ويا دوب حكت للشرطي عن البنت, بحكيلها مين قصدك؟؟ فلانه!!! واللي هي البنت نفسها, بتحكيلو اه , حكالها هلأ طلعت سيارة تجيبها من المدرسة, اتصلت المديرة وبتحكي انها متهجمة عالمدرسة بسكينه!!!!! و حكولها انها لازم تروح تشكي بمخفر تاني بنفس منطقه المدرسة وفعلا هاد اللي صار, راحت عالمخفر لقت البنت و اخوها قاعدين هناك....

بنت خالي دخلت غرفة الضابط لقت البنت واخوها قاعدين وما في مكان فاضي غير جنب البنت او جنب الشرطي , قعدت جنبها قامت البنت مش عاجبها ووقعدت جنب الشرطي, الشرطي بحكي معها بهدوء كتير وهي ما بترد, قاعده بطريقة مش مناسبة, بحكيلها زبطي قعدتك يا فلانه, بتحكيله هاد احسن اشي عندي, بحكيلها اسكتي بلاش تاكلي قتله هلأ, بتحكيله ليش عاساس انك زلمه يعني, كلكم هون نسوان وما فيكم زلمة, بحكيلها اسكتي بلاش تلحقي امك واختك عالسجن هلأ ... قام الشرطي يحكي مع بنت خالي, بحكيلها هاي قاصر وبدكيش بهادل, بلاش تكتبي شكوة وانا هلأ بخليها تيجي لعندك وتعتذر, بنت خالي كانت مترددة, حكتله لأ بدي اكتب شكوه و وتوقع على تعهد, لف وجهه ونادى ضابط وحكاله خدها أدبها شوي, رجعو بعد فترة بحكيلها الضابط شو بدك تحكي لمعلمتك, بتحكيله ايش؟؟ بحكيلها بدك تعتذري؟؟, حكت انا اسفة, سألتها بنت خالي على شو اسفه, حكتلها ما بعرف همه هيك حكولي احكي, حكتلها بنت خالي انا ما بدي اياكي تقربي عالمدرسه, ويلا والله بخلي البنات يطعموكي قتله ترييكي منيح, بتحكيلها والله ما بتسترجي وحده ترفع عينها بعيني, الضابط صار يحكي مع البنت بلاطفه وهدوء, انت منيحه وما شاء الله عليكي و الله بعتلك مدرّسه زي هاي تحطيها فوق راسك, هي قربت عالضابط وصارت تفتش بالدروج بتحكيله شو عندك اشي بتاكل, صرّخ عليها الضابط و حكالها " هلأ بلخمك كف بخليكي تعدي سنانك عن الارض" حكتله بس تكون زلمة بالاول هدد, انقهر الضابط وقام لخمها كف ضربت بالحيط, بتحكي بنت خالي منيح اللي كنت قاعده, لو واقفه والله يمكن كان اغمي علي, وصوت ضربتها بالحيط هزني هز, وقفت البنت بتحكي, ها شايف مش زلمه, انت مره و ضربك زي المره, رد لخمها كف تاني, و ردت عادت نفس الكلام, بنت خالي قررت تكتب شكوى بعد هالمنظر وما تتنازل.

كتبت شكوه و كتبّو البنت تعهد, وصلت المردسة لقتها قايمه قاعده, بحكولها الله سترك ما اجيتي الصبح, كانت بتستناكي بالسكين من ال 7 الصبح, وبس اتصلنا بالشرطه قعدت تهرب والشرطي يلف وراها بالساحه, طلعت جاي بالسكين لبنت خالي :( وكل المدرسة فاهمه ان بنت خالي خافت وما داومت, بالفرصه بنت خالي نزلت عالساحه وحكت للبنات وين كانت و شو صار, علشان منظرها و احترامها للسنوات الجاي, بس ضلت مرعوبه و حملت معها بجيبتها رشاش الفلفل, وصارت تصف سيارتها بنص الساحه لحد ما وصللها قبل كم يوم ان البنت حطوها بجمعيه حماية الاسره لانها ضربت شرطي :$ و حاليا محبوسة هناك وبشوفها معالج نفسي بشكل يومي.

الموضوع كلّه كأنه فيلم, البنت وتصرفاتها و الرعب اللي عملته للمعلمات والطالبات -حتى المعلمات بخافو منها -و البيئه اللي عاشت فيها البنت و خلتها هيك, والاهل اللي بتركو بناتهم, اخوها طلع بحشش وياما ماسكينه, وبتحكيلنا بنت خالي بالمخفر يسب عليها مسبات وقحه ويحكي انه بتمنى تموت ليخلص منها..... وكل هالمؤثرات خلت البنت مجرمة

24 التعليقات :

" احفظي ملامح وجهك منيح لانك راح تشتاقيلو بس ارمي عليكي ميّة نار " ههههههههههه, ما شاء الله اللهم زد وبارك على هالزعرنة تحكي احنا بشيكاجو وعصابات المافيا اللي فيها , كأنها هاي البنت بتمثل شي بفيلم العراب.

البنت هاي مو ضحية, أنا ما بأمن بانو الانسان ضحية منطقتو أو مجتمعو أو فقروا أو غناه, كل الانسان باختيار حياتو وببنيها وبهدها بنفسوا, البنت هاي أنا متاكد انو يا أهلها ما ربوها أو أنهم خلال ما كبرت ما سألو فيها ولا اهتموا فيها فلقت انو الزعرنة هي الوسيلة الوحيدة لجذب الانتباه.

بس لا ما شاء الله اتحملت ضرب الضابط كمان بس الحيح انو غلط يضربها, لانو هاي النوعية من الناس العنف بزيدها غلاظة و حقارة

 

I am sorry I have to write this in English I don't have Arabic keyboard. First of all, glad to hear that your cousin is safe. I am sure she went through a very difficult time. The school principle should have called the police as soon as this girl caused trouble. All this would have not happened if the police were involved in the first place. In the US they have what is called "zero-tolerance policy". Many people are against this policy because they say it is harsh but really when you meet girl like this one who put everyone in school in danger and I am sure all teachers and parents will be pleased to know that such things don't happen in their school. As soon as things get physical police should be called right away.

 

بكرة بذبحها اخوها و بيقلّك جريمة شرف

بصراحة، شيء محزن. لكن بالتأكيد في حل، لازم اخصّائيين نفسيين يقيّموا البنت و يحاولوا يساعدوها تتجاوز الأمراض اللي عندها

 

شو هاظ اللي كاتبيته
اللي بشوف مصايب الناس و انا زعلان من اخوي الصغير بجكي لواحد انت حمار

 

Ahmad Hamdan

والله يا احمد من حكي بنت خالي البنت مسكينه, يعني بعد ما وصلت هالعمر بدون رعاية ولا انتباه و اكيد في شوية قابلية عندها فطبيعي اللي وصلتله, بنت خالي نفسها شفقانه عليها لكن هاد لايمنع انها خايفة منها كانت :$

ما بننكر ان في ناس بكونو بظروف مشابهه وما بوافقو انهم ينجرفو مع اللي حواليهم و بتعبو وبغيرو
لكن مرات في اشياء بتكون اقوى منهم او اريح الهم

Jaraad

ولا يهمك..

شكرا الك, الحمد لله ان الموضوع انحل

انا بتزكر في بوست بمدونتك لفيديو لشي مشابه وكيف الشرطه دخلت القاعه و سحبت البنت من مقعدها, بس للاسف هالشي مش مطبق عنّا, ولهيك بنسمع قصص عن اعتداء الطلاب على المدرسين

معك حق, ولو صار هالموقف لواحد من المتمردين اكيد بكون رادع لغيره
من البيئة اللي عايشة فيها البنت ما بنستبعد تأذي المعلمة

 

قويدر

والله مش بعيده :(
و بنسو انه حشاش و اله اسبقيات, وبصير زلمة و برفع الراس

المشكله ان المرشدين الاجتماعيين بالمدارس عنا وخصوصا الحكوميه مش مؤهلين لهيك شي, ان شاء الله هلأ بمركز رعاية الاسرة يستوعبوها ويحاولو يساعدوها علشان ما تتطور اكتر عندها الامور

Anonymous

فعلا مصيبة اهون من مصيبة...بس لازم تزعل من اخوك و تفهمه انه هاد غلط
لانه هيك البدايه بالعاده بتكون بسيطه وصغيرة بنظرنا وهي بتكون لبنه اساس غلط في الشخصيه واحنا مش عارفين :$

الموضوع ما بضحك ..بس ما بعرف ليش حششت ضحك على
"شو هاظ اللي كاتبيته"
ههههههههه
اهلا فيك :)

 

مساء الخير
بصراحه ويسبر وضع البنت هذه محزن اكثر من وضع بنت خالك....يعني بنت خالك بتقدر تطلب نقل وتخلص من المشكله....اما البنت فطول عمرها ح تبقى بالمشاكل والله اعلم ايش هي الاسباب اللي خلتها توصل لهالدرجه من العدوانيه...غلط كبير انه الضابط ضربها حتى لزقها بالحيط!!!!!!! هذا وهو تحت ايده سلطات بيقدر يحجزها مثلا في غرفه منفرده لم تطاولت عليه بدل انه يضربها ...اما يضربها بهالشكل الوحشي...مرفوض

 

waaaaaaalllllllllllllllllllllllllll! Msh m3gol! Sho had whisper? Are you serious wela kzbt nissan bshahar 6?

 

مش معقول!! عن جد ولا بالافلام صدقي لو واحد حكيلي القصة كان ما صدقتها ، و الله اشي بحزن ، يعني هاي البنت ما لاقت مين يربيها و مين يعتني فيها و شوفي كيف صار فيها ، الماساه اكيد باقي عيلتتها بدهم يكونو اعطل و اسوء ، زي ما بحكي المثل اذا كان رب البيت بالدف ضاربا فشيمة اهل البيت الغناء و الرقص
الله يهدي الجميع

 

تنفع فيلم هالقصه :(بس عيشي دهر وبتشوفي العجب!!والله يعين بنت خالك على مهنة التعليم
بس هاي بصراحه مش لاقيه حد يربيها وباعني تربيه صحيه مش ضرب لانها شكلها مبلده وما بتحس الله يعينها شو بيضل للواحد بعد ما يفقد الاحساس

 

هذا فيلم رعب ! جد إشي بحط العقل بالكف
:(

 

Nissan

مسا الورد :)

بنت خالي مع رعبتها حزنانه عالبنت, و بتحكي انها حاولت معها منيح و تطنيش و مش منيح والبنت ما في اشي مشي معها, و بتحكي انه لازمها طبيب نفسي ومن زمان


اكيد غلط, مش طريقة بصراحه, حتى لو استفزته المفروض يكون مهيء للتعامل مع الكل

Haitham Seelawi

Unbelievable sa7 !!!
unfortunately its 100% true :(

 

Dr.Mohammed

بنت خالي تحكيلنا واحنا مصدومين ومش مصدقين, وهي بتضحك و كأنه اشي عادي, بس طلعت مسكينه ماكله هوا :(

امها واختها بالسجن للبنت والله اعلم عن باقي العيلة :$ ممكن احسن شي مكانها هلأ بلاش حد يستغل تمردها بأشي سيء

Sozan

انا اول اشي خطرلي " جعلوني مجرما " جد كل الناس والظروف اللي حواليها عملو فيها هيك للبنت

الضرب بزيد من تمرد و عنادة هيك شخصيات

Haitham هيثم Al-Sheeshany الشيشاني

شفت بالله.....
انت بس دير بالك على حالك وما تزعل حد منك :)

 

همسه الموضوع كتير بزعل والله دمعتي نزله ادايقت كتير واتوقع لا سمح الله انحطيت بهيك موقف يمكن لدخله بغيبوبه ما صحيت منها مش خوف لكن زعل وصدمه على واقع هالبنت :"(

الحمدالله الي الله حفظ بنت خالتك من شر هالبنت وقرار حكيم منها انها تبلغ عنها وما تتنازل عن الدعوه البنت امبين انها بتعاني مشاكل وضغوطات نفسيه كتيره اذا الكف الي اعطاها اياه الضابط والحيطان قاله اي من صوتوا ما صحاها معناتو هادي بالمره امتمسحه ما بتخاف من اشي ,ومافي عندهارجا بالدنياولاحتى الاخر والعياذ بالله فكل ما فى الدنيا يذكرنا بالآخره وهادي دنيتها لا هي شايفه الحق ولاقادره اتحس وتشعر فيه :"(

وانشالله البنت لمن يشوفوها الاطباء النفسيين ويشوفو الحاله تبعتها يقدرو يساعدوها ويطلعوها من الي هيا فيه :(

والله ايكون بعون هالبشر عن جد الي بشوف مصيبت غيرو بتهون عليه مصيبتوا الله ايعافينا يا رب

 

اول شي الحمدالله على سلامة بنت خالك، والحمدلله اللي الله نجاها وسلم.

منيح انها اتصرفت صح ولجأت للشرطة علشان يكون الموضوع معها مش ضدها.
لو راحت عالمدرسة بالأول وواجهت البنت كان حطوا الحق عليها، لأنه مسكين هالمعلم شو ما يتصرف محسوب عليه، وكل يوم والثاني طالعينلنا بقانون جديد لحقوق الطالب وما بدري شو، طيب وين حقوق المعلم؟

النظام التعليمي الفاشل كان لازم وجد حل من البداية بتحويل هيك طلاب لمختصين بدل من نقلها من مدرسة لمدرسة، لأنه هالشي ما زادها غير اصرار وعدوانية.
لازم اتنبهوا من بعد اول مدرسة نقلوها عليها ولما ما اتحسن وضعها انه مش هاد الحل الأمثل.

الله يعينها، وانا بنصحها تقدم نقل لمكان افضل اذا ما بتقدر تتحمل التعامل مع هالبنات.

 

" وكيف بس توصل وحده منهم العاشر فورا بتتزوج, واذا كملت توجيهي اكيد اكيد بتكون مخطوبه."


I don't respect your post at all, because it's pretty obvious that you're vomiting and spouting despicable crap.

You're presenting your culture and relgion as trash.

قَالَ لَنَا رَسُولُ الله : «يَا مَعْشَرَ الشَّبَابِ مَنِ اسْتَطَاعَ مِنْكُمُ البَاءَةَ فَلْيَتَزَوَّجْ، فَإِنَّهُ أَغَضُّ لِلْبَصَرِ، وَأَحْصَنُ لِلْفَرجِ، وَمَنْ لَمْ يَسْتَطِيعْ فَعَلَيْهِ بِالصَّوْمِ، فَإِنَّهُ لَهُ وَجَاءٌ». رواه البخاري ومسلم .


3eeb 3liiki or 3liik.....

 

لا حول لولا قوة إلا بالله.. هادا بنفع سيناريو فيلم هندي :(

والله مشكله.. وحمدلله على سلامه بنت خالك.. جد سبحان الله كيف ربنا هداها تروح عالمغفر هداك اليوم.. ولا جد إبصر شو كان ممكن صار..

قصه كتير محزنه انو بنت مدرسه وكل هادا السواد بقلبها..

 

Jarat

الله يعينها ويشفيها, لانها اكيد مريضه وبدها حد يستوعبها و يرجعها للطريق الصحيح

الله يسلمك يا رب, الحمد لله انها راحت, سبحان الله كيف ربنا يسرلها تروح علشان تتأخر عن الدوام

امين يا رب.....الله يهونها عالجميع

الكيل بمكيالين

الله يسلمك يا رب :)
شفتي...سبحان الله قدرها ما تواجه هيك اشي, وفعلا فورا بصير الحق عالمعلم...لازم يكون في قانون ليخوف الطلاب وما يتمادو باخطائهم

قدمت وللاسف مش موافقين بالوزارة...مسكينه الها فترة مش مرتاحه
موظفة حكومه :$

 

Anonymous

اذا كان كلامك نابع من منطلق ديني بحت فأرجو ان تنتقي كلماتك بدقه في النصح حتى تأخذ الاجر كاملا " وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ"

ويجب قرأة الموضوع وفهم المغزى منه قبل القاء الاتهامات, انا والحمد لله ايماني قوي و لا اتأثر بالكلمات, ولكن هناك ضعاف ايمان يسقطون تصرفات المسلم الخاطئة على الدين وحاش للاسلام ان يتمثل بشخص


Rula A

شفتي جد لو مش بنت خالي واللي بوثق بكلامها حكته وصار معها ما بتتصدق القصه :$

الله يسلمك يا احلى قرابه ..الحمد لله انها قررت تروح من الصبح

الله يعينها و الله اعلم شو شافت بحياتها

وربنا يهدينا و يهديها

 

by the way , your post has been mentioned in 7iber.com , here is the link

http://www.7iber.com/2010/06/%D8%A3%D8%B5%D9%88%D8%A7%D8%AA-%D8%A3%D8%B1%D8%AF%D9%86%D9%8A%D8%A9-%D8%AD%D8%B1%D8%A9-%D8%AA%D8%B1%D8%A8%D9%8A%D8%A9-%D9%88-%D8%AA%D8%B9%D9%84%D9%8A%D9%85-%D8%A3%D8%AD%D9%84%D8%A7%D9%85-%D9%86/

congrats.

 

Dr.Mohammed

شكرا محمد ...اسفة كتير التهيت بالقرأة هناك وما شكرتك :)

و كاتبين جزء من تعليق الانسة كيّاله :)

 

بس على الفكرة اللي بضحك انهم بحكو بصيغة المذكر

"رواها صاحب مدونة “همسة” مع ابنة "خاله المعلمة

:))))))))))))

 

ويسبر
ذاكرينك على حبر بصفة المذكر مش المؤنث!!

حطيلهم تعليق يصلحو هالشي :)

 

Dr.Mohammed & مياسي

ههههههههههه الله يسامحهم...مدونة همسة لصاحبها !!!

شكرا عالتنبيه و هيني بعتت تعليق على الموضوع

انا بنت :)