Things I Like To Whisper About

Would You Hear Me Whispering

كرتونا و كرتونهم



اليوم صاحبتي بتحكيلي انها بدها تلغي قناة سبيس تون من عندها , استغربت بحكيلها, قصدك اشي تاني صح؟؟ بتحكيلي لأ سبيس تون
بتحكيلي انت ما شفتي الكرتون اللي بعرضوه, البنات بدون لبس و هاد حب هاد, وهاي بتحب هاد, و اولادها طول الوقت, بحبها بتحبو وبحبو بعض....

صرنا نتزكر الكارتون اللي كنا نحضره, هلأ بغض النظر ان الكارتون ايامنا كان اشي فخم بصراحه مش زي بعض التفاهات اللي بحطوها هلأ, اكتشفنا انه برضه كله حب بحب, ساندي بل بتحب مارك, عدنان بحب لينا, حتى اوسكار فيه حب و طم طم.... طم طم كاين بلاوي زرقه واحنا مش عارفين,اذا اخوي الصغير بحكيلي عن مشهد انا ولا متزكرته بحكيلي انا حافظه عن غيب, اشياء غريبه عن اخت طم طم و حبيبها عرفان.....

المهم اكتشفنا انهم كلهم كاينين حب بحب برضه, ولكن وصلنا لنتيجه

احنا كنا بريئييييييييييييييييييييين كتيييييييييييير
و الجيل الجديد اقوى وافتح واكسر منا و بدو انتباه كتيييييييييييييييييير



ملحوظه زغنونه...لو يضلو يعيدو عدنان ولينا و لخمسين سنه قدام راح اضلي احضره و اتابعه :)

25 التعليقات :

كانو كلهم بحبو بعض
بس احنا كنا ملتهيين بالاحداث اللي بتصير

الكذب اللي كان يصير بعدنان ولينا , ينط من ابصر وين وييجي واقف والخ الخ , بس كان حلو كثير

كان يخف عقلي لما احضر ليدي ليدي , زماااااااااان
والا سالي

 

LUNAR.

ولا كنت ملاحظه بصراحه...زي ما حكيت هو تسلق عدنان وقوه رجليه واصابعه كانو ماخدين عقلي بصراحه :)

يا الله شو بكره سالي ...حزين وكئيب كتير

 

ما بعرف اذا عن جد الجيل الجديد تغير ولا لأ ، و لا المشكلة بانو الكرتون الجديد مليان شغلات عن الحب فبالتالي بتم تنشئة الجيل على معنى مشوه للحب،

للاسف صارت كلمة الحب مشوهة تماما ، و اذا ذكرت كلمة الحب صارت تعني شغلات مش مليحه و معنى سيء جدا و صارت زي اشي محرم او اشي بيوصف فيه الشباب الهاملة او حتى البنات المش محترمو ، مثلا كلمة حبيب بتشديد الباء اذا انحكت للشب صارت زي كانك بتسبو

على كل حال ، التلفزيون بدو مراقبة من قبل الاهل و الابلى و الامر مشكلة العنف اللي صاير ينعرض على قنوات الكرتون تبعت الاطفال

 

والله مظبوط كلامك زمان كان الكرتون مليان قصص حب وغرام بس والله ما كنت انتبه على هاي الشغلات

جيل اليوم مش زي جيل امبارح ولا زي جيل الي قبلو

الي بدي اوصلوا صاحبتك ازا شاله السبيس تون ما حله مشكله

حضل اتشوف هادي المشكله موجوده وممكن تصير اكبر فما تحل المشكله بمشكله لانو ازا شفره السبيس تون الاطفال راح يرووحو ويسمعو من اصحابهم بالمدررسه والله اعلم كيف راح يترجمو هاي الشغلات والطفل حيخاف يشارك هاي الشغلات بالبيت لانو عارف انها غلط

رقابه الاهل كتير مهمه بهاي المرحله

انصحيها تقعد اتشوف الكرتون مع اولادها وتحكي معهم وتتاكشن معهم بكل عفويه لانو طفل بضلو طفل وسهل جدا انو يتوجه ويتلقن المعلومات

 

Dr.Mohammed

انا بحس ان الجيل الجديد اوعى منّا, و هالشي في اله ايجابيات واله سلبيات
يعني بحس الاطفال مش عايشين طفولتهم صح, اللي ببالهم اشي اكبر من عمرهم

معك حق, المعنى الحقيقي والسامي لهالكلمه راح, يمكن لان المشاعر بطلت صادقه متل قبل, صارت الكلمة تستخدم بس كمدخل لتضييع الوقت

Jarat

معك حق, اذا ما شافو بالبيت بصيرو بدهم يدورو برّه
لكن صاحبتي ناويه تجيب البديل

بتحكيلي انهم شافو عند دار عمهم قناة المجد للاطفال وكتير حبوها, وهاي القناة اشتراك
فناويه تشترك فيها وهيك ما بتحرمهم من شي

 

متل ما حكيتي
مو القصص هي اللي تغيرت
وانما العقول
بس بالنهاية مراقبة الاهل هي صاحبة القرار .. وهي اللي بتوجه الافكار عن الصغار

عدنان ولينا ما كنت احبه .. قد ما عادوا وزادوا فيه
احلى افلام كرتون عندي توم وجيري القديم .. وودي بيكر .. بينك بانتر

 

بصراحه انا ما بتفق معها من الاساس تشيل التلفزيون اذا عندها اطفال لانه حتى الدعايات صار فيها مسخر
اما شغلة انه احنا ما كنا منتبهين هاي شوي بدها اعادة نظر المسأله انه ما كان عنا اهالي واعيين لخرابيط التلفزيون زينا هلا وما كان عنا وسائل الترفيه اللي موجوده هلا يعني بالمختصر يا همسه المشكله مش بالجيل المشكله صارت انه احنا صار عنا وعي اكتر وصرنا بدنا نحافظ على براءة اطفالنا

 

مبروك الثيم الجديد =) بس سبايس تون أكتر قناة بتحرف الكرتون عشان ما يجيبو هاي القصص

 

آه والله كنا هبل، والحمدالله هاي كانت نعمة، عرفنا كيف نستمتع بالحياة أكثر منهم.
ملاحظة معقولة جدا، وانا كمان لو يعيدولي عدنان ولينا، وجزيرة الكنز مع القبطان سلفر بحضرم وراح اضل احضرهم يمكن حتى لو صرت بالخمسين.

 

ما هي الحياة في جوهرها حب ، لما يوم الجمعة اقعد و اشرب كاسة شاي و افكر بهدوء بتطلع شغلات مع الواحد انه الحياة هي الحب ، بنحب الله عزوجل فبنصلي و بنصوم بروح ثانية مختلفة ، بتحب الرسول صلى الله عليه وسلم فبسمع السيرة و الاحاديث و انا آخر استمتاع ، بنحب الشغل فنبدع فيه و بننسى اللي حولينا ، بحب زوجته وولاده (مع اني مش متزوج) بتطلع ب 90% العيلة سليمة ، هاي هي الحياة كلمة من حرفين حب

افلام الكرتون صايرة سخيفة وهبلة و معقدة بدها واحد يشرحها علشان تنفهم بدها ملازم ودوسيات شو ابطال ديجتال و قوه و كروت ؟؟؟
بما اني جيل ثمانينات يعني صرت قديم
بحب طمطم وكابتن ماجد و هداف و عدنان و ليانا و الاحلام الذهبية و في فيلم كرتون كان اسمه حكايات عالمية

بتحسي الافلام زمان كان الها هدف ، هسه الموجود كله عايش بعالم ثاني و مركبات فضائية و مخلوقات كمبيوتر و شغلات غريبة شغل ناس سكرانة

 

Ahmad Al-MKahrouq

اكيد اهم شي هي مراقبه الاهل, لانه كل شي صاير بخزي بهالتلفزيون :$

له له له ليييييييييش.. عدنان ولينا بجنن
بس يلا سماح مدامك بتحب ودي بيكر و بينك بانثر و توم اند جيري لانهم برضه كتير حلوين...بس مش قد عدنان ولينا :)

Sozan

هو معك حق ان كل شي بطل مناسب الواحد يحضره, بس بدها تعوض الفراغ اللي بعملة غياب التلفزيون و الموضوع صعب بما انها موظفه وهمه معطلين هلأ وما في الهم غير التلفزيون, بس لو قناة اطفال ملتزمه ممكن تحل الموضوع...هيك اعتقد :$

بابا كان يحضر اشياء كتير معنا, بس فعلا انا ما عمري انتبهت للموضوع, كانت مغامرات مش اكتر ولكن ما في موضوع حب وما حب
و ممكن لهيك ما كان بابا عندو اعتراض عاللي بنحضره...

للاسف حاليا في كتير اهل بهملو بموضوع مراقبة الصغار, الي صاحبه بتابع هي وبناتها ال 3 كل المسلسلات التركيه و لمّا حكيت مع البنات حسيت ان في مفاهيم غلط دخلت عقلهم و لما حكيت للام حكتلي " مأنا بدي اتسلى و همه ملزقين فيي شو اعمل !!!" جد اشي غريب

 

Haitham Seelawi

اهلا وسهلا بهيثم...الله يبارك فيك


انا بصراحه متابعه ل
MBC3
توم اند جيري و شون ذا شيب :)
وما بحضر سبيس تون

بس ولادها للمسكينه متأثرين باللي بنعرض :$

الكيل بمكيالين

جد ولا كنّا منتبهين :)
معك حق, همه حابسين حالهم يا تلفزيون يا كمبيوتر يا بلاي ستيشن
احنا كنّا كله بالطبيعه :)

يا سلاااام على جزيره الكنز :) برضه بتجنن و بتنحضر

 

Anonymous

جميل جدا تعريفك للحب...بس بالنسبة للاطفال الحب وصللهم بمفهومه المشوه و هاي المشكله

ثمانينات و قديم...الله يسامحك :) هينا باواخر السبعينات ولسا حاسين حالنا صغار :)

حكايات عالميه هلأ كل ما اسمع موسيقى البدايه بيجيني شعور غريب و جميل...كتيييير كنت احبه
و الاحلام الذهبية يا الله كنت ناسيته تماما و بس قرأت الاسم تزكرته :) وتزكرت النسر الذهبي...بيبيرووو

من يوم ابطال الديجيتال و الكرتون بالنازل بصراحه :)

 

walla ya whisper .. enni abel osboo3 t2reeban kano ft7een 3ala el TV 3ala ka2enno MBC 3
o alla la ywarjiki eshi msh ma32ool !!
aslan ashkalhom bet5wef tb3oon el sha5seyyat!
mumtaz!! shu btetwaqa3o mn el atfal y3ni? el bara2a ra7 3t2atte3 7alha fe3lan!!!!! :S :S :S
a7sanelha tel3'i el Spacetoon
o a7sanleha kman tensa mwdoo3 el TV bel marra :S :S :S :S

 

ويسبر يا ويسبر
انا بدي احكيلك
الذنب برضو مو ذنب الولاد
مزبوط احنا كنا نحضر وكان كله حب
بس احنا ما كنا ننتبهلو
لانه ما كان في اشي يجذب انتباهنا لهاي الأشياء
شوفي هلأ, المسلسلات الأجنبية اللي كلها بتحكي عن هاداالاشياء و الخلاعة اللي فيها
شوفي المولات و صويفية و الرابية كلها شباب مع بنات و كل الأغاني هلا حبيته و حبني و باسته و باسني
الغلط مش غلطهم صدقيني
و تشفير القنوات مش حيساعد, و لو انشطب التفلزيون كله ما رح يساعد
لانه برضو هاي الأشياء موجودة عنا في المجتمع
تخيلي واحد ما عنده ستلايت في البيت, و ما بطلعش من البيت وبيروحش و بيجيش, لما يروح عالجامعة شو حيصير فيه ؟
هو أول واحد رح يهمل, لو كان شيخ الجامع !
و بوس الواوا !

 

انا اللي قصدته انه الاهل ما كان عندهم معرفه باثر التلفزيون على فكر الاطفال لهيك ما كان في تدقيق على القصص الموجوده اما انت هلا تنظري لكل شي بعين منتقده لانه صار في وعي اكثر وفهم اكثر لاثار التلفزيون حتى على اللغه المستخدمه
انا والدي مثلا كان يحضر معنا كل مسلسل وكان احيانا في نص المسلسل يطفيه ويحكي هاد المسلسل بيعلم اشياء غلط بس الكرتون كان حكايه تانيه لانه ما فيه تصريح حقيقي للحب فما كانوا يعتبروه شي مهم
وبالنسبه لصاحبتك فيها تحط الاولاد في المخيم الصيفي الاردن المخيمات الصيفيه مش غاليه

 

صح كلامك..
أنا مرات بحكي ليش هيك الكرتون هاي الأيام كلو عن الحب و عن علاقات غرامية و مش عارفة شو ، بس لما أتذكر كرتوننا كمان كان نفس الاشي!!!
بس أنا أيامها عمري ما ركزت على هاي القصص، يعني كنت أعرف انو عدنان "حابب" لينا، بس كنت أفهمو بمعنى برئ، و ما يكون كل التركيز عندي على هالموضوع..
المشكلة من زماااااان زماااان و لحد هلأ انو احنا منستورد كل كرتوننا من برا، و خصوصاً اليابان، و أكيد رح تكون برامجهم معمولة على أساس ثقافتهم و معتقداتهم... و ما بصير احنا نضل ننتقدهم لانو هم أصلاً ما جبرونا نحضر أفلامهم اللي عملوها عشان أطفالهم!!!
لازم يكون في نهضة أكبر بمجال برامج الأطفال ببلادنا، عشان نقدر نوجههم بالطريقة اللي احنا بدنا إياها و نعلمهم المبادئ و الأفكار اللي بتناسب عاداتنا و ديننا...
حالياً في تجارب زي قناة "طيور الجنة" الرائعة، بس هي ما بتعرض كرتون، كلو أناشيد و برامج، و هاي خطوة كتير حلوة، بس للأسف هلأ قلّبي بالريموت كنترول بتلاقي صار في مليون قناة متلها...
برأيي بدل ما القنوات تقلّد بعضها، مفروض يضلوا يبتكروا أفكار جديدة تنافس البرامج و أفلام الكرتون الأجنبية...
آسفة طولت عليكي..
اذا انا تعبت!!! :S :p

 

جيل هالأيام جيل الإنترنت وعصر السرعه.. انتي حتقوليلي.. ما شاء الله إبن أختي عمرو ٩ سنين وبعمل أشياء غريبه عجيبه وسلايد شو عالباور بوينت إلي أنا يادوب أمشي حالي عليه..
كنا مسجلين عدنان ولينا على أشرطة فيديو ولساتهم موجودين عنا.. بس صدقي ماعمري شفتو عالفيديو إلا bs لما ييجي عالتلفزيون :)

 

Farah

LOOOL shaklo heak
jad b7es 2enno elbara2a bte5tafee bakeer men el z3'ar :$ 7aram wallah :(

حمزة الشعراوي

والله كل شي بخزي...حتى افلام عربي بطلت تقدر تحضر, مسلسلات سوري بتحس نفس الشي, اشياء و قصص غريبه وناس عايشين كأنه بدون اهل و بنات وشباب و ديسكوهات

هي التربيه الاساس, ربي ابنك وبنتك و هيك بتكون عملت اللي عليك :$

"و بوس الواوا !"
O_O
هههههههه لاااا شكل التوجيهي عامل عمايله :)

بالتوفيق ان شاء الله....و بدي امارس عليك دور الكبار

شو بتعمل هون...قوم ادرس ;)

 

Sozan

معك حق, حتى الوعي الديني بحسّه عند جيلنا اقوى, لانه اعتمادهم من زمان على العادات و على العيب بمقياس الامور
و الوازع الديني يمكن بخلينا نكون احرص بالمراقبه

فكرة ممتازه النادي الصيفي و اكيد بتلاقي واحد مناسب تكاليفه لوضعها
الاحد بقترح عليها ان شاء الله
شكرا عالفكرة :)

Mrs H

كنّا نشوفه بطريقه تانيه, اكبر من الصداقه, مش لاقيه تشبيه مناسب , بس كان بريء

معك حق, المفروض يعملو اشي مناسب لبيئتنا اللي عايشين فيها, و بصراحه بديت اكره هالقنوات اللي متل طيور الجنه, يعني اي نعم بوصلو افكار حلوة للطفل, لكن برضه المفروض يخاطبو عقل الطفل بالحكي مش بس اغاني

صاحبتي بتحكيلي عن قناة المجد للاطفال وفيها كارتون ديني شكلها حلوة, بس للاسف مش مجانيه وبدها اشتراك :$

المدونه كلها تحت امرك...انا بحب التعليقات الطويله :)
نورتيني

 

Rula

حبيبي ...عالقليله ما شاء الله عليه بستغل وقته و عقله باشي منيح :)

اخوي الكبير عامل هيك, وبالليل بس يروّح من الشغل وما في شي يحضره بحط الشريط و بحضرلو كم من حلقه :)
مرتو مسكينه حافظه الحلقات كلها
بتضللها تحكيلو

"I fed-up from Adnan wa Leena" 2aw
"qazaztena with Adnan wa Leena" :D

 

الواحد كاين اجدب شكلو زمان
انا من كم سنه فهمت كم كرتون كنت احضرهم:)

بس مش حاسه انو صايرين زي الختايره؟ نتحسر ونحكي ايامنا احسن؟!!
:)

 

مياسي

انا نفس الشي, جديد لانتبهت لاشياء كتيره :)


معقول كبرت علشان هيك صايره انتقد :$

لااااا...لاااااا احنا ما بنصير ختايره ابدا :)

 

أنا ماحي كا قنوات الأطفال لأنها بصراحة ياأما مش مناسبة (بتشجع على الإنحلال والصحبة) ياإما كلها دعايات والولاد بقززوك بطلبات الألعاب.. أفضل قناتين هما براعم والجزيرة للأطفال، كثير ممتازين، جربوهم

 

Bilal

اهلا وسهلا بلال :)

هههههههه برضه صح...كل ما يشوفو اشي بصير بدهم اياه ...هاي مشكله تانيه :)

سمعت عنها قناة براعم بس ما شفتها...ان شاء الله بحكيلها عنهم

شكرا والله يخليلك الصغار :)