Things I Like To Whisper About

Would You Hear Me Whispering

6 Secrets Tag :)





انا من الناس اللي بحبو ال Tag بصراحه :) و بتزكر اول مره SimSim حطت اسمي لاعمل Tag شو انبسطت من كل قلبي :)) و قبلها كان في واحد لقيته وانا ببحبش في مدونة مياسي و من غير ما ينحط اسمي جربته :) وبرضه في واحد لقيته بمدونة Sharifo وبرضه جربته لحالي :)

هلأ نيجي لهاد ال Tag اللي وصلني من الانسة كيّاله , ما بتتخيلو قديش عصرت مخي عصر لاكتب 6 اسرار عني :$ مش لانه ما في اسرار بس بدور على اسرار ممكن تنتشر عالهوا :) غير اني كتبت قبل 25 اشي و قبلها 7 اشياء ...فشكله ما ضل كتير, خلينا نبدا

1. انا من يوم ما بديت التدوين وعندي هواية البحبشه في المدونات اللي بحب اتابعها, بمسكها من اول بوست و كل يوم بقرأ شوي لاوصل لاخر بوست, ما بعلق بس بهيك بتعرف اكتر على المدون او المدونه, مش فضول, بس بدي ما يروح علي اشي من كتاباتهم الرائعه, فاللي الو زمان بدوّن وقبل ما اتعرف على مدونته يتأكد اني بحبشت فيها :)

2. اشي اليوم اكتشفته, انا كنت افكر حالي بحب كل الاطفال, اليوم اكتشفت اني ما بحب الصغار الزنخين و القليلين ادب :$ البوست القادم بكتبلكم شو صار

3. انا بحب شعر البنات كتير كتير ...كل ما اشوف البياع او اسمع الصفيره فورا لازم اشتري و مش بكيت او بكيتين لا باكل لتصيبني صدمه سكر مع اني ما بحب الحلويات بشكل عام و بفضل الموالح :)

4. انا اجتماعيه بحدود بأول لقاء, بكون شوي حذره لاعرف اللي قدامي و هالشي مرات بخلي الناس تتهمني بشوفة الحال :$ مع اني ابدا مش هيك وبأني جامده وجدّيه, بس اللي بتعرفو علي منيح بعرفو اني عكس هالصفات, و هاد الحذر ما بمنع اني دائما بنصدم بالناس, لاني بروح لاخر حد بكل شي, اذا حبيت بحب لاقصى حد واذا كرهت بكرة لاقصى حد, ولهيك دايما بنصدم :(

5. بالجامعه كان لقبي رجل آلي :) وهالشي اكتشفته بالصدفه, مشيتي كانت سريعه و عسكرية على رأي ماما, كنت ماشيه رايحه من مبنى لمبنى سمعت شب بحكي هي اجا الرجل الآلي, بتطلع اشوف مين هو, لقيتهم بتطلعو علي, ما قدرت امسك حالي و صرت اضحك, همه انصدمو, كانو بفكروني ما بضحك :( حتى لمّا رجعت اخد شهاداتي مريت على صاحبتي بالمختبرات, وسلمت عالاساتذه انصدمو, بحكولي هلأ انتي اللي كنتي بتدرسي عنّا بالجامعه؟؟ كاينه كشرة كشرة وانا مش عارفه :)

6. الي تقريبا سنتين في عالم التدوين و لليوم ما بتتصورو الفرحه اللي بكون فيها بس اشوف تعليق :))) جد الموضوع ما بصير عادي عندي, بنبسط بالتعليق زي فرحتي بأول تعليق وصلني.

هيه... هيه خلصت الواجب :)))



تعديل..

طلعت مش مكمله الواجب :$ شكرا لماهر اللي نبهني واللي حيكون اول المرشحين لعمل الواجب :)

هلأ بما اني بحس ان في ناس ما بحبو هالمواضيع وهالحركات , و بما اني كتير متأخرة بالواجب والكل تقريبا انذكر اسمه فأنا برشح اسم ام عمر و اي حد بحب يعمل الواجب يعمله :)

28 التعليقات :

والله شكلو هال
عامل عمايله بالمدونين
tag
:-D
بتعرفي شو حلو الواحد يئعد يعني بينه وبين حاله ويفكر بالأمور ويواجه حاله شوي
جميله ويسبر للأمام

 

شفتي بالله...انا اللي كتير متأخرة بصراحه :$

المشكله بس تفكري تفكري وتلاقي اسرارك غير قابلة للنشر :)
كأنه كتير شخصيه ولسا ما وصلتي لمرحلة انك تحكي عادي عنها

تخيلي كل اللي بكتبه ولسا في اشياء شخصيه :)


تسلمي يا قمر :)

 

صباح الخير
1-بعمل زيك...بس انا ببحبش عشوائي والعنوان اللي بيعجبني بقرأه
شعر البنات بحبو...بس بحبه نافخ مش3- مجعلك بالكيس
5-انا الي شهرين بعالم التدوين ويا ريت اصمد زيك...وقبليها كنت اتابع المدونات بدون تعليق
تعرفت على مدونتك عن طريق مدونة قويدر قبل سنه تقريبا وحاطيتها عندي بالمفضله

 

مرحبا ويسبر
اخيرا عملت الواجب، راح اصلحلك نقطة نقطة:
#حلوة شغلة البحبشة، انا أول ما عرفت مدونتك رحت بحبشت على سلسلة عرسان وقرأتهم كلهم بليلة، عجبوني كتييير وضحكت لانه فيهم مواقف صار معي زيها بالزبط.
#بالنسبة للأطفال انا ما بحبهم بالغالب،لانه الاطفال اللي حولي كلهم زنخين، 21 حفيد عنا وكلهم ازنخ من بعض.
#ما ازكى شعر البنات، وصوت العرباية بذكرني بالطفولة.
# حتى انا كنت بالجامعة ( شقفة وحدة) وجدية في المشي، ما عمري سمعت تعليق بس بتخيل انه اكيد حدا حكا عني ورا ظهري.
# بالنسبة للاجتماعية، انا بقبل عالناس بسهولة وحتى من اول مرة بس ما الي طولة بال عالعلاقات والزيارات والمناسبات
# عالم التدوين عالم رائع، بيكفي انك بتلاقي اللي بيشابه فكرك وبيناقشك وبيفهم عليك.

استمتعت بالقراءة، يعطيك العافية وتصبحي على خير

 

مع اني مش حابب اعلق و الكيبورد بعيد و الضو مطفي و انا مش شاطر بالطباعة بالعربي كتير و بالتالي ما راج اشوف الكيبورد مليح ،بس لانك بتحبي الكومنتس هيني كتبتلك كومنتس يلااا انبسطي

 

بما انك كشفتي سرك انك بتحبي التعليق على مدونتك فأنا سوف أعلق عشان تفرحي :)ـ
انا كمان بمشي بسرعه وأكثر شيء يقهرني لما حد يمشي قدامي كسدره (ببطء). وعلى فكره الرسول صلى الله عليه وسلم كان من صفة مشيته انها سريعه. فمشيتك هي الصح واللي بمشي بطيء هو الغلط:)ـ

 

يا لهوي يا لهوي *_*
إسمي مكتوب,,

بتكرمي ويسبره,, رح بعمل الواجب
بس عند التصليح بدي علامه كامله من هلأ

 

Nissan

اهلا وسهلا بنيسانة المدونين :)

لا انا ببحبش بالترتيب من القديم للجديد :) اللي عليك عليك

انا ما بتفرق عندي نافخ مكرمش كلّه زاكي

ما شاء الله عليكيشهرين و صار في عندك انتشار منيح فأكيد راح تصمدي ان شاء الله:)

الله يسعدو قويدر, عن طريقة كتير انا تعرفت على ناس بجننو و ناس تعرفو علي :)
بس قبل سنة؟؟؟ طب ليش ما كنتي تعلقي؟؟ :(

انسة كيّاله

ان شاء الله تكوني راضيه عن ادائي يا مس :)

مواقف العرسان اعتقد صارت مع معظم البنات...الله بعينا شو بدنا نعمل :)

الاحفاد بجننووووووو..احنا طاير عقلنا فيهم, 2 و لاخر السنه ان شاء الله بصيرو 4 :)) ما بتتصوري فرحتنا فيهم
الله يخليلكم اياهم يا رب

انا بحب الزيارات لبعض الناس مش للكل, في زيارات من اول 10 دقايق ببدا احكي لماما يلا نرّوح :)

الله يعافيكي, وشكرا الك عالتاج :)

 

Dr.Mohammed

مش حابب تعلق؟؟؟
ماشي ماشي
بس بما انك فرّحت قلبي وعلقت مسامح هالمرّة :)



Jaraad

شكرا الك :)

ليش الكذب...فرحت بصراحه :)

صلى الله على محمد صلى الله عليه وسلم....يا الله شو بكره هالشي انا كمان, والمشكله مرات بتحاول تتعداه وما بعطيك فرصه, المفروض اللي بمشو بطيء يمشو على يمين الرصيف زي السيارات :)

 

Um Omar

اسمك مكتوب وبالعربي كمان :)ومع لينك فما فيكي تحكي ما عرفتي وما شفتي
عليكي واجب صار :)

تسلمي يا قمره...وعلامتين زياده مني كمان :)

 

صباح الخير ويسبر

في كل مره بعد ما أقرألك إدراج بكتشف فيك شغله جديده وأكيد بتكون حلوه :)

اللي لفت انتباهي هاي المره إنك وانت عم بتكتبي عن حالك الاسرار ماحسيت أبدا إني عم بقرأ كلام مكتوب بل على العكس حسيت إنها محادثه وجها لوجه وهادي دلاله على قدرتك الرائعه دائما في إنك تكوني قريبه جدا من اللي عم بتخاطبيهم

مشاء الله عليك وعيني عليك بارده أكيد

يسعد صباحك :)

 

أشرف محيي الدين

صباح الورد أشرف

كل مرّة بتسعدني بتعليقاتك اللي بترفع المعنويات :)

شكرا الك و لكلامك أشرف...بدون مجامله هاد من بعض ما عندكم

صباحك سعيد

 

حقك علي يا قمر...لكن ما كنت افهم كتير بعالم التدوين واستصعب المشاركه
لكن بدون مجامله كنت استمتع كتير بكل شي بتكتبيه واتابعك مع جرائد اليوم

 

هي خلصت الواجب
وما غشيت من حدن بالمره

وين العلامتين والنجمه كمان

 

Nissan

بعرف قصدك لاني انا هيك كنت كمان, قعدت فترة اقرأ المدونات وما فكرت اعلّق

الله يسعدك يا رب...هاد بس من ذوقك بس ان شاء الله كانت مواضيعي تبسطك وما تدايقك زي اخبار الجرايد :$

Um Omar

الله يعطيكي العافيه و الك 5 علامات مش لاني خفت من الاسرار اللي كتبتيهم...لااااا بس علشان عملتي الواجب بسرعه :)

 

looooooooool
ليه كل حدن بيسمع إني بتدرب ع الصيد بخاف مني

يعطيكي العافيه ويسبره,, يجعل نهارك حلو يارب متل ما خليتي نهاري حلو

 

Um Omar

الله يسعد ايامك وكل اوقاتك يا رب :)

وان شاء الله كل ايامك حلوه و عسل زيك

 

هلا ويسبر
مش عارف ع شو أعلق
بس كنت منشكح وانا بقرأ هالآسرار عنك
ما بعرف ليش

ع سيرة الرجل الآلي .. انا زمان كانوا ينادوني بينوكيو اللعبة الخشبية .. لنفس السبب
اني كنت بمشي متل الرجل الآلي
بس تخلصت من العادة
وهيني بمشي عادي وما احلاني

بظن طولت بالحكي .. شكرا الك ويسبر

 

Ahmad Al-mahrouq

ان شاء الله على طول تضلك منشكح :)

انا لهلأ بس انسجم بالمشي برجع لمشيتي القديمه, اشي ما بقدر اغيره بحالي :$

اهلا وسهلا فيك دائما

 

هو بشكل عام كل ما ادخل مدونتك بكون منشكح .. شكرا الك مرة تانية:)

 

:)
لأنه بتحبي التعليقات قلت أعلق
اما عم بتابع مدونتك من جديد
وحبيت إنسانيتك جداً

احتمال أنا أبحبش هلا :))

 

Ahmad

وهالشي بسعدني كتير ...اذا دايما لازم تضلك تزورني :)

ربى حجازي

اهلا وسهلا فيكي :)

وشكرا كتير لذوقك

بحبشي زي ما بدك...خدي راحتك و اكيد بتنوريني :)

 

شفتي انو الأولاد الصغار ما بنطاقو ما أحلاهم بس لما يكونو نايميين

 

اهلين ويسبر :)

انا بصراحة من اشد المعجبين بمدونتك فيها اقبال كبير ماشاء الله تبارك الله خاصة انك من النوع اللي سوالفه فيها وناسه :)
فيني فضول:) خلصتي بحبشة في مدونتي ؟
بما انك تحبين البحبشة >>>حبيت كلمة بحبشة

 

1* نفسك بحب اقرأ جميع الموضيع والتعليقات وردود الافعال بالمدونه انا سويت هيك بمدونتك وكتير بحب سلسله عرسان وياما قرئتهم مره ومرتين وتلاته وعلى فكره القصص الي بتكتبيها مش جديده علي زي ما بتعرفي احنا 6 خوات بالبيت يعني شفنا هيك شوفات بس بحب طريقه عرضك للاحداث الي بتصير ;)

2* انا بحب الصغار بس من بعيد :$

3* انت دايمن بتكتبي عن شعر البنات وانك بتحبيه فهادا الاشي مش سر عشان هيك حتنقصي علامه هههه

4* انا عندي الناس كلها واحد وهل الاشي بخلي الناس اتحبني بسرعه او تكرهني بسرعه اجتماعيه كتير لمن ايكون بالي رايق بس لمن اكون بفكر باشي بصير دمي زنخ وما بتفرجى بالمره

5*وأنا سريعه جدا سؤال اسمعتوا من اكتر من وحده ازا كنت مركبه عجلات بالبوت تبعي ولا لأه اما بالنسبه للمشيه العسكريه هاهاها زكرتيني بحالي ايام الدراسه انا كنت امشي نفس المشيه وعمله مشكله مع بنت عشان قلدتني يالله هديك الايام كانت بضحك بس حلوه كتير :)

6* يا الله ايش بنبصط لمن يجيني تعليق بصير اضحااااااااك وجهي حينمزع من كتر الفرحه حتى ساعات بصير اقرأ التعليق اكتر من مره وبصوت عالي هههه


يالله يا عم انبصطي وهي تعليق كمان
:))

 

1. هاي شغلة حلوه ومعك حق الواحد كلما قرأ ادراجات من المدونه بصير يعرف الكاتب أكتر :)

3. أنا بحب الحلو بس شعر البنات مو كتير صحبه معاه :)

4. أنا متلك بهاي..

5. الحمد لله أيام الجامعة كانو مقتنعين اني مو عربيه :)

7. أنا إلي سنه وشوي بعالم التدوين وبرضو بنبسط لما أشوف تعليق على إدراج من إدرجتي..

 

Ahmad Hamdan

ههههههههههههه

عمري ما توقعت احكيها بس بصراحه...شفت انهم مرات جد ما بنطاقو :)
بس الحق عالام اللي مش عارفه تربي

White freedom

اهلا وسهلا فيكي يا قمر :)

بسعدني كتير كلامك و وجودك يا قمر

بحبشت بس لسا ما خلصت :)

هههههههه حبتك العافيه يا رب

 

Jarat

علشان هيك دايما المدونه بكون نورها زايد, بسبب وجودك يا قمر :)

ما شاء الله, الله يخليكم لبعض, اكيد اذا مش كل الاحداث صارت مع معظم البنات فجزء كبير اكيد صار

اه بتذكر حكيتي بتخافي تحمليهم كأنه :) انا بحبهم من همه صغار, بس اللي مش زنخين :)

لاااااا!!! انا حاكيه من قبل عن شعر البنات...امممم اذا هاد تأكيد عالموضوع :)

ههههههههههه عجبتني مركبه عجلات :) فكرة برضه

اشي بفرح بصراحه :) احلى شعور تلاقي تعليقات

شكرا يا قمر...دائما بتسعديني بوجودك
MonMon

Rula

اهلا وسهلا باحلى قرابه, اللي اشتقنالها وهي بدبي :)

جربيها كتير بتتعرفي على و بتعرفي شخصيه صاحب \صاحبة المدونه

العكس يعني :$
يلا بسيطه مدام 4 زي بعض طلعنا

هههههههه اريح لراسك يفكروكي اجنبيه, واحنا هون ما عنّا عقدة الاجنبي اطلاقا مطلقا....

شكلة مش سر الموضوع و الكل بفرح بالتعليقات :)