Things I Like To Whisper About

Would You Hear Me Whispering

مشاهدات من يومي....2



المشهد الاول

قبل اسبوع تقريبا رحت عملت فحص دم , ما بعرف شو الاجراءات بالزبط, مع اني رحت اكتر من مرة بس ما شاء الله الذاكرة عندي مشطوبه, و انا واقفه بدي اعطى الورق للمرضه اللي قاعده بالاستقبال, في بنت عمرها 15 او 16 اعتقد هي وامها طالعين من الغرفة اللي بياخدو فيها العينات, البنت رافعه عن ايدها و حاطه قطنه وثانيه ايدها وبتشد عالقطنه و الدم معبي القطنه و معبي ايديها و بنقط عالارض, كل القاعدين بالغرفه انصدمو, انا صرت ادور بشنطتي على بلاستر طبي بالعاده بكون معي, الاخت اللي قاعدة عالاستقبال صارت تصرخ عالبنت وتحكيلها " يا حبيبتي ..شوفي كيف الدم بنقط عالارض و احنا هلأ بنمشي عليه و بنروح عالبيت بنمشي ببيوتنا, هاي نجاسه!!!" الكل مصدوم باللي حكته الممرضه, و البنت مش عارفه شو تعمل بحالها و طلعت من الغرفة وللاسف ما لحقت اعطيها البلاستر ولا احكي اشي للمرضه اللي ما بتستحي ولا بتحس بشلن, انقهرت من حالي اكتر اني ضليت ساكته :( او عالقليله قمت مسحت للبنت ايديها و حطيتلها قطنه او فاينه جديده.

اللي دايما بقهرني ان هالعالم اللي زي هالممرضه بحكو عأساس انهم بحكو بالدين, بمسكو بجزء و بتركو كل الاجزاء, نسيو ان الدين المعامله, نسيو انه "لا يؤمن أحدكم حتى يحب لأخيه ما يحب لنفسه" - جد بهزني هالحديث - تخيلو لا يؤمن... لا رحمة ولا شفقه ولا احساس, وبس بطبقو اللي بتناسب مع ظرفهم بهاللحظه, لانه ممكن لو همه كانو بموقف تاني ما يطبق هالجزء برضه.


المشهد التاني

رحت عالصالون وانا هناك اجت وحده هي و ابنها, الام شكلها صغيرة بالعمر والولد عمره تقريبا 4 سنوات,, الولد امور و لبسه بجنن, قعدت الام تستنى تيجي وحده من الكوافيرات تشوف شو بدها ...شوي الولد مصرّ الكوافيرة تاكل من مصاصته :$ و يهديك يرضيك يرضى انها ما بدها و يبكي و يشد على حاله , الام حكتله
"Enough Saif you will drop it on the floor...don't be a naughty boy now "
وبالاكسنت الامريكيه الصح :) الولد قعد عجنب و هو زعلان, شوي بدو شيبس, وصار يبكي و يصرخ

"Ok I'll give you some but you have to promise me to set and be a good boy mashee"

قعد شوي وبعدين مسك موبايل الكوافيره عن الطاوله وبدا يلعب فيه, الكوافيره المسكينه انصدمت و بدها تاخده منه صار يهرب ويضحك وهي تلحق وراه, والام طبعا شو اتطلعت عليه نظره عتب و حكتله " هيك مامي...شو عيب..نوتي بوي سيف "
انا بهاي اللحظه بصراحه ولأول مره حسيت اني مش طايقه طفل :$ جد مش طايقته ومش طايقه اضحك بوجهه وهو بعمل حركات من ورا المرايه

الام بدها تصبغ شعرها, الولد صار يتزانخ هب وقّع الصبغه عالارض, الكوافيرة المسكينه طبعا بدها رضى الزبون, حكتلها بسيطه و مسحت اللي وقع و راحت جابت وحده جديده, قامت الام و نتشت الولد, نتشت لانه فجأه صار بأيدها ومرفوع عن الارض, حكتله

" walak ya 7awan ro7 2ngale3 w 2og3od honak w bedeesh 2asma3 nafasak "

انا نزل علي الضحك و الكوافيره اللي معي مش قادرة تمسك حالها و حاولنا ما نبين حفاظا على مشاعر هالمسكين
بس ليش التمثيل و الأنزعه هاي من اولها احكيلو كلمتين بالعقل و بكل هدوء و خليه يقعد وياكل اكلاته وخلصت خلصنا :)




26 التعليقات :

اول مشهد,, متله متايل بهالبلد,, المفروض انه الصبيه تضلها ع كرسي التمريض عبيل مايقطع الدم,, وازا كانت كميه الدم كبيره,, بيعطوها كاسه عصير برتقال ت ما تدوخ وهيه ومروحه


المشهد التاني
لووووووووووووول
كيف تدرجت من امريكن اكسنت ل" إنجلع"
حسستني إنها شي مهم ف البلد

 

أحزنني اول موقف
وذكرني بممرضات المراكز الصحية بعيدا عن العاصمة , بتكون مفكرة حالها بروفيسورة او اشي زي هيك , بتلاخم بهالمراجعين ملاخمة , وبترافس فيهم
ولما ييجي حدا يشكي عالاذاعة , بنط مدير الصحة بقول هاي ممارسات فردية وما بتعكس الواقع
واقع اللي يتعبطك يا شيخ

بالمقابل
انا قاعد مع
client
حاليا باجتماع
, وكنت بدي افرط ضحك رسميييييييييي لما قرأت الموقف الثاني

انه قرف يقرفك فوق ما انتي مقرفة , ما دام الفاظك مسقعة زي وجهك , ليش سقتي فيها انك مارثا ستيوارت من اول
ونوتي ومش نوتي وباد بوي

باد بوي اللي يشيلك انتي الثانية بعيد عن السامعين

يسعد مساكي همسة
:D

 

يعني ما أحلا تدينها للممرضة مكينة كثير خايفة عالنظافة ونست أنك تساعد أخيك حق عليك, فعلا في ناس ما تستحق وظيفتها لانو في أفضل منها هما اللي بستهالوها

-بالنسبة للولد الصغير فيبدو انو الأم تعتقد أنو الأطفال في هالسن بستمعو للمنطق من أول مرة ما بتعرف انهم مع الصراخ بيلبدو في محلهم وما بتمسع نفسهم(أسلوب ناجح على الرغم من أنو غير منطقي) بس شو بالنسبة انها مستحية تحكي مع ابنها بالعربي من أولها ولا هاي العنجهية اللي مرمية على الشعب عنا ما راح يبطلوها

 

مساء الفل
المشهد الاول...يعني الدم بيشرشر من تياستهم وكمان بيسمعوها كلام...هي غزة ابره وللا ضربة موس؟؟؟
كتير مواقف بتصير قدامي وبكون افكر انو دخلني وللا ما دخلني حتى احكي...وبتروح الشغله وانا عم افكر....بعدها بندم لاني ما حكيت
مشهد القرد...اااااخ من حركات الستات
يعني عارفه القرد ما بيمشي معه نوووتي وماااامي...من الاول كان اقمعيه:).مساء الياسمين
والدنيا كتير شوب ومش طايقه انام عشان هيك جايه ابحبش

 

المشهد الأول جد بيقهر... بس والله في كتير ناس متل هيك شغل "اتفلسف" بس على "فاشوشة".

اما المشهد التاني فجد ما قدرت امشك حالي من الضحك لما قرأته. انه ذكرتيني بكتيييييير مواقف متل هيك شغل "شوفوني يا ناس.

 

حلوه بس لا تعيديها :)

 

الحق معك
يصادف أحدنا مواقف صارخة من القسوة نفسها تقبها والصمت عليها.
أنا أميل للصراخ في الشخص اللي مايحشم ولا يخاف.
الممرضة على الأرجح تحتاج لدرس أو دورة تكوينية للتعامل مع الناس..لانه على الارجح خضعت لدورة تكوينية لمواجهة هيك مواقف، ستكون مألوفة ف عملها.
انا بطلت ادي دمي لأن المستشفيات والموجودين فيها غير متأمن ليهم هلى صحتنا و مصلحتنا..
وفي هيك مواقف السكوت الجماعي قد يكون موافقة لاوعية للشخص المخطئ، وبالتالي يكرر تصرفه ف اول فرصة..



بالنسبة للقطة الثانية
المجتمع كله صور هناك
التربية ، الأمهات اللي دللوا امراء وفلذات كبدهم اللي طلعوا فوق ريوسنا من شدة استهتارهم وقلة مسؤوليتهم اللي مفروض يحسوا بها ، متعلمينها من اسرهم من بيوتهم.
تصرف هذا الطفل الام وحدها من يرجع لها
خيار وقفه
لأنه لن يصغي لاحد غيرها، ولأنه يغيظها هي دوناً عن غيرها في المقام الأول.
وهذه السيدة لم تنفعها عجرفتها أمام العالم .
ان شاء الله تتواضع اكثر من هيك

 

ع فكرة
انا هلق موعد السحب والاضافة تبعي
والموقع ماشالله عليه
مش قابل يضحك
ومسموم بدني
بس لما دخلت عندك وقرأت المشهد التاني فرطت ضحك

بس عنجد لشو التصنع من الاساس؟؟؟
والحق على الام ما كان لازم تاخد ابنها معها ع هيك اماكن

تقبلي تحياتي

 

هههههههههههههههه انا اذا حصل لي طفل مثل هذا الطفل بستجن لاني وحده مثلك احب الاطفال بجنووووون بس في المشاغبه ابعد عنهم :)

والموقف اللي حصل للبنت والله حرام مسكينه يمكنها راحت البيت وقعدت تبكي من الاحراج .. المفروض تراعي مشاعر البنت
كسرت خاطري ودي اروح اضمها :) لانها انحرجت بس غصبا عنها
يعني اللي في الاستقبال مالقت احد تحط حرتها فيه غير البنت المسكينه ؟
هي لو انها بنتها ماقالت لها الكلام معروف هذا الشي اللي من اهلك ماترضى احد يهينه واللي غريب عادي
ولا كأننا مسلمين يعني المفروض نراعي المشاعر وهذي من صفات المسلم

قهرتني والله موظفة الاستقبال

 

الموقف الاول جد بعصب انا مكانك عن جد كنت انقهرت من هادي الموظفه بس لا تدايقي انشالله البنت الصغيره بتكون امها انتبهت عليها وبعدين عادي انتي من الخضه على البنت الصغيره وانك بدوري على البلاستر وما لحقتي تعطيها اياه تركتك بلحظه الدهشه عشان هيك ما عرفتي تحكي مع الموظفه الله ايسامحها بس :(
عن جد في ناس كتير بتحكي بمنطلق الدين بياخدو الدين من غير ما يفكرو بالمعنى الصحيح بس بطبقوا وهل الاشي باكدلي انهم
They are follower NOT believer

الموققف التاني بفطس من الضحك مش من الولد لاه من رده الفعل تبعتك هههه بس الصراحه عن جد مشاغب هالولد بشكل مش طبيعي ابن صحبتي هيك مشاغب مره اخد بكله شعري وامو الي هيا صحبتي ما عمله اشي وانا احكي بالزوق للولد جيب البكله وهوا مش راضي حكيت ايوااا يعني اجناك بالزوق وما بدك ترد طيب تعال ولك شكلك بدك كتله هات البكله احسلك واطلع من خلقتي مش ناقصه الك هههه ناس ما بتيجي الا بالعين الحمرا

 

المشهد الأول؛
حسبي الله.. هاي حرام فيها لقب الممرضة..
وسبر هادا انتي زي أنا دائماً بمحفزطي بكون في بنادول وبلاستر وستريبسلز :)

الموقف الثاني؛
لازم العرط يعني.. بس ساعة الجد ببان المعدن الأصلي تاع الناس.. على قول ماما الطبع غلب التطبع :)

 

بالنسبة للمشهد الاول، عادي في عنا منه كثييير ناس خسارة فيها وظيفتها وهي على شو ممرضة ما تقوم وتساعدها، والله عجايب!!
بس لفت انتباهي كلامك عن انه الدين معاملة والله صحيح فيه ناس بتعطي حالها الحق تحكي عن الدين وهي بعيدة عنه سفر سنة. الواحد منهم - لما يعتقد انه عنده دين - بيصير يشوف غيره باستقذار وفوقية وكانه احسن منهم.

وبالنسبة للمشهد الثاني، كثير عادي فيه من هالولاد الزنخين كثير مروا علي بحياتي وسبق وحكيتلك انه عنا احفاد كتير ما شاالله فيه منهم زي هالنمرة.

بس احلى شي الام، صحيح انه احنا شعب بيعتاش عالمظاهر، حتى لسانها معووج من عشق المظاهر، بس الحمدلله كل شيئن انكشف وبان.

تصبحي على خير

 

اول اشي بحييكي على الصيدلية اللي انت حاملاها بالشنطة :)))

و بعدين طيب مهو هاد غلطهم ، يعني اذا هاي و غزة ابره كيف لو بدهم يعملو اشي محرز؟ كان الواحد نزف وحدتين دم ، و بعدين انت ما طمنتينا انت سحبت دم و لا لأ ؟ شو صار فيكي يعني؟

بالنسبة للموقف التاني عن جد انا اكره علي التصنع و الأنزعه و الفشخرة و التصنع و ....مش عارف ما ضل كلمات ، هاد اشي مقرف و مقزز و بصراحة اذا هاد الموقف صار قدامي هاد الشخص بنزل من عيني و بستحقرو رسمي ،

طبعا هاد غير اللي بكونو بحكو نص عربي نص انجليزي يا خيبتي بس

 

بعتذر لان كل التعليقات القديمه راحت :(
من الصبح المدونه مش راضيه تشتغل فرجعت قمت الدومين ورجعت للاسم القديم قصص طرمه :)

www.2esas6arma.blogspot.com

 

:)))
بينو التعليقات

Um Omar

المشكله انها ولا حاسة, زعلانه على حالها بس :$ يعني مش مشكله دمها للبنت يتصفى بعيد الشر, المهم انها مش هون و ما توسخ الارض
الله يهديهم و يهدينا هالعالم

المشهد التاني تحشيييييييييش بالعافيه لمسكت حالي :))

LUNAR


انا موظفه حكومه و ما بنكر ان في موظفين وموظفات حكومه بدهم حرق, كأنه المراجعين جايين بدهم اشي من دار ابوهم, مش انه شغلك تخدم هالعالم لأ

المشكله مرات بتكون بنفس الناس, بالمقابلات ما بشكو من اشي, وبالعكس بصيرو يشكرو و يحكو اشياء منيحه ومش موجوده :$


هههههههههههه جد
قرف يقرفك فوق ما انتي مقرفة ,زلت اهلنا انجليزي و بعدين بينت واقعها :)

مساء الفل :)

 

المشهد الاول

يعني مش عارفة شو بدي احكي على هيك ناس فقدو الاحساس

المشهد التاني
ههههههههههه
عنجد مش طبيعي
كائنات حية مضحكة
بكره هدول الناس لانهم بمسخوا ولادهم مسخ
بكونوا بالانجليزي منيح ولا بالعربي منيح
بطلع الولد مفصوم
الله يجيرنا منهم

 

Ahmad Hamdan

يا الله شو بكرهم هدول اللي بطبقو جزء من الدين على مزاجهم بس و المشكله انها المفروض ملاك رحمة هالممرضه :$

الموضوع ان الولد مش متعود على امه
تحكي معه بهدوء لهيك ما رد

ولما حكت معه بلغتهم وطريقتهم المتعودين عليها فهم و جلّس على طول :)

عنجهية فارغه وعدم ثقه بالنفس هاي, وهيها بالاخر انكشفت و انكسفت

Nissan

يا مسا الورد على نيسانة المدونين :)


شفتي بالله عليكي, شكلهم مدمرينها للمسكينه ولقوها ساكته ما بتحكي قامو استغلو الفرصه و طلعو امراضهم عليها :(

جد انقهرت اني ما عملت اشي, عالقليله لو ما حكيت للمرضه اشي اعمل شي للبنت و لدمها النازل عالارض :$

هههههههههههه عجبتني اقمعيه...وهي قمعته بالاخر و ضلو قاعد و ولا نفس :)

 

Fazlakat

واللي قهرني ان لا انا ولا البنت او امها او اي حد حكالها كلمة تفهمها غلطها...كلنا ضلينا ساكتين :$
وهالشي راح يخلي الممرضه ما تفهم ان اللي عملته غلط وممكن تكرره :(


المشكله انها هلكتنا شغل شوفو يا ناس و بس عصبها الولد بينت على حقيقتها :)

Anonymous

ما بوعدك بصراحه :)

Haitham

LOOOOL shofet bellah 3aleek....2eshe men el2a5er elgama3a :)

 

لاتي Lati

اهلا وسهلا فيكي دائما و سعيده بتعليقاتك :)


للاسف واجهت كثير مواقف مماثله من قبل مرات يرزقني الله بالكلام المناسب و ردة الفعل المناسبة و مرات ما بتحرك من مكاني و زي ما حكت نيسان بفكر بالموضوع ولاقرر بكون الموقف انتهى

بدها دورة انسانيه هالممرضه, لان بغض النظر عن مهنتها عالقليلة تكون تتحلى بانسانيه لتستوعب الموقف
الله لا يحوجك لعمل فحوصات ان شاء الله

معك حق, بدللو الاولاد وبخربو اخلاقهم و بعدين بدهم اياهم يكونو مربيين ويسمعو الكلام, اسلوب تربية خطأ اكيد حينتج ولد مش مربى, و المفروض الاب والام يكون الهم نوع من السلطه او السيطره ليسمع كلامهم الطفل

ان شاء الله :)

Ahmad Al-Mahrouq

الحمد لله اللي قدرت ارسم ضحكه على وجهك :)
مواقع الجامعات دايما بتسم البدن :( ان شاء الله تكون زبطت معك و حطيت الجدول اللي بدك اياه

عقدة الانجليزي اللي عمرنا ما حنخلص منها :$
بالزبط, مع انو ممكن ما يكون في حد او مكان تحط ابنها فيه بس عالقليله تنتبهلة شوي مش هيك وهي قاعدة مكانها
اهلا وسهلا فيك :)

 

White Freedom

اول مره بعرف اني ما بطيق المشاغبين, يمكن لانه اول مرة بمر علي زي هيك ولد و يمكن من كرهي لامه ما حبيته :$

الله يعينها و يشفيها, يعني اللي بروح يعمل فحص بكون مريض او تعبان و اجت هالممرضه وزادتها عليها

لا والله مش عادي :( مقهورة من حالي اني ضليت ساكته, والناس مشكلتهم ما بفكرو هيك لو انهم همه اللي كانو بمكان الناس اللي بتعرضو للظلم, لو بفكرو هيك ما حد بتعدى عالتاني

بتقهر وكتير كمان

Jarat

ان شاء الله تكون انتبهتلها و حلت مشكلتها :(
بس برضو كان لازم اعمل شي, مش موقف بصراحه
بكرهم هدول الناس
They are follower NOT believer
عجبتني

ههههههههه جد انصدمت و كل اللي بالصالون انصدمو....بتعرفي بس تمشي فترة هدوء عبارة عن ثواني بس بتحسيها طويله, وانا مش قادره امسك حالي عن الضحك :)

ما بحب بس الامهات ما يتعاملو مع ولادهم ويتركوهم هيك, يعني بكفي انك بتخلي العالم ما تطيق ابنك :$
ولا الك نفس تجامليها ولا تجامليه بتكوني

بدهم عين حمرا :)

 

Rula A.

ملاك رحمة ال...ولا الها دخل بالموضوع
اه طبعا صيديله متنقله شنطتي :)


الطبع مش بس غلبه لا ودمّره كمان...قلبت الام 180 درجه :)

الكيل بمكيالين

بالزبط بدل ما تساعدها وتعمللها اشي بتصرخ عليها :$
الله يهيدهم عالعالم بس يعملو اشي بفكرو حالهم وصلو لقمّة الايمان وما بعرفو ان الطريق طويله و بدها شغل كتير

الله يخليلك اياهم يا رب...ولاد الاخوان لو زنخين بنضلنا بنموت عليهم ليش الحكي :)))

بتعرفي ضروري تحكي انجليزي وانها هيك بتصير واو شو كوول و شو انها مثقفه :$
انكشفن وبان :)

تلاقي الخير يا رب :)

 

Dr.Mohammed

هي بصراحه صيدلية , بلاستر و بندول و دوا تحسس و هاي جين و كولونيا
اشي من الاخر :)

بالزبط...يعني لولا انهم ما عرفو يسحبو دم زي العالم كان ما صار هيك بايد البنت المسكينه, بس مبدأ خدوهم بالصوت شكله :$

اه الحمد لله كانت ايدها خفيفه اللي سحبتلي , بالعاده بتصير ايدي خرائط والوان قوس قزح :$
وطلع عندي نقص سكر و حديد :) بس دمي 13 :))


الانزعه الفارغه ...انا حسيت اني ما طقت الولد من الام :$ جد انها غريبه
بس للاسف في ناس عندهم عقدة الانجليزي وبنبهرو بسرعه بهيك عالم


ربى حجازي

فقدو الاحساس و فقدو الانسانيه :(

ههههههههههههه " كائنات حيّه مضحكه " معك حق :)
هاي نقطه تانيه, فعلا الولد بطلع تايه لا بهاد فالح ولا بهاد فالح :$

امين يا رب العالمين

 

بس شغلة بتضحك صارت معي اليوم ، كنت بدي افوت على موقعك بس كتبتو غلط كتبتو هيك
http://hamasati.com/

شوفي هالموقع شو في ، و الله انا حكيت الله يعوض عليها ويسبر

 

hahahay el mash.had el tani nahfeh loool enno el 6b3 ya3'leb el ta6abbo3 LOOOOL jad nahfeh

el mash.had el awal .. ya3ne jad ma sha2 allah 3ala haik momareda.. bten7sed!!
o hadeek el benet ma 3erfat te7keelha o ENTE LAISH GA3DEH HON?! MA TFEZZE TSHOOFE LEASH EL DAM BENAGET HAIK?!! O TLAGEELEK 7AL!!

 

De.Hohammed

بتعرف اني خفت بس فتح الموقع :$

يعني بعرف انه مش موقعي بس الصوره و اسمه " جرح هكر" والاغنية كلهم دمار :)
جو سسبنس عالاخر

وكمان الاخ حاطط ايميله عأساس الناس تضيفة....

تم" سدح" الموقع..جديده هالكلمة علي :)


Ahmad Merie


الحمد لله على سلامتك....وين هالغيبة
اشتريت سيارة من هون و بطلنا نشوفك من هون :)

الطبع مش بس غلبه و دمره كمان

بالزبط هو كان لازم الام او البنت او حد من القاعدين يحكي اشي
بس للاسف كلنا ضلينا ساكتين :(